الاثنين، أغسطس 04، 2008

(4) الاحـتــــراف ..من مذكرات نتاوي

.
ها قد اشتد عودي واصبحت محترفة في عالم الانترنت
اتعلمت منهم ازاي افتح الشات

واختار منه اسما لاتحدث مع اي شخص عاقل علي هذا الكوكب

اجمل حاجة في الشات ده انه مستحيل

انا استوعبت تقنية التليفون عشان بقت شئ عادي
لكن مش عارفة ازاي السلك بينقل الصوت

طيب الهوا بينقله ازاي؟؟؟

طيب الشات بقي بينقل صوت وصوره في نفس اللحظة ازاي
العلم نوووووور

بس انا راجعت القواعد اياها

مفيش اسم حقيقي ومفيش عنوان حقيقي و ((لا للصدق))
بسم الله ابدأ

وبدأت....

لا ادري لماذا كل من يكلمني من الهند

اين المصريون والعرب ؟

صحيح استطيع تدبر امري جيدا باللغة الانجليزية
ولكني بالطبع اكثر طلاقة وخفة وظرفا باللغة العربية

بس انا شفت صاحبتي ( لما كنت لازقة ليها )
بتتكلم مع عرب ومصريين لما طلبت منها تعلمني الشات

تساءلت ولم اسال

كلمت شخصا هندي يدعي هاري كان ظريف
هندوسي يعبد البقر
وناقشته طبعا في هذا المعتقد
مكنش مقتنع اوي بعبادة البقر
بس مش ممكن يغير دينه لان ده دين وعيب يغيره ،،،

وشخصا يدعي توم ،

واخري اسمها مرجريت انجليزية لكن تعيش في الهند !!!

مش عارفة ايه حكاية الهند معايا

يللا
الهند الهند مش بني ادمين وخلاص
بني ادمين وعفلاء

انا هدفي من الشات استمتع بكوني عالمية
ممكن اكلم اي حد من اي مكان في اي وقت

مر شهران وانا اتحدث الي الهنود
بصراحة زهقت

زهقت منهم ومن البقر اللي بيعبدوه
اختلس النظر الي من يجلس بجواري في السيبر
اجده يتحدث بالعربي

اختلس النظر الي من يجلس يالجهة الاخري
اجدها تتحدث عربي برده .

اشمعني انا !!!

اختي كانت مسافرة في الكلية
وهي رغم انها اصغر ( بــ 9 سنوات ) لكن بدات الانترنت قبلي
وكانت وقتها مركزة في الدراسة
وهي كانت طبعا احدي الصديقتين اللتين استرشدت بهما في خوض غمار هذا العالم

صديقتي الاخري لم تكن معايا هذا اليوم
الذي قررت فيه ان اجد حلا للهنود
واحاول التخلص منهم

طيب اسال مين ؟؟؟؟؟

بكل شجاعة استدعيت الشاب المسؤول عن السيبر وسالته
عاوزة مصريين اجيبهم منين ؟؟؟


نظر لي نظرة غريبة اوي لن انساها
ومسك الماوس

وعمل كليك علي كلمة ( Arab)
كانت موجودة فوق الصفحة
بجوار كلمة (Australia ) ، (America ) ، (middle east)
.

وغيرها

كل مناطق العالم كانت موجودة
انا مش عارفة ليه مشفتش

ليه مبصتش لفوق !!!!

اتاري اننا لازم نختار المنطقة اللي عاوزين نكلم حد منها
بس انا مشفتش حد فيهم بيعمل كدة؟؟!!


بكل بساطة مش ممكن اسماء كل العالم
من يجلسون علي الشات في هذه اللحظة
يكونوا موجودين في لستة واحدة

يمكن حد يقول انا كسلانة ومش عارفة امشي لوحدي
لكن انا بحب اخد العلم الجديد كدة بكرتونته
من اللي بيفهم فيه وبعدين انطلق
يعني من فضلكم محدش يفهمني غلط

كنت ناوية انطلق النهاردة

بس مرحلة الانطلاق الظاهر لسة مجتش

المهم الشاب المسؤل نظر لي نظرة اخري
اثتاء تحميل صفحة العرب
ثم ابتسم ابتسامة خبيثة

انا طبعا لم اسكت
لازم اعمل حاجة
شكلي وحش

.................

ابتسمت له ابتسامة اخبث
وقلت له ارد له الصاع...

طيب تمام
هم هنا يعني ؟؟ ...

حسابي كام ؟
واخدت حقيبتي بكل كبرياء

ومشيت

,,,,,,Kochia
================

هناك 92 تعليقًا:

الفارس الملثم يقول...

هههههههههههه

يعني انتي قعدتي الفتره دي كلها بتكلمي ناس من الهند ومحستيش ان في حاجه غلط

بوست دمه خفيف اوي " ,شهران بتكلمي مع هنود بس " ههههههههه

مستنين التكمله بسرعه

WhItE HeArT يقول...

اولا بعيدا عن موضوع البوست شوية لإني مركزتش فيه اوي لإن بصراحه في جمله حاطاها تحت الصورة سحرتني فعلا جمله جميله قوي بحييكي عليها ميت ألف مرة

اما عن البوست

بصراحه موضوع الشات ده انا كنت مدمن فيها من فترة بس بصراحه حسيت ان في هبل في الموضوع وعدم مصداقيه وشتايم وحاجات تضايق فسبته بس كنت محتار نفسي في ناس اكلمهم يكونو عقلاء وبصراحه ملقتش احسن من الساحه التدوينية


سعيد بااكتشاف مدونتك اما عن الصوت اللي بيتنقل في السلك فده بيتنقل ذبذبات لقن الصوت اصلا عباره عن موجه والسلك يقدر يحمل الموجات

وكويس انك مشيتي وسبتي صاحب السيبر ورديتيلي الابتسامه

تحياتي

appy يقول...

ههههههههههههههههه
طيب ارد اقولك ايه بزمتك مش عارفه هند هند
طيب ايه مفيش اى ريحه بهارات
لا انتى بقيتى متمكنه انا اطمنت عليكى

فارس بلا جواد يقول...

هههههههههههههههههههه
هنود
حظك بقى
بس على فكره فكره الشات دى فكره فاشله وده رايى
تحياتى على البوست المميز ده

مهيج الجماهير يقول...

ههههههههههههههههههههه
هم هنا يعنى ؟
طب حسابى كام ؟
هههههههههههههههههه
لا جامدة
انا زمان كنت شغال فى سيبر
بس عمر ما حد عمل معايا كدة
الله يكون فى عونه
ههههههههههههههههههه
لأ و شهرين بتكلمى هنود بس
ههههههههههههههههه
على فكرة مش قادر امسك نفسى من الضحك
عامة جات سليمة
و اديكى اتعلمتى حاجة جديدة
تحياتى

صاحب المضيفة يقول...

ودفعتي كام بقى في الحساب ؟؟؟

سبهللة يقول...

بعد تجربة شخصية
احسن حاجة ليكى انك تسلى نفسك بمتابعة المدونات والتعليق فيها افضل كتير من الشات

غير معرف يقول...

هههههههههههههههههههههههههه وفين الفيل اللي طلعتى بيه من الهنود عملتيه علي ملوخيه ورقاق ..............



onyx

rara يقول...

ههههههههههههههه
تعيشى وتاخدى غيرها

بطوط حبوب يقول...

هههههههههههههههه

لما تبدأ بهنود تفتكرى هتنتهى بايه؟؟

بوست دمه خفيف اوى

عبده الرايق يقول...

بما انكى من محافظه السويس وانا من محافظه السويس اذن هناك مسافه الاف الاميال بيننا
علشان كده بتأخر فى زيارتك نظرا لطول المسافه وانتى بسم الله مشاء الله عندك تحديث مستمر للتدوينات
لذلك قررت انا الدكاتره عبده الرايق بعد الاطلاع على مواد الدستور
واخذ رأى العلامه حسن باشا الفراش انى ارد على البوست السابق والبوست الحالى شروه واحده توفيرا للنفقات
بالنسبه للبوست السابق
شدنى البوست جامد جدا خصوصا ان الكاتبه انثى فهى تستطيع ان تصف فعلا بنات جنسها
ولكنى اعترض على كون المرأه من الممكن ان تخون من تحب لفرط حبها له
انا ارى ان طبيعه المرأه غير طبيعه الرجل فانتى قلتى ان الرجل من الممكن ان يحب واحده واثنين واكثر وهذا طبيعى حتى ان الدين شرع لنا انه يجوز للرجل ان يتزوج اربعه بشرط ان يعدل بينهم
والله سبحانه وتعالى خلق الرجل ويعرف عنه ما يعرفه الرجل عن نفسه
اذن
انا متفق معكى فى تلك النقطه
ولكنى مختلف معكى فى ان المرأه تخون لفرط حبها اذا جرحها الرجل
المرأه التى تحب لا تخون ابدا لان المرأه ترى الرجل الذى تحبه هى كل غرائزها ولا ترى فى الغرائز سواه
قرأت كتاب منذ فتره طويله مترجم الى العربيه
يرى كاتبه الباحث العلمى وهو رجل ان المرأه فى علاقتها العاطفيه اسمى بكثير من الرجل وانها اذا احبت فعلا وهبت جسدها لرجل واحد فقط وفى بحث اجراه الكاتب عن مجموعه كبيره جدا من النساء كانت النساء المحبات للزوج اندر حالات الخيانه حتى انه اشار الى اجتهاده التام فى البحث عن خائنه محبه
وفى رحلته الشاقه وجد عددا لا يتجاوز اصابع اليد الواحده محبات للزوح وقعن فى الخيانه الزوجيه وكانت لكل منهن ظروفها الخاصه فى هذا المجال قررن جميعهن انهن اقمن تلك العلاقه لمره واحده فقط ولم تعدن اليها مطلقا لشعورهن الشديد بالخجل من الزوج وهو لايعلم شى وندمهن على ما قمن به وعدم استمتاعهن بما قد فعلن
وفى المقابل كانت الحالات الماديه وحالات نقص المتعه وكما اشرتى فى تدوينتك حالات الاهمال من قبل الزوج هى الغالبه بين تلك المجموعات وحتى ان معظم النساء اللاتى قمن بهذه الاعمال لم يردن العوده الى حياه الزوج مره اخرى
شوفى بقى الفرق بين الحاله الاولى والثانيه
واخيرا
اصفق لكى واحييكى واشعر بفخر شديد لابنه السويس على جرأتها وعلى حديثها العلمى المفيد

عبده الرايق يقول...

نو
نو
نو
متقفليش السكه
فى تعليق تانى عن البوست الجديد
بس محتاج اشرب سيجاره
ممعكيش نص جنيه سلف اجيب سيجارتين فرط
من قدم شىء بيداه التقاه
وهنيه لك يا فاعل الخير

عبده الرايق يقول...

هنووووووووووووووود ؟؟؟
شهرين بتتكلمى مع الهنود ؟؟
اكيد بقيتى لبلب فى الهندى
واكيد تعرفى هند رستم وهند صبرى وهند سعيد وهند بنت عمى
طبعا كلهم هنود
واكيد تعرفى سر عمل شوربه التمر هندى
عارفه يا كويشا
انا نفسى اتكلم مع واحد او واحده من اللى بيعبدوا البقر دول
واشوف فعلا مخاخهم زينا كده ولا فيها برسيم
مره اخرى
الف سلام وتحيه لكى
ونصيحه منى
بلاش الشات
الدكاتره عبده الرايق

عبده الرايق يقول...

اه نسيت حاجه
بما ان انتى من ابناء محافظتى الحبيبه السويس
حبيت انى اعرفك اخر انجازات الرايق قبل ان يسمع عنها العالم باسره
وقبل ان تنقلها كل الفضائيات العالميه
بكل فخر
وبكل امتنان وشكر للساده المساعدين للرايق
فقد اتممت حفظ جدول 5
يعنى حافظ لغايه 5 × 12
يلا بقى فرقى شربات لابن بلدك

رئـــــيسـة حزب الأحلام يقول...

هههههههههههههههههههههه
الشات مابيشدنيش اوى لانه على مااعتقد مابيقدمش الصورة الواضحة للاشخاص
تحياتى

كاتب مصري يقول...

جميل قوي صراحتك دي عادي أما نتكلم ع الشات هيجرى ايه يعني
طب أقولك سر
والله العظيم البنت الي أنا بحبها ورحت زرت أهلها في البيت واتعرفت عليهم وتقريبا خطلتها عرفتها من النت محترمة جدا ومؤدبة وبتحبني..مش شرط يبقى الشات كله وحش وبعدين شوية شوية هتتعودي عليه وبكرة تبقي استاذة
كل الود
كاتب مصري

سنووايت يقول...

هههههههههههه
هنود
وبقر

طيب والله كويس
بس كنتي بتتكلمي معاهم ازاي دول
ههههههههههه
بوست دمه خفيف اوي

Two in One يقول...

والله يا كوشيا انا ماعجبنيش غير ردة فعلك على نظرته الخبيثة وانك خدتي شنطتك ودفعتي الحساب

بجد حركة ذكية

اما مسألة الهنود ديه ارزاق :)
وانتى رزقك وقع في الهند على ضهر فيل :)

تحيــاتى كتير
ومستنيين جديدك

egyboy يقول...

ههههههههههههه

حد يكلم الهنود الأيام دى

بغض النظر عن براعه الهنود فى البرمجيات بس اعتقد أنها تجربه جميله

والشات ده أصلا موضوع الكلام فيه كتير اوى

بس عجبتنى الحكايه بتاعت اه هما موجودين الحساب كاااااااام

ذكرتينا بالماضى البعيد

مصطفى

ٍSOU يقول...

شهرين بتكلمى هنود...ماحدش عرض عليكى زيارة للهند و لا اتعملتى الهندى؟؟
دة انتى ضيعتى فرصى عمرك :))

Jana يقول...

أضحك الله سنك يا كوشيا

الراجل فى السايبر اللى نظرلك نظرة عجيبة كنتى ردى عليه بالهندى وقوليله انك مش عارفة انجلش
متقوليش بقى انك شهرين معاهم ومتعلمتيش هندى !!!!!!!!!!!
وهو لما حيعرف انك هندية مش حيستعجب اى حاجة تعمليها بعد كده
شفتى الميزة؟؟
ههههههههههههه

والله ضحكتينى يا كوشيا
ربنا يكرمك يارب
ومش عايزاكى تتفائلى ..اعرف ان الشاتنج مع العرب هو الاسوأ على الاطلاق ..حيث البنت ولد والولد بنت
لكن الهنود على الاقل هنود ومش فارقة بقى
:))

المنسى يقول...

هههههههههههه
جميلة أوى
نتاوى وصل للعالمية ياجدعاااااااان
والله أنا عمرى فى حياتى
رغم إنى بحب النت والقعدة عمرى ما دخلت على الشات
معرفش ليه
مش بحبه خااااااالص

بحب أوى المواقع والمنتديات والمدونات والكلام ده

بس متنسيش إنتى كمان وصلتى لإحتراف الكتابة
أسلوبك لذيذ أوى

خللى بالك من العيال
تحياتى

blue-wave يقول...

بوست خفيف وروعه
تحياتى

مدحت محمد يقول...

ههههههههههههههههههه

تعرفى انا كنت ابتديت اكره النت بسبب الشات ده اصلا الواحد قابل عاهات فيه

بس مش كلهم يانهار ابيض فى ناس كويسة

بس اللى عرفتهم من الساحة التدوينية بس ناس ليها فكر

انتى بقى رايحة تكلمى هنود بيعبدو البقر وتناقشيهم

ده انتى ليكى الجنة يابنتى ههههههههه

دعاء مواجهات يقول...

انا مش هضحك زى الباقيين

بس حقولك
مفيش كدة ذرت شك تسربت إلى أساريرك انهم كلهم هنود يعنى

ربنا يعينك يابنتى

بس من كلامك باين انك عسولة اوى

بس (ياخوفى من اليوم اللى هتندمى فية على اللحظة اللى الولد بتاع السيبر وراكى فيها منين تكلمى العرب )

ولا تعليق..

لو عاوزة تعرفى لية ممكن اقولك عادى يعنى

اصلى خبرة الى حد ما يعنى

بيس ياقمر

موبايلااات بقى..

kochia يقول...

الاخوة الاعزاء
السادة المدونون والمدونات

تحية طيبة وبعد

اولا
احب اشكركم جميعا علي قلقكم عليا من الشات ومخاطره
لاني لاحظت ان الجميع حذرني منه
لكن احب اقول اني دي مذكرات
وارجو اللي مقراش الاجزاء السايقة يقراها
وانا دلوقتي خيرة زي معظمكم الحمد لله
صحيح طلعت منه .. من الشا يعني .. بعاهات بس الحمد لله لسة علي قيد الحياة
ثانيا
اتمني انكم تستمتعوا بالحلقات القادمة

تحياتي

kochia يقول...

الفارس الملثم
==================
الحقيقة ايوة قعدت الفترة دي كلها اكلم هنهود
كلمت كتير
هنود وباكستانيين والناس بتوع المناطق دي
كنت مبسوطة اني بتكلم انجليزي كويس وماشي معايا وقلت اهو تنمية للغة
وكنت برده مكسوفة اسال في الاول

بس دلوقتي بسال من اول لحظة
السؤال مش عيب

والتكملة قادمة ان شاء الله

تحياتي

kochia يقول...

WhItE HeArT
===============
اشكرك علي اعجابك بالجملة المذكورة
وهي فعلا عجبتني اوي وحسيت بيها عشان كدة حطيتها
واتمني ان حد يقراها ويستفيد منها ان شاء الله

اما عن الموضوع
الشات ده فيه كل حاجة
من القديس
الي الماجن

وانا شفت كتير
والموضوعات القادمة هتلاقي فيها ده
مجرد مذكرات لنفسي
وللاخرين علهم يستفيدوا او يستمتعوا
واتمني مرورك دائما

تحياتي

kochia يقول...

appy
==========
مش كدة والنبي
قوللي للناس اللي بتقوللي خلي بالك دي
انا متمكنة جدا
ولو كنت فضلت شوية كمان كنت زماني عايشة في الهند دلوقتي
اكل البقر
مش اعبده طبعا
لا اله الا الله محمد رسول الله

تحياتي

kochia يقول...

فارس بلا جواد
=================
اشكرك
والشات مجرد وسيلة تعارف من اي وسيلة تانية لكن فشله او نجاحه بيعتمد علي هدفك منه

تخياتي

kochia يقول...

مهيج الجماهير
================
هي جت سليمة فعلا الحمد لله
بس ساعات كان بيحصل حاجات تانية كنت بخرج منه باصابة

الحمد لله انا دلوقتي كويسة

تحياتي

kochia يقول...

صاحب المضيفة
==============
تقريبا دفعت نص جنيه
مكنتش كملت ربع ساعة
مانا كنت قررت اتصرف بقي
مش اتصرف اخر القعدة .. لا اول ما دخلت
يللا
كنت علي نياتي بقي ايامها

تحياتي

kochia يقول...

سبهللة
===========
اشكرك علي نصيحتك
بس طبعا صعب اعمل بيها باثر رجعي
لاني قلت ان دي مذكرات

كمان انا دلوقتي بعد خبرتي الحمد لله بعرف اتصرف

تحياتي

kochia يقول...

غير معرف
onyx
=============
الفيل موجود
فيل ابيض صغير
امور اوي
شكلك عاوز تشوفه
بس مش هتقدر تشوفه الا لما تعمل الطقوس
تكلم الهنود شهرين


ومش ارنب عشان اعمله علي ملوخية

تحياتي

kochia يقول...

rara
==========
تعيش يا قمر
انا فعلا اخدت غيرها والحمد لله عايشة

تحياتي

kochia يقول...

بطوط حبوب
==============
اشكرك
ولما تبدا بالهنود مش عارفة تنتهي بايه بصراحة؟؟

ابقي قوللي الله يخليك

تحياتي

kochia يقول...

عبده الرايق
==============
حضرتك منور المدونة والمنطقة اللي ميكروبصاتها بالدور اللي في الموقف وكدة يعني

طبعا كنت احب ان تعليقك علي موضوع الخيانة يجي في موضوع الخيانة لكن طلعا انا مقدرة المواصلات صعبة قد ايه

عشان كدة هرد عليك هنا برده
وكمان هبقي انام شوية بين الموضوع والموضوع عشان تلحق تيجي

زى الهوا يقول...

ايه الاحتراف دا كله , انا جيت فى فترة برده قعدت اتحايل على اخويا يعرفنى اذاى ادخل الشات العام علشان اكلم ألمان , أل ايه كنت عايزة انمى الالمانى بتاعى

اقوم كل شوية الاقى حد بيتكلم المانى جامد , وف الاخر الاقيها معايا فى الكلية , او مثلا من لغات وترجمة , المهم انى دخلت بتاع تلت مرات ,كلمت فيهم مصريين , قوللللللللللت توبة , طب مانا اكلم صحابى بالألمانى بقى وخلاص

بس هقولك نصيحة اخويا قالهالى , قالى انهم عالم هايفة اللى بيدخلوا على الشات دول وعايزين يستهبلوا , وبينى وبينك انا لما فكرت , قولت صحيح ماممكن اوى حد يقولى كلمة مش كويسة , هاعمل ايه , غير انى هاتضايق وهتنرفز , ولا يعنى اتعب نفسى واتنرفز ؟؟؟

kochia يقول...

عبده الرايق تاني
===================
اولا احترم رايك بخصوص اعتراضك علي عدم خيانة المراة من فرط الحب
ولكن
اري ان غاليا خيانة المراة المحبة يكون نادرا او ربما مرة
لكن بتحصل فعلا
والاكثر حدوثا خيانة الزوجة من اجل كرامتها
لكن طبعا احترم الباحث الذب يحث في هذا الموضوع وان كنت انا قرات فقط هو بحث بنفسه
والبحث الانساني لا توجد فيه حقيقة مطلقة
واشكرك علي تعليقك ورايك وارجو متنابعتك دائما

تحياتي

kochia يقول...

عبده بيه الرايق لتالت مرة
=============================
بقيت لبلب في الهندي طبعا
واعرف فعلا الهنود كلهم
لو عاوز تتعرف علي حد منهم قوللي
احنا بلديات واخدمك بعنيااااا

واشكرك علي نصيحتك بس احي اقوللك
انها جت متاخرة
ومالطة مخربتش اوي بس تضررت

قوللي صحيح
بمناسبة جدول 5
انت مدرس رياضيات لا قدر الله؟؟

kochia يقول...

رئـــــيسـة حزب الأحلام
======================
بس بصراحة كان بيشدني
كنت بحس انه عالم غير العالم وناس غير الناس ودنيا غير الدنيا

لكن بعد فترة وبعد التجارب وبعد المقالب
عرفت ان هو العالم وهو الناس وهو الدنيا
لكن التجربة لما بتعلم الانسان مش بينسي اللي اتعلمه ابدا

تحياتي

kochia يقول...

كاتب مصري
==============
اهلا بيك
وانا رايي ان الشا زيه زي اي وسيلة تعارف تانية
واللي بيكدب هنا هيكدب هناك
واللي هيحط علي وشه قناع هنا هيفضل لابسه في كل حتة
الا نسبة قليلة اللي فاكرين انهم عشرين واحد في واحد وكبوتين ومتعقدين واللي عشان كدة بيبوظوا صورة كل حاجة حلوة
علي فكرة
انا اعرف ناس كتير اوي اتعرفوا واتجوزا من النت
واعرف ناس اكتر فشلت
زي الدنيا العادية اللي احنا عايشينها
فيها نجاح وفيها فشل
العبرة في الانسان

تحياتي

kochia يقول...

سنووايت
=============
كنت بتكلم معاهم بلغة الاشارة بتاعة الصم والبكم !!!!!!!!!!!!!1

كنت بتكلم معاهم انجليزي طبعا
ولا عشان بكلمكم هنا عربي مش باين عليا اني اعرف انجليزي ؟؟؟

تابعي بقي
من المرة الجاية عربي وبس
ومصري كمان

تحياتي

kochia يقول...

Two in One
=============
الحمد لله ان عجبك حاجة
اهو يوم ومر عليا في حياتي

الهنود كانوا رزق بس انا رفسته
كانوا زي الفل بس لولا حكاية البقي دي

يللا بقي
نصيب

تحياتي

kochia يقول...

egyboy
============
اهلا بيك مصطفي
وعلي فكرة دي كمان ماضي بس مش بعيد اوي

اشكرك علي مرورك
بس تفتكر كنت هعمل ايه تاني غير الحساب كام ؟
شكلي كان مش هو

تحياتي

kochia يقول...

SOU
========
عرضوا زيارات رايح وزيارات جاي
بس انا كنت بعمل بالقواعد بتاعة الكدب سيد الموقف والتملص من المتطفلين سياسة وكدة
بصراحة
شكلي صح ضيعت فرصة عمري
تفتكر افتح سكة تاني مع الهنود ولا ايه ؟؟؟

تحياتي

kochia يقول...

Jana
=========
صح والله لو كنت رديت هندي كان اتفحم وعرف اني مش قاعدة بلعب
مجتش في دماغي دي خالص

معلشس بقي فرصة وراحت
ان شاء الله الجيات اكتر

تحياتي

kochia يقول...

المنسى
=========
اشكرك
واحب اقوللك تعرفي بالنت كان بدايته شات
ولو قريت الموضوعات السابقة بتاعة مذكرات نتاوي هتعرف

بس طبعا كنت بتعلم وعيوني مفتحة عاوزة تستوعب جديد العالم والتكنولوجيا

تحياتي

kochia يقول...

blue-wave
=============
اشكرك علي رايك
وارجو استمتاعك دائما

تحياتي

kochia يقول...

مدحت محمد
===========
النت ده مش عملة ذات وجهين لكن تقدر تقول زي المكعب له 6 اوجه
ده علي الاقل
والشات وجه من الاوجه دي
وانا كان استفتاحي بالهنود
يمكن عشات اتعلم حاجة
مش عارفة هي ايه بس اكيد مفيش حاجة بتمر كدة علي الانسان

تحياتي

kochia يقول...

دعاء مواجهات
================
هو انا ندمت فعلا انه وراهاني
وكتير قلت مش كنت خلتني اكلم اجانب بس
علي الاقل مش هفهم دوافع الندالة ايه

بس يعني بصراحة زي ما قبلات ناس وحشين بمعني الكلمة
قابلت ناس كويسين بمعني الكلمة

تحياتي

kochia يقول...

زى الهوا
===========
التجارب عديدة وكثيرة بعدد الناس اللي بتعمل شات
يعني القاعدة هنا صعب تتحقق

المهم اخبار الالماني ايه دلوقتي
ان شالله يكون كويس ؟

تحياتي

maha zein يقول...

هو اولا حاجة حلوة انك تتعلمي وكده
بس يا ريت بلاش تشيت عام
يعني يا ريت تشيتي مع حد تعرفيه
انا عرفة انك قصدك تجربي وتشوفي اذاي الدنيا بتمشي
بس احسنلك والله
لان فى مواقف سيئة جدا والله بتحصل في الرومز
خاصة من المصريين والعرب
يمكن الهندوس اكثر احتراما
تحياتي ليكي ولبوستك

فاتيما يقول...

طب إنتى برافو عليكى عملتى دا كله
أنا معرفش الحاجات دى خالص
و بخاف
هنود
مش هنود
صعب قوى أتواصل مع حد مش مصرى و لا عربى بخاف مش عارفة ليه
دنا لولا دخولى عالم المدونات كان عن طريق أشخاص أعرفهم بالإسم مكنتش دخلت و إتكلمت و إتعرفت على ناس حلوة بعد كدا طمنيتنى و خلتنى اخرج من الشرنقة
بس نقول إيه فى الوحدة
تحياتى يا كوشيا من قلبى

عبده الرايق يقول...

ياستى المنطقه اللى ميكروباصاتها بالدور منوره بناسها وانا بهدى لكل المناطق دى الف تحيه وسلام
وهى السماد والمعمل وبورتوفيق والصفا والموقف واكتوبر والعبور والمميز وحوده والسادات
ايه ده احنا كده قلنا نص السويس
طيب سلام كبير قوى للسويس كلها
وسمعنى احلى سلام يابيوت السويس يابيوت مدنتى
اما بالنسبه انى اكون مدرس رياضيات
احب اعرفك انى بعيد تماما عن التعليم
وبعيد تماما عن الرياضيات
مع انى واخد دكتوراه فى الهندسه الفراغيه
والدكتوراه دى كنت ناسيها من كتر الدكتوراهات اللى ماليه القفه تحت السرير عندى
واحب اقولك بكل فخر
انا الرايق عمل رساله الدكتوراه بتاعه الهندسه الفراغيه فى حوالى 2368 صفحه وتمت مناقشاتها مع العبد لله على القهوه ولم تستغرق اكتر من دقيقه واحده
لان اللجنه فتحت الرساله لقيت ال 2368 ورقه فاضيه
قام الواد القهوجى سألنى وقالى
ايه ده الرساله كلها ورق فاضى ؟؟؟؟
قلت له طبعا يابنى مش هندسه فراغيه ؟؟..يبقى لازم تكون الرساله برضه فراغيه
راحت اللجنه كلها برئاسه المعلم على الجزار والمعلم صلاح المكوجى ادوا الرايق الدكتوراه العلميه والفخريه والشرفيه وام حسنيه فى الهندسه الفراغيه للدكاتره عبده الرايق

عروسة ننوسة يقول...

مبروك احترافك للنت والشات بس خلى بالك واستعمله كويس

الطائر الحزين يقول...

ليه ما كنتى تسيبى الشنطة للراجل بتاع السيبر كمان اصلها ناقصة

اوعى تقولى ان صاحب السيبر طلع هندى هو كمان

ربنا يكرمك

سارة علي يقول...

ازيك عاملة اية
انتى دمكخفيف اوى تعرفى انا نفسى اسافر الهند اوى عشان اشوف المناظر الطبيعيةهناك دى امنية حياتى بجد اروح هناك لانى بحس انها بلد ساحرة جدا
بس من افلامهم بحس انهم عكس طبيعة بلادهم الجميلة
تحياتى

احمد يقول...

كمان بتعرفى هنود
انتى فين يابنتى مختفيه ليه
اوعى تكونى سافرتى الهند

Dr- Hema يقول...

الشات ده ليه حكاية معايا انا بدأت حباتى على النت شات وكان من جمبع انحاء العالم

وبوهم نفسى انى هتعرف على ناس وكده

ولكن بعد اسبوع لقيت ان كل ده هجص وملهوش فايدة

فأتجهت للياهو بخدماته التانية من جروبات
\

واصبح عند جروب فيه 8200عضو

وبعدين عملت موقع ومدونة

ولقيت الحاجة المفيدة هى دى النجاح والنت بجد

والتعارف على الناس والإفادة

د/هيما

حبيبـــــــة القمـــــر يقول...

ههههههههههههههههههههههههه
مش ممكن الجمال في المدونه دي
انتي عسل اوووووووووي

شوفي ياقمر انا مستعده اديكي كل المعلومات اللي تجعلك محترفه
على اساس اني ام العريف يعني ههههههههههههههه
شخللي انتي جيبك بس
مش هغرمك كتيير واحده بيبس بس صاروخ هههههههههههه

خلاص اقولك بجد لو محتاجه اي حاجه في الكمبيورر ولا وقف قصادك في مرة قوليلي وانا ان شاء الله اقدر افيدك

ومش هاجي ناحية الهنود مش ناقصه بقر
سبحان الله عقول واقعه بجد

خالص تحياتي ياسكررررررررر

micheal يقول...

هههههههههههه..يا جدعان محدش يتريق علي الهند وكفايع أننا لسه بنقول هو أنت فاكرني هندي
مع أن الهند عنهدا ثاني أقوي صناعة ميكروسوفت بعد أمريكا
تلاقيهم هناك بيقولوا هو أنت فاكرني مصري
:)
المدونة جميلة وشيقة
تحياتي

bastokka طهقانة يقول...

انا كمان من الهند و جيت وراك اقولك مبقتيش تيجي كاتجري الهند ليه الناس هناك بيسالوا عليكي
ههههههههههههههه
اوروفوار

Heart Beat يقول...

انا اول ما بدأت موضوع التشات ده و ايامها بقى كان موضة و كل اما اسأل عن اصحابي يقولوا لي اصلنا مشغولين بنعمل تشات ... قلت انا كمان اشوف ايه المفيد في التشات ده

المهم لما بدأت اتعرف على ناس و اتكلم معاهم اونلاين كانوا كلهم عرب و مصريين من محافظات مصر المختلفة

انا كنت بدور على حد اتكلم معاه انجليزي عشان اقوي اللغة عندي بدل ما انساها ... ما انا بتكلم عربي في البيت و مع اصحابي و كان عندي امل اتعرف على ناس بيتكلموا انجليزي بس ما قابلتش حد بالمواصفات دي و لا حتى هندي زي حالاتك

يعني بالنسبة لي كان الوضع معكوس ... معلش تأتي الرياح بما لا تشتهي السفن

و مع مرور الزمن تطور الامر من تشات الى منتديات ثم الى مدونات و الله اعلم ايه اللي جي بعد كده

خلي بالك من نفسك بس

تحياتي

كاميليا يقول...

هههههههههههههه

هنود؟؟؟

مش كفاية افلامه اللى مقطعة قلوبنا؟

هههههههه

حمد الله على السلامة فى العالم العربى

ولو انى بينى وبينك
مش بكلم حد الا اللى اعرفهم

بوست لذيذ اوى

ربنا يسعدك زى ما ضحكتينى يارب

دمت بكل الخير

kochia يقول...

maha zein
===============
بعد التجارب عرفت فعلا ان الغرف مش كويسة
بس اكيد مكنتش هعرف الا فعلا بالتجربة

تحياتي

kochia يقول...

فاتيما
===========
انا بيكون عندي فضول اني اعرف حاجة جديدة ةبحب اتعلمها
العلم مش بيضر ابدا
لكن طريقة الاستخدام هي اللي بتحدد الصح من الغلط

ومسالة التواصل دي نسبية
يعني ايه مضمون الحوار وهدفه
وبصراحة في الاول كان من ضمن اهدافي تنمية اللغة

ومتهيالي انت دلوقتي غير زمان
بتتعرفي عبر الشاشة علي ناس متعرفهمش ولا عمرك شفتيهم في الحقيقة مش كدة

تحياتي

kochia يقول...

عبده الرايق
================
الحمد لله انك بعيد تماما عن التعليم
رغم انه خسرك طبعا بعد رسالة الهندسة الفراغية جدا دي وواضح انك عبقرية فذة
لكن موضوع جدول 5 ده قلقني حبتين

منورني يا عم الدكاترة

kochia يقول...

عروسة ننوسة
================
انا احترفته من زمان
دي مذكرااااات

تحياتي

kochia يقول...

الطائر الحزين
===============
اسيب الشنطة كمان
مش كفاية اللي حصل للي في السيبر ده
الحمد لله انها جت لحد كدة

تحياتي

kochia يقول...

سارة علي
=============
اشكرك علي رايك
وفعلا الهند بلد جميلة
تفتكري لوكنت استمريت في الكلام الهندي كانت جت لي دعوة للزيارة ؟؟

فاتت الفرصة ولا مكن الحقها تاني
مش عارفة

تحياتي

kochia يقول...

احمد
========
الهنود دول كانوااول من استقبلني
وكانوا مرحلة وخلصت

هندخل بقي علي المصريين وجمالهم من الحلقة الجاية في المذكرات

وانا تحت النظر يا باشا
بس عندي واجب بحله عشان انزله ان شاء الله

تحياتي

kochia يقول...

Dr- Hema
=============
انا برده رايي ان النت كله عمله ذات وجهين
فيها الكويس وفيها الوحش
والشاطر اللي يعرف يحسن الاستخدام
بس اكيد الحاجة في بدايتها بتكون مختلفة

والطريق اللي بيمشي فيه الناس في النت غالبا متشابه

الاول شات و و و وبعدين منتديات و و و ثم في الاخر مدونات
الي جانب طبعا العلم والقراءة والدراسات الحرة

تحياتي

kochia يقول...

حبيبـــــــة القمـــــر
============================
اشكرك علي رايك
وطبعا الصاروخ واجب ويوصلك من عندي راسا اليكس بس ابقي خدي ساتر عشان الاصابات

يس انا الحمد لله دلوقتي عديت وبقيت ميةمية
متقلقيش عليا
بس اوعدك اني لو احترت خالص هبقي ابلغك

تحياتي

kochia يقول...

micheal
==========
اشكرك علي رايك بالمدونة
وطبعا الهند رغم ان عندهم افيال لكن سمعتهم الوحشةمن الافلام
لكن فعلا حقيقة الامر انها دولة بجد

تحياتي

kochia يقول...

bastokka طهقانة
==================
هههههههههه
فعلا بيسالوا عليا ؟
يبقي وحشتهم

والله متشكرة اوي انك قلتيلي الحكايةدي انا قلت انهم نسيوني

اهلا بيكي
وتحياتي

kochia يقول...

Heart Beat
=============
اللي عاوز فعلا ينمي اللغة ميتكلمش مع عرب
لان معظم العرب تعليمهم متشابه حتي لو بيتكلموا كويس
ده كان رايي
والمصري هتكلم معاه عربي طبعا
ايه اللي يخليني اتحير في كلمة ولا تعبير

لكن لو اجنبي بضطر وبسمع كلمة جديدة بعرفها وكدة

وعلي رايك مين عارف فيه ايه بعد كدة

تحياتي

kochia يقول...

كاميليا
==========
ان شاء الله دايما مبسوطة
بس قوليلي
ايه لذة الشات لو بكلم بس اللي اعرفهم؟ في الواقع
اصحابي وجيراني وزمايلي
مانا بكلمهم برةالنت
ده كان رايي
المن عالم جديد وناس جدد وروح جديدة
ده كان فكري وقتها

تحياتي

وميض ابتسامة يقول...

اولا وبدون مجاملات انا بشكر الظروف اللى حدفتنى للبوست بتاعك
بصراحة وبعيد عن موضوعك الظريف جدا .. احييك على عباراتك المعبرة وخفة الدم التى هى من طباع أغلب المصريين
اما عن موضوع الشات .. فقد مررت كغيرى من البشر بهذه التجربة .. واوقعنى حظى العاثر مع الجانب السىء من موضوع الشات الا وهو بذاءة بعض المشتركين واستخفافهم بالفكرة من أصله ..وعليه وبأستسلام ملوش معنى قررت عدم خوض التجربة .. ويمكن صدقينى الاخوة الهنود كانوا ارحم من اللى جاى ... الا فى مسألة البقر دى .. هى مش ناقصة
والسلام .. وعلى فكرة انا قرأت بعض من مواضيعك السابقة وبصراحة انت موهوبة .. جدا واشكرك على هذا البوست الرائع .. وبالتوفيق ان شاء الله

afew good men يقول...

الف سلامة وريحي دماغك من الهند والسند مالهم المصريين

طاب والله ولاد بلد وبيعرفوا يقولو كلام حلو ومنطقي جدا

وبعدين

عموما
مش تقر بخيري غير لما تجرب غيري

ومتعرفش قيمة الماما غير لما ........

انا بهزر معاكي بس والله انا بطلت شات من حوالي 3 سنين

مشعارف الدنيا فيها ايه دلوقت

خايف اخش جرب

تيجي في الهند

عموما حاربط الفيل علي باب المدونة
ههههههههههههه

GiGi يقول...

يارب تكونى استفدتى من الهند والهنديين
وطبعا احنا كعرب مش عارفه ليه فعلا دايما بنفترض سوء الظن فى بعض فى موشوع الشات ده
تحياتي

kochia يقول...

وميض ابتسامة
==============
اولا وبدون مجاملة اشكر الظروف اللي حدفتك علي المدونة بتاعتي وانا سعيدة جدا للحدفة دي

تاني حاجة بقي اشكرك علي رايك جدا

اما عن البوست فهو كما قلت مرحلة مر بها تقريبا كل ما تعامل مع النت في بداياته
وهي فيها الوحشوفيها الحلو
وانت وحظك بقي

ارجو وجودك دائما
تحياتي

kochia يقول...

afew good men
=================
هي كانت زيارة كدة علي الماشي ووصلت بسلامة الله للبر المصري

وربنا يستر من الجاي

منور المدونة
تحياتي

kochia يقول...

GiGi
========
انا طبعا استفدت
بس علي فكرة مش كل الناس بتفترض سوء الظن

لكن اللي مجرب يعرف ان الكذب في الشات 90% علي الاقل
يعني معظم الناس اتقرصت

بس لعلمك
انا بعامل بعقلي ومش بشك في حد حتي يظهر كذبه
لانه ببساطة مش هيستفيد من كذبه معايا لان انا اولي زي اخري
غالبا

تحياتي

rara يقول...

كوشيا
وحشتينى
جيت اطمن عليكى
ومنتظرة جديدك

كيكى يقول...

عوووووووووووووووووووووووووو انا جيت اتخديتى
..........................
هههههههههههههههههههههه
هههههههههههههههههههههههه
...........................
طب وفين الفيل صديقى
!
!
...........................
طب يا بختك والله انا مش بفهم فى الكمبيوتر ولا النت اى حاجة فى اى حاجة
وخلتنى افضح نفسى
روحى يا شيخة وتعالى بسرعة
هههههههههههههههههههههههههههه
...........................
وبكل كبرياء اخدتى الشنطة ومشيتى
لا عجبتينى بجد
يااااااااااااااااااااواد ياجامد انت
ههههههههههههههههههههههههه
..........................
دومتى فى حفظ الرحمن وربنا يخليكى ويسعدك على طولللللللللل الخط
عووووووووووووووووووووووووو
لازم تخدى
عوووووووووووووووووووووووو

احمد يقول...

ايه يابنتى انتى فين
يارب خييير
مش بتبانى ليه
علا وعسى يكون خير
:)

rovy يقول...

الحقيقه موضوع الشات ده ماليش فيه الا مع اصحابى و اصدقائى اللى اعرفهم ..

سعيده بوجودى فى مدونتك و اشكر مرورك الكريم بمدونتى و اتمنى دوام التواصل ان شاء الله ..

دمتى بخير و سعاده فى حفظ الله

تقديرى و تحياتى

نعكشة يقول...

ابتسمت له ابتسامة اخبث
وقلت له ارد له الصاع...


طيب تمام
هم هنا يعني ؟؟ ...


حسابي كام ؟
واخدت حقيبتي بكل كبرياء
..............
اكتر حتة عجبتني صراحة

زمان انا كمان مكنتش بكلم إلا ناس من باكستان معظمهم
بس كان the lobby
ومكنتش بلاقي هناك مصريين صراحة
معظمهم من الفرنجة

لحد ما اكتشفت الساحة العربية

بس كل دة من خلال المنزل

متعاملتش مع النت كافييز البتة

إلا مرة اومرتين ومكنتش بقعد كتير

دمتي سالمة

سلامٌ عليكي

fire bird يقول...

بصى

البوست بتاعك دمه خفيف جدا

بس انا رايى ان الشات ده لو كان اتفهم صح

والناس ما اتعاملوش معاه بالاستخفاف ده

كان هيكون شىء تانى خالص

..........
على العموم هو فكرة فاشلة

وتضييع وقت على الفاضى

..........

Dr.m يقول...

السلام عليكم
شهرين تكلمي هنود ..تلاقيكي وصلتي لأميتاب نفسه
ههههههههههههه
رأيي إن معظم الشات مضيعه للوقت لأن معظم اللي عليه بيخشوا بيبقوا من غير هدف دردشه وخلاص سواء كانت صدق أو كذب حلال أو حرام..عشان كده المفروض إن اللي يخش شات يبقى عارف داخل ليه وعايز ايه
تحياتي لك وللهنود
سلام

kochia يقول...

rara
=========
رارا يا قمر
شكرا علي سؤالك
وكنت يا ستي بجاوب علي الواجب اللي بعتيهولي

تحياتي لك