الخميس، يونيو 05، 2008

جميلة .. رشيقة .. بيضاء


بعد ما تعرفت علي الانترنت بفترة .. حسيت اني لازم اكون مفيدة واستغله الاستغلال الامثل
ميكونش مجرد لعبة معايا اتسلي وخلاص
حددت اهدافي منه... اتعلم حاجة جديدة .. وافيد غيري ..

فتحت مواقع تعليمية ..صحية ..فكرية .. ثقافية .. وفعلا استفدت كتير
وشفت حاجات اثناء بحثي بالصدفة مكنتش ببحث عنها اصلا ..
زي مواقع الجواز علي الانترنت


والفكرة الالمعية نورت في راسي فورا وقررت اني اكون مفيدة واحاول اوفق راسين في الحلال ..
قريت صفات الناس اللي عاملة اشتراكات .. الصفات كويسة وقررت ابدا

ليه هؤلاء الرجال مش عارفين يتجوزا بشكل تقليدي ..
اقصد مثلا زواج حب او زواج صالون ككل الشعب من حولنا ..

يمكن مشكلة المدنية اللي بعدت الناس عن بعضها .. محدش دلوقتي بقي عارف حد
يمكن مشكلة المادة اللي جعلت الناس بيدورا في دوامة البحث عن لقمة العيش
يمكن مشكلة الدين والتدين اللي بقي نادر واللي بيحب يدور عليه مش بيشوفه
يمكن مشكلة المغالاة في مطالب الزواج .......................الخ

كل دي حاجات جعلت المواقع دي تنتشر
حسيت اني لازم اعمل دور .. وبدأت ..

جبت اجندة .. وكتبت فيها اسماء كل البنات صحابي اللي اعرفهم مش متجوزين
وعملت لهم ((داتا بيز )) بالسن والظروف وطلباتهم وكل حاجة
وحسيت اني خلال سنة هكون موفقة 60 راس في الحلال مش راسين بس
- وعملت توفيق بينهم وبين بعض الرجال اللي علي الموقع
وبقيت ارسل للشخص بما يناسب الصفات اللي هو كاتبها عن نفسه واللي هو طالبها في شريكة حياته
وبعد فترة لقيت نفسي مش عارفة اوصل لحاجة


ابتديت ادرس

ولما دققت النظر .. لقيت المشتركين دول عدة اصناف


الصنف الاول : كاتب مطلوب : جميلة رشيقة بيضاء
طيب يا سيدي الفاضل ..الجميلات الرشيقات .. البيضاوات مش موجود منهم كتير معايا
ايه رايك في جميلة رشيقة قمحاوية ؟؟(( لا))
طيب جميلة بيضاء ممتلئة شوية ؟((لا))
وهكذا فقدت الصنف الاول


الصنف التاني كاتب مطلوب سن مناسب متدينة وبس
طيب الحمد لله
واثناء الحوار معه اجد ان لديه طلب اخر مكتبوش في الملف بتاعه
وهو انه يريدها ....جميلة رشيقة بيضاء!!!!
برده ؟؟؟؟؟؟؟؟؟؟؟؟

الصنف التالت بقي ياكل كذبا ويشرب كذبا ويتنفس كذبا .. وقد يكون متزوج
بس برده رغم كدة عاوز جميلة رشيقة بيضاء


وصنف اخر .. الموقع عنده هو وسيلة لمقابلة الفتيات ..ومن هن ربما يائسات لينصب حولهم الشباك .. بالكلام المعسول المنمق .. وهم كثير ومحترفون .

الصنف الخامس .. صنف يبحث عن قطعة مفقودة في لوحة بازل يرسمها لحبيبة احلامه لعله يجدها .. ومش عايز وسيط ولا خاطبة
وحسيت ان منهم كتير مش عارف هو عاوز ايه بالظبط ..


عاوز الذكية ولا يخاف تكون اذكي منه ...
عاوز الجميلة ولا يخاف عليها ومنها تعمل له قلق ..
عاوز الجدعة ولا محتاج يحس انه هيحميها لوحده ..
عاوز غير ذات الحيلة ولا محتاج واحدة تقف جمبه عند اللزوم..
عاوز الطيبة والحنينة ولا يحس معاها بالملل ..
عاوز الهادية ولا هيشتاق للمناكفة والتجاذب ..
عاوز ذات خبرة ولا هيندم انه مكنش حبها الاول ..
عاوز ذات صفحة بيضاء ولا هيشتاق لصحباته القدامي ..


وبعد مرور ثلاث سنوات علي التجربة
للاسف


فشلت في توفيق راسين في الحلال

حيروني معاهم

لكن الاكيد .. واللي محيرنيش انهم متفقين علي رغبتهم في

الجميلة .. الرشيقة .. البيضاء


هناك 17 تعليقًا:

Tamer Nabil Moussa يقول...

بوست مميز

طبعا الاختيار يختلف من انسان الى اخر وحكاية الجواز على النت اغلبية من يدخل اليها يدخل لمجرد اللعب واللهو او الحصول على علاقة غير طبعية ودول من الجنسين

الجواز محتاج طرفين بينهم حب ومودة وتفاهم وان لم يجد الحب نقول القبول والراحة النفسية

ودة صعب يتوفر على النت وان نجحت بعض التجارب فهى ليست قاعدة تعم على الجميع

اما حكاية رشيفة وجميلة وبيضاء هذة الكلمات تبين ان الغرض ليس الجواز بل اللعب والعبث بالاخرين

لان مش ممكن كل الرجالة هتتجوز بالموصفات دى اللى عايز يجوز ويراعى ربنا مش هيفكر بالطريقة دى

تحياتى

صاحب المضيفة يقول...

مع طول المدة

لكن التجربة تستحق النظر بالفعل

ربما بداتي أنتي الخطى



وربما سيأتي اليوم التي تكتمل فيه القصة


تحياتي

Unknown يقول...

السلام عليكم
لستت طلبات
بيضاء حلوة جميلة مرحة رشيقة غنية
وكله راجع لنقص الفكر الاسلامى وكمان الثقافى
يعنى الاسلام قال ذات الدين
وقال كمان وجلعنا بينكم مودة ورحمة مش لستة طلبات
والله الشباب من الجنسين عندة مشكلة ثقة فى الطرف الاخر من كثرة المشاكل والقصص المرعبة اللى بنسمعها عن فشل حديثى الزواج


بوست هايل
بالتوفيق يا رب

BinO يقول...

جميله طريقة عرضك
بس ده واقع الامر
رغم انه مش الغالب في الرجال بس الصنف اللي مش عارف هو عايز ايه
غالبا لا يجد ما يرضيه

Ahmed Kamal يقول...

فكرتيني بجملة لدكتور أحمد خالد توفيق في أحد قصصه : "المجدد و السؤدد للبيضاء المكتنزة ، و لا شئ للسمراء النحيلة !" .

أحييك على طريقة عرض الفكرة ..

RaRa يقول...

مساء الخير
بوست جميل
واقولك مش تستسلمى بسرعة ولازم يكون عندك أمل فى انك توفقى راسين بالحلال وان شاء الله ربنا معاكى
واتمنى تشرفينى فى مدونتى

تحياتى

واحد بيدور علي قلبه يقول...

مش عارف حاسس ان القصه هتكمل وربنا يوفقك.

مدحت محمد يقول...

ههههههههههههه

اوعى يكون الموقع اللى مشترك فيه

انا مرة دخلت موقع زواج

فاتعرفت على بنت فى شات الموقع

فبقلها انتى داخلة هنا عشان تلاقى عريس يعنى

راحت قالتلى لا انا كنت بدور على اغنية لعمرو دياب
هههههههههههه

معتقدش المواقع دى بتبقى جادة اساسا

زى ماتامر قال انها بتبقى لعب ولهو تسالى

كدة يعنى

تحياتى ليكى

kochia يقول...

الاخ تامر نبيل
والله انا كنت شايفة ان النت وسيلة زي ايى وسيلة بس هو مجرد باب للتعارف بس .. بس اللي خلاني افكر في الحكاية دي اني شفت ناس كتير كويسين ولما تسالهم يقول مش لاقي البنت الكويسة .. والعكس صحيح
قلت الموضوع محتاج بس طرف تالت يوصل دول لدول وبعد كدة العملية هتمشي لوحدها
بس طلع الموضوع محتاج اكتر من كدة.. والظاهر ناس كتير جواها طموحات ومش بتعبر عنها وهو ده اللي موقفهم.


صاحب المضيفة
تحياتي
انا فعلا بفكر احاول تاني .. ايه رايك؟


نهر الحب
انا فعلا معاكي ان هي ازمة ثقة بتخلي الواحد يحاول يحصل علي اللي شايفة وهو الشكل وبعد كدة انا ونصيبي
لكن من الاول ابقي ماخدتش ولا حاجة !!!
وان شاء الله هبقي اقول لكم طلبات الطرف التاني كانت ايه ان شاء الله

kochia يقول...

bino
اشكرك
وانا شايفة ان الشخص اللي دايما مش عارف هو عاوز ايه عمره ما هيكون مبسوط حتي لو اتجوز واحدة نقاها بنفسه
برده مش هيبقي سعيد وهيحس ان فيه حاجة ناقصاه


احمد كمال
المجد والسؤدد!!!
فعلا صحيح .. ومش بس في الجواز لكن في طابور العيش .. وفي المصالح الحكومية وفي الجامعة والناذج كتيررررررررررررة


عزيزتي rara
انا فعلا عاوزة احاول تاني واستفيد من اخطاء التجربة وربنا الموفق
ومدونتك لطيفة جدا وشعرك حساس اوي
انا بحب الشعر جدا


واحد بيدور علي قلبه
ادعيلي اني اعرف اكمل اي قصة فيهم
تحياتي

No Fear يقول...

السلام عليكم
أولا أسلوبك جميل جدا
:)
ثاينا بالنسبة لموضوع الجواز بقة معقد جدا جدا جدا
بالرغم من إن الإسلام شجع علي الجواز بأقل التكاليف و الإحتياجات
ثالثا
أمشي في جنازة و متمشيش في جوازة خصوصا اليومين دول
شكرا لزيارتك

kochia يقول...

مدحت محمد
كويس انك دخلت
احكيلي علي تجربتك فيها بقي عشان اكمل البحث بتاعي واعرف انا غلط في ايه
مستنية الحكاية
والجدية من عدمها مش بتبقي في الموقع .. لان الموقع بيعمل بيزنس وخلاص
الجدية في الشخص اللي داخل الموقع
مش كدة ولا ايه

kochia يقول...

No Fear
اشكرك جدا
وانا مش مع مقولة امشي في جنازة ومتمشيش في جوازة
وكمان مش مع اللي حد يسالة وويقول حاجة غيرالحقيقة
بس انت رايك محاولش تاني ؟
لسة بفكر

الطائر الحزين يقول...

جميل البحث
جعله الله فى ميزان حسناتك

القلوب بين اصبعين من اصابع الرحمن يقلبها كيف يشاء

التوافق ده حاجة تانية خالص

(ننتظر طلبات الفتيات فى الرجال)
ياترى هيبقى ايه

جميل ابيض اشقر بردة؟؟؟

kochia يقول...

الطائر الحزين
صحيح الحب حاجة والتوافق حاجة ؟؟
يعني ممكن اتنين يحبوا بعض يكونوا مش متوافقين .. او اتنين متوافقين بس مش بيحبوا بعض ؟
اعتقد التوافق يشمل الحب لكن ربما الحب لا يشمل التوافق
بدليل انك ممكن تحب حد ويبقي مش مناسب لك من حيث السن او الظروف او الشكل حتي اللي بتحلم بيه
مش عارفة .. هي قضية متشابكة
وربمما بقي الزواج له علاقة بالاتنين
وغرضي كان اللتوافق ثم الزواج ثم الحب
بهكذا الترتيب
والله الموفق
تحياتي

نعكشة يقول...

كدة يا كوشيا
تبقي بتدوري علي جميلة رشيقة بيضاء و متقوليليش
دنا الخمس صفات كلهم عندي
ههههههههههههههههههههههههههه

بهزر طبعاً

لأ مبثقش انا في الجواز من النت دة

ناس بتهبل

يلا خير
بس خدتي ثواب النية

دمتي سالمة

سلامٌ عليكي

kochia يقول...

نعكشة
=========
انتي وصلتي لحد هنا
ايوة يا ستي شوفتي بقي اللي حصل
يللا كله بثوابه

تحياتي