الأربعاء، أكتوبر 01، 2008

( 7 ) محمد سيكو .. من مذكرات نتاوي

-

كان نفسي اوي افهم ازاي الناس بتوع الهاكر بتعمل الهاكر ده

كان نفسي اعرف افتح ايميلات الناس ( محدش يقوللي عيب انا عارفة ) بس كانت رغبة خبيثة

-

ازاي العلم وصل لكدة

-

كنت في يوم علي ICQ - زي العادة

واضافني شخص

وبعد التعارف العادي قاللي انه مهندس كمبيوتر

-

فجاة حسيت بالشيطان ( اللي ديله فيه سهم ده ) فوق راسي

وبيقوللي فرصتك اهي

ثبتيه واعرفي منه موضوع الهاكر

-

بكل براءة سالت

- فيه حاجة كدة اسمها هاكر انت بتفهم فيها ؟

- اه طبعا .. انا شركتي لازم تحارب الحاجات ده وانا واخد فيها دبلومة .

-

( دبلومة كمان .. والله باضت لك في القفص يا كوكو )

( اشتغلي بقي بس برزانة )

-

- وازي يعملوا دبلومات في الحاجات الوحشة دي .. المفروض ميعلموش الناس الحاجات دي خالص
( خبث ايوة بس هدفه علم .. عاوزة اتعلم يا ناس )

-

- مهو لازم تعرفي عدوك عشان تعرفي تحاربيه

- ( طبعا تظاهرت بالاقتناع ) تفتكر اي حد المفروض يبقي عنده فكرة عن الحاجات دي ؟

- طبعا

- امممممممم.. خسارة .. كان نفسي يبقي فيه كورس او حاجة في السويس ممكن ادخلها واعرف .. انا الايميل بتاعي مخترق 100% .

- طيب انا ممكن اعلمك ... ( رقص قلبي فرحا )

- طيب علمني بس ازاي

- بصس انا هبعت لك برنامج وهعلمك عليه .. ابسط حاجة للمبتدئين

- وايه البرنامج ده ( طبعا قلت بهدوء وانا مبسوطة جدا )

- ممكن تعرفي منه اللي بتكلميه بيكلم مين وتطلعي علي جهازه وبياناته وممكن كمان تحرقيله الهارد كله

- وازاي ابعت له البرنامج ( الضحية طبعا )

- عن طريق صورة او اي ملف تبعتيه في الماسنجر .
-

( نسيت اقولكم انه في مرحلة تثبيته قاللي انه بيبني بيت

وبعت لي صورة كدة ملهاش راس من رجلين

وقاللي دي تصميم البيت بتاعي ..

وانا طبعا مفهمتش حاجة بس بقي اللي عاوز من الكلب حاجة ..

قلتله هايل تصميم ممتاز رائع عبقري )

( طيبة مش كدة )

-

حاول يبعت لي البرنامج .. لكن النورتون الله يكرمه رفضه

-

- النورتون رافض يقبل بيقول ده فيروس

- النورتون بيعتبر الملفات دي فيروسات .. اقفلي النورتون

- اقفل النورتون ازاي .. مينفعش .. وابقي من غير انتي فيروس؟

- اقفليه وبعد ما البرنامج يوصل افتحيه تاني .. مش هيحصل حاجة .

( يعني هصدق النورتون ولا اصدق مهندس الكمبيوتر )!!!!!

- قفلت النوتون .. ويارتني ما قفلته

وصل البرنامج

قاللي شغليه .. شغلته

-

بس الحق يتقال ..

لمدة خمس دقايق كدة وراني جهازه والشاشة بتاعته وشوية لعب كدة بتاع عيال صغيرين

يعني افتح السي دي روم واقفلها اشوف مساحة الهارد

-

( نسيت اقول لكم حاجة كمان .. اول الكلام في مرحلة التثبيت قاللي انه في وقت فراغه بيحب يعمل هاكر علي الناس ويبوظ لهم الاجهزة .. بيحس بمتعة في الحكاية دي )

انا عارفة ان النوتون قوي وكان شغال معايا كويس جدا

-

- قلتله اشغل النوتون بقي يا محمد

- لا .. هيوقف البرنامج

- طيب


طبعا انا كنت مبسوطة جدا اني مشيت اول خطوة في طريق الهاكر .. ومر في دماغي حاجات كتير عاوزة اعمله باستخدام العلم العظيم ده
-

( مر خمس دقايق وبعدين الجهاز قفل لوحده وفتح لوحده وقفل لوحده وفتح لوحده )..

( حوالي 6 مرات كدة )

ولا جه في دماغي

-

رحت تممت علي الكهربا والسلوك .. كله تمام

فتحت وفتح معايا لمدة دقيقة كدة وفتحت النوتون وبعد كدة بقي عينك ما تشوف الا النور

-

الجهاز تقريبا انفجر في وشي

100 موقع تقريبا اتفتح .. وشوفت حاجات غريبة جدا والصفحات اللي اتفتحت مش عاوزة تتقفل

-

ولو قفلت صفحة بعد 5 دقايق لما ترضي تتقفل يتفتح معاها 10 غيرها

بس ومواقع مش هقولكم بقي .. من كل الاشكال والالوان .. والجنسيات !!!

-

ادركت في اللحظة دي اني شربت مقلب انما لووووووووووووز

طلع من نافوخي

-

جهازي الحبيب بعافية

طبعا مستحملتش ..

-

ووديته فورا للمعالج وقاللي عندك فيرس قوي اوي

مش فاكرة اسمه ايه عمل باد سيكتور

( كمان باد سيكتور )

-

الله يخرب بيتك يا محمد سيكو

-

ملحوظة : سيكو دي نسبة الي سيكوباتي .. وهي تطلق علي المرضي النفسيين في المعتقد الشعبي

ملحوظة : محمد سيكو بعت رسالة اعتذار بعدها بشهر كدة وقاللي انه مقدرش يقاوم وعاوز يكلمني تاني !!!!!!!!

-

تاني ايه يا عم .. الله يسهل لك

( جتكم القرف ماليتوا البلد )

--

هناك 106 تعليقات:

حسن حنفى يقول...

ههههههههه

مش هقل من حفر حفره لاخيه

بس كل سنه وحضرتك طيبه

وبالف صحه وسلامه

:d

تحياتي

مهندس مصري يقول...

هههههههههههههههه
تستاهلي
آخرة الشر وحشة
و بعدين اللي عايز يهزر ما يحرقش للتاني الهارد

حصل خير
:)

كل سنة و انتي طيبة

romansy يقول...

صحيح ملوا البلد

والله بجد دمك خفيف
بس دا عشان متلعبيش بالنار

على العموم كل سنه وانتى طيبه
وعيد سعيد عليكى وعلينا
مدونتك رائعه

afew good men يقول...

كوشي كل سنة وانتي طيبة

عموما الموضوع عجبني بس علي فكرة لو حبيتي تتعلمي المووع دا ياريتي تتعلمي دوس كويس وتشتغلي من علي الدوس وبلاش برامج الهاكر الجاهزة لانها عبارة عن ملفات تجسس وملفات
فيروساتا لكن البرنامج بصراحة للمبتدأيين وسهل جدا وعندي نسخة منه
لو عايزة تتعلمي

بس اوعي تنزليها في مزكرات نتاوي

تحياتي ليكي

واوعي تنسي تعمللي ابديت للنورتون

Habiba يقول...

كل مقلب وانت طيبه ياكوشيا
وكل سنه وانتى طيبه
وكل عيد وانتى طيبه

ماتزعليش مفيش حد بيتعلم بالساهل

Miss. Sosa يقول...

ههههههههه

التعليم مش بالساهل يا شابة :D

بس هو عموما كل برامج الهاكينج ماهي الا فايروسات وتروجان هورسز
والهاكرز نفسهم الايبهات بتاعتهم بتبقي انفيكتد او مصابة و بكدا من السهل يقعوا فريسة سهلة لاي هاكر
وطباخ السم لازم يدوقوه

وبلاش تلعبي بالنار يا سمارة :D

وكل سنة وانتي طيبة وبكل صحة وخير وسعادة

قلب ينبض لله يقول...

جت سليمة الحمد لله
وخلي بالك المرة الجايه

كل سنة وأنتي طيبه
:)

نعكشة يقول...

ههههههههههههههههههههههههههههههههههههههههههههههههههههههههه

والله انكي لَسكر

اضحكتيني يا عسلية

كل سنة وانتي طيبة

و ربنا يعافينا من شر الهاكرين

ولا مش فارقة انا جهازي بيودع اصلا

:D

سلام يا قمراية

rovy يقول...

كل سنه وانتى طيبه و عيد سعيد يارب عليكى و علينا كلنا و على كل الأمه ..

اطيب امنياتى

تحياتى

هانى زينهم يقول...

ان كان ع الجهاز فهيتعدل ما فيش مشكلة فى ده انما اللى انا مستغربله الثقة اللى انت حطتيها فى حد اتعرفت عليه من النت وقبلتى منه برنامج وانت عارفة ان هوايته تبويظ الاجهزة حتى لو كان مهندس كمبيوتر ؟!
ده الدرس الحقيقى اللى باشكرك انك علمتيه للناس ." ليس كل ما يلمع ذهبا "
كل سنة وانت طيبة.

وميض ابتسامة يقول...

دى آخرة الفضول
ده انا لما اشوف اى رسالة من اى شخص انا معرفوش ببقى متردد فى فتحهاوغالبا لا افتحها...

لكن انت معذورة الاخ سيكو ده منه لله عمل معاك واجب جامد قوى وبالرغم من حرصك رفعت عنك النورتون وده بسبب الرغبة فى المعرفة ...!!!

بصراحة مقلب سخيف جدا ... بجد سخيف

تحياتى وعيد سعيد عليك وعلينا وعلى امة محمد(صلى)

ليكوريكا يقول...

ههههههههه

كل فيروس وانتي طيبه

وعيد سعيد عليكي وعلي الكمبيوتر باذن الله

ليكورريكا

محمود حسن العدل يقول...

هههههههههههههههههههههههههه
انتى عارفة
سيبك من البرامج اللى ممكن يرفضها الانتى فيرس واوعى توقفى الانتى فيرس على شان برنامج لان برامج التجسس ممكن تفضل على الجهاز حتى لو نزلتى 100 نسخة
اللى انتى بتحكية دة اللى هيا الصورة دى عبارة عن ملف بصيغة الصورة بيبعتة على جهازك واول ماتستلمة الضحية اصبح جهازك ملك لية هو دا اذا كان مح-ترف ولو كان خيبة هاياذى جهازك بعبطة
..
عزيزتى فى خافاية فى نسخة الويندوز اكسى بى بتعمل الحاجات دى كلها .
تاخدى بيها اميل اى حد مهعماان كان
وتكلمى ناس انتى مش مضافة عندهم وتهاكرى على ناس وكتير وكتير
بدون برامج
تحياتى اخوكى / محمود حسن العدل

الفارس الملثم يقول...

حاجه غريبه اوي انه هو يلاقي متعه كده في ايذاء الاخرين ..

طبعا بيقولك الفضول هو اللي قتل القطه هههههههه

علي فكره كلنا جوانا الفضول ده , عامله زي حكاية الباب المغلق او اشبه باسطورة بندورا

بس انتي واضح بتثقي في الناس بسرعه وده خطأ قاتل خاصة انك متعرفيش اوي الشخص ده ..

علي اي حال الانسان بيتعلم من تجاربه

كل سنه وانتي طيبه

maha zein يقول...

يا ابن الايه يا سيكو
ده طلع شرفنطح
الجدع ده تمام
وكله براءة
عموما
حصل خير
واوعاكي فعلا تقبلي اي فايل من حد نتي شكة في امره
وبقولك ايه
ناوليني ميل سيكو ده
الرادل ده لاازم يعلمني الهاكر
هههههههههههههههههه

الازهرى يقول...

dear kochia

انا جاى اعيد عليك لقيت الحكاية دى

قالوا قديما
من حفر حفرة لاخيه اوقعه الله فيها

وكمان قالوا
لا يلدغ المؤمن من جحر مرتين

فاحترسى
وبلاش الشيطان والعابه مرة تانية يمكن يدمر الذاكرة كلها ويبقى رحنا فى داهية

كل سنة وانت طيبة وعاقلة

تحياتى

هــــــــــــايدي يقول...

السلام عليكم ورحـــــــــ الله ـه وبركاته

ههههههههههههههههههههههههههههههههه
انا قولت انك فهمتى لما النوترن رفضه وكمان هو قالك انه بيحب يعمل هكر

بس مش بيقع الا الشاطر

وكل مره وانتى طيبه

بالحق
عيد مبارك عليكى

ahmed_k يقول...

هههههههههههههه
شربتي المقلب
وأنا اللي بقول عليكي واعيه هههههه
ده بيقولك أنه بيستمتع بالأذى ده
فبالتأكيد إستمتاعه حيزيد لما يأذيكي وكأنه بيعلمك
وعلى فكره اللي زي ده مش ممكن يعلم حد إسلوب أذيته لغيره
ده سر المهنه
مش كدا ولا أييييييييييييييييه

ahmed_k يقول...

أسأل الله
أن يعطيك أطيب ما في الدنيا محبة الله
وأن يريك أفضل ما في الجنه رؤية الله
وأن يجمعك بأفضل خلقه رسول الله
وأن ينفعك بأنفع الكتب كتاب الله
وكل عام وأنتم بخير
عيد سعيد

اجندا حمرا يقول...

قدر و لطف ياكوتشيا

ماحدش بيتعلم ببلاش
انا من كتر اللي سمعته و عشان حصل معايا قبل كده موقف مشابه بس كان مجرد ملف فتحته و بوظلي الجهاز فحرمت اني استقبل اي ملفات من اي حد مش واثقه فيه انتي عارفه اذيه الناس بقت تسليه عند بعض الناس
عارفه اللي يغيظ ياكوتشيا ايه؟لما ادخل منتديات و ادخل في سيكشين الهاكرز و تعليم الهاكينج اشوف بيقولوا ايه من بعيد لبعيد الاقيهم بيبتدوا موضوعاتهم ببسم الله الرحمن الرحيم الله المستعان يااخواتي جايبلكم طريقه مجربه لاختراق مواقع و عمل هاكينج عليها و ارجو ان تستخدموها فيما يفيد الاسلام و ضد المواقع الغير اسلاميه
يعني انتم عايزين تسرقوا اي بي هات و تحرقوا هاردات و بتبتدوا ببسم الله الرحمن الرحيم
من غير خشي و لا ادب
للاسف الهاكينج ده من اقذر الحاجات اللي ممكن واحد يعملها في التاني

معلش ياقمر المهم انك بخير و الف حمدلله علي سلامه جهازك و كل سنه و انتي طيبه

صباح الصباح يقول...

هاهاى هاى هاى

شوفتى بقى نيتك اللى مش ولابد ودتك فين

بطلى اذية بقى

ههههههههههههههه

أنا حر يقول...

كل سنة وانت طيبة
علشان تحرمي تحاولي تعملي هاك على حد حرام عليكي يابنتي اتخلصي من الرغبات الشيطانية اللي تودي في داهية دي
بس الحمد لله ربنا ستر معاكي هو صحيح مش قوي بس المهم انه ستر يعني
:)
تحياتي

حنين.. يقول...

انا عارفه ان نيتك كانت طيبه
ههههههههههههههههههههه
انا هموت وحد يعلمنى الهاكر دا من زمان
بس برجع واقول حرام يا نونا
يلا كل مقلب وانتى طووووووووويبه
دمتى سالمه
وخدى باللك بعد كدا

سمر الشافعى يقول...

السؤال المهم

هيا مرحله التثبيت دى مين اللى كان بيثبت مين ياام العريف

ياخايبه بقى حته سيكو لاراح ولا جه حيالله حته مهندس ومعاه دبلومه يشربك المقلب

اقفلى ياكوشيا حاضر

اقبلى ياكوشيا حاضر

شغلى ياكوشيا وماله ياسى محمد انت بس نؤمرنى ياخويا

ههههههههههههه

والنبى مذكراتك دى مفيده جدا بتدسلنا السم فالطعام

او بمعنى اصح الحكمه فالبوست ههههههههههه

وحشانى ياقمر

حـــــدوتـــــة يقول...

السلام عليكم

كل سنة وانتى طيبة وعيد سعيد

مع انى زعلان عشان انتى بقالك فترة مجتيش عندى فى المدونة

سلالالالالالالالالالالالالالالالالالالالالالالالالام

kochia يقول...

حسن حنفى
&&&&&&&
كل سنة وانت طيب
واشكرك علي مرورك

تحياتي

&&&&&&&&&&&&&

kochia يقول...

مهندس مصري
&&&&&&&&&&
والله مكنتش عاوزة اعمل شر اوي بس هو الفضول
معلش بقي جت كدة
كل سنة وانت طيب

تحياتي

&&&&&&&&&&&&&&&&&&&&&&&&

kochia يقول...

romansy
&&&&&&
هو انا حرمت العب بالنار بس بعد كدة بكتير
وكل سنة وانت طيب
واشكرك علي رايك بالمدونة

تحياتي

&&&&&&&&&&&&&&&&&&&&&&&

محمد الكومي يقول...

هههههههههههههههههه

تيجي تصيده يصيدك

و بعدين هو ماعليهوش عيب انتي اللي جيبتيه بنفسك

ايه اللي خلاكي تقفلي النورتون

كل سنة و انتي طيبة

kochia يقول...

afew good men
&&&&&&&&&&
وانت طيب
وانا كنت عاوزة اتعلم من الفضول لانه كان بالنسبة ليا علم جديد
لكن طبعا مش عاوزة اضر حد فعليا ولا عايزة حد يضرني
ونبقي نشوف موضوع الدروس الخصوصية دي

تحياتي

&&&&&&&&&&&&&&&&&&&&&&&&

kochia يقول...

Habiba
&&&&&
وانت طيبة يا حبيبتي
والله اكلت مقالب بجد تتكتب في المذكرات
عشان كدة بكتبها
كل سنة وانتي بكل خير

تحياتي

&&&&&&&&&&&&&&&&&&&&&&&

kochia يقول...

Miss. Sosa
&&&&&&&&
لا مش بالساهل
انا بقيت دكتورة دلوقتي
وعندك حق في حكاية طباخ السم بيدوقه
فعلا دي حقيقة
كل سنة وانتي بكل خير

تحياتي

&&&&&&&&&&&&&&&&&&&&&&

kochia يقول...

قلب ينبض لله
&&&&&&&&&
ايوة جت سليمة المرة دي
ربنا يستر
وكل سنة وانتي بالف خير

تحياتي

&&&&&&&&&&&&&&&&&

kochia يقول...

نعكـــــــشة
&&&&&&&&&
اهلا باشا منوراني
وانتي اللي عسلية والله
وربنا يكفينا شر الاشرار في مكان وزمان

تحياتي

&&&&&&&&&&&&&&&&&&

kochia يقول...

rovy
&&&
وانت طيبة ان شاء الله
واشكرك علي المرور

تحياتي

&&&&&&&&&&&

kochia يقول...

هانى زينهم
&&&&&&&&
فعلا انا مش قصدي من الموضوع الجهاز اللي باظ
لكن هو تصرف مني اولا ومن الاخر
وهو درس انا اتعلمت منه حاجات كتير
بس يمكن ثقة مني في نفسي او ثقة في العالم اني مادام مش شريرة يبقي مفيش حد هيعاملني بشر
هو حقيقة الامر عدم نضج مني
واشكرك علي حكمتك
ليس كل ما يلمع ذهبا
وعلي فكرة .. ادعوك لقراءة الحلقات السابقة من مذكرات نتاوي
واللينكات بتاعتها عي جانب المدونة

تحياتي

&&&&&&&&&&&&&&&&&&&&&&&&

kochia يقول...

وميض ابتسامة
&&&&&&&&&&
هو من جهة عمل واجب عمل واجب
وانا خايفة في يوم يقرا المدونة دي يعرف اني زعلانة منه لا قدر الله يدعي عليا
وهو فعلا مقلب سخيف وفوري
يحسس الانسان قد ايه كان مش شايف قدامه
الحمد لله انها جت علي قد كدة

تحياتي

&&&&&&&&&&&&&&&&&&&&&&

kochia يقول...

ليكوريكا
&&&&&&
وانت طيب ان شاء الله ويحيمك من الفيروسات
والحمد لله الحالة مستقرة لحد دلوقتي

تحياتي

&&&&&&&&&&&&&&&&&&&&&&&

kochia يقول...

محمود حسن العدل
&&&&&&&&&&
يعني تفتكر محمد سيكو شايفني دلوقتي وانا بتكلم عليه ؟؟؟
مانا نزلت يجي 60 نسخة وندوز من ساعتها
ولما انت جامد كدة طيب كنت قولي
جاي تقولي دلوقتي بعد ما اللي حصل حصل والجهاز باظ
علي العموم هشيلك للمرة الجاية

تحياتي

&&&&&&&&&&&&&&&&&&&&&&&&

kochia يقول...

الفارس الملثم
&&&&&&&&&
فعلا فيه ناس بتجد متعة في الايذاء .. ليه مش عارفة
والفضول وحش فعلا
وانا عندي حكايتين تلاتة تاني فضولي فيهم زعلني
بس طبت دلوقتي خااااااااالص
والنظرية يا محمد مش ثقة بسرعة .. انا كنت عاوزة اعرف وتعاميت عن رغبته هو في الايذاء
والحقيقة برده وقتها كنت بثق بسرعة
مش هكدب علي نفسي
بس دلوقتي مش بثق خالص
وعندك حق .. التجارب هي اللي بتعلم الانسان

تحياتي

&&&&&&&&&&&&&&&&&&&&&&

علي محـمــــــد يقول...

السلام عليكم

لالالالا معقوله مانزلت معايدتي !!!
على فكره انا عايدتك امس بس تعليقي مش ظاهر الله يسامح بلوقر.. عموماً كل عام وانتِ ومن تحبين بمليون خير ان شاء الله

في امان الله

kochia يقول...

maha zein
&&&&&&&&
ههههههه
اه كله براءة
وانا حرمت بعدها
ومش بقبل من حد اي حاجة نهائي ولغيت خاصية استقبل الملفات من الماسنجر اصلا
مش كدة احسن

تحياتي

&&&&&&&&&&&&&&&&&&&&&

kochia يقول...

الازهرى
&&&&&
كل سنة وانت طيب
واشكرك علي نصيحتك
وعلي فكرة دي حاجات قديمة حصلت اول ما ابتديت استخدم النت وادعوك لقراءة الحلقات السابقة منها
وانا كاتباها من باب التسلية والعبرة في نفس الوقت

وانا دلوقتي اعقل بكتير من زمان
علي الاقل بحكم السن

تحياتي

&&&&&&&&&&&&&&&&&&&&

kochia يقول...

هــــــــــــايدي
&&&&&&&&&&&&&
بصراحة ساعتها اقنعني
قالي اقفلي النورتون قفلته
يللا التعليم مش ببلاش

تحياتي

&&&&&&&&&&&

kochia يقول...

ahmed_k
&&&&&&
واعية ايه بقي وبتاع ايه
دانا كان شكلي قدام نفسي وحش اوي
وشكلي قدام الراجل اللي صلحه قالي الفيروس ده جالك منيين مقدرتش اقوله اني قفلت النورتون بايدي
وصح ومش هيعلم حد
مهو سيكو بقي

وكل سنة وانت طيب واشكرك علي دعوتك الجميلة
تقبل الله منا صالح الاعمال

تحياتي

&&&&&&&&&&&&&&&&&&&

احمد يقول...

بجد انت حكايه انا باستمتع جدا بحكايات نتاوى
بس الغريبه انك تتمنى حاجه خبيثه تتحقق بسرعه كدة
بجد تحفه رائعه كالعادة

kochia يقول...

اجندا حمرا
&&&&&&
قدر ولطف صح
الحمد لله اني طلعت سليمة من الانفجار
وانا رايي ان الهاكنج ده علم طبيعي ينبثق من الانترنت لانه انفتاح ورغة الانسان في العلم ليس لها حدود
بس حاجة زي كدة لازم يتم التعامل معاها في حدود اخلاقية مش كدة والسلام
وهو بجد يضايق
ربنا يستر علينا
منوراني

تحياتي

&&&&&&&&&&&&&&&&&&&&&

kochia يقول...

صباح الصباح
&&&&&&&&
هههههههههههه
انا نيتي مش ولابد
دانا ملاك

تحياتي

&&&&&&&&&&&&&&&&

kochia يقول...

أنا حر
&&&&&
وانت طيب وبكل خير
انا حرمت الحكاية دي .. بس فيه حاجات تانية محرمتهاش بصراحة
وبعدين هو انا لحقت اعمل
ولا عملت ولا اي حاجة
كان نفسي بس ربنا مش عاوزني ابقي شريرة
وانا كنت هتجسس بس !!!!!!!!!!!!!!
والحمد لله علي كل حال

تحياتي

&&&&&&&&&&&&&&&&&&&&&

kochia يقول...

حنين..
&&&
والله كانت سليمة
كان هدفي اعررررررف
بس معلش بقي
مفيش نصيب
وعلي فكرة ناس كتير حاولت تعلمني بعد كدة بس انا رفضت رفض قاطع
وانت طيبة ان شاء الله

تحياتي

&&&&&&&&&&&&&&&&&&&&

kochia يقول...

سمر الشافعى
&&&&&&
ههههههههههههه
والله عندك حق
الظاهر انا اللي اتثبت تمااااااام
بس متتريقيش قوي كدة لحسن تشرب في يوم مقلب اكبر منه
الارض كروية
المهم ابقي خلي بالك عشان انتي مش هيبقي ليكي حجة
انا مكنتش اعرف
اديني عرفتك اهو وفطنتك
ماشي
منوراني يا قمر

تحياتي

&&&&&&&&&&&&&&&&&&&&&

kochia يقول...

حـــــدوتـــــة
&&&&&&&&&
وانت طيب
وان شاء الله ايانك كلها سعادة
وانا كنت عندك النهاردة وعجبني موضوعك
منور

تحياتي

&&&&&&&&&&&&&&&&&&&&

kochia يقول...

محمد الكومي
&&&&&&
مش عارفة والله ازاي اقفل النورتون
علي فكرة دي بقت طرفة في البيت
اخواتي بيقولولي تقفلي النورتون باديكي
وشكلي بقي وحش وكانت فضيحة
يلا جت سليمة
كل عام وانت بكل خير

تحياتي

&&&&&&&&&&&&&&&&&&&&&

kochia يقول...

علي محـمــــــد
&&&&&&&&
يا سيدي ولا يهمك
واشكرك جدا علي مرورك ومعايدتك
وكل سنة وانت طيب

تحياتي

&&&&&&&&&&&&&&&&&&&

kochia يقول...

احـمـــــد
&&&&&&&
ياريتني لم اتمن حاجة خبيثة
بس نيتي مكنتش وحشة والله
وانا مبسوطة جدا انك استمتعت بالحكاية
واشكرك علي رايك الجميل


تحياتي

&&&&&&&&&&&&&&&&&&

blue-wave يقول...

هههههههههههههههههههههه
معلش بقى
محدش بيتعلم بالساهل

طالب ثانوى يقول...

هههههههههههههههههههة

وانا كمان نفسى والله اتعلم الهاكر دة منلاقيش واحد يعلمنا احانا الاتنين

وكل سنة وانتى طيبة

ojg يقول...

هههههههههههههههههه
اشرب
في حد يقفل النورتون بإيده
ومن الدرس ده نتعلم ايه؟؟
من فحت فحتة لأخية
جاله باد سيكتور فيها

دمك شربات بجد

:)

عبده الرايق يقول...

تن تن تراتنرار
تيييلالا دو
سى رااااااااا دى سوووو

دى موسيقى تصوريه للمشهد الرهيب ده
انا جاى وشايل كفنى على ايدى
ومستعد لتقديم اى اعتذارات
لانى نسيت ارد على تعليقك عندى
سهو والله سهو

اما بالنسبه لتعليقى على البوست
احسن انا فرحان فيكى لانك فى البدايه كانت عندك رغبه تتجسسى على الناس
اشربى بقى
انا هاعلق يافطه كبيره قدام الاسعاف فى وسط الميدان جنب صوره الريس
واقول فيها
بنت السويس كوشيا انضحك عليها يا رداله بالانجليزى
ههههههههههههههههههههههههه
تعيشى وتاخدى غيرها

DR.roro يقول...

انا بقي اتعمل فيا موقف انما ايه لوز

لقيت مرة واحدة كدة ايميلي اتقفل واتبعت رسالة بيقولي انه اتفتح من كمبيوتر تاني مختش في بالي قلت يمكن معلق

وبعديها قلقت قلت لما ادخل أغير الباس ورد دخلت لقيت الصفحة مقفولة


وبعدين لقيت واحد بعتلي اضافة وبيكلمني وانا نفضتله

قوم ايه لقيته بعتلي الباس ورد بتاعي وقالي متحوليش تغيريه عشان لو غيرتيه 100 مرة هغيرهولك


ولقيته بيقولي اللي انتي بتكلميه دلوقتي وحاطط صورة لرمضان ولد ولا بنت (يعني معني كدة انه هو شايف بكلم مين )


قلتله انت مالك, قلي خلصي وقليلي انا مش فضيلك خليني ادور علي حد غيرك


وبعدين قفل وقفلي الايميل بتاعي


حفظت ايميله و ضفته علي ايميل تاني وكلمته قلتله انا عايزة ايميلي قالي لا قلتله ليه قالي أنا حر وضاع الايميل واتقفل حسبي الله ونعم الوكيل

صاحب المضيفة يقول...

مقلب سقع وكويس انك قلتي لنا على المقلب ده


خلي بالك النت ده عالم كبير وواسع وغالبا مش بتبقي عارفه اللي بتكلميه أصلا


كل سنة وانتي طيبة

الملاك يقول...

السلام عليكم ورحمة الله وبركاته
أختى فى الله kochia كل عام وانت بخير واقرب الى الله

انا سعيده جدا بزيارتى لمدونتك بجد مدونة رقيقه جدا تدل على شخصية جميلة بارك الله لكى فيها ونفعنا واياكى بها

اسلوبك فى الكتابة بسيط وجميل ورائع قوى بس بلاش نبحث عن علم ممكن يضر اكتر من انه يفيد ويفتح باب للشيطان
وانت شفتى النتيجة بنفسك اهه هههههههه

حفظك الله اختى من كل سوء وبارك لنا فى تواجدك معنا فى نور الجنة الذى اتمنى له الدوام
تقبلى ارق تحياتى واعذبها

دمتى برعاية الله

semsem يقول...

هههههههههههههههههههه
ههههههههههههههههههههههههههههه
ههههههههههههههههههههه
حته مقلب يا كوشيا
ايه جامد
هههههههههههههههههههه
ههههههههههههههه
يلا معلش
تعيشى وتاخدي غيرها
ههههههههههههههه
سيبك انتى
وحشتينى
وشكل مدونتك حلو اوى ولذيذ
مبروك ياقمر
اسفه انى متابعتش بوستاتك الجديده
بس خلالالالالالالالالاص
هتابع ان شاء الله
يلا
اشوفك على خير
سلام

tarek alghnam يقول...

هههههههههههه
اقولك تستاهلى
لا حرام بس منه لله اى انسان يحب يتجسس على الناس او يضرهم
كل سنه وانتى طيبه
وانا رديت على مشاركتك التى اسعدتنى بمدونتى
اتمنى لك عيد سعيد

kochia يقول...

blue-wave
&&&&&&&
ايوة محدش بيتعلم بالساهل
المهم الحمد لله اتعلمت وربنا كرمني

تحياتي

&&&&&&&&&&&&&&&&&&&&

kochia يقول...

طالب ثانوى
&&&&&&&&
هههههههههههه
لا يا عم
انا خلاص حرمت
اتعلم انت بقي

تحياتي

&&&&&&&&&&&&&

kochia يقول...

ojg
&&&
مش عارفة ازاي اقفل بايدي النورتون
بايدي
بصراحة استاهل
الحد لله علي كدة

تحياتي

&&&&&&&&&&&&&&

kochia يقول...

عبده الرايق
&&&&&&&
هو انا بجد زعلانة
بس المسامح كريم

المهم بقي
انا مكنتش عاوزة اتجسس بس كنت عاوزة اعرف وامتنع بارادتي
وبلاش فضايح بالذات في الاسعاف لان عندي مشاكل في المنطقة دي واحنا معرفة مدونة مش هندخل الاسعاف في الموضوع
ماشي
هعتبره وعد يا عبدة

تحياتي

&&&&&&&&&&&&&&&&&&&&&&&&

kochia يقول...

DR.roro
&&&&&
برة وبعيد برة وبعيد
اكتر حاجة بكرهها الحكاية دي

كان مرة ليا صديق علي النت برده تقريبا اتخانق مع حد
وفجاة لقيت ايميلاته كلها وكان ليه حوالي اربعة ايميلات عندي
مكتوب النك نيم فيها "" لقد تم سرقة ايميل هذا الشخص ولن ترجع حتي يعتذر ""
المهم قاللي كلميه واقنعيه يرجع الايميلات
كنت خايفة جدا بس كلمته طلع ولد في ثانوي ولما صديقي ده كلمه حقر من شانه انه ميقدرش يعمل حاجة بس فعلا الولد قد وقالي فعلا مش هرجعهوله الا لما يعتذر
ورغم المحاولات العديدة لاسترجاع الايميلات لم تفلح
انا طبعا كنت لطيفة جدا مع الولد خفت علي ايميلي بصراحة جدا واحترمته جدا وانا بكلمه

ونتعلم من كدة بقي ان العلم في الراس مش في الكراس
السن مش هو مقياس الجودة
المهم راحت الايميلات ومرجعتش تاني
وانا محظوظة انه مفيش ايميلات من بتاعتي اتسرقت
اهي مواقف وبتحصل

اشكرك علي مرورك
تحياتي

&&&&&&&&&&&&&&&&&&&&&&

kochia يقول...

صاحب المضيفة
&&&&&&
اه مش عارفة
مواقف بايخة وسخيفة
بس للاسف حصلت

اهلا بيك دايما

تحياتي

&&&&&&&&&&&&&&&&&&

kochia يقول...

الملاك
&&&
اهلا بيكي وكل سنة وانتي طيبة
حقيقي البحث عن علم لا ينفع مش مفيد لكن انا اري انه علم ينفع بس يمكن مش ليا انا لان انا مجرد مستخدم
لكن اكيد هناك غيري من يفيده هذا العلم جدا وقد يفيد بلده باكملها

ربنا يستر المرة الجاية ان شاء الله
واشكرك جدا علي رايك في المدونة واتمني وجودك دائما

تحياتي

&&&&&&&&&&&&&&&&&&&&&&

kochia يقول...

semsem
&&&&
اهلا بيكي
وايوة مقلب جامد بصراحة وزعلني فترة طويلة
متتاخريش تاني بقي

تحياتي

&&&&&&&&&&&&&&&&&&&&&&

kochia يقول...

tarek alghnam
&&&&&&&&&
ومشاركتك هي الاخري دائما تسعدني
وعلي فكرة مكنتش اقصد شر
كنت اقصد جدعنة
بس الجدعنة مجتش معايا المرة دي

تحياتي

&&&&&&&&&&&&&&&&&&&&&

احمد اشرف يقول...

هههههههههههههههههههه
تصدقى انا كمان نفسى اعرف اساليب الهكر بس صرفت نظر عن الفكره الواحدى برضه مش مستغنى عن جهازه
تحيـــــــــــــــاتــــــــى

Sherif يقول...

كل سنة وانت طيبة

كل مااملك هو الدعاء بأن يحفظك الله دائما من كل المقالب دى

MaGn0liA... يقول...

اتعلمى عاشان مفيش حد يضحك عليكى

و معلش بقى ما يقع الا الشاطر

كل سنه و انتى طيبه

سلااام

أحمد كمال يقول...

:))
بيني و بينك اللي يعمل كده يستاهل اللي يجرى له ، و أنا عارف إن انتي مش وش كده طبعا :)

* على فكرة أنا مهندس و عندي برنامج كده ، و ممكن أبعته لك على الإيميل :)

فى القلب يقول...

هههههههههههههههه

والله أنا بضحك بقالى ربع ساعه متصله وألى قاعدين حوليا مبتسمين على الأخر من منظرى و أبنى شك فيه وبيقولى هوفيه أيه يا ماما جوه الاكمبيوتر بيضحك كده

ههههههههههه
مش ممكن
يالا خيرها فى غيرها

متعتينى أوىىىىىىى بجد

kochia يقول...

احمد اشرف
&&&&&&
طيب الحمد لله انك صرفت نظر
بس عارف
اي حد ممكن يتعلم اللي يحبه بس عن طريق مشروع
مش زيي كدة من منازلهم

تحياتي

&&&&&&&&&&&&&&&&&&&&&&

kochia يقول...

Sherif
&&&&&
الله يخليك ويكرمك ان شاء الله
كل سنة وانت بكل خير

تحياتي

&&&&&&&&&&&&&&&&

kochia يقول...

MaGn0liA...
&&&&&&&&
ايوة هو الميزة ان محدش يضحك عليا
معلش المرة الجاية مش هتحصل ان شاء الله

تحياتي

&&&&&&&&&&&&&&&&&&&&

kochia يقول...

احمد كمال
&&&&&&
انا مش وش كدة والله
بس يلا بقي

وفكرة انك تبعتلي البرامج دي حلوة جدا والله ومخي زقزق تاني اهو ..
وانت راجل موثوق فيك ومش هتعمل اي حركات سيكو
اي حاجة ممكن حضرتك تبعتهالي طبعا واهو كدة العلم يبقي من مصادر كويسة

منور وتشكر
تحياتي

&&&&&&&&&&&&&&&&&&&&

kochia يقول...

فى القلب
&&&&&&&
ربنا يبسطك علي طول ان شاء الله
ومامادم بقي الحكاية عجبتك ادعوك لقراءة الاجزاء الاسبقة من مذكرات نتاوي
اكيد هتعجبك برده ان شاء الله

تحياتي

&&&&&&&&&&&&&&&

قلب مصرى يقول...

يعنى شربتى المقلب
مع أنه كان واضح قوى إن الحكاية فيها إن بس الفضول وحش قوى
على كل حال حمدا لله على سلامة الجهاز

نهر الحب يقول...

هههههههه
مش هقولك احسن تستاهل
بس بقولك خدى بالك من الناس دى يعنى هو بيتعمل التجسس لية اكيد فى اهداف فى النص مش صح
الحمد لله على سلامة جهازك

funckydoctor يقول...

هههه
كل مقلب لوووووز وانتى بألف خير
بس بجد طيبة قوى ربنا يكرمك :D

¨¨¨°~*§¦§ Appyplanet §¦§*~°¨¨¨ يقول...

هههههههههههههه شوفتى كنتى عاوزه تحفرى حفرة لحد اهو انتى وقعتى فيها انا عمرى ما رضيت اقبل الكلام ده هههههههههههههه
معلش بقى المهم الجهاز كويس بس والله لازم ناخد بالنا
كل سنه وانتى طيبه

صبرني يارب يقول...

هههههههههههههههههههه
كوكو

بتهرجي
حد يعمل كده ؟؟؟

بس انتى شكلك كان نيتك مش تمام

كنتى ناويه تعملي هاكر على مين ؟؟؟

شوفي هى سكه مش صعبه خالص ومافيش اسهل منها ما هى الى برامج وبتشغليها

بس لا تأمني اي حد من الى بيتعاملوا بالبرامج دي لانها فعلا فعلا بتبقى مرض عندهم

تحياتي لك ولدمك الخفيف

kochia يقول...

قلب مصرى
&&&&&&
اه شرب المقلب
يلا بقي
هو كان باين دلوقتي ان فيه ان لكن ساعتها مكنش باين خالص كنت مركزة علي نفسي بس

تحياتي

&&&&&&&&&&&&&&&&&&&&&&&&&

kochia يقول...

نهر الحب
&&&&&
الحمد لله انها جت سليمة
بس انا اتعلمت علي العموم فعلا

تحياتي

&&&&&&&&&&&&&&&&&

kochia يقول...

funckydoctor
&&&&&&&
هو صح مقلب لوز
بس لوز بقشره من اللي بيكسر السنان

تحياتي

&&&&&&&&&&&&&&&&&

kochia يقول...

¨¨¨°~*§¦§ Appyplanet §¦§*~°¨¨¨
&&&&&&&&&&&&&&&&&&
انا دلوقتي باخد بالي
بس ساعتها بس طيش شباب

تحياتي

&&&&&&&&&&&&&&&

kochia يقول...

صبرني يارب
&&&&&
والله مكنتش شريرة اوي
كنت شريرة نص نص بس
وهي مش صعبة وفيه دلوقتي منتديات كتير بتعلم كدة وبتدي البرامح لكن بصراحة مجربتش تاني رغم ان لسة الفضول عندي
بس هاخد العلم من محترفين بقي بعد كدة

تحياتي

&&&&&&&&&&&&&&&&&&&&&&

شيماء الجمال يقول...

ههههههههههههههههههه

أمير البلانكو يقول...

kochia

الاول ميرسي علي زيارتك ليا في مدونتي

ثانيآ : ميرسي أكتر انك عرفتيني المدونه الجميله دي

ثالثآ : بجد انتي شخصيه واضح كدا انها لذيذه أوي وكمان صريحه

من حفر حفره لاخيه وقع فيها

تحياتي ليكي

kochia يقول...

شيماء الجمال
&&&&&&&&
نورتي

تحياتي

&&&&&&&

kochia يقول...

أمير البلانكو
&&&&&&&&&
اشكرك
واهلا بيك دائما

تحياتي

&&&&&&&&&&&&&

norahaty يقول...

السلام عليكم ورحمة الله وبركاته
هو كل من قالك ان مهندز يبقى مهندز
ياحلااااااااااااااااااااااااااااوة
ماكانش حد غلب بس على العموم اهى تجربة تخليك تفكرى الف مليون مرة قبل ما تقبلى اى فيل من حد واتعلت فينا كتير بس مش من اشخاص من الرسايل المفاجئة اللى بتجى دى فى اول ما اتعلمت النت كل ما كان يقولى دوسى ادوس ومافكرش وكانت بتبقى ليلة كوبيه عليا وعلى الجهاز(ربنا يستر)
تدوينة حلوة اوى اوى

kochia يقول...

norahaty
&&&&&&
وعليكم السلام والرحمة
لا بس هو مهندس .. بس مهندس خبيث
وانا ايامها كنت طيبة اوي زيادة عن اللزوم وكنت فاكرة الشرير مش هينكر شره
المهم جت سليمة الحمد لله
اشكرك علي رايك

تحياتي

&&&&&&&&&&&&&&&&&&&&&

Shimaa Gamal يقول...

ده إنت مشيتى الطريق كله يا مسكينة :)
مش كنتى تقولى و أنا أعلمك :)))))))

ربع ضارب يقول...

هههههههههههههههههههههه
حلو اوى المقلب ده يعنى انت كنت عايزة تعملى هاكر على الناس جاه اللى عاملها معاكى صحيح تيجى تصيدوه يصيدك

kochia يقول...

Shimaa Gamal
&&&&&&&&&&&&
اه للاسف
مشيته كله
طيب انا معرفش بقي انك عارفة علميني نفسي اعرف

&&&&&&&&&&&&&&&&&&&

kochia يقول...

ربع ضارب
&&&&&&&
اه للاسف
بس انا حرمت علي العموم اخد حاجة من حد معرفوش

&&&&&&&&&&&&&&&

عالم ماريونت يقول...

ههههههههههههههههههههههه
بجد انا نفسي افهم نفسية الناس دي اية؟

بوست مميز يا كوشيا
:)

kochia يقول...

عالم ماريونت

اشكرك جدا
ومرحبا بكي دائما

غير معرف يقول...

شكرا جزيلا لكتابة هذا ، كان من المفيد unbelieveably وقال لي للطن