(5) اول القصيدة .... من مذكرات نتاوي

-

بدات بخطي سديدة

وبقيت بنزل كدة يوم او يومين في الاسبوع اروح السيبر

اكلم عقلاء الدنيا
مهو اكيد اللي قاعد علي النت عاقل .. زيي!!

نزلت السيبر اليوم ده .. بعد ما اصبحت بعرف افتح واختار واتكلم
عندي فضول اني اكلم الناس كلها واتعرف علي الناس كلها
اعرف كل الناس بتفكر ازاي وبتعيش ازاي
عاوزة التهم ثقافتهم ومعارفهم وطريقة تفكيرهم

وبدأت .........

شخص كلمني وقررت ارد وافتح عيني والتهم المعارف ..

- اسمك ايه
- عمرو .. وانتي ؟؟

( قلت اسمي الحقيقي .. )

(هو يعني مفيش حد في الدنيا اسمه زي اسمي )

- وسنك كام
- 35 ...وانتي ؟؟

- 28

( قلقته سني الحقيقي .. وكان وقتها سني كدة هو يعني هيعمل بسني ايه)

مش عارفة ليه مكنتش بطبق القواعد كويس اللي قالتلي عليها صاحبتي واختي ..

بس يعني هو لما يعرف سني هيعمل ايه .

- بلدك ايه ؟
- القاهرة .. وانتي ؟؟
- موزمبيق ..

(تذكرت بقي القاعدة مفيش صدق )

احتمال برده يكون لعوب يقوللي اشوفك ..

وانا ماليش في المقابلات

انا عاوزة اشوف الدنيا من الشاشة دي

لكن مش هقابل حد ولا اصاحب برة الجهاز ده

وواضح طبعا اني مش من موزمبيق ولا حاجة

لكن معرفتش اكدب برده
لكن اتضح اني مش عايزة اقول

هو احترم ده وعداها

- مؤهلك ايه ؟
- هندسة .... وبشتغل رجل اعمال ...وانتي ؟
- قلتله المؤهل الحقيقي
- متجوزة ؟
- لا وانت ؟؟
- لا مش متجوز .. بدور علي عروسة تقبل امي تعيش معاها (ست كبيرة وملهاش غيري )

كان محدث لبق جدا وبار بامه ومثقف وذكي وطيوب

مرت فترة علي التعارف بتاعنا .. وموضوعاتنا بتتسع واعجابنا باراء بعض بيزيد
بمعني اصح اعجابي انا بيه بيزيد

مع الوقت حسيت اني وجدت نصفي الاخر ..

هو ده الشخص اللي بحلم بيه ..

سنه مناسب ومؤهله

وبار بامه واخلاقه طبعا تحفة

وشكله معجب بيا

يارب يحبني .. يارب يحبني .. يارب يحبني

مسالش عن لبسي ولا شكلي ولا اي حاجة

وقعدت معجبه بيه حوالي شهرين

لما اقتنعت بيه تماما بقي حسيت بالذنب اني كدبت عليه

او بالاصح خبيت عليه بلدي

وتشجعت وقلتله اني من السويس

( يارب ميزعلش )

- والله .. معقولة .. من السويس فعلا ..مش مصدق..

انا خالي هناك في الحتة الفلانية وانا من السويس اصلا ...

- يا سلام .. مش ممكن ( الحتة الفلانية دي كانت الحي اللي انا ساكنة فيه ) ..

(يا محاسن الصدف )

مين خالك ؟

- عمك محمد ...... تعرفيه ؟؟

- اه اعرفه ده زميل بابا في الشغل وساكن في العمارة اللي جمبنا

واعرف بنته كمان

- بصي بقي يا كوشيا .. احنا طلعنا بلديات وانا عاوز اقوللك علي الحقيقة
وانت بنت بلد جدعة وهتقدري ...

- ايه الحقيقة دي ...وهقدر ايه ... (حاسة اني هسمع حاجة مش هتبسطني)
هو انت فيه حاجة مقلتليش عليها ؟؟

ــ انا الحقيقة معنديش 35 سنة .. انا عندي 45 سنة

(ذهووووووووول) (بس مش هبين الذهول )

(مش مشكلة .. الحب بيدوب الفروق .. ايه يعني 45 سنة )

بس دي كانت اول خبطة

ــ واسمي جمال .. مش عمرو

( جمااااااااااااال ؟؟؟؟ دانا حبيت اسم عمرو اوي )

ــ وايه كمان ؟؟ فيه حاجة تاني ؟؟

ــ انا سبت الكلية ومكملتش وسافرت برة اشتغلت .. معايا ثاوية عامة

(ثانوية عامة كمان ) !!!!!!!!!!!!! مقدرتش ارد عليه ..

خبطيتين في الراس توجع .. لا دول بقوا تلاتة ..

اخليه يخلص احسن بدل ما يجيني اغماء

انا عارفة السيبر ده وشه وحش عليا

ــ كمل .......................

ــ انا متجوز .. وعندي 3 اولاد .. انما لو شفتيهم هتحبيهم اوي

كماااااااااااااااااااااااااااااااااااااااان .. 3 عيال ؟؟

( تقريبا جالي اغماء فعلا وفوقوني بعد شوية )

او يمكن اللحظة اللي عدت عليا بعد ما سمعت كدة

انا حسيت فيها اني فقدت الوعي ..

بس مش ممكن ابين له طبعا

- والله .. طيب كويس اننا طبعنا بلديات عشان تقوللي المعلومات الظريفة دي

( كنت بتكلم عادي معاه ومن الداخل طبعا بغلي بغلي بغلي )

( نفسي اشوفه دلوقتي عشان اخبط راسه في الحيطة )

ليه الناس بتكدب ؟؟؟؟

حلفني بايمانات المسلمين اني لو عاوزة اي حاجة

من مصر اقوله

ولو من السويس اقوله

واعتبره زي اخويا

وتبرير كدبه انه محسش انه عاش شبابه ومراهقته

والنت بالنسبة له متنفس

بصراحة هو فيما بعد اثبت فعلا انه يعتمد عليه

في العديد والعديد من المواقف والمشاكل

لكن ده لما نسيت المقلب اللي اخدته منه
كان جامد اوي

بس ليا معاه حكايات كتير
المرة الجاية بقي

,,,,,,Kochia

=================

-------------------------------------------------------------------

الحلقات السابقة من مذكرات نتاوي

الحلقة الاولي ... كوشيا kochia

الحلقة الثانية ... الدرس الاول

الحلقة الثالثة ... shutdown

الحلقة الرابعة ... الاحتـــــــــــراف

--------------------------------------------------------------------