الأربعاء، يوليو 23، 2008

. الحلقة المضيئة حول القمر

-

البنتين كانوا عاوزين يسكنوا في المدينة الجامعية بتاعة الطالبات
زي كل سنة

لكن العام الماضي نجحت كل منها ولكن رسبت بمادتين ..
ولسوء الحظ منع الراسبون بمادتين من السكون بالمدينة الجامعية للطالبات منعا باتا

طيب يعملوا ايه؟؟

قدموا التماس ..
رفض طبعا

قدموا التماس اخر
انهم يقابلوا الدكتور فلان المسؤول عن التسكين بتاع الطلاب

كل واحدة فيهم كان ليها طريقة في عرض المشكلة
بصوا لبعض


-- ها .. هنعمل ايه
-- انا هكلمه يابنتي .. متخافيش
-- طيب


دخلت البنتين علي الدكتور الفاضل
وقالت البنت


-- السلام عليكم
-- اهلا اهلا .. انتوا اخوات ؟ ( البنتين كانوا شبه بعض شوية وكانوا الاتنين حلوين )
-- لا احنا زمايل
-- خير
-- يا دكتور احنا من السويس وحضرتك عارف كليتنا كلية صعبة واحنا مش هنقدر نروح ونيجي كل يوم .. ومش عاوزين نفوت المحاضرات .. ارجوك تقبل التماسنا وتسمح لنا بالسكن في المدينة
-- يابنتي مينفعش وانا متاسف جدا .. بس القواعد والقاونين بتقول كدة
-- يعني مينفعش يا دكتور
-- لا مش هينفع .. لما يجوا عليكوا الدور في السكن تسكنوا .. احنا منقدرش ننتخطي الاحق منكم في السكن

فجاة انهمرت دموع الفتاة الاخري .. فقد جاء دورها لتعمل علي قبول الالتماس
التفت الدكتور ليها فورا ليعرف سبب البكاء


-- مالك بتعيطي ليه
-- يا دكتوغ مش عاغفة هنعمل ايه وهنذاكغ ازاي
-- هئ هئ هئ ( بكاء ) زمايلنا كلهم ساكنين واحنا بس اللي معغفناش
-- طيب اقعدي متعيطيش .. واعطاها منديل ورق
-- شكغا
-- انتي اسمك ايه
-- هالة
-- انتي عارفة بقي معني اسمك ايه ؟( محاولا التخفيف عنها )
-- اه .. الحلكة المضيئة حول القمغ
-- شاطرة
.....(تالقت عين البنت بالابتسام )
-- ايه رايك في الكتاب ده .. شعر .. انا اللي بكتبه (تجاهل البنت الاخري تتماما )
-- يااااه .. حضغتك شاعغ
-- ايه رايك ..
-- جميل جدا وازاي بتلاقي وقت للتدغيس وللشعغ
-- دي موهبة بقي ( قاللها مع الابتسام الشديد )

...( وفجاة ظهر في ملامح البنت حزن )

-- السكن يا دكتوغ هنعمل فيه ايه
-- لا متشيليش هم خالص .. النهاردة هعمل تليفون لمديرة المدينة وهتسكني.
-- وصاحبتي ؟؟؟
-- صاحبتك ؟ ( الظاهر كان ناسيها ) وصاحبتك طبعا
-- شكغا يا دكتوغ
-- بصي يا هالة
-- نعم
-- الاسبوع الجاي تيجي تطمنيني انك سكنتي يوم الاربعاء انا موجود من الساعة 11
-- اوكي يا دكتوغ (مع ابتسامة رقيقة )
-- وخدي الكارت بتاعي اهو .. فيه تليفوناتي كلها لو احتاجتيني اي وقت
-- شكغا


وسكنت البنتين ولم تذهب هالة الي الدكتور مرة اخري في مكتبه

التعليق
كنت عاوزة اكتب تعليق بصراحة بس مش عارفة ..

بس ياتري مين الغلطان
لو حد شايف انه فيه حد غلطان

البنت الاولي
البنت التانية
ولا الدكتوررررررررر

ولا الدنيا

ملحوظة

( كل حرف " غ " هو في الحقيقة "ر " ولكن هالة لدغة )..

===============================

هناك 53 تعليقًا:

الفارس الملثم يقول...

معلش انا مفهمتش , يعني دي قصة حقيقيه , يعني ايه مين الغلطان ؟؟؟

بدايه هي المشكله تخص التعليم الجامعي اساسا , وان في ازمة موارد , بمعني ان مثلا المدينه الجامعيه بتبقي ههيأة تاخد الف طالب مثلا لكن المتقدم بيبقي كذا الف فعشان كده بيحطوا القواعد دي , يبقي المشكله مشكله الدوله نفسها..

بس نرجع لموضوعنا انتي تقصدي مين غلطان من اي زاويه ؟؟؟؟؟؟

تحياتي

kochia يقول...

.
الفارس الملثم
===================
ايوة القصة حقيقية بالتفاصيل
وانا مش بتكلم علي مشكلة التعليم الجامعي ولا ازمة الموارد
انا بتكلم علي انه اللي مكنش لهم حق سكنوا الا اذا كان متاح انه يقبل التماسهم
طيب ليه لم يقبل الالتماس من البداية
------------
ييعني الدكتور مش غلطان انه تنازل عن قاعدة معمول بها مع الكل وعمل كارت توصية لبنت لمجرد انها عجبته

ولا البنت اللي استخدمت طرق انثوية في الدفاع عن نفسها بقبول التماس

ولا البنت الاخري اللي كانت جادة رغم كدة لم يلتفت اليها اطلاقا ولا حتي يناقش مشكلتها

الصح ايه
اقدم التماس وانا اعلم اني سوف اعامل بحيادية
ولا الجأ لطرق ملتوية بس هتوصلني لهدفي
والمسؤول :::
ليه ميقبلش التماس جاد مسبب او يرفضه

وليه دكتور مالوش علاقة بكليتهم اطلاقا يعرض كارت ورقم تليفون ودعوة للزيارة ؟؟

مش حاسس لسة ان فيه حاجة غلط ؟؟؟؟

تحياتي

سنووايت يقول...

محدش غلطان منهم
هو قلبه رق لدموع البنت , حس بيها يعني واتأثر وواضح انه شخصية عاطفية لانه كمان شاعر

الغلط بقي جاي من القوانين اللي مش بتنفذ وبتتغير علي هوي كل مسئول

Unknown يقول...

اول مرة اجى هنا
مدوننتك حلوة واسلوبك كمان رقيق
بس يعنى عادى هى جت على دى الحمد لله ان قلب الدكتوغ غق اقصد الدكتور رق

ربنا يوفقكم

اسلام الحضرى يقول...

دى اول زياره

لكن اسلوبك فى سرد القصه شدنى جدا وكمان اسلوبك فى الكتابه فى منتهى الرقه

بخصوص القصه


هى لما استخدمت سلاحا الانثوى والدموع مكنتش غلطانه لانه دى بالنسبلها موضوع لا زم تطلع منه كسابه دى حرب ولا تستخدم كل الاسلحه حتى ولو كانت غير مشروعه
اما الدكتور ده مبقاش شذوذ عن القاعده دى هى القاعده ان القوانين والاعراف بتمشى حسب الاهواء

freedom يقول...

سلام
الظاهر كل شيء خاطيء
قلة الموارد و عدم التنظيم و القليل من الدموع تساعدك لحل مشكلتك على حساب شخص اخر لكن لو لم تبك هالة ماذا كان سيحصل بها؟
لا اؤيد هذه الطريقة لكن هذه الطريقة متاحة

جمعاوى يقول...

بصى يا ستى

الدكتور شكله دكتور ......لامؤاخذه

و البنت التانية " بتاعت الراء " شكلها برده مش سهلة ....من السويس بقى ...!!!

نعكشة يقول...

لوووووووووووووووووووووووووول

والله دكتوغ سكغ

علي فكرة قيل لي
انه مادام الواحد بيعرف ينطق ال لام يعرف ينطق الراء صحيحة ولكن التربية و طريقة التعود هيا اللي بتخلية ينطقها كدة اغ طبعا لما بيكبغ قصدي بيكبر مبيبقاش بايدها حاجة متعرفش تغير الموضوع إلا لو راحت لدكتور تخاطب

فمن هنا نفهم ان شخصية البنت رقيقة
والدكتور مرهف الحس
و بعدين قالتلوا الله انت شاعر وشكلة شاعر مغمور فاستغل الفرصة

بصي أي حد لو شاف دموع أي حد بتتحرك مشاعرو و بيبقي عايز يعمل أي حاجة
.......

هقولك علي موقف هوه معوق بس يعني
أنا في الامتحانات الاخيرة
قررت قرار معوق إني مش همتحن آخر مادة
وإني مش هذاكر
يهديكي يرضيكي لأ
صحباتي قالولي طب ززاكري و متخليش ... لأ
ماما زاكري لأ
بابا زاكري .. لأ
وبعدين ماما أول ما عيطت أنا قولت خلاص خلاص هزاكر و امري لله

الفكرة في ان الدموع بتحسس اللي قدامها بالذنب

مش مشكلة الدكتور بس هيا مشكلته برضو انه تعاطف مع دية و لم يتعاطف مع الأخرى

عامتاً هوه النظام مدهول

ومفروض يكفلوا حق لكل البنات انهم يسكنوا في المدينة
يلا ربنا يسهل

.........
دمتي سالمة
سلامون عليكي

kochia يقول...

سنووايت
===========
الغلط علي القوانين
لا
الغلط علي اللي مش بيعرف ينفذ القوانين
هي القوانين ذنبها ايه

تحياتي

kochia يقول...

نهر الحب
===========
اهلا بيكي

وعلي رايك
اهي المصلحة قضيت وخلاص

تحياتي

kochia يقول...

اسلام الحضرى
=============
اهلا بيك واتمني انها تتكرر
وبالنسبة للقصة
هي المفروض مكنتش تبقي حرب
ولا تستخدم فيها اسلحة
لكن احنا خلينا حياتنا كدة

تحياتي

kochia يقول...

freedom
========
هي المنظومة فيها حاجة غلط اكيد
لان مش مفروض تكون دي طريقة الوصول للهدف

لكن هكذا الامر
تحياتي

kochia يقول...

جمعاوى روش طحن
=================
هي وجهة نظر
بس يعني ايه "" من السويس بقي ""
ما البنت التانية من السويس
وانا يا فندم من السويس
فهمني الموضوع ده الله يخليك لحسن مفهمتوش

تحياتي

kochia يقول...

نعكشة
===========
ايوة الدموع وسيلة وكل حاجة
لكن لو راعينا الدموع في كل حاجة هنغلط كتير
المفروض في حاجات الصح فيها لازم يبقي صح

تحياتي

سمر الشافعى يقول...

بصى هوا مفيش مشكله بالعكس المهم انهم سكنو فالاخر ووصلو للى عاوزينه بس اللى بيلفت انتباهى ان الراجل راجل مهما كان منصبه انا كنت فاكره ان دكاتره الجامعه دول ناس ستركت اوى مكشرين كدا وتترعبى قدامهم اكتشفت بقى وانا فى اخر سنه فى كليتى يعنى بعد سسسسست سنين دراسه ان فى بنات تيجى يوم امتحان الشفوى اخر شياكه وميك اب ايييه وتروح مركبه حرف الغين اياه وداخله للدكتور منتهى الرقه والطيبه والدكاتره بيهزرو ويضحكو وكدا وياخدو الدرجات اللى هيا ويخرجو انا لما عرفت قلتلهم الله يخرب بيوتكو وجايين تقولو دلوقتى دا انا كنت بخاف من مناظرهم بس طبعا انا بهزر لانى مقبلش كدا يعنى

... يقول...

عزيزتي
مش عارفة طبعا اقول لك مين بالضبط غلطان
أنا شايفة الموقف كله كأنه شوت سينما للدنيا
الحاجة
الدفاع
الهجوم
الرفض
القانون
الفساد
الضعف الانساني
المؤامرة

محدش غلطان .. كله برتقال

غير معرف يقول...

في راي اللي غلطانه البنت الاولي ......وانا محتفظ بالسبب لنفسي مش حاصرح بيه.........



onyx

kochia يقول...

سمر الشافعى
===============
الراجل راجل مهما كان منصبه
عندك حق
وبجد ضحكتيني علي كلمة جايين تقولوا دلوقتي
الظاهر الدنيا كدة

تحياتي

kochia يقول...

بثينــــــة
================
محدش غلطان .. كله برتقال
كلام جميل

وتعليقك كله جميل
انتي اجمل تعليق قريته علي كل الموضوعات اللي عملتها
بيوجز كدة الحياة في كلمة ونص

تحياتي

kochia يقول...

غير معرف
onyx
عاوز الحقيقة
انا كمان رايي زي رايك
الغلطانة البنت الاولي
بس مكنتش عاوزة اعترف
عشان البنت الاولي تمت ليا بصلة

التربية التقيلة ساعات بتجيب الواحد ورا
مشس كدة

تحياتي

نعكشة يقول...

مممممممممممممم

نظرية تستحق التقدير

خلاص هما يعدلوا نظام الاشتراك في المدينة
ال يعني المدينة عدلة
انا كل صحابي بيشتكوا منها اصلا

يلا خير

دمتي سالمة

سلاموون عليكي

رحـــــال يقول...

اقول ...

الطيور على اشكالها تقع ..

بلد كوسه صحيح ..

هههههه. !!!.

kochia يقول...

نعكشة
===========
هي فعلا نظرية تستحق الدراسة

تحياتي

kochia يقول...

رحـــــال
==============
فعلا
الطيور علي اشكالها تقع
وبلد كوسة

متفقة تماما

تحياتي

Nostor Azzuro يقول...

عمار يا مصر
هى دى أم الدنيا مصر
فعلاً نحن نعيش فى زمن المزز
أنا كتبت الحالة دى فى موضوع بعنوان
(كلام فى وصف أم الدنيا مصر)
ياريت تقرأيه حيعجبك أوى
BYE
ـــــــــــــــــــــــــــــــ
NEO

خالد كامل يقول...

كويس ان البنت دى عرفت الدنيا ماشية ازاى
رغم انها طريقة انا مش بحبها قوى ان البنت تستخدم مقوماتها كأنثى علشان توصل للى هى عاوزاه
بس ساعات بقى طالما فى حاجة هتأثر على المستقبل اما ممكن اعذرها
و طبعاً العيب مش على أى حد فيهم ... العيب على اللى عمل القوانين دى ... و علم الناس يخالفوها
و بس بقى علشان المدونة متتشمعش بالشمع الاحمر
و تحياتى ليكى

د. محمد رضا يقول...

العيب في كل حاجه

في الدكتوغ الناقص

انا عندي نظرية شخصية بتقول

ان اسوأ فئتين في المجتمع

سواقين الميكروباصات
ودكاترة الجامعات

مع وجود شواذ للاتنين

مع اعتبار ان الصح دلوقتي بقى اسمه شاذ

تقبلي مروري

ومنتظرك في مدونتي

محمد رضا...

مدحت محمد يقول...

مفتكغش انى الدكتوغ غلط

بس المفغوض هالة كانت شكغت الدكتوغ يعنى عشان كدة عيب

وعلى فكرة بقى انا كنت عايش فى مدينة جامعية ايام الجامعة وزميلى كان شايل مادة وسكن قبلى عشان معاه واسطة وكمان ايه كان من منطقة اسمها الصف يعنى تبع الجيزة بصى هى الدنيا ماشية وسايط لانى اكيد غيرها مسكنوش وهى عشان الدكتور اتوسط مكانتش هتسكن
البنت التانية مفيش مشاكل عليها
بس هى دنيتنا وسايط وكان المفغوضالبنت تشكغ الدكتوغ اللى هى هالة بس كدة

كل غ ر بغضه قصدى برضه
على فكرة دخلت اللينك اللى بعتهولى بس مش عارف مرضتش اشترك
نفسيا مرتحتش والله خفت يكون فيها سرقة ونصب وحاجات كدة
سيبك
ياللا تحياتى ياباشا

مدحت محمد يقول...

بقلك هو انتى بتقولى الدكتور مش من الكلية بتاعتهم وسابلهم رقم تليفونه ودعوة للزيارههههههههههه

يعنى الدكتور اعجب بهالة يادى النيلة
الله يخربيت الدنيا ياشيخة

والله مفيش حد عاد بيعمل حاجة لله ابدااااااا

ربنا يرحمنا برحمته قولى اللهم امين

HERO يقول...

ههههههههه
انا في الاول والله افتكرت ان الكيبورد هو اللي الدغ في ال ( ر )
بس انا من وجهة نظري انا مش شايف ان في حد غلطان الا الدكتور لأنه كان متأسف في الاول وبعد كده غير رأيه بس معتقدش ان البنت عملت كده بقصدها يعني هي فعلا كانت بتعيط بجد والله اعلم

تحياتي

صباح الخير يا مصر يقول...

قصــاقيــص
***********
اعتقد ان لكل انسان مفتاح لو وجدناه لاستطعنا الدخول اليه
و البنت التانيه استطاعت ان تجد المفتاح بالتوفيق و استطاعت ان تدير المفتاح و ان تفتح لتدخل لتجد ما تريد
انها لعبة الاقنعه التى يرتديها الجميع للوصول لاهدافهم

تحياتى

kochia يقول...

Nostor Azzuro
=================
اشكرك علي مرورك
والدنيا فيها من كل الالوان

تحياتي

kochia يقول...

مهيج الجماهير
=============
الدنيا كلها دلوقتي ماشية بالمقومات
الانثي
الفلوس
مراكز القوي
ده العادي

تحياتي

kochia يقول...

Dr.Hammood
================
اشكرك علي مرورك وعلي رايك
واكيد هزورك ان شاء الله
والظاهر الدنيا كدة

تحياتي

kochia يقول...

مدحت محمد
==============
ايوة انا عارفة ان الواسطة بتعمل المعجزات
بس المشكلة انك بتاخد حق غيرك وبيكون واحد له حق وبيتحرم من حقه
لكن الواسطة بتجيب الضغط والمرض والقرف من العيشة
وبتطفش الناس من البلد

وايوة معجب بيها
امال انت فاكر ايه
امال كان وافق عشان الدموع
علي فكرة معظم اللي علقوا فهموا غلط
الراجل موافقش عشان الدموع بس يمكن الدموع كانت هي المفتاح

يللا
اميـــــــــــــن

تحياتي

kochia يقول...

HERO
========
هي فعلا كانت بتعيط
بس يعني لو معيططش متعرفش تخلي التماس يتقبل
مش حرام ؟

تحياتي

kochia يقول...

صباح الخير يا مصر
================
وهل المفتاح هنا كان الدموع .. ولا ايه ؟
ولا يمكن الطمع فيما يمكن حدوثة بعد الدموع
امال لزمة الكارت ايه ودعوة للزيارة وابقي طمنيني عليكي ايه ؟؟؟

تحياتي

ٍSOU يقول...

انا شايفة انه غلط الدكتور .. اصل البنت ماعيطتش عن عمد .زدة احساسها بالعجز و القهرة و الضياع هو اللى وصلها لكدة .. وبما ان فى رجالة كتيييييييير عندهم فائض حنية فالراجل كتر الف خيره و زاد الله من امثاله عرض عليها المساعدة و الوقفة جمبه فى اى وقت لان حاسة انها زى بنته بالظبط.. و الله اعلم من نيتة

نعكشة يقول...

بلاش حكاية الدراسة دية ارجوكي أنا لسة خارجة من امتحانات

ههههههههههه

..............


ليكي واجب عندي تعالي خديه

دمتي سالمة

kochia يقول...

SOU
=========
حلو موضوع فائض الحنية
دي حاجة محتاجة ملاحظة

علي العموم اشكرك علي رايك

تحياتي

kochia يقول...

نعكشة
=========
ايه يا نعكشة الكلام ده
واجب ايه
انا مش بعرف احل الواجبات دي
طيب مش تغمزيني الاول
اديني وقت بقي لما افكر
ماشي
وبجد ميرسي جدا انك افتكرتيني وبعتيه ليا
قد ما مش عارفه هحله ازاي قد ما سعيدة بانك بعتيه ليا تحدبدا

تحياتي

mostafa rayan يقول...

الحمد لله انهم سكنوا

رئـــــيسـة حزب الأحلام يقول...

الدكتور باين عليه مااسحملش اللدغه
فراجل سلم من اول غين
ربنا يسهل لعبيده
تحياتى لكى

kochia يقول...

mostafa rayan
===============

اه فعلا الحمد لله

تحياتي

kochia يقول...

رئـــــيسـة حزب الأحلام
=========================
اه مستحملش
ناس ليها حظ
وناس ليها ترتر

تحياتي

عبده الرايق يقول...

من واقغ الامغ ان الدكاتغه عبده الغايق
شايف ان البنت مش قصدها تستعمل المكغ الانثوى هى جات كده معاها لان البنت كانت بتعيط فعلا
لكن الدكتوغ طالما عنده حل للمشكله من الاول المفغوض كان حلها
اما البنت الاخغاء
شاطغه بغضه انها التزمت الصمت
تدوينه سكغ خالص يا كوشا
دكاتغه
عبده الغايق

tarek alghnam يقول...

اختى الغائعه
الغلطان مش البنت ولا الدكتور
الغلطان هو نظام التعليم الفاشل عندنا
الغلطان هو ولى الامر اللى تعب وربى وصرف دم قلبه علشان المسئولين عن التعليم يألسوا على بنته
اقولك ايه ولا ايه ماعدش ضميغ
دائما بوستاتك رائعه
تحياتى لكى

kochia يقول...

عبده الرايق
=============
شكرا يا دكاترة عبده
كان نفسي اعمل لدغة دلوقتي بس لساني فيه بربوقة
المرة الجاية بقي

kochia يقول...

طارق الغنام
===============
اشكرك شكرا جزيلا
وفعلا العيب مش في البنات هم يعني هيتصرفوا ولا يعملوا ايه
العيب في اللي عنده حل ومش بيقدمه
والعيب في اللي بيعقد الدنيا عشان مستني ضحكة خليعة ولا قرش حرام

تحياتي

فارس بلا جواد يقول...

السلام عليكم ورحمة الله وبركاته
الحقيقه اول زياره للمدونه بتاعتك
مدونه حلوه بجد
وبوست جميل
وواضح المقدره على السرد ودقه الالفاظ
الى الامام دائما
تحياتى

kochia يقول...

فارس بلا جواد
==============
اشكرك علي رايك
واتمني انها لا تكون الزيارة الاخيرة

تحياتي

Ahmed Kamal يقول...

الظاهر أنا فاتني التعليق على الموضوع ده ، موقف حقيقي بيحصل كتير ، و المشكلة إنه كان في حل فعلا لكن الدكتور مافكرش فيه غير لما عواطفه اتحركت ، مش حاقدر أقول عواطفه دي كانت أبوية ولا غير كده ، لكن صدق من قال إن ضعف المرأة أقوى أسلحتها ، و أعترف أن الرجال لا يساعدون المرأة التي تحاول أن تأخذ حقها بدراعها زيها زي الرجل ، و إنما ينتظرون أن تثبت جدارتها ، و بعضهم قد يزيد بعض العراقيل لأنها يكره الفكرة ، أما المرأة التي تأتي للرجل و تطلب منه أن يعاملها كامرأة ، فاحتمال ضعيف جدا ألا يجيب طلبها :) و كل ده قد يحمل معنى برئ أو لا و الله أعلم .

kochia يقول...

أحمد كمال
===========
اكيد مادام قريته .. وعلقت .. يبقي لم يفت التعليق

ضعف المرأة أقوى أسلحتها فعلا حقيقي

الرجال لا يساعدون المرأة التي تحاول أن تأخذ حقها بدراعها زيها زي الرجل ايضا واقع

تحياتي لك