جميلة .. رشيقة .. بيضاء

بعد ما تعرفت علي الانترنت بفترة .. حسيت اني لازم اكون مفيدة واستغله الاستغلال الامثل
ميكونش مجرد لعبة معايا اتسلي وخلاص
حددت اهدافي منه... اتعلم حاجة جديدة .. وافيد غيري ..

فتحت مواقع تعليمية ..صحية ..فكرية .. ثقافية .. وفعلا استفدت كتير
وشفت حاجات اثناء بحثي بالصدفة مكنتش ببحث عنها اصلا ..
زي مواقع الجواز علي الانترنت

والفكرة الالمعية نورت في راسي فورا وقررت اني اكون مفيدة واحاول اوفق راسين في الحلال ..
قريت صفات الناس اللي عاملة اشتراكات .. الصفات كويسة وقررت ابدا

ليه هؤلاء الرجال مش عارفين يتجوزا بشكل تقليدي ..

اقصد مثلا زواج حب او زواج صالون ككل الشعب من حولنا ..

يمكن مشكلة المدنية اللي بعدت الناس عن بعضها .. محدش دلوقتي بقي عارف حد
يمكن مشكلة المادة اللي جعلت الناس بيدورا في دوامة البحث عن لقمة العيش
يمكن مشكلة الدين والتدين اللي بقي نادر واللي بيحب يدور عليه مش بيشوفه
يمكن مشكلة المغالاة في مطالب الزواج .......................الخ

كل دي حاجات جعلت المواقع دي تنتشر
حسيت اني لازم اعمل دور .. وبدأت ..

جبت اجندة .. وكتبت فيها اسماء كل البنات صحابي اللي اعرفهم مش متجوزين

وعملت لهم ((داتا بيز )) بالسن والظروف وطلباتهم وكل حاجة

وحسيت اني خلال سنة هكون موفقة 60 راس في الحلال مش راسين بس

- وعملت توفيق بينهم وبين بعض الرجال اللي علي الموقع

وبقيت ارسل للشخص بما يناسب الصفات اللي هو كاتبها عن نفسه واللي هو طالبها في شريكة حياته
وبعد فترة لقيت نفسي مش عارفة اوصل لحاجة

ابتديت ادرس

ولما دققت النظر .. لقيت المشتركين دول عدة اصناف

الصنف الاول : كاتب مطلوب : جميلة رشيقة بيضاء
طيب يا سيدي الفاضل ..الجميلات الرشيقات .. البيضاوات مش موجود منهم كتير معايا

ايه رايك في جميلة رشيقة قمحاوية ؟؟(( لا))
طيب جميلة بيضاء ممتلئة شوية ؟((لا))
وهكذا فقدت الصنف الاول

الصنف التاني كاتب مطلوب سن مناسب متدينة وبس
طيب الحمد لله
واثناء الحوار معه اجد ان لديه طلب اخر مكتبوش في الملف بتاعه
وهو انه يريدها ....جميلة رشيقة بيضاء!!!!
برده ؟؟؟؟؟؟؟؟؟؟؟؟

الصنف التالت بقي ياكل كذبا ويشرب كذبا ويتنفس كذبا .. وقد يكون متزوج
بس برده رغم كدة عاوز جميلة رشيقة بيضاء

وصنف اخر .. الموقع عنده هو وسيلة لمقابلة الفتيات ..ومن هن ربما يائسات لينصب حولهم الشباك .. بالكلام المعسول المنمق .. وهم كثير ومحترفون .

الصنف الخامس .. صنف يبحث عن قطعة مفقودة في لوحة بازل يرسمها لحبيبة احلامه لعله يجدها .. ومش عايز وسيط ولا خاطبة
وحسيت ان منهم كتير مش عارف هو عاوز ايه بالظبط ..

عاوز الذكية ولا يخاف تكون اذكي منه ...
عاوز الجميلة ولا يخاف عليها ومنها تعمل له قلق ..
عاوز الجدعة ولا محتاج يحس انه هيحميها لوحده ..
عاوز غير ذات الحيلة ولا محتاج واحدة تقف جمبه عند اللزوم..
عاوز الطيبة والحنينة ولا يحس معاها بالملل ..
عاوز الهادية ولا هيشتاق للمناكفة والتجاذب ..
عاوز ذات خبرة ولا هيندم انه مكنش حبها الاول ..
عاوز ذات صفحة بيضاء ولا هيشتاق لصحباته القدامي ..

وبعد مرور ثلاث سنوات علي التجربة
للاسف

فشلت في توفيق راسين في الحلال

حيروني معاهم

لكن الاكيد .. واللي محيرنيش انهم متفقين علي رغبتهم في

الجميلة .. الرشيقة .. البيضاء