الأحد، مايو 10، 2009

التدوين

-

التدوين

ماله وماعليه

-

احب الاحتفالات السنوية

واحب الاحتفالات عامة

وان كنت لا احب المفاجات

-

واليوم سوف احتفل

بمرور عام علي تدوينتي الاولي

كانت الجمعة 23 مايو 2008

-

مالي وما علي

وماله .. وما عليه

-

التدوين

-

الحقيقة مش عارفة اقيم نفسي تماما خلال التجربة دي

لان هناك موضوعات حبيتها جدا وانا بكتبها وبعد ما نزلت..

-

وموضوعات اخري كتبتها وحسيت انها كانت ناقصة شئ ..

ناقصة روح ..

ناقصة اضافة .وكان نفسي تطلع احسن من كدة

-

ومن اجل ذلك سوف اقبل النقد بصدر رحب وبشكل موضوعي

من اي شخص يحب يقول رايه فيا ..

وخاصة الاصدقاء ..

من اول يوم تدوين لحد النهاردة

-

عايزة اعرف ايه عيوبي وعيوب موضوعاتي ..

وايه مميزاتها لو كان فيها مميزات ..

واستمر فيها ولا ابطل واتوقف عن التجربة دي ؟

-

ولو محدش قال عيوب هعتبر ان كلها مميزات طبعا ....

-

اول ما تعرفت علي التدوين ..

كنت فاكرة انه مثل صفحة الاخبار الساخنة من الجرائد

يعني مثلا تعليق علي حدث .. او مظاهرة ..

او راي صريح ومباشر في احد ..

-

وده لاني سمعت عن التدوين لاول مرة باذن صاغية السنة اللي فاتت

اثناء الاحداث الساخنة فقط ..

وقبل ذلك كنت استمع بشكل عابر للاسف

ولا التفت الي الاستفهام عن هذا التدوين

-

لكن لما فتحت وجدت انه ذلك واكثر كذلك واكثر

وجدت خواطر .. وقصص قصيرة ومذكرات ويوميات ..

وتعليق علي الاحداث

-

حب وسياسة واقتصاد وثقافة وادب وعلوم وتاريخ ... الخ

-

قرأت شهرا ثم قررت ان ادلو بدلوي في هذا العالم من باب التجربة

وها انا اليوم اقيمها

-

استطيع القول انني سعيدة بدخولي اليه

لم اندم علي قول اي راي او كتابة اي موضوع

-

بحب فيه الروح الجميلة اللي اراها بين مدونين لم يروا بعض حتي .

حرية الراي فيه جميلة اوي ومساحة التعبير كبيرة

وبحب اسداء النصيحة من اطراف وتقبل النصيحة من الاطراف الاخري

-

وبكره الاغاني اللي بتحمل علي المدونات ..

بصراحة عاملة ليا ازعاج جامد .. لما اكون فاتحة كذا مدونة مع بعض

حتي يحملوا لاقرأهم واحدة واحدة ..

-

واجد تداخل بين اغاني وقران وشعر وكلام و و و

وانا في نفس الوقت بكون فاتحة نجوم اف ام ..

وادور علي المكان اللي اقفل منه صوت كل مدونة او اقفل الصوت نهائيا ..

-

بتعب

-

كمان موضوع التعليق ..

يعني ممكن ناس تعلق عندي لو علقت عندها ..

واحيانا يكون التعليق مجرد مجاملة وتسجيل مرور

-

وممكن ناس تعلق عندي عشان اعلق عندها لما تبقي منزلة موضوع جديد

وناس اخري ممكن تزعل لو معلقتش وتبطل تعلق عندي

-

وناس طبعا تعلق عادي لان الموضوع يستحق التعليق

-

موضوع التعليقات ده اخد حيز من التفكير اكثر من اللازم

-

انا شخصيا اقرا كل ما يصل اللي مدونتي من مدونات

سواء الناس اللي موجودة علي لستة المدونات المفضلة

او ناس مش عندي وبعرفهم عن طريق قراءة تعليقهم عندي او عند غيري

-

والحقيقة افضل اني اعلق في حالتين

اما ان يكون الموضوع مثير للتعليق

يعني تعليقي هيعبر عن رايي اللي هقوله بصراحة

حتي لو كان نقد ( لذلك ارحب بالتعليقات الناقدة بموضوعية )

-

او بعلق عند حد لاني افتقدت موضوعاته

وبتكلم عنده من باب السؤال والتواصل

-

لكن يوجد موضوعات حلوة جدا ..

لكن مش بيكون عندي جديد اضيفه

-

زي مثلا الشعر .. كتير مش بعرف اعلق عليه

ما علينا

-

اقصد يا جماعة اني ارحب بكل التعليقات .. واسعد بها ..

لمن يريد التعليق .. وبس..

-

خلال هذا العام اتعلمت حاجات وعرفت اراء

واستفدت كثيرا من مدونين من خلال مدوناتهم

-

والموضوع ده ان شاء الله ناوية اكتبله تدوينة منفصلة ..

-

كمان خلال هذا العام اعتز جدا بعدة موضوعات كتبتها

مثل

-

مذكرات نتاوي طبعا

ثلاثة ريالات

خيانة المراة

انوثتي في الميزان

ذوي الشوارب

-

وموضوعات اخري وان كنت احس بصلة ما بيني وبين تلك الموضوعات

لذلك احب ان انهي عامي الاول في عالم التدوين بالتهنئة

والتعبير عن سعادتي لدخولي هذا العالم

حتي لو كنت دخلته متاخرة

-

واحب اقول لنفسي

ولمدونتي

-

كل سنة وانتي طيبة

-

-

هناك 68 تعليقًا:

الطائر الحزين يقول...

استطيع ان اقول ان حضرتك كتبت موضوعات فعلا تستحق القراءة وخاصة التى تتعلق بالواقع منها

كلما كانت الموضوعات تمس الواقع كلما كان لها أثر كبير فى النفس وعلى الناس

قلمك يعتبر من الاقلام المميزة

كل عام وحضرتك بخير

ومازلتُ أتعلم يقول...

انتى من الاقلام المميزة فعلا
وانا منتظرة منك مواضيع اكتر
تحياتى حبيبتى

صيدلانيه طالعه نازله يقول...

اولا كل سنه و انتى طيبه و عقبال المدونه التانيه و التالته كمان
انتى على فكره من الناس اللى زرتها متأخر بس عجبنى اسلوبك والقصص اللى بتكتبيها قوى لانها باسلوب شيق و جميل
واحب اعرفك اننا كلنا اتعلمنا حاجات كتير من التدوين و لو قارنتى اسلوبك فى الكتابه فى اول التدوين و دلوقتى حتلاقيه اختلف كتير للاحسن طبعا
ياريت كلنا نقيم التجربه بتاعتنا و نشوف السلبيات و الايجابيات اكيد ده حيفيدنا كتير

همس الاحباب يقول...

كل سنة وحضرتك طيبة
ومدونتك طيبة
وعقبال 100 سنة تدوين
انا فعلا مش متابع حضرتك من البداية
بس قريت لحضرتك كتير
فعلا موضوعات متميزة حقا
بالتوفيق دائما
تحياتى وتقبلى مرورى

رؤية يقول...

واحن بنقولك كل سنة ونتى ومدونتك بخير
ودايما يكون عندك مفيد تقدميه

تحياتى

arsenalwy يقول...

كل سنة وانتى طيبة وعقبال 50 سنة تدوين

ده عالاقل ان شاء الله

koketa يقول...

والله انا كنت بتابع حضرتك نمن قبل حتى ما ادخل التدوين واثرتى فيا جداااا
وبالذات مذاكرات نتاوى استفدت منها جدااااااا
وكل سنة ومدونة وحضرتك بخير

norahaty يقول...

السلام عليكم ورحمة
الله تعالى وبركاته
كل لحظة وانتِ بخير
سنة واحدة فقط!
حسبت انها اكثر من هذا:)
اما الميزة الكبرى التى اراها
فى مدونتك او فى كلامك :فهى التلقائية
والتلقائية الشديدة كمان فى بعض التدوينات (ساعات حين اقرأ لك أحس وكأنى اتكلم مع نفسى!)
اما العيوب :الانقطاع لفترات دون تبرير او حتى اعتذار (لا تغضبى منى)
احب التواصل مع الاخر وإعلامى ان كانت هناك مشكلة ما فلا مانع ولكن ليقول ان هناك فترة لن يكتب فيها.
اما التعليقات فبصراحة :ارحب بها جداً ولو السلام عليكم !ولما لا ؟قلتها مرة لمدون صديق :حينما يقرأ ثم يمضى دون تعليق فكأنما مر بمكتبى عينى بعينى
ثم لم يكلف نفسه قول (السلام عليكم)!
مش حاجة تغيظ برضه؟!
تحياتى لك وكل
لحظة وانتِ بخير.

mohamed ghalia يقول...

كل سنة ومدونتك بخير
كل سنة وإنتى طيبة
بالتتوفيق دايما

OverFOrty يقول...

كل سنه و انتى طيبه و مستمره فى التدوين اما بصفه عامه فمشكله التدوين انه بيحتاج وقت كتير و احيانا ظروف الحياه و العمل لا تسمح بذلك
تحياتى

soly88 يقول...

التدوين يعنى حريه
انك انت اللى بتختارى الموضوع
وازاى تعرضيه
كل سنة’’ تدوين وانت احسن واجمل

الوردة البيضا يقول...

عزيزتي كوشيا
عيد ميلاد سعيد لمدونتك التي أسعدتنا طوال الفترة الماضية بموضوعات قيمة وأسلوب قوي ومحبب للنفس.
وأتفق معك طبعا في نقطة الملفات الصوتية المختلفة التي تنطلق من المدونات بمجرد فتحها، ولذلك فأنا أفصل الصوت عن الكمبيوتر الخاص بي تماما أثناء تصفح مدونات الأصدقاء حتى يمكنني التركيز في المكتوب على صفحاتها.

استمري يا صديقتي وتمنياتي لك بالتوفيق ومزيد من النجاح
تحياتي

الربان يقول...

تحياتي

الف مبروك و عقبال المؤية...وان شاء الله من حسن الي الاحسن دائما....

بالتأكيد لن تكون كل التدوينات رائعة
و كما تحبين و تودين لان الكمال لله وحده
و لانه بدون الاحساس بعدم الرضي (احيانا)...ما كان هناك تطوير او تجويد لما نقوم به...و لم يكن هناك الجديد المفيد...الشعور بعدم الرضي قد يدفع الي الابداع...و ايضا قد يدفع الي
الاحباط...و الفرق يكمن في شخصية الفرد
نفسه...هل هو تواق الي الابداع و لديه الارادة...ام يركن الي الانكسار ...


اخيرا كل الامنيات الطيبة لحضرتك بدوام التوفيق و من نجاح الي اخر ان شاء الله.


تحياتي و تقديري

جريدة الصباح العربي يقول...

جروب جريدة الصباح العربي بيت المدّونين العرب
http://www.facebook.com/group.php?gid=78080770039

Sherif يقول...

كل عام وانت ومدونتك أحلى وأجمل

وتجدين فيها كل محبينك من كل مكان .. صغار وكبار ..

وتجدين فيها مايزيدك ادراكا وعلما وايضا مايضع على وجهك بسمة باقية

كل عام وانت بخير

إبن مصر يقول...

السلام عليكم

كل سنه وانتى بخير وطيبه وبينا ومنوره عالم بلوجر

مشكلة التعليق والنقد ده كان بيسبب لى مشاكل مع بعض المدونين
انا زيك بادئ التدوين منذ عام تقريبا بس قبلك بشهر شوفت كتير واتعلمت كتير بس اكتر ما يستفذنى من مدونات وتلاقينى فيها ناقد لاااازع جدا فى نقدى المدونه اللى بتتكلم على الدين وهى بكلامها ده بتسيئ للدين بغلطات وانقص فى المعلومات وهطذا فلابد انى اصحح وادى صاحب المدونه الفكره الصح واعرفه انه بلاش يكتب الموضوع الدينى لنه بيسبب مشاكل له و للناس الغير متطلعه عليه وممكن جدا حد يتأثر بيه وبكلامه الغير صحيح

كفايه كده التعليق هيطول واناشكلى رغيت كتيييير :)

كل سنه وانتى ومدونتك بألف خير وصحه وعافيه ودايما عالم بلوجر منور بيكى وبالمدونات تبعك

MǿиY El-Shreef يقول...

كل سنه وانتي طيبة ياجميله

عقبال سنين كتير اوي معانا

انا طبعا ماقدرش احكم ع البلوج لاني ضيفه جديده

بس قريت كام بوست وعموما حسيت انهم جمال اوي

وانتي شخصيه تستحق اننا نحبها ونتابعها

ربنا يوفقك ياسكر

(أم البنين) يقول...

كل سنه وانت طيبة وعقبال مليون بوست
ومليون حسنه على كل كلمة خير
يا سموحه

romansy يقول...

ايه يا سيدى الكلام التدوينى
الجامد دا
الف الف مبروك على مرور اول سنه وان شاء الله تكملى ميتين سنه

نعكشة يقول...

صراحة
مش عارفة

يعني لما حد بيطلب مني إني اقيمه ببقى واقفة كدة و مش فاهمة حاجة

لو سألتيني اسئلة مثلا
الموضوع دة كان كويس
آه ولا لأ

عامتاً

مجملاً انا بشعر إن مدونتك كدة محتاجة دماغ وانا داخلاها
بالنسبالي يعني

ولما بكون مش رايقة مبحبش اروحلها معرفش ليه

يعني مثلا ممكن اقعد فترة طويلة مجيش
ولما آجي مبزهقش ولا بمل إني اقرالك كذا موضوع ورا بعض

اسلوبك في الكتابة بيعجبني

و خصوصا المواضييع اللي بتثيري فيها وجهة نظرك
بحس إن عقليتك حلوة قوي
و لو تفتكري سألتك كذا مرة بتدرسي إية و كدة

مذكرات نتاوي كانت بالنسبالي لذيذة قوي في البداية عشان كنت بحب اشوفك وانتي بتتعرفي على شيء جديد

دلوقتي لذيذة لإني بحب الفضول

الكام موضوع بتوع المرأة اللي كتبتيهم كانوا عاجبيني قوي صراحة

ابو شوارب لذيذ بس مش فظيع يعني
هوه و موضوع العصفورة

زاكرتي لا تسعفني إني استرجع كل حاجة قريتها عندك

بس انا بحسك كدة زي طائر كبير جميل قاعد و فاتح اجنحته
بحسك طيبة و قوية و حكيمة من خلال كتاباتك

معنديش نقد سلبي ليكي
بس انا اعتقد إني لما بلاقي حاجة اقول عليها بقول

عامتاً نورتي هذا العالم

سلام عليكِ

Khaled يقول...

كل سنة وانتي طيبة

نهر الحب يقول...

كل كل كل عااااااااااااااااااااام
تودينى وانتى بكل خير
ومنورة دائما عالم التدوين

كيكى يقول...

قبل اى حاجة انا بستمتع جداا والله
بقصصك
دى بجد مش محتاجة اى تعليق
******************
غير كدة كمان بحسك صريحه جداااااااا
والى جواكى بيظهر علطول فى التعليق بجد
***وعلى فكرة دة مش كلام فى الاونطه**
انتى حد محترم ومتميز جداا
وعلى فكرة لسة مقرتش التعليقات عندك عشان اتاثر براءى حد
و
و
و
كنت على لساااااااااااااااااانى
كل سنة وانتى طيبة
لولولوولوولىىىىىىىىىىىىى
يوووووووووو كنت هنسى انا جتلى عقدة من موضوع التعليقات بجد وبقيت اكره اعلق عندى لانى بمجرد ارجع عندى مدونتى الاقى علق عندى!!!
كانه امر واااااجب افففففففففف
عوووووووووو

afew good men يقول...

كل سنة وانتي طية يا كوشي عارف انك زعلانة سف مشغول بجد

اخبارك ايه

اما الكتابة

فانا بحب اقولك ان صحفية شاطرة

الست فرويد يقول...

اول مرة ازورك
بس ده لا يمنع انى اقولك
كل سنة وانت طيبة
:)

تحياتى

MaNoOoSh يقول...

الحقيقة انا زرت مدونتك وابتديت اتابعها قريب قوي
وانا معاكى فى موضوع الاغانى اللى بتتفتح مع المدونة توماتيك دى لانها احيانا بتبقى مزعجة.
كل سنة وانتى طيبة يا قمر وتفضلى تدوني علطول ان شاء الله بمواضيع جميلة ومفيدة

الازهرى يقول...

هو فى الاول كل سنة والمدونة وصاحبتها واصحاب صاحبتها وحبايبهم كلهم بخير وسلام وهناء وفى تقدم مستمر

اما بخصوص العيوب بقى فى كتير والحمد لله
اولا
طيب ثانيا
لااااااا
شكل الذاكرة خرفت مش لاقى عيوب خالص

انما اقولك استنى لما الامتحانات تخلص وهتلاقى القايمة عندك كاملة

تحياتى دوما

طهقان يقول...

كل سنة وانت طيبة
وعلى فكرة انا متابع مدونتك من زمااان بس مقل في التعليقات


عقبال ما اشوفك حاجة كبيرة قوي
تعيشي وتفتكري

Miss. Sosa يقول...

كل سنة وانتي طيبة يا كوشيا

عقبال مليوون سنة :)

مذكرات نتاوية كانت حلوه فعلا
بوستاتك اللي تخص المرأة كان ذكية ووصلتي رأيك بشكل جميل

استمري يا كوشيا انتي تملكي قلم مميز

تحياتي

يا مراكبي يقول...

أولا كل عام وإنت بخير

ثانيا .. بما إنك عايزة شوية نقد .. أنا حاولت البحث لكن وجدت إن المدونة متوازنة إلى حد كبير .. مش متطرفة لأ إتجاه يخليها محل هجوم .. براءة يعني

دمت بخير

micheal يقول...

كل سنة وأنتي ومدونتك طيبين وتفضلوا منورنا علي طول
مواضيعك جميلة بس في بعضها بتبقي طويلة حبتين
ممكن تختصري فيها شوية بسيطة وبرضه حتوصل لنفس المضمون..أنا برضه ساعات فيه مواضيع بتطول مني
:)
علي فكرة أنا كمان مبحبش أفتح المدونة ألاقي أغنية بس برضه فيه مدونات أنا بحبها وبحب أصحابها فبعلق فيها حتي لو حطوا دي جي
:)
تحياتي

kochia يقول...

________________________________
الطائر الحزين
________________________________
موضوعات تمس الواقع ...
اشكرك علي رايك
واشكرك علي مرورك
________________________________
تحياتي
________________________________

kochia يقول...

________________________________
ومازلتُ أتعلم
________________________________
اهلا بيك واشكرك جدا
________________________________
تحياتي
________________________________

kochia يقول...

________________________________
صيدلانيه طالعه نازله
________________________________
وانتي بكل خير .. اشكرك
وفعلا الاسلوب اختلف كتير وارجو انه يكون للاحسن ..
________________________________
تحياتي
________________________________

احمد يقول...

كل سنه وانتى ومدونتك بخير
عقبال 100 سنه
ودائما متألقه

Shimaa Gamal يقول...

كل سنة و إنت طيبة و عقبال سنين كثير حلوة تملى الدنيا فيها كتابة :)

تهنئة متأخرة بس كنت مسافرة و لسة راجعة

kochia يقول...

________________________________
همس الاحباب
________________________________
اشكرك جدا
واهلا بيك دايما
________________________________
تحياتي
________________________________

kochia يقول...

________________________________
رؤية
________________________________
اشكرك جدا وكل سنة وانتي بكل خير
________________________________
تحياتي
________________________________

kochia يقول...

________________________________
arsenalwy
________________________________
50 سنة مرة واحدة
الله يكرمك
________________________________
تحياتي
________________________________

kochia يقول...

________________________________
koketa
________________________________
وانت بكل خير
واشكرك علي مرورك واهتمامك
________________________________
تحياتي
________________________________

kochia يقول...

________________________________
norahaty
________________________________
اهلا بيكي
ومنوراني دايما
واشكرك علي رايك الذي اسعدني جدا
وطبعا لن اغضب منك لانك اولا لم تقولي مطلقا من قبل والان ما يثير الغضب
ولانني طلبت الصراحة والمصدلقية في الراي
وسوف ااخذ برايك في هذا الامر وهو عدم الغياب بدون اعتذار ولو انه احيانا يكون ظرف طارئ ولكني سوف احاول لاحترم الاصدقاء الذيثن يحرصون علي القراءة لي حتي لو كان عددهم قليل
اما الشئ الاخر وهو موضوع التعليقات .. ورغم اني احيانا يكون صعب عليا اعلق ولو بالمرور في موضوع لم يعجبني فكريا .. واحيانا موضوعات لا افهمها
ولكن في هذا اعد بالمحاولة
واشكرك جدا علي راي وهو من اكثر الاراء التي اسعدتني في هذا البوست
سلام
________________________________
تحياتي
________________________________

kochia يقول...

________________________________
mohamed ghalia
________________________________
وانت بكل خير
اشكرك جدا
________________________________
تحياتي
________________________________

kochia يقول...

________________________________
OverFOrty
________________________________
فعلا عندك حق
المتابعة الجيدة فعلا بتاخد وقت كبير
واحيانا لا نستطيع الملاحقة
خاصة في وجود عدد كبير جيد جدا يستحق القراءة والمتابعة
________________________________
تحياتي
________________________________

kochia يقول...

________________________________
soly88
________________________________
اشكرك جدا
ومنورني
________________________________
تحياتي
________________________________

kochia يقول...

________________________________
الوردة البيضا
________________________________
اشكرك جدا علي رايك ويارب دايما مبسوطة
واخيرا اتفق معي احد في حكاية الصوت ده
فعلا بتعب منها
سلام
________________________________
تحياتي
________________________________

kochia يقول...

________________________________
الربان
________________________________
اشكرك جدا وربنا يبارك فيك
وفعلا الاحساس بعد الرضا هو ما يدفعني الي التحسين
ومنور دائما
________________________________
تحياتي
________________________________

kochia يقول...

________________________________
جريدة الصباح العربي
________________________________
تحياتي
________________________________

kochia يقول...

________________________________
Sherif
________________________________
اهلا بيك واشكرك جدا
وانت بكل خير
________________________________
تحياتي
________________________________

kochia يقول...

________________________________
إبن مصر
________________________________
وانت طيب وبكل خير ان شاء الله
وانت مرغتش كتير ولا حاجة
وفعلا التعليق فيه معضلة هي انك تكون مجامل وخلاص او تكون صريح وتعلق وقت ما تحب
وانا شخصيا عملت حاجة كدة بين الاتنين
اشكرك علي مرورك
________________________________
تحياتي
________________________________

kochia يقول...

________________________________
MǿиY El-Shreef
________________________________
اشكرك جدا
ومنورة دايما
________________________________
تحياتي
________________________________

kochia يقول...

________________________________
(أم البنين)
________________________________
ربنا يخليكي ومنوراني دايما
________________________________
تحياتي
________________________________

kochia يقول...

________________________________
romansy
________________________________
الله يبارك فيك
ومنور دايما
________________________________
تحياتي
________________________________

kochia يقول...

________________________________
نعكشة
________________________________
ههههههه
يعني ايه محتاجة دماغ وانتي داخلاها ؟؟
يمكن عشان فيها حاجات محتاجة تفكير ساعات ؟
وعلي فكرة انتي كمان مخك حلو اوي
وانتي من الناس اللي غيروا رايي في اراء الاصغر سنا مع احترامي الكامل
لاني كنت اعتقد ان العقل يزداد ثقلا حتما ودائما مع كبر السن ولكن الحقيقة ليست كذلك وهناك من الاصغر سنا لديهم من العقل والحكمة الكثيير
ونقدك عجبني اوي لانه موضوعي وصريح ومهذب جدا في نفس الوقت
واشكرك عليه جددا
واعتقد انت عرفتي من تاج ما كدة انا درست ايه وبشتغل ايه
مش كدة ؟
متبخليش عليا دائما بزيارتك لاني بسعد بيها
سلام
________________________________
تحياتي
________________________________

kochia يقول...

________________________________
Khaled
________________________________
وانت بكل خير
اشكرك
________________________________
تحياتي
________________________________

kochia يقول...

________________________________
نهر الحب
________________________________
اشكرك جداااااااا
وكل سنة وانتي كمان طيبة دايما ان شاء الله
________________________________
تحياتي
________________________________

kochia يقول...

________________________________
كيكى
________________________________
اهلا بيكي
اشكرك جدا علي رايك
ومنوراني دايما
________________________________
تحياتي
________________________________

kochia يقول...

________________________________
afew good men
________________________________
اشكرك جدا
ورايك اعتز بيه اوي
ومنورني دايما
________________________________
تحياتي
________________________________

kochia يقول...

________________________________
الست فرويد
________________________________
طبعا لا يمنع
وده من ذوقك
اهلا بك
________________________________
تحياتي
________________________________

kochia يقول...

________________________________
MaNoOoSh
________________________________
اشكرك جدا
ويارب دايما تستمتعي هنا
________________________________
تحياتي
________________________________

kochia يقول...

________________________________
الازهرى
________________________________
يارب يخليك ويكرمك
وتشكر علي التهنئة الجامدة دي
ومستنية العيوب اي وقت وروحي هتسمح متخفش
منور دايما
________________________________
تحياتي
________________________________

kochia يقول...

________________________________
طهقان
________________________________
وانت بكل خير
واهلا بيك قارئا او معلقا اي وقت
________________________________
تحياتي
________________________________

kochia يقول...

________________________________
Miss. Sosa
________________________________
اشكرك جدا علي رايك الجميل
واتمني متابعتك دائما
________________________________
تحياتي
________________________________

kochia يقول...

________________________________
يا مراكبي
________________________________
وانت طيب وبكل خير
واشكرك علي متابعتك الدائمة
________________________________
تحياتي
________________________________

kochia يقول...

________________________________
micheal
________________________________
اهلا بيك واشكرك جدا علي رايك
وعلي فكرة انا كمان مش بحب الموضوعات الطويلة
وبحاول اقلل منها كتير بس ساعات مش بقدر عليها بس اوعدك اني احاول
________________________________
تحياتي
________________________________

kochia يقول...

________________________________
احمد
________________________________
وانت بكل خير
واشكرك علي تشجيعك الدائم ليا
________________________________
تحياتي
________________________________

kochia يقول...

________________________________
Shimaa Gamal
________________________________
وانتي بكل خير
واشكرك جدا علي تهنئنك
وحمد الله علي السلامة
________________________________
تحياتي
________________________________

T يقول...

مرحباً / كوشيا
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/1488

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع ونرجو منك مراسلتنا للأهمية على الايميل
Tadwina@gmail.com
لوضع البانر الخاص بنا على الصفحة الرئيسية لمدونتك حتي يستطيع قراءنا في مصر والوطن العربي من متابعة تدويناتك المستحدثة

و لكم جزيل الشكر،

فريق عمل تدوينة دوت كوم.
http://www.tadwina.com

Tadwina يقول...

مرحباً / كوشيا
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/1488

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع ونرجو منك مراسلتنا للأهمية على الايميل
Tadwina@gmail.com
لوضع البانر الخاص بنا على الصفحة الرئيسية لمدونتك حتي يستطيع قراءنا في مصر والوطن العربي من متابعة تدويناتك المستحدثة

و لكم جزيل الشكر،

فريق عمل تدوينة دوت كوم.
http://www.tadwina.com