(2) الدرس الاول .. من مذكرات نتاوي

-

كأي وليد يبدأ خطواته الاولي في العالم حبوا ..

بدأت انا خطواتي الاولي في سبر اغوار عالم الانترنت حبوا...

التصقت بصديقة لي سبقتني اليه لاتعلم ..

حيث كنت لا اعرف اي شئ في اي شئ ..

وجدير بالذكر ان معرفتي بالانترنت هي التي عرفتني علي استخدام الكمبيوتر ..

حيث كنت فقط من مستخدمي ال "جيمز"

ولكن الانترنت بوابة سحرية الي عالم واسع جدا احب ان ادخله

وجهاز الكمبيوتر هو مفتاح هذه البوابة السحرية

المهم لزقت لصاحبتي كل ماتروح تعمل حاجة في الكمبيوتر اروح معاها ..

اقعد جمبها وهي بتفتح .. وهي بتبحث .. وهي بتقرا .....

كنت متطفلة جدا ..لكن رغبتي الاكيدة اني اتعلم واتعلم دفعتني للتطفل ده

وهي بصراحة كانت مستحملاني

لحد ما اتعلمت وحسيت اني بقيت كويسة

وعرفت يعني ايه ايميل .. مكنتش فاهمة اصلا ايميل يعني ايه ..

وعرفت الفرق بين الياهو والهوت ميل

وعرفت جوجل

وعملت الايميل اللي قلت لكم عليه في موضوع كوشيا

وقلت خلاص ممكن اروح السير لوحدي ( مكنتش لسة جبت كمبيوتر)

وخرجت في يوم مع صاحبتي واختي

وهي كمان كانت سبقتني لمعرفة الكمبيوتر والانترنت

خرجنا وروحنا السيبر بناءا علي طلبي طبعا

وقلتلهم

- انا بقي هاخد جهاز لوحدي انا بقيت بفهم كويس
- يابنتي انت لسة جديدة واسبوعين مش كفاية اقعدي مع حد فينا
- لا .. ليه يعني
- طيب لو عوزتي حاجة نادينا
- هعوز ايه يعني
- اوكي براحتك

وجلست لوحدي .. ومكنش عارفة اعمل ايه
اعمل ايه....
اعمل ايه....
اعمل ايه.....

طيب ابحث في جوجل .. هما بيعملوا كدة
وفتحت جوجل

ادور علي ايه ..
ادور علي ايه ..
ادور علي ايه ..

طيب اشوف ازياء ..؟؟؟
اشوف اختبارات نفسية .. ؟؟؟
اشوف ابراج ..؟؟؟
اشوف.............؟؟؟

قررت في الاخر وبعد تفكير عميق اني ابحث عن قضية تخص المراة
وكتبت في جوجل كلمة (lady ) ثم ضغطت

بحث
وطبعا جوجل العبقري جاب لي مواقع كتير

ونقيت انا منهم واحد عشوائيا وفتحته

واذا بصورة مش ولابد خااااااااالص تظهر علي الشاشة بالحجم العائلي

جامبوووووو

صورة واحدة من غير هدوم
طبعا اتخضيت جدا

تتقفل منين تتقفل منين ...

دورت علي علامة x مش لاقياها
هم قالولي اقفلي منها

مش عارفة راحت فين

عرفت بعد كدة ان المواقع دي بتعمل علامة x بطرق مش واضحة

عشان الموقع يفضل اطول فترة ممكن
وطبعا ساعتها مكنتش اسمع حاجة عن ( alt+ f4 ) ولا اي حاجة شبيهة

المهم اعمل ايه وانا في سيبر والناس حواليا وهس محدش بيتكلم

طبعا لما شفت الصورة شهقت شهقة قوية خلت الناس كلها تبص عليا
انقاذا مني للموقف وللمنظر

قمت من مكاني وحضنت شاشة الكمبيوتر اخفيها عن الاعين
طبعا الناس بصت عليا واكيد حد منهم لمح الصورة

ندهت علي اختي ... وصاحبتي

بسسسسسسس

بسسسسسسسسسسس

بسسسسسسسسسسسسسسسسسس
الحقوني

وطبعا الناس كلها شافتني برده وانا بنادي
والفضول كان هيقتلهم

لكن انا كنت محضنة علي الشاشة تمام وقافلة عليهم كل المنافذ
لحد ما اختي جت وقفلت الشاشة بسرعة بكل بساطة

- اقعدي
- اصلي كنت مخضوضة
- طيب مقفلتيش الشاشة ليه
- هو حد قاللي ابقي اقفليها
- طيب معملتيش ريستارت ليه
- هو ايه الريستارت ده
- الريستارت ده كدة ( وداست علي زرار في الكيسة )
- ياااااه .. طيب مش حد يقوللي

بصت لي بصة كدة ورجعت علي الجهاز بتاعها

وانا استنيت لما الكمبيوتر يفتح تاني عشان اطمن
مش عارفة ليه مكنتش مصدقة ان الصورة اياها راحت وحاسة انها هترجع تاني
لما فتح قفلته تاني زيادة توكيد

وقمت قعدت جمب اختي زي الشاطرة من غير ولا كلمة
شكلي كدة لسة محتاجة شوية تعليم !!!!!!

,,,,,,Kochia

=========================

..غـريـزة الاصــلاح

ربنا سبحانه وتعالي خلق الانسان بعدبد من الغرائز التي تعينه علي الحياة

زي غريزة الجوع.. لو مش هيجوع وبفكر ياكل هيموت ..

وغريزة العطش طبعا

وغريزة الامومة اللي من غيرها ربما الامهات يزهقوا من زن ولادهم ويرموهم
كمان غريزة الجنس اللي برده ربنا خلقها في الانسان للحفاظ علي الجنس البشري

وغيرها اكيد من الغرائز والحاجات اللي قالها العالم " ماسلو " الشهير

وحطها في الهرم بتاعه اللي سمي بعد ذلك هرم ماسلو

وطبعا من انبل هذه الغرائز هي غريزة الامومة
شئ جميل وحساس ومختلف عن كل حاجة تانية

الام دي بتضحي براحة ووقت وصحة واكل ونوم وكل حاجة بمنتهي السعادة ..

عشان خاطر الولد الصغير ده اللي وجد في الدنيا عاجز عن كل شئ

وبعدين الولد بيكبر وامه تفضل تراعيه مختلف انواع الرعاية

ومع تطور الجنس البشري تطورت غريزة الامومة ..

وتوسعت مع توسع المخاطر الدنيوية اللي ممكن تصيب الولد وممكن تفسده

ولو فسد هيصيع مجهودها معاه في تربيته

وفجاة وصلت فكرة الاصلاح وبقت جزء من غريزة الامومة
ومع تطور الجنس البشري تطور الاصلاح ..

وانفصل عن غريزة الامومة .. واصبح غريزة بحد ذاته..

((غــريــزة الاصــــلاح))

تتبناها المرأة .. بصفتها حزء من غريزتها الاثيرة الي نفسها ..

وبصفتها غريزة تميزها عن الرجل باختلاف الغرائز الاخري التي يشترك فيها مع المراة...

الامومة

وكل هذا اخذ في التطور الانساني حقبة زمنية قصيرة

والان غريزة الاصلاح هي غريزة متاصلة في اعماق معظم النساء

وفجأة .. وبالمقدمات او بدونها ...

اعطت المرأة الحق لنفسها "كأم تاريخية" ان تصلح الرجل "كابن تاريخيا"

والان اطرح تساؤلاتي :

• هل فعلا الاصلاح جزء من غريزة الامومة لدي المراة ؟
• هل امتد الاصلاح من الام نحو ابنها الي المراة نحو الرجل ؟
• هل الحب يؤدي الي ظهور الاصلاح ؟ ام ان البدء يالرغبة في الاصلاح قد يؤدي الي الحب ؟
• هل الحب يتضمن اصلاح دائما ؟
• هل وجود ميول اصلاح عندي امراة نحو رجل يؤدي دائما الي نمو الحب؟
• هل توجد علاقة بين الاصلاح والتمللك ؟
• هل توجد غريزة اصلاح في الرجل نحو المراة ؟
• واذا وجد .. هل يؤدي الي الحب من احد الطرفين نحو الاخر ؟
  
  

انا رايي ان الاصلاح كغريزة لدي المراة-
ليس كل النساء بالطبع -
غريزة تدفع المراة الي ان تحاول اخراج افضل ما في الرجل من اخلاق وتصرفات حسنة
معتمده علي ميله اليها
لتنتسب اليه في النهاية وتفخر به وتفخر بنفسها لانها ساهمت في اصلاحه

كثيرمن الرجال يستجيبون
مستمتعين بشعور الرعاية والاهتمام المنصب عليهم من تلك المراة ...
والبعض الاخر يمل بعد بعض الوقت ويتوق الي الرجوع الي حياته العادية
بدون القواعد الجديدة التي فرضت عليه بشكل لطيف ومحبب جدا من تلك المراة

والقلة يلفظ هذه النوع من محاولة الاصلاح من البداية
لانه يري فيه نوع من التملك والسيطرة
وذلك رغم ميله اليها

وفي النهاية وبعد الملاحظة
نسبة نجاح المراة في الاصلاح والحصول علي من اصلحته لا تزيد عن 50%

بهذه النسبة .. هل يستحق الامر المجازفة ؟؟

لا ادري..................

================================

(1) " kochia" ..... من مذكرات نتاوي

الانترنت ...
عالم كبير.. كان غريبا ..الان اصبحنا نحن الغرباء فيه !!
عالم يحتوينا .. يحيط بنا.. فلا نسطيع ان نري غيره حتي يشيح بوجهه فتري نفسك قد استفقت من حلم
كان اجمل الاحلام او كان اقبح الكوابيس او ربما كان اطرف الرؤي..

وما بين الجمال والالم والطرافة تترسب الذكريات ..ذكريات جميلة او اليمة او طريفة او ذكري تجمع بينهم جميعا
منها ما يجب ان يبقي دفينا عزيزا غاليا طي الكتمان ومنها ما يكتب في دفتر المذكرات وقد اقتطعت لكم بضع قصاصات من هذا الدفتر الاثير الي نفسي وقد كنت قررت انشاء مدونة خاصة لمذكرات نتاوي .. ولكني وجدت انها جميعا .. مواقف وقصاقيص لذلك ضممتها الي " قصـــاقيـــص"

واليكم القصاصة الاولي …

---------------------------------------------

(1)

.....kochia

هذه هي ( انا )

اسمي...

طبعا في عالم النت اذا كنت قد دخلته للمتعة والتسلية –
كمان كنت افعل انا في بداية دخولي اليه -
لا يجب ان يعلن اسمك الحقيقي

لابد ان تبتكر اسما اخر او تنتحل اسما اخر!!
ولا ادري لماذا ولكن هكذا قيل لي :

- ( اوعي تقولي لحد اسمك الحقيقي)

- (ليه ؟)

- ( ليييييييييه !!!! انتي اتجننتي ؟ هو كدة وخلاص)

- ( طيب )....

وهكذا ظللت اياما واسابيع افكر في اسم ابتكره او ان او انتحله
حتي استطيع طرق هذا الباب وانا متسلحة بالقاعدة الاولي له :
( اسمي الحقيقي سر حربي ) !!!

وبعد ان اعياني البحث توصلت لهذا الاسم العجيب

"kochia "

الذي ليس له اي معني سوي انه بضعة حروف تشابكت وانتجته

ملحوظة :: الشبكة لها قواعد في قبول الاسماء

اولها واهمها الا يكون مكررا

وقبلته الشبكة الساحرة

التي تتيح لك الاتصال بكل كائن عاقل علي هذا الكوكب
واصبحت رسميا انتمي الي هذا العالم

وسالني الجميع

ما هذا الاسم الجميل ؟

ما معناه ؟

لابد ان له معنا عميقا ؟

وبابتسامة واثقة اكدت للجميع ...

" بالتاكيد له معني

انه يعني ( زهرة ) باللغة الصينية !!!!

لقد كذبت وقتها وقد صدقني الجميع

( لقد كففت عن الكذب الان ).

ولكني بهذه الكذبة طبقت القاعدة الثانية للتسلية عير الانترنت

وهي ...

( لا للصدق )

وبدات احبو في هذا العالم

ولكنني اشتد عودي باسرع مما كنت اتخيل …

,,,,,,Kochia

=================

..ماذا تريد المراة ؟

ماذا تريد المرأة؟؟

سؤال دائما يتردد داخل عقول الرجال المتعاملين معها ..
ربما يدور هذا السؤال في ذهن الاب ..

عندما يجد ابنته ذات السادسة عشر ربيعا تغيرت واصبح لها عالمها الخاص

الذي لا يفهمه والذي لا تسمح هي لاحد - ايا كان - بالدخول اليه

ربما يدور في ذهن الاخ ..

الذي يري اخته قد انغلقت علي ذاتها بعد ان كانت اعز صديقة له

.. ويراها بحال مختلف كل يوم

والاكيد انه يدور في ذهن الرجل نحو امرأته..
ماذا تريد "تلك المرأة"

المرأة في اذهانهم " لوغارتم " غير مفهوم كما قال " اليقين " في موضوعه الاخير " ماذا يردن الزوجات "
لا يعرفون ماذا تريد .. ماذا ترغب .. ماذا تتمني .. وبماذا تحلم ؟
لا يعرفون ؟؟؟ ام لا يريدون ان يعرفوا ؟؟؟

ربما نحن النساء قد نتسائل فيما بيننا ...
ماذا يريد الرجل ؟؟

ولكن بما ان الرجل له مطلبان او ثلاث مطالب اساسية يشترك فيها كل الرجال ..

اذن اتضح جزء كبير من غموضه وتم حل الكثير من طلاسمه

اما المراة ..

فلا تشترك النساء في ما تحتاجه وليس لها مطالب محددة
فلذلك هي " لوغارتم "

كلا سيدي
ان المراة ليست لوغارتم ..

وانما هي مخلوق رقيق حساس جدا وضعيف
تخفي ضعفها بكل الوسائل

وهي تعتقد ان اخفاء هذا الضعف انما يزيدها ويكسبها القوة في مواجهة الحياة

وفي مواجهة هذا المخلوق الاخر الذي تحيا معه .. الا وهو الرجل
ولا تدري انها عندما تخفي هذا الضعف انما تضعف اكثر واكثر ..

وتخفي ملامحها الجميلة المحببة اللطيفة التي خلقها الله سبحانه وتعالي لها

ماذا تريد المرأة
تريد المرأة ذراعين تحوطانها تمنحها الحب والامان
ذراعين تحميانها من برد الشتاء وحر الصيف
ذراعين تعلم انها تستطيع ان تغمض عيونها امنة مبتسمة وهي بينهما
ذراعين تشعر بينهما بكل الثقة وبامتلاك العالم

ماذا تريد المراة
تريد المرأة كتفا تستند عليه وقت الرخاء قبل وقت الشدة
كتفا صلبا .. حنونا في نفس الوقت
كتفا لا يميل ولا يهتز وقت الانواء

ماذا تريد المرأة
تريد المراة يدا حانية تمسح دموعها
وتمحو الامها

ماذا تريد المرأة
تريد المرأة التقدير قبل الشكر
والاحترام قبل الحب

ماذا تريد المراة
تريد المراة ابتسامة حانية صادقة نابعة من القلب تشعر بها قبل ان تراها

ربما يري البعض اني ابالغ
ويفكر ..

ان المراة مخلوق مادي

واحيانا مصاصة دماء تريد ان تأخذ وتأخذ وتأخذ بلا عطاء

وانها خائنة احيانا..

تحب الرجل من اجل ماله او مركزه او او احيانا اخري

ولكـــــــن

عندما لا تشعر المرأة بهذين الذراعين يحيطانها بكل الحب والود والحنان

تعتقد ان المال والمادة قد تحميها من برد الشتاء وحر الصيف

عندما لا تجد المرأة الكتف الصلبة الحنونة التي تدعمها في الحياة وقت الرخاء ووقت الشدة

تحتاج الي ما يدعمها واحيانا تري ان المال قد يدعمها

عندما لا تري او تشعر المرأة بتلك الابتسامة النابعة من القلب

قد تكون مشاغبة مزعجة متحركة رافضة ..

لعلها تحصل علي ما يشعرها بالتواصل الذي تفتقده

عندما لا تجد المراة تلك اليد الحانية التي تمسح دموعها ( ودموعها كثيرة )

تبحث عنها لانها تحتاجها

سيدي.....
هذا المخلوق الجميل احيانا الصغير الحجم غالبا القصير القامة ممتع الصحبة

انما هو بحر متدفق من الحب والحنان والعطاء والاخلاص والانتماء والمؤازرة

فقـــــــــــــــــــــط

طوقها بذراعيك .. والثم جبينها بتقدير
وانظر كيف تحارب العالم معك .. ومن اجلك

============

..ثـلاثــــة ريــــالات

3-

المواصلات في المكان اللي انا ساكنة فيه وحشة اوي
يعني سكة اللي يخرج ميروحش .. واللي يروح ميخرجش
كدة طول اليوم تقريبا

اللهم الا يوم الخميس لو انت عاوز تخرج ومتروحش مش هتعرف تخرج اصلا..

ولو انت عاوز تروح ومتخرجش مش هتعرف تروح اصلا

معاناة معاناة معاناة

لكن بالليل ( بعد الساعة 10)

سواقين الميكروباص ( وهي وسيلة المواصلات المتوفرة ) ( الي جانب التاكسي )

سواقين الميكروباص الله يكرمهم ..

بعد ما يخلصوا طبعا قعدة القهوة ويتبسطوا

يقررا يروحوا عشرات الناس اللي واقفة في الشارع عاوزة تروح ومش لاقية حاجة تركبها ..

ومستخسرة تركب تاكسي ب 15 جنيه يمكن تجيب بيه حاجة لولادها افضل

الناس _ وانا منهم طبعا _ تشوف السواق من دول قام من علي الكرسي في القهوة
تجري علي العربية بتاعته عشان تقف جمب الباب عشان تعرف تركب

يقرر السواق يروح الناس لكن بشرط
ملحوطة:

الاجرة بتاعة الميكرباص 50 قرش ..

وطبعا السواق بياخد 50 قرش رسميا من ايام ما كانت الاجرة ب 35 قرش

ما علينا ده مش موضوعنا
المهم الشرط اللي بتسمعه وهو واقف علي الباب قبل صعود الناس

- الاجرة جنيه يا حضرااااات
- جنيه ليييييه .. مش هي نص جنيه
- لا جنيه .. اللي مش عاجبه مايركبش
- جنيه جنيه بس نروح

الحمد لله اني جمب الباب .. مهي الناس كتير ومش كله هيعرف يركب
( لكن فجاة واحد يتسحب من لسانه )

- جنيه كتير ياسطي .. حرام عليك
- خلااااااااااص .. بلااااااااش .. شوفوا حاجة تانية تركبوها

( ويتقفل الباب قفلة قوية حازمة متضامنا مع صاحبه )
( عشرات الناس اللي واقفة تنظر نظرة حارقة صاعقة قاتلة مميتة للشخص اللي اتسحب من لسانه وقال كدة )

لسان حالهم بيقول ( اذهب عليك اللعنة .. ثكلتك امك .. انت طلعتلنا منين.. روح يا شيخ )
وتنتشر الناس بعيد عن الميكروباص تضرب بعينها في اتجاه القهوة ..

يمكن سواق تاني بقرر يقوم يشتغل
(وزي ما يكون الميكروباص ده هياخدهم كلهم )
وتتهافت بعض الناس علي السواق الاول تحاول تقنعه

- خلاص يا عم .. اهو رزقك ...
- يللا اتكل علي الله ...
- افتح الباب واستهدي بالله ...

وينظر واحد منهم الي الجمع صائحا
( موافقين يا جماعة )
وقبل ما حد يرد طبعا زي مجلس الشعب كدة ( موافقون )
موافقييييييييييييييين

بنظرة المنتصر .. يتفتح الباب حتة صغيرة ويقف السواق جمبه ..

وكانه عاوز يقرر مين يركب ومين ميركبش
طبعا الشخص اياه اللي اتسحب من لسانه مش هيركب ..

ومين هيركبه؟
السواق مش هيركبه .. يمكن يعمل له شغب في نص الطريق ..

واهو عقاب برده عشان يحرم يتدخل مرة تانية
والناس مش هتركبه .. اهو مكان وهيفضي لغيره

وللاسف ساعات بيكون حد مشي بعيدا عن الميكروباص

وميعرفش يقرب منه تاني ولا يركب مع التلاحم اللي ملتصق ببعضه وبالباب

المهم دي قصة المواصلات الظريفة اللي بتحصل لنا كل ما نحب نخرج
اتعلمت منها الزق جمب الباب لو وصلتله لحد ما المفاوضات تخلص
يمكن اعرف اركب

وسافرت العمرة
حسيت اني سبت كل حاجة وحشة ورايا
مكة والمدينة بلدين عاش فيهم الرسول عليه الصلاة والسلام
نفسه فيهم .. خطواته علي ارضهم
يااااااااااه
قد ايه انا سعيدة

عملت العمرة الحمد لله .. وحبيت اعمل عمرة تانية
قالولي لازم تروحي مسجد التنعيم تنوي الاحرام من هناك

رحت انا وبعض رفيقات الرحلة وكان الوقت ليلا وللاسف الاتوبيسات العامة انتهي موعدها
وهناك ميكروباصات خط سيرها لمسجد التنعيم .. والاجرة ريالين

توجهات لركوب الميكروباص وجهزت الريالين انا والاخوات

وللاسف كان هناك زحام علي الركوب
سالت السائق

- مسجد التنعيم
- ايوة يا ست ..( وحجزني عن الصعود ) وتابع .. الاجرة ثلاث ريالات

ابتسمت.. وسمعت الاخوات يناقشونه في الاجرة وكيف انها ريالين وتصبح ثلاثة
قلت الانسان هو الانسان في كل مكان ..

وصعدت السيارة بسرعة قبل ما حد منهم يتسحب من لسانه .. وافقد مكاني المتميز جمب الباب
وكنت اعلم جيدا من المنتصر في هذه المناقشة

وانتهت المناقشة ودفعنا طبعا 3 ريال والحمد لله عملت العمرة التانية علي خير ...

احـقـاقـا لـلـحـــــــــق

عشان ابقي عادلة وموضوعية ومش متحيزة .. بعد الموضوع السابق

(جميلة رشيقة بيضاء) كان لازم اقول برده دماغ الطرف التاني كان فيها ايه...

طبعا انا الطرف التالت

البنات والستات اللي كلمتهم تحمسوا جدا .. ووافقوا علي الفكرة .. لدرجة ان ناس معرفهمش كلموني واعطوني بياناتهم وظروفهم وطلباتهم وصورهم كمان
بس بشرط ان الكلام كله يبقي عن طريقي والاتفاق عن طريقي لحد المرحلة اللي العريس المفروض يروح فيها البيت يشوفها ..

حتي كلام علي النت لا..
والتليفون لا .. الا بعد اثبات الجدية..
والرؤية علي انفراد طبعا لا .. وانا كمان مكنتش مؤيدة الفكرة دي خالص..
تقريبا كانوا عاوزين يحصدوا النتائج لكن لو فيه مخاطر تقف عندي واشيلها انا

( وده حصل كتير .. بس مش وقته بقي )

المهم انا طبعا تقريبا كنت ساذجة وفكرت انه عادي وهيحصل
الناس هتقول لا ليه مادام المراد من رب العباد هيحصل وهيلاقي العروسة المناسبة
وسوقت للموضوع وبقيت مشهورة اوي في الشغل وفي المنطقة وبين صحابي اني خاطبة !!!

ومكدبش عليكم انا كنت متاكدة اني هنجح

معظم البنات عاوزة تعيش .. تستقل .. مع زوج .. وربنا يرزقها بابناء ترضي بيهم شوقها لغريزة الامومة الفطرية اللي فيها.. وكانوا بيوافقوا علي معظم العروض اللي قلت لهم عليها ..

وكل اللي عاوزاه من الزوج ده انه يكون محب عطوف قادر علي فتح بيت ماديا ويعاملها بالحسني ويتقي فيها ربنا
لكن الرفض كان بيجي من ناحية العريس ...

لكن طبعا مش كلهم ملايكة .. وزي ما فيه رجال كان كل هدفهم انهم يستقروا ويعفوا انفسهم بالحلال .. كان فيه ستات علي العكس .. برده مش عارفة هي عايزة ايه
مانتي مش ممكن تاخدي كل حاجة مع بعض

مستحيـــــــــــــــــل

مكنش يبقي اسمها دنيا

الستات بقي كانت النماذج الغريبة منهم كتير
اشمعني الرجالة تتشرط .. هم يعني مالهمش نفس

واتشرطوا .............!!!!!!!!!!

· لازم يكون مؤهل عالي طبعا .. حتي لو كانت هي بالاعدادية
· والاكيد انه لازم يكون غني ومعاه فلوس
· وياريت يكون دكتور او مهندس او رجل اعمال
· واكيد وسيم وطويل

بس الحقيقة محدش اشترط الحالة الاجتماعية بس لو كان مطلق او ارمل ياريت يكون بدون اولاد

ودي الحالات العامة
غير الحالات الغريبة والشاذة اللي مش مجال الحديث عنها دلوقتي

وطبعا بعد الفشل سببت احباطات كتير وشكلي الاجتماعي بقي بايخ اوي

بس اللي انا متاكدة منه بعد محاولات كتير

ان فعلا فيه رجال كتير كويسين وفيه بنات اكتر كويسين

بس المشكلة المجتمع والتباعد اللي حصل فيه

وطغيان المادة علي التفكير

بس بفكر احاول تاني ..
مش قادرة اشيل من راسي فكرة اني ممكن اوفق راسين في الحلال

ملحوظة :: لو حد عنده اي تجربة مشابهة ياريت يحكيهالي ويبعتهالي علي الايميل .. مع الحفاظ علي السرية المطلقة .. لاني بعمل دراسة عن الموضوع ده .. وهنشر نتيجتها قريبا ان شاء الله

جميلة .. رشيقة .. بيضاء

بعد ما تعرفت علي الانترنت بفترة .. حسيت اني لازم اكون مفيدة واستغله الاستغلال الامثل
ميكونش مجرد لعبة معايا اتسلي وخلاص
حددت اهدافي منه... اتعلم حاجة جديدة .. وافيد غيري ..

فتحت مواقع تعليمية ..صحية ..فكرية .. ثقافية .. وفعلا استفدت كتير
وشفت حاجات اثناء بحثي بالصدفة مكنتش ببحث عنها اصلا ..
زي مواقع الجواز علي الانترنت

والفكرة الالمعية نورت في راسي فورا وقررت اني اكون مفيدة واحاول اوفق راسين في الحلال ..
قريت صفات الناس اللي عاملة اشتراكات .. الصفات كويسة وقررت ابدا

ليه هؤلاء الرجال مش عارفين يتجوزا بشكل تقليدي ..

اقصد مثلا زواج حب او زواج صالون ككل الشعب من حولنا ..

يمكن مشكلة المدنية اللي بعدت الناس عن بعضها .. محدش دلوقتي بقي عارف حد
يمكن مشكلة المادة اللي جعلت الناس بيدورا في دوامة البحث عن لقمة العيش
يمكن مشكلة الدين والتدين اللي بقي نادر واللي بيحب يدور عليه مش بيشوفه
يمكن مشكلة المغالاة في مطالب الزواج .......................الخ

كل دي حاجات جعلت المواقع دي تنتشر
حسيت اني لازم اعمل دور .. وبدأت ..

جبت اجندة .. وكتبت فيها اسماء كل البنات صحابي اللي اعرفهم مش متجوزين

وعملت لهم ((داتا بيز )) بالسن والظروف وطلباتهم وكل حاجة

وحسيت اني خلال سنة هكون موفقة 60 راس في الحلال مش راسين بس

- وعملت توفيق بينهم وبين بعض الرجال اللي علي الموقع

وبقيت ارسل للشخص بما يناسب الصفات اللي هو كاتبها عن نفسه واللي هو طالبها في شريكة حياته
وبعد فترة لقيت نفسي مش عارفة اوصل لحاجة

ابتديت ادرس

ولما دققت النظر .. لقيت المشتركين دول عدة اصناف

الصنف الاول : كاتب مطلوب : جميلة رشيقة بيضاء
طيب يا سيدي الفاضل ..الجميلات الرشيقات .. البيضاوات مش موجود منهم كتير معايا

ايه رايك في جميلة رشيقة قمحاوية ؟؟(( لا))
طيب جميلة بيضاء ممتلئة شوية ؟((لا))
وهكذا فقدت الصنف الاول

الصنف التاني كاتب مطلوب سن مناسب متدينة وبس
طيب الحمد لله
واثناء الحوار معه اجد ان لديه طلب اخر مكتبوش في الملف بتاعه
وهو انه يريدها ....جميلة رشيقة بيضاء!!!!
برده ؟؟؟؟؟؟؟؟؟؟؟؟

الصنف التالت بقي ياكل كذبا ويشرب كذبا ويتنفس كذبا .. وقد يكون متزوج
بس برده رغم كدة عاوز جميلة رشيقة بيضاء

وصنف اخر .. الموقع عنده هو وسيلة لمقابلة الفتيات ..ومن هن ربما يائسات لينصب حولهم الشباك .. بالكلام المعسول المنمق .. وهم كثير ومحترفون .

الصنف الخامس .. صنف يبحث عن قطعة مفقودة في لوحة بازل يرسمها لحبيبة احلامه لعله يجدها .. ومش عايز وسيط ولا خاطبة
وحسيت ان منهم كتير مش عارف هو عاوز ايه بالظبط ..

عاوز الذكية ولا يخاف تكون اذكي منه ...
عاوز الجميلة ولا يخاف عليها ومنها تعمل له قلق ..
عاوز الجدعة ولا محتاج يحس انه هيحميها لوحده ..
عاوز غير ذات الحيلة ولا محتاج واحدة تقف جمبه عند اللزوم..
عاوز الطيبة والحنينة ولا يحس معاها بالملل ..
عاوز الهادية ولا هيشتاق للمناكفة والتجاذب ..
عاوز ذات خبرة ولا هيندم انه مكنش حبها الاول ..
عاوز ذات صفحة بيضاء ولا هيشتاق لصحباته القدامي ..

وبعد مرور ثلاث سنوات علي التجربة
للاسف

فشلت في توفيق راسين في الحلال

حيروني معاهم

لكن الاكيد .. واللي محيرنيش انهم متفقين علي رغبتهم في

الجميلة .. الرشيقة .. البيضاء

للــكــبــــــــار فـــــقــــــط

بدأ الموسم الصيفي .. والموسم الصيفي اسمه موسم صيفي طبعا عشان بيجي في الصيف واسمه موسم عشان هو موسم للترويج رائج جدا

ترويج لكل انواع السلع

طيب ليه مفيش موسم شتوي ؟؟؟ ياتري عشان الشتا برد ؟

طيب مهو الصيف حر !!!!!!!!!!!

طبعا لا ..

ولا فيه موسم الربيع .. ولا موسم الخريف

مش دي فصول برده ومن حقها يبقي ليها مواسم ؟؟

الموسم هنا بقي موسم لانه مرتبط باجازة المدارس طبعا .. وبما انه موسم للترويج يبقي لازم يرتبط بالناس اللي هتشتري اوهتتعامل مع السلع دي

عشان كدة كل صاحب سلعة بيستني الصيف عشان يروج لسلعته وهو ضامن انها هتبيع كويس وتشتغل كويس

السينما .. الفن السابع .. والشاشة الفضية

ياتي الموسم الصيفي كموسم زي كل المواسم بالعديد والعديد والعديد من الافلام .. الافلام السينمائية .. التي يجب علي من يشاهدها ان يذهب الي السينما حتي يشاهدها ..

ومعظم الافلام هذه الايام هي "للكبار فقط "

لانها افلام تناقش مشاكل واقعية جدا وقاسية جدا وصريحة جدا

وقررت الرقابة مشكوووورة انها لاتناسب الاطفال لذلك اجازت عرضها ولكن بشرط ان تكون للكبار فقط !!!!

انا بقي مش عارفة عبارة للكبار فقط دي هدفها ايه .. ساعات بعتقد انها من الدعاية بتاعة الافلام .. لان اي شاب مراهق من سن 10 سنين مثلا لحد سن 18 هيشوف فيلم مكتوب عليه للكبار فقط هيحب يشوفه علي الاقل من باب الفضول

بس هم كدة عملوا اللي عليهم وكتبوا للكبار فقط وخلصوا زمتهم من ربنا

طيب السينما بقي .. هل بتمنع الاطفال والشباب حتي سن 18 سنة اهم يدخلوا افلام الكبار ؟

الاجابة لأ

وانا اعرف بنفسي اطفال وشباب في ثانوي واعدادي دخلوا افلام الموسم الماضي اللي مكتوب عليها للكبار فقط وكانت قاسية جدا في طرح القضايا لدرجة الاباحية

الجديد بقي .. والاكثر غرابة

اعلانات الافلام دي في التليفزيون .. طبعا فيلم للكبار فقط وعاوز زباين يتفرجوا عليه وبيعمل اعلان عنه .. تفتكروا هيجيب ايه في لاعلان

طبعا بيجيب مشاهد " الكبار فقط "

افلام الكبار فقط دخلت البيت خلسة من خلال اعلانتها واصبح الاعلان اللي مدته 60 ثانية بيعرض مثلا 20 لقطة منهم 10 لقطات للكبار فقط !!!!!

وبدل ما الولد اللي عنده 12 سنة هيشوف الفيلم لما يروح السينما ويدخلوه .. هيشوفه كمان اللي عنده 3 سنين قي البيت

ليه بيجيبوا مشاهد الكبار فقط في التليفزيون

هو مفيش رقابة علي الاعلانات دي؟

طيب ازاي مفيش رقابة وده جهاز اعلامي خطير ...

ولو فيه رقابة .. ازاي مشاهد الكبار فقط تخش البيت للكبار والصغار .. اللي عايز يشوف واللي مش عايز يشوف ..

غريبة اوي

طيب ازاي هنحمي الاطفال من رؤية مشاهد العنف والجنس والقسوة والاباحية وعدم الاحترام .. اللي بتتقدم في صيغة لطيفة ومقبولة احيانا ؟؟؟؟؟

مش عارفة ....

مش عارفة رغم اني كنت فاكرة اني هعرف

لكن لما لقيت ولاد اخويا 9 سنوات و5 سنوات بيتفرجوا .. وسالوني ؟؟

-هم بيعملوا ايه يا عمتو ؟ هو اخوها ؟ هم بيلعبوا لعبة ايه ؟

-بصي يا عمتو .. شايفة الحركة دي .. انا جربتها في صاحبي امبارح في المدرسة

واسئلة تانية كتير ..

رديت .. بس هعرف ارد لحد امتي .. ولحد ايه ؟

مش عارفة ....

دول بقي بيتين شعر قريتهم وعجبوني ....

اذا حار امرك في معنيين ***** ولم تدر حيث الخطا والصواب

فخالـف هواك فان الهوي ***** يقود النفس الي ما يعـــــاب