مفيش بني ادم اليومين دول مش بيتكلم في السياسة والاقتصاد والصح والغلط
ومفيش واحد في البلد دي معتبرش نفسه اما من الثوار حتي لو من منازلهم .. او من اعداء الثورة اللي رافضينها لكثير من الاسباب .. او من الفلول ..
وانا هنا طبعا افرق بين اعداء الثورة والفلول لاني شايفة بينهم فرق كبير حتي لو الكثير – من الثوار طبعا – شايفين ان عدو الثورة لازم يكون راجل فلول – او ست فلول طبعا
وبما ان الشرعية الثورية فرضت نفسها يعني اذن البني ادم العادي بيفهم – لان رأيه اللي قاله اتفق مع رأي ناس تاني كتير بالتالي قامت الثورة – لاتفاق رواد التحرير علي رأي واحد وبالتالي اجتمعوا هناك عشان يعبروا عن رايهم ..
الثورة – اللي انا في اللحظة دي مش عارفة اهدافها تماما – قامت في يوم ترفض الحاجات الوحشة اياها .. ثم امتدت من رفض الحاجات الوحشة الي رفض الناس الوحشين ومن رفض الناس الوحشين لرفض الحاجات الوحشة والحلوة اللي تخص الناس الوحشين ..
وبما اننا شعب كبييييييييييير اوي – وعلي راي الشخص اياه ده اللي سموه مثقف الثورة.. النظام عندنا سرطاني مش ثعباني .. وبالتدريج اتضح ان الناس الوحشين مش في القصر الرئاسي .. ولا البيت الرئاسي ولا الوزارات بس .. لكن في المحافظات وفي الجهاز الاداري
ولابد يكون كمان – زي ما كان في البيت الرئاسي فساد – يبقي في بيت المحافظ فساد
واللي يمشي الفساد في بيت المحافظ لازم يبقي هو نفسه فاسد
المهم لما فكرت بصيت لقيت الوحاشة اياها سرطانية صحيح زي ما قال صاحبنا اياه ..
وانا شغالة في مدرسة – بدراعي – فيه فساد طبعا بسيط وصغنون علي قدنا - ماحنا براغيت – وكل برغوت علي قد دمه .. انما فيه فساد وفيه دفتر حضور وانصراف ملعوب فيه وفيه ميزانيه ملعوب فيها – يمكن انا شخصيا اكون فاسدة
لا مش يمكن .. بالتاكيد انا فاسدة
لاني شفت فساد وموقفتوش عند حده
هو انا كنت هقدر لوحدي ؟؟
مش عارفة بس كنت فاسدة طبعا حتي لو انا نفسي سليمة 100%
زي ما شفيق فاسد لانه كان في مؤسسة فاسدة حتي لو كان هو سليم – لحد دلوقتي 100%
مين مننا كدة بربطة المعلم من كبيرها لصغيرها مكنش خلية سرطانية في شبكة الفساد المصرية اللي شربناها مع مية النيل
اكيد شربناها – مفيش حد في البلد مش فاسد او شاهد بعينه فساد يا جماعة – خالص – نهائي
المهم قرأت جملة وسط موضوع بتقول
حدد موقفك – انت مع الثورة ولا من اعدادء الثورة
لو مع الثورة متقولش لا للمليونات (الكريهة من وجهة نظري)
ولو كنت ضد الثورة متهللش لانجازات المليونيات وتقول الله عليكم يا رجالة
ولو كنت فلول استني علينا لما نمسكك .. هنوريك النجوم – في الضهر طبعا
طيب انا مع الثورة .. ومش فلول ..( مع اني كنت ناوية اعمل كارنيه حزب وطني )
ومش عدوة للثورة
اصنف نفسي بأيه؟؟؟؟
بيقولوا – اللي بيقول بلاش مليونيات ونعم للاستقرار ونعم للمجلس العسكري يبقي مش بيفهم - الاغلبية الجاهلة المتخلفة اللي مش فاهمة يعني ايه ثورة ويعني ايه ديمقراطية واللي لا تعرف ولا تعرف ولا تعرف ........... الخ
لما اعرف ان بنت – هنا في السويس اتخطفت الساعة 12 ظهرا بواسطة 2 في تاكسي ومرجعتش لحد دلوقتي من شهر
ولما واحدة تتثبت بمطوة الساعة 4 ظهرا تحت بيتها ويقولها هاتي شنطتك تديهاله من غير كلام من اسبوع
ولما اعرف ان البوليس بيحدد الاماكن اللي بيروح ينقذ الناس منها لو كانت منطقة لبش مش بيروح
ولما اعرف ان السعودية ناشدت مواطنيها يلبسوا سبور عشان المصريين بيهجموا علي اللبس الخليجي ( عشان الفلوس طبعا ..)
وحاجات تانية كتير الكل عارف
ايوة انا من الاغلبية الجاهلة
اللي مالوش كبير يشتريله كبير ..
ايوة البلد لازم تتلم قبل ما نخترع كل يوم مطلب جديد
ايوة البوليس لازم يقوم بدوره الاول قبل ما نشوف ناويين ننتخب مين وننزل نلف نعمل دعايات انتخابية
الا مشفتش واحد من دول اتثبت بمطوة ولا اتسرق ولا عربيته راحت
يا جماعة السرطان لما يكون في الجسم كله بيتعالج مش بيتأصلوه
وبعدين الحتة اللي مش هتخف نستأصلها
لازم نتعالج الاول .. والا هنموت واحنا عاوزين نستاصل كل حتة فيها سرطان
المرض منتشر جدا .. في كل حتة وشارع وبيت
في كل مؤسسة حتي لو كانت قهوة بلدي
وفي الاخر بيقولوا كل ده عشان مصر
مصر امنا كلنا صحيح .. بس ربما مش كلنا بنفهم
وانا رأيي مصر مش امي دلوقتي
مصر بنتي
بنتي وعاوزة اعالجها
