السبت، مايو 02، 2009

اليوم الاخير

-

كان اليوم الاخير من التدريب

وانا كنت اتكلمت قبل كدة عن اليوم الاول منه

اللي مش فاكره يراجعه من هــنـــــا

-

المهم

كنا اليوم ده

اليوم الاخير

هنعمل عرض للمشروع اللي اشتغلنا عليه لمدة 3 شهور ..

-

جهزنا القاعة وجهزنا الملصقات بتاعتنا المدعمة للمشروع

ولبسنا فورمال

واستعدينا تمام

-

كنا متوترين اوي لاننا طبعا هنقول المشروع بالانجليزي

طبعا بقينا بنعرف نضرب مش عيارين بس ..

لا خرطوشة انجليزي بحالها في الهوا

-

احنا كنا حافظين ومركزين بس برده التوتر طبيعي

-

دخل علينا مستر ناجي " مدير المركز اللي بنتدرب فيه " وقال :

-

يا جماعة شدوا حيلكم

النهاردة عندنا ضيوف جايين يشوفوكم

ويشوفوا مجهودكم طول الثلاث شهور اللي فاتوا

وضيوفنا هم مديرين المدارس وناس من الادارة التعليمية

هيقعدوا الناحية دي

( وشاور الناحية الشمال )

-

والمجموعة بتاعتنا طبعا بتاعة المدرسين اللي اشتغلوا معاكم

وانتوا عارفينهم كلهم هيقعدوا في الناحية دي

( وشاور الناحية اليمين)

-

طبعا مديرين المدارس والادارة التعليمية مش بيفهموا انجليزي

هتلاقوهم بيهزوا راسهم كانهم فاهمين

هزوا راسكوا انتوا كمان معاهم كانكم مصدقين انهم فاهمين

-

اتفقنا ؟

اتفقنا

-

دخلوا الناس ..

مجموعة المدرسين اللي كانوا معانا قعدوا علي اليمين

طبعا احنا عارفينهم كلهم

-

ودخلوا الاخرين رجال ونساء وطبعا باين عليهم التربية والتعليم

مش عارفة وشوشهم بتقول لوحدها

-

ابتسموا لنا ابتسامة تشجيع ثم جلسوا علي الشمال

-

المهم

احنا عارفين هنركز مع مين

هنركز مع المدربين بتوعنا اللي هيقيمونا طبعا وهيدونا الدرجات والتقديرات بتاعنا

وبدأنا وانطلقنا وكلنا تركيز

-

بدأنا عرض المشروع

كل واحد قال الجزء بتاعه

وانا بنفسي كنت مسؤولة عن عرض البور بوينت

وكله تمام

-

وفجاة في النص والشغل ماشي تمام وقف العرض في حتة كدة

وكانت زميلتي اياها بتاعة اليوم الاول ( اكيد فاكرينها )

بتقول الجزء بتاعها

-

وقفت طبعا عشان تنتظر العرض عشان يمشي مع كلامها

واندفع المستر يلحقني لاني معرفتش المشكلة فين

-

وانطلقت بعض الاصوات تقدم النصيحة

لان العرض شكله هيبوظ طبعا

-

كملي كملي

-

طبعا النصائح جت من الناحية الشمال (طبيعي)

علي اساس ان الكمبيوتر مش هيشتغل تاني

-

المهم البنت يا عيني اوشكت علي الرضوخ للاصوات

-

كملي كملي

-

وفجاة جاء صوت من النايحة الشمال برده

صوت عالي جهوري ..

-

تكمل ازاي .. مش نستني لما الكمبيوتر يتظبط

هي بتقول ( as we see) مش نشوف هنشوف ايه

بصينا كلنا طبعا لقيناه احد مديري المدارس

-

قال يعني فاهم!!!

-

المهم الامر كله اخد دقيقة واحدة حتي انتظمت الامور

واكتمل العرض علي خير الحمد لله ونال استحسان الجميع ..

فريق الناحية اليمين وفريق الناحية الشمال

-

وقام الجميع ليهنئنا علي حسن الاداء

مبروك

برافو

هايل

ممتاز

-

وجاء دور المدير اياه .. واحنا كنا خمس بنات ..

جاء ليلتقف يد كل منا علي حدة

ويشد عليها بحرارة لتكافح في نزع يديها منه..

-

الحقيقة لقيته بيشد ايد كل واحدة بشكل اقوي من اللازم

كدة حاولت ازوغ منه .. (هي حنة)

لقيته شافني

-

اه.. وانتي ياللي كنتي ماسكة الكمبيوتر

تعالي هنا

الف مبروك

وطبعا لم اسلم من السلام الظريف

-

وبعد الانتهاء هنانا بعض وتعجبنا علي هذا المدير الغريب

-

  • ايه الراجل ده .. لازم يسلم كدة
  • وهو ايه اللي حشره كدة في الكلام
  • تلاقيه كان مدرس انجليزي وفاهم كلمتين حب يتمنظر بيهم
  • بس افرض حد كان ساله علي حاجة كان هيبقي شكله ايه
  • هم كدة بتوع التربية والتعليم
  • ماحنا منهم
  • الله .. ماحنا بنتطور اهو..

-

وفجاة لمحنا المدير اياه راجع

ييييييييي

-

  • امشوا بقي من هنا لحسن حضرة الناظر يجي يحكي تاني
  • اصل فيه ناس كدة بتحب تتكلم مع البنات علي الفاضية والمليانة
  • مش عارفة ليه الموضوع ده منتشر في التربية والتعليم
  • يمكن عشان القطاع ده فيه ستات كتير
  • مش عارفة

-

وقررنا الهرب والتزويغ منه وسط جماعة من الناس من الاداريين بالجمعية ..

-

خلونا هنا جمبكم لحد ما بتوع التربية والتعليم يمشوا

-

  • مهم مشيوا ومبسوطين منكم اوي
  • امال الراجل ده ممشيش معاهم ليه
  • اي راجل
  • ده .. اللي بيسلم هناك علي الناس ( وشاورنا عليه )

(برده شغال يسلم يمين وشمال )

مش يبطل بقي

لازم يفضحونا كدة في كل حتة

  • وده يمشي ليه .. ده مستر ايهاب
  • مستر ايهاب مين .. مش مدير مدرسة ؟
  • لا .. ده رجل اعمال .. ملياردير .. من مؤسسي الجمعية ..وعايش برة مصر علي طول
  • يا سلام ( مع نظرات تعجب متبادلة بينا ) ده !!!
  • ايوة وحظكم حلو انه حضر العرض بتاعكم .. ده بيجي مصر شهر في السنة وعلي فكرة مبسوط منكم جدا
  • يعني بيعرف انجليزي كويس بقي ؟
  • ههههههههههه .. بقولك عايش بين اوربا وامريكا
  • طيب وايه اللي خلاه يقعد الناحية الشمال بس
  • اشمعني يعني
  • لا .. ولا حاجة

-

الحقيقة نسينا العرض بتاعنا

وجت لنا هستريا ضحك علي الكلام اللي قلناه ..

وعلي توقعاتنا عنه

وعليه هو شخصيا

-

فعلا الواحد مش لازم يتوقع حاجة عن شخص ميعرفهوش من تصرفاته فقط حتي لو معجبتهوش ..

المهم الراجل مطلعش بيتمنظر ولاحاجة

هو كان فاهم كويس

-

بس السؤال بقي ..

كان بيسلم بحرارة ملء اليد كدة ليه ؟

-

-

هناك 54 تعليقًا:

MǿиY El-Shreef يقول...

طيب الحمدلله مبروووووووك ع الخطوه النهائيه الحلوه دي

بالنسبه لسوء الظن ههههههههه

والله احنا ظالمين الدنيا كلها معانا

عموما بلاش بردوا نشك ف السلامات :D

سلام ياقمر

micheal يقول...

هههههههههههههههه..مراهقة متأخرة للراجل
ربنا يوفقكم بإذن الله
تحياتي

رؤية يقول...

طيب الحمد لله
ومبروووك
وبعدين انتى لسة قايلة ماينفعش تصدرى احكام من غير ما نعرف الاشخاص
ماتخمنيش بيسلم قوى كدا لييييه؟
يمكن
ويمكن ويمكن كمان يمكن
الاحتمالات كتيرة
وعموما اهو الموقف عدى

تحياتى لك

Khaled يقول...

بيسلم بحرارة علشان ينقلكم إعجابة و نوع من التشجيع أكيد ماكنش يقصد حاجة وحشة لإنة بساطة مش محتاج .. أكيد يعنى .. !!!!

من الخطأ الحكم على الناس من مجرد رؤيتهم

سمراء يقول...

يمكن تكون مصر وحشاه
اللي بيكونوا عايشين برة ويرجعوا حتي في اجازة بيبقوا عايزين يحضنوا كل حاجة في مصر

كل حاجة في الدنيا ليها 1000 احتمال
وبلاش نسئ الظن تاني

بالتوفيق دائما
سمراء

koketa يقول...

مش بحب اساءة الظن خالص

بس ساعات غصب عننا بنصدر احكام غلط

norahaty يقول...

ممكن حنّ لايام زمان؟!
ايام السلام باليد!
ومبروك النجاااااح

hamada يقول...

جروب جريدة الصباح العربي بيت المدّونين العربي
http://www.facebook.com/home.php#/group.php?gid=78080770039

Sonnet يقول...

تحياتى لمدونتك الجميلة
ادعوك لزيارة مدونتى
http://shayunbiqalbi.blogspot.com/

حنعيش يعنى حنعيش يقول...

بدأت اصدق حكاية نظرية المؤامرة دى ...اسلوب كتابتك حميل

maioya يقول...

الحمدلله ان العرض خلص
علي خير
وديما سوء الظن سابق حتي يثبت العكس
يمكن كان بيسلم بحراره كنوع من
انواع التشجيع الحار ليكم
ويمكن عادات البلاد اللي راحها كده
كل شيء ممكن

الازهرى يقول...

اولا مبروك خلصتم لى خير
ثانيا بقى بخصوص السلام ممكن تكون دى عادة عند الشخص فى السلام مش اكتر

تحياتى دوما

أمبارح كان عمرى عشرين يقول...

الحمدلله انك وصلتو للمرحله النهائيه:D

وبا النسبه للسلام خلى النيه السوده دايما الى ان يثبت العكس ههههههههه

ربنا يوفقك ان شا ءالله

بيكر(baker) يقول...

المهم عدت و خلاص
ابقوا البسوا جوانتى بعد كده

محمود جامع يقول...

السلام عليكم
بوست حلو جدا
والحمد لله ان ماكانش تفكيره وحش
والحمد لله كمان طلع راجل 100-100
والسؤال اللي في الاخر بصراحه مااعرفش له جوااب
والسلام عليكم ورحمه الله وبركاته

مهندس مصري يقول...

ما دام الراجل طلع فاهم
يبقى عجبه شغلكم جداً
و كان بيعبر عن إعجابه و فرحته بيكم

صدى الصمت يقول...

مبروك يا قمر وربنا يوفقك وتكملى بنجاح وإمتياز ونشوفك دايماً فى أعلى مكانه
تحياتى

عاشقة الورد

الربان يقول...

تحياتي

امر جيد من حضرتك ان تنبهينا الا نتعجل في الحكم علي الناس....

اما بانسبة للسلام الحار...يمكن يكون الرجل معتاد علي ذلك...و لكن ايضا عليه ان يتعلم كيف يسلم علي المرأة...

في البروتكول...لا يجب ان يبادر الرجل بمد يده للسلام علي المرأة...لكن اذا
مدت المرأة يدها عليه ان يصافحها...
و الا فالكلمة الرقيقة مثل " تشرفنا...فرصة طيبة....حياكم الله...الخ


تحياتي و تقديري و مبروك نجاح المشروع...و بالتوفيق دائما.........

ملكة بحجابى يقول...

ياخراشى عالناس
الظنانين الوحشين
بئى الراجل بيثبت انه انسان حساس بالسين مش بالشين
نفتكرو فيه انه كدة كدة
تؤ بئى
ياناس ظلمتو الراجل الحونين ده
ههههههههههههههههه

حسن حنفى يقول...

للاسف سوء الظن بيسبب مشاكل كتير وبيظلم ناس اكتر

بس سعات بيقي في الزمن ده افضل

عمرو يقول...

مبروك نجاح المشروع و ده مش غريب على بنات مصر اللى و الله بافرح لما بلاقيهم بيثبتوا جدارتهم فى مختلف المجالات
و صحيح لا يجوز الحكم على الشخص من الوهله الاولى و لكن شىء من الدراسه قبل الحكم مطلوب فعلا
اما بقى موضوع السلام بالايد المبالغ فيه فده شىء بيضايق فعلا خاصة لو كان مع بنت بس برضو ارحم من سلام بعض الشعوب العربيه بالبوس 3 مرات و على الكتف او على المناخير او الجبهه :)
مبروك مره تانيه و تقبلى تحياتى

يا مراكبي يقول...

هو تلاقيه بس وحشاه مصر واللي منها فبيسلم عالناس بحرارة زايدة مش أكتر

Dr.A.S. black armor يقول...

الف مبروك على نهاية التدريب والنجاح الكبير
وعموما لو كان الراجل ده فعلا بيعيش كتير بره ... فيه كتير منهم فعلا بيسلموا كده عادى لان زى ماانتى عارفة مش كتير بيفرقوا برة بين السلام على الستات او الرجالة
ربنا يوفقك دايما

فتاه حالمه يقول...

السلام عليكم
اول زياره لمدونتك الرقيقه
بصي يا ستي
الموضوع ايه
الناس الي عايشين بره او الاجانب عموما لما بيجو يسلمو علي حد بيسلمو بحرارة ويضغطوا علي الايد دليل علي السعاده بالمعرفه
ودي معلومه اكيده وبما انه عايش بره فاهو اكيد بياخد طبعهم يعني
فا مش تقلقي وبعدين لو مش عجبك سلامه قوليله مش بسلم علي رجاله وخلاص

كيكى يقول...

اكييييييييييييييييييييييييييييييد
طلعتوا بلدياااااااااااااات فى الاخر
عوووووووووووووووو

أحمد كمال يقول...

مش بتقولي عايش في أمريكا ؟ يبقى الراجل قصده تيك ايت إيزي!

نعكشة يقول...

مش عارفة
بس سواء كان ملياردير
او واحد في وزارة التعليم

مش هتفرق

هوه نوع شخصية واحد

يمكن هوه متعود يسلم عالناس كدة

بس معتقدش يصح انه يسلم على بنات و يفضل قاعد كدة

سلام عليكِ

kochia يقول...

________________________________
MǿиY El-Shreef
________________________________
اشكرك جدا
والله هو مش سوء ظن بقدر انه استشفاف
يعني بيبقي توقع تصرف نتيجة لاحساس وبيحصل
بس طبعا سوء الظن ده طبع وحش جدا
________________________________
تحياتي
________________________________

kochia يقول...

________________________________
micheal
________________________________
اشكرك ..
هو فعلا رطريقته مش طبيعية اوي
________________________________
تحياتي
________________________________

kochia يقول...

________________________________
رؤية
________________________________
الاحتمالات كتيرة فعلا
بس كلها متشابهة
اشكرك
________________________________
تحياتي
________________________________

kochia يقول...

________________________________
Khaled
________________________________
هو فعلا بينقل اعجابه
وميقصدش حاجة وحشة بس شكله كان ملفت
________________________________
تحياتي
________________________________

kochia يقول...

________________________________
سمراء
________________________________
هو رد فعلنا اللي كان مبالغ فيه فعلا
بس تصرفاته اضطرتنا لكدة
________________________________
تحياتي
________________________________

kochia يقول...

________________________________
koketa
________________________________
اساءة الظن فعلا من اسوأ الطباع
________________________________
تحياتي
________________________________

kochia يقول...

________________________________
norahaty
________________________________
الله يبارك فيكي
مش عارفة الحقيقة احدد سبب التصرف لكن انا بتعجب علي عدم القدرة علي الحدس السليم
منورة
________________________________
تحياتي
________________________________

kochia يقول...

________________________________
hamada
________________________________
مرحبا
________________________________
تحياتي
________________________________

kochia يقول...

________________________________
Sonnet
________________________________
اهلا بك
وسوف ازورك قريبا جدا
________________________________
تحياتي
________________________________

kochia يقول...

________________________________
حنعيش يعنى حنعيش
________________________________
وانا كمان مؤمنة بالمؤامرة
اشكرك
________________________________
تحياتي
________________________________

kochia يقول...

________________________________
maioya
________________________________
هو كان بيسلم كنوع من انواع الظرف
________________________________
تحياتي
________________________________

kochia يقول...

________________________________
الازهرى
________________________________
اشكرك واهلا بيك دائما
________________________________
تحياتي
________________________________

kochia يقول...

________________________________
أمبارح كان عمرى عشرين
________________________________
هههههههه .. انا بقول كدة برده
شكرا
________________________________
تحياتي
________________________________

kochia يقول...

________________________________
بيكر(baker)
________________________________
ايوة عدت
الحمد لله
________________________________
تحياتي
________________________________

kochia يقول...

________________________________
محمود جامع
________________________________
وعليكم السلام ورحمة الله
المهم نورتني
________________________________
تحياتي
________________________________

kochia يقول...

________________________________
مهندس مصري
________________________________
هو فعلا كان بيعبر عن اعجابه
والمفارقة في اعتقادنا عنه
وعن المؤسسة التربوية كلها
________________________________
تحياتي
________________________________

kochia يقول...

________________________________
صدى الصمت
________________________________
اشكرك جدا
ومنورة
________________________________
تحياتي
________________________________

kochia يقول...

________________________________
الربان
________________________________
والله يا اخي لقد لخصت كل القضية في كلمتين
اشكرك
________________________________
تحياتي
________________________________

kochia يقول...

________________________________
ملكة بحجابى
________________________________
هو الحقيقة مش مظلوم اوي بس يبدو كذلك
________________________________
تحياتي
________________________________

kochia يقول...

________________________________
حسن حنفى
________________________________
والله سوء الظن وحش حتي في الزمن ده
________________________________
تحياتي
________________________________

kochia يقول...

________________________________
عمرو
________________________________
طبعا ارحم كتير من بوس المناخير ده
خاصة مع انفلونزا الخنازير
________________________________
تحياتي
________________________________

kochia يقول...

________________________________
يا مراكبي
________________________________
ايوة انا قلت كدة برده
مصر وحشاه
________________________________
تحياتي
________________________________

kochia يقول...

________________________________
Dr.A.S. black armor
________________________________
اشكرك جدا
والاسباب المحتملة كتير طبعا وفيه ناس كدة
بتحصل يعني
________________________________
تحياتي
________________________________

kochia يقول...

________________________________
فتاه حالمه
________________________________
انا عارفة طبعا ومقدرة
انا بس الامر لفت نظري
اهلا بيكي ومنورة واتمني اشوفك دائما
________________________________
تحياتي
________________________________

kochia يقول...

________________________________
كيكى
________________________________
بلديات من فين ؟
يمكن الله اعلم
________________________________
تحياتي
________________________________

kochia يقول...

________________________________
أحمد كمال
________________________________
هو كان قصده كدة فعلا بس تقول ايه بقي في النية المصرية السودة
الحمد لله عدت علي خير
________________________________
تحياتي
________________________________

kochia يقول...

________________________________
نعكشة
________________________________
مرحب بيك يا قمر
هو ميصحش عندنا لكن عندهم ؟؟؟ الله اعلم
________________________________
تحياتي
________________________________