السبت، ديسمبر 20، 2008

اليوم الاول



-اللغة الانجليزية حاجة بقيت مهمة اوي في حياتنا

واللي ميعرفش يضربله عياراين "انجلش" كدة في الهوا في كل موقف
يبقي مش تمام

مش مثقف..
وكمان الناس تبص له بصة مش ولابد


عشان كدة اول ما اعلنوا عن الكورس ده
جرينا انا وصاحبتي نقدم عليه

كورس ممتاز ومنحة كمان
يعني مش هندفع فلوس

3 شهور هنبقي بعدها ايه ...
بربند


بس الحقيقة احنا الانجلش بتاعنا شغال
مش وحش


وكنا بنعرف نضرب كلمتين في الهوا في المناسبات

عشان كدة لما عرفنا انهم حطونا في "ليفل" 1
زعلنا

بس قلنا ..
المهم نستفيد


رحنا اول يوم متاخر حبتين ..
المواصلات بقي ..


ودخلنا "الكلاس" بكل الاطة طبعا
ماحنا احسن من كل دول

هي لقت كرسي هناك
وانا لقيت كرسي هنا
وقعدنا


المهم المستر كان خلص شوية الكلام العربي بتاع اول يوم دول
ومن هنا ورايح مش هيتكبم الا انجلش


وايه يعني ماحانا تماااااام

انا وهي بصينا لبعض وكلمنا بعض بالعيون

  • - فاهمة
  • - اه فاهمة وزهقانة اوي اوووف
  • - معلش بقي يومين والمناهج هتشد
  • - يابنتي كل الكلام ده عارفينه
  • - بس علي فكرة معانا ناس شاطرين برده يعني مش لوحدنا
  • - طيب


واحنا في نص حوار العيون هذا
سمعنا المستر بيقول بصوت عااااالي



برييييييييييييييييييييييك



  • - الحمد لله "بريك" اخيرا
  • - ايوة انا جعانة اوي
  • - طيب مش نتعرف علي الناس
  • - ياستي لما ناكل ماحنا قدامنا نص ساعة


خرجنا من الكلاس ورحنا الكانتين
نضرب كوبايتين شاي وناكل



وعدي حوالي نص ساعة الا خمس دقايق
قلنا نقوم بقي عشان منتاخرش

بصينا كدة حوالينا نمشبه علي حد نعرفه
مفيش



  • - هم الناس اللي معانا في الكلاس فين
  • - مش عارفة
  • - طيب ندور عليهم ولا هندخل الكلاس اول ناس
  • - طيب وايه يعني عشان ننقي كرسي كويس احسن من بتاع الصبح
  • - اوكي



ودخلنا الكلاس
كل الناس قاعدين

معقولة كلهم جم


وايه الكلام اللي علي السبورة ده ايه ده ...
هم اشتغلوا ولا ايه


وفجاة المستر بص
لينا وقال بصوت جهوري
مع بريق حاد في العينين



You are fifteeeeeeeeeen minutes
late



الناس كلها بصت علينا
احنا بصينا لبعض

وابتسمنا للمستر ابتسامة خجولة
لطيفة زي بتاعة الاطفال كدة

بس ظهر فيها صف السنات كله


البرييك كان ربع ساعة بس
مش نص


مش معقول نكون مفهمناش
اكيد مسمعناش

سحبنا الكرسيين
وقعدنا من سكات
-
-

هناك 97 تعليقًا:

طالب ثانوى يقول...

هيييييييييية اول تعليق بوست تمام وانا فاكر مرلاة العيال صدرونى بصفتى اكتر واحد بيفهم انجليزى والست الاجنبية قعد ت تفولى شارع 28وانا فاكر82 ههة وكان منظرى زبالة وانا مش فاهم الارقام دى بتلخبط فيها
انا بفكر اخد كورس فرنساوى فى الاجازة وهضطر اشتغل علشان ب350جنية فى المعهد البريطانى عاااااااا انتى خدتى منحة لية؟

وكنت بدرس المانى فى2ثانوى

HERO يقول...

ههههههههههه
واضح ان اللغة عندكوا جامدة جدا
عادي بتحصل كتير وربنا يعينكوا بقى على الانجلش

تحياتي

صدى الصمت يقول...

ههههههه
بتفكرينى بأيام ماجابولنا معيد فى الكلية من الجامعة الأمريكية عشان يدينا كورس لمدة 3شهور
بصراحة طفش مننا بعد إسبوع لأنة كان هينسى الإنجليزى ال إتعلمة
ههههههه

مولان يقول...

ربنا معاكي ياقمر

في الايام الجايه

بس انتوا عرفتوا منين ان البريك كان نص ساعه

يوميات مصرية يقول...

المدونة جملية جداً وإسلوب رائع
بالتوفيق والسعادة
khaled dubai tv

EmY يقول...

شكلك فااااهم يا نصه

يعني كل ده و جامد و شاطرين و في الاخر متعرفيش النص ساعه من الربع ساعه

علي العموم مش مهم الاكل و الشاي اهم يعني الانجلش هيطير

ahmed_k يقول...

أنتو معذورين
الراجل قال بريك محددش مده يعني
يعني الغلط عنده هو مش عندكم أنتم
فولا يهمك
المره الجايه أكدوا عليه
بريك ساده ولا هاند بريك

نعكشة يقول...

ٍهههههههههههههه

فعلاً

واضح جداً تمكنكم الفظيع من اللغة


بس دة لسة اليوم الاول

ما بالك بقة اما توصلوا لفل 12
محدش هيعرف يكلمكم

هوه كام لفل صحيح يا اوختي؟؟


اصلي عايزة اخد امتحان التويفل و معرفش عنه معلومات

غير الامتحانات اللي امتحنتها عالنترنت
الجرامر و السمع و القطعة

لو عندك اي معلومات فيديني
و شدي حيلك يا قمر

سلام عليكِ

blue-wave يقول...

ههههههههههههههههههههههه
واضح ان الإنجلش عندكم مفرتك:))))

Lady E يقول...

والله انتوا عسل والانجليش بتاعكو مش اي كلام

وبعدين هانت انتوا في ليفل ون بكرة تبقوا في ليفل 12

ربنا يعينكم عالانجليش اصل انا عارفاه عشرة 16 سنة :) وان شاء الله اشوفكم بتقرأو اولد انجليش لشكسبير وغيره

بأحييكيى عالفكرة الجميلة

ريهام العربي يقول...

ههههههه لا بوست لذيذ بجد

هو فعلا الانجليزي بقي مهم جدا انا كمان نفسي ابقي اخد كورسات

مستنيه منك كل جديد

الازهرى يقول...

العزيزة كوشيا

رائع وضحكت كتير جدا
وبالمناسبة موضوع
واللي ميعرفش يضربله عياراين "انجلش" كدة في الهوا في كل موقف
يبقي مش تمام

كنت بحضرله من فتره علشان اكتب عنه
لكن الظروف اخرته

تحياتى دوما

Manamino يقول...

الله الله الله
ايه ياكوشيا الخيانة والندالة دي
مش لما تعرفي حاجة زي كدة برضة تقولي لاصحابك ولا تروحي لوحدك مع نفسيتك كدة
طيب انا دلوقتي عاوز اخد الكورس ده
اعمل ايه انا بقي دلوقتي
عااااااااااااااااااااا

سمـــــــــــا يقول...

انتى عارفة ان نفس الاطتكم دى انا برضه كنت بتأليطها من فترة ورغم انى بدرس دراسة حرة بقالى ردح من الزمن فى الجامعة الامريكية يعنى المفروض بقى حافظة النظام ومركزة ولسانى شغاااال يونيفرسال فى الانجليزى

فجيت بقى يا ستى من كام شهر كنت داخلة كورسات جديدة والراجل اللى هيدرس كان دمه تقيل اوى على قلبى واول يوم اروحه اتخانقت معاه علشان رحت متأخرة ساعة الا ربع على الكلاس

" وايه يعنى ساعة الا ربع لما اتأخرهم مش يحمد ربنا انى رحت اصلا !"
راجل بارد صحيح :))

المهم بقى انى مكنتش طايقاه وقاعدة عاوجة وشى طول الكلاس وكل شوية ابص فى الساعة اووووف امتى يجى البريك انا هطق

ولما جت الساعة 11 قال برضه موضوع " فيفتين مينتس " وانا راسى والف جزمة انها نص ساعة والولد اللى جنبى يقول فيفتين يعنى ربع ساعة وانا ابص له وفى سرى اقول " ايه المجنون دا فيفتين يعنى نص ساعة طبببعا "

إحم... بس هما بيقولو انهم إختصروا
" فيفتين " من نص ساعة لربع ساعة بس

يعنى العيب مش فينا العيب فيهم هما

هما مين دول بقى ؟؟؟ اوعى تحرجينى وتسألى :))

شفقة هانم واحسان بك يقول...

شوش عنجليزى كويس
خدوها من قصيرها وخليكو فى اليفل وبلاش عنتظة
مش عايزين حد معاكم ينوبكم ثواب

مسعدة يقول...

ياعينى على الانجليزى التمام
لا اتجدعنوا
تحياتى لكى

~*§¦§ Appy §¦§*~ يقول...

حلوه الفكره على فكره حتى لو بتعرفى ده بيقوى اللغه عندك
وتعيشي وتركزي فى الكلام

صبرني يارب يقول...

عقبااااااااالي يارب عقبااااااااالي

عايزه اخد انا كمان كورس خدينى معاكي يا اختي الله يصلح حالك

وميض ابتسامة يقول...

بصرف النظر عن اللمحة الكوميديا وظرافة الموضوع فأنا بأتمنى فعلا انك تأخدى الموضوع جد .. دى فعلا فرصة لاتأتى الا مرة واحدة فى العمر فلا تضيعيها .. يعنى من الاخر بلاش الاطة فالعلم ملوش كبير ...
عموما اناسعيد جدا بمقالك واتمنى لك دوام التوفيق ...

Khaled يقول...

بتحصل كتير الثقة بالنفس زيادة ممكن تقلب لغرور .......

بس دة ماينفيش إنة موقف ظريف ......

kochia يقول...

_________________________________
طالب ثانوى
_________________________________
جميل اوي انك تفكر تاخد كورس والاجمل انك هتوفر فلوسه بنفسك
العلم جميل وبالذات اللغات بتكون ثرية اوي
والكورس بتاعي دي FGF بتاع جيل المستقبل وكانوا عاملينه في السويس من سنتين تقريبا منحة للمدرسين وانا اخدته في اول باتش اول دفعة وطلعت بامتياز في الانجليزي والكمبيوتر .. وده كان اول يوم
_________________________________

kochia يقول...

_________________________________
HERO
_________________________________
ربنا اعانني الحمد لله وخلصته علي خير
دي حكاية قديمة
_________________________________

kochia يقول...

_________________________________
صدى الصمت
_________________________________
لا الحقيقة انا وصاحبتي عملنا شغل كويس جدا بس هي الطلعة الاولي بتكون صعبة شوية
_________________________________

kochia يقول...

_________________________________
مولان
_________________________________
دي حكاية قديمة يا مولان .. والحقيقة البريك احنا حذرناه لاننا اتاخرنا الصبح ومسمعناش .. وقلنا مش ممكن يكون اقل من كدة .. لكنه كان .. وعدت علي خير الحمد لله
_________________________________

kochia يقول...

_________________________________
يوميات مصرية
_________________________________
اشكرك
ومرحبا بكِ
_________________________________

kochia يقول...

_________________________________
EmY
_________________________________
لا والله هو مقالش تقريبا واحنا قاعدين .. وكمان مكناش عاوزين نسمع اول يوم
وبعدين صح هو هيطير
مهو قاعد الحمد لله اهو
_________________________________

kochia يقول...

_________________________________
ahmed_k
_________________________________
مش كدة
يعني الغلط مش عندنا الحمد لله
تعيش يارب ويخليهملك
_________________________________

kochia يقول...

_________________________________
نعكشة
_________________________________
دول مش 12 ليفل يا نعكوشة
دول 4 بس
بتوع ال FGF جيل المستقبل
مش التويفل
والتويفل علي فكرة اعرف ان له مدة محددة صالح للتقديم في الدراسات والحاجات دي
اما عني انا نجحت الحمد لله من سنة ونص
_________________________________

kochia يقول...

_________________________________
blue-wave
_________________________________
جامد والله
بس الحظ كان وحش اليوم ده
_________________________________

kochia يقول...

_________________________________
Lady E
_________________________________
فرصة الترشيح كانت لاربعة ليفل بس وكل واحد يطلع اربعة لفوق يعني اللي يبدأ 1 يخلص 4 واللي يبدأ 4 يخلص 8 وهم 8
والمشكلة اننا كنا متعلمين الاولد بتاع شكسبير ورحنا اخدنا الامريكاني
بس حلو
_________________________________

kochia يقول...

_________________________________
ريهام العربي
_________________________________
اشكرك جدا
وفعلا اللغة مهمة جدا دلوقتي
تحياتي
_________________________________

kochia يقول...

_________________________________
الازهرى
_________________________________
اهلا بيك .. منور
ومنتظرة موضوعك بتاع الانجليزي
_________________________________

kochia يقول...

_________________________________
Manamino
_________________________________
خيانة وندالة كمان .. مرة واحدة مع بعض ..
طيب سد سد متزعلش
انا اخدت الكورس ده قبل ما تتولد انت ..
تاخده معايا ازاي بقي ..!!
_________________________________

kochia يقول...

_________________________________
سمـــــــــــا
_________________________________
ساعة الا ربع .. لا مالوش حق يتخانق خالص طبعا .. علي فكرة انا وصاحبتي برده كنا متاخرين تقريبا ساعة الا ربع ..
وفيفتين يعني نص امال ايه
هو حد قال حاجة تانية!!!!!
المهم يعني العيب فيهم
طيب طمنتيني .. هو ده المهم
_________________________________

kochia يقول...

_________________________________
شفقة هانم واحسان بك
_________________________________
اللي حصل حصل وخلاص
الحمد لله علي كدة
_________________________________

kochia يقول...

_________________________________
مسعدة
_________________________________
اتجدعنا والحمد لله
اطمني
_________________________________

kochia يقول...

_________________________________
~*§¦§ Appy §¦§*~
_________________________________
طبعا حاجة كويسة جدا .. وانا اللي سعيت ليها
وجت سليمة وعدت علي خير .. التلات شهور عدوا علي خير الحمد لله
_________________________________

kochia يقول...

_________________________________
صبرني يارب
_________________________________
للاسف خلصته من بدري وانت روحي متستنيش حد يوديكي ولا يجيبك انتي اتحركي
_________________________________

kochia يقول...

_________________________________
وميض ابتسامة
_________________________________
اهلا بك اخي العزيز
انا الحمد لله اخدته جد جدا واستفدت جدا وعملت نتيجة كويسة واخدت ترتيب كمان علي الباتش كله.. واتكرمت في الحفلة بتاعة تسليم الشهادات
_________________________________

kochia يقول...

_________________________________
Khaled
_________________________________
هي مكنتش ولا ثقة بالنفس ولا غرور .. كان فيه حاجات تانية
بس متفقة معاك .. انه موقف ظريف
_________________________________

Manamino يقول...

ياه ياكوشيا
قبل ما اتولد كمان
لالالالالالا ده انا طلعت صغير قوي
انما برضو ماكانش فيه مانع تستني لما اتولد
ماهو برضو احنا جيران تدوين يعني والجيران ليهم حق علي بعض
ولا ايييييييه
ههههههههههههههههههههههههههه

نعكشة يقول...

العلمُ نورون

يا حلاوة

والهل الي يسأل ميتوهش

الف مبروك عالنجاح :D

تسلمي عالمعلومات يا قمر

سلام عليكِ

يا مراكبي يقول...

ده لسة أول يوم وما عرفتوش الفرق بين الربع والنص

أنا هأكون سعيد لو تاني يوم عرفتوا مكان الكلاس أصلا .. هههه

بس خطك في الإنجليزي فعلا أحسن من العربي .. الكورس فارق برضه

freedom يقول...

ضحكتيني بجد
انا بعرف احكي انجليزي منيح
بس مستحيل احكي بلغة غير مع حد ما بعرفها
لما حد يحكي انجليزي مع حد هوه بيعرف انه ما بيتكلمها بالمره
يروح التاني يسأل الاول ايش حكيت؟
الاول طبعا رح يستهجن ليش التاني مش فاهم عليه
هادا الموقف بستفزني وكاني محصورة بمكتب تحقيق صيني
رجاء مهما تكلمتي الانجليزية بطلاقة لا تعملي هيك مع الناس اللي متلك قبل الكورس

norahaty يقول...

السلام عليكم ورحمة
الله تعالى وبركاته
ولا يهمك
صدقينى
بتحصل
فى احسن العائلات:):)
بوست جميل كوشيا

enjy يقول...

اشطة انا فى انتظار باقى اليوميات

maha zein يقول...

يا غلبي عليكم
اقول ايه بقه
هه
شاطرين
جدعان
بقه ضيعتوا منكم الحصة
ماشي

وكده بتروحوا منح من ورايا
ماشي
ماشي

msafa يقول...

يابنتى انا شوفت ناس طبعا بصفتى انى جاى من بلاد الواق واق شوفت ناس بتتكلم بالانجلش فى احدى معارض الفن التشكيلى فقولت لصاحبى
والله الاجانب حلوين وفيهم شبه من المصرين
قالى اخرس قطع لسانك دول مصرين بس متنكرين
هههههههههههههههههههههههه طبعا كارثه من منطق الامى والجاهل اللى زيى
معلش مصيرى فى يوم اخد كورس فى وشى

معلش انا نشرت نفس التعليق بالخطاء فى التدوينه اللى قبل دى
بشكرك على الزياره

الفارس الملثم يقول...

تعرفي رغم اني برده الانجليزي بتاعي مش وحش اوي , لكن ساعات بحس اني محتاج ادخل كجي 1 عشان ابتدي الانجليزي من الاول اصلي متصور لو اتصادفت مثلا مع طفل ابتدائي في مدرسة لغات اتبقي فضيحه هههههههههه

مستنين التكمله

تحياتي دائما

Dr Ibrahim samaha يقول...

يالا على البركة

عشان تبقوا قاعدين مركزين وعارفين إنجلش مش بتضرباو انجلش فى المناسبات :)

الربان يقول...

تحياتي

كلنا يمكن ان يحدث معنا هذا ان لم نكن منتبهين الي ما يدور و يقال...انشغلت
و صديقتك بلغة العيون...و فقدتما التركيز ...هذا تحليلي لما حدث.

ربنا يوفق الجميع الي ما يحب و يرضي
و يعلمنا ما ينفعنا و ينفعنا بما يعلمنا.


تحياتي و تقديري

الطائر الحزين يقول...

ده اخر بريك هتخدوه فى حياتكم
بريك منكم بريك

kochia يقول...

_________________________________
Manamino
_________________________________
طبعا الجيران لبعضهم
اعمل لك كورس مخصوص متزعلش
_________________________________

kochia يقول...

_________________________________
نعكشة
_________________________________
الله يبارك فيكي وشدي حيلك بقي عشان تاخدي التويفل بس في الوقت المناسب طبعا
_________________________________

kochia يقول...

_________________________________
يا مراكبي
_________________________________
ايوة فارق اهو الحمد لله انك واخد بالك
انا كنت عارفة انه هيبقي له لزمة
_________________________________

kochia يقول...

_________________________________
freedom
_________________________________
مش قادرة افكر ممكن اعمل ايه دلوقتي المهم يجي يوم اتكلم الانجليزي منييييييح زي بلاده يعني .. ممكن ؟؟؟؟
_________________________________

kochia يقول...

_________________________________
norahaty
_________________________________
اشكرك .. وايوة بتحصل طبعا
المهم مشيت الحكاية
_________________________________

kochia يقول...

_________________________________
enjy
_________________________________
طيب ممكن نخليها اسبوعيات ؟؟؟
_________________________________

kochia يقول...

_________________________________
maha zein
_________________________________
اه ضاعت الحصة الاولي والله .. لحد البريك
بعد البريك فتحنا العيون والودان تماااام
وبعدين دي ال FGF
تلاقيكي واخداها خريجين .. صح؟؟
_________________________________

kochia يقول...

_________________________________
msafa
_________________________________
لازم كورس في وشك بقي في دماغك بس لازم فعلا
العربي مش بياكل عيش دلوقتي خالص
_________________________________

kochia يقول...

_________________________________
الفارس الملثم
_________________________________
فعلا .. العيال بتوع المدارس اللطيفة دي بيحلموا بالانجلش وبيتخانقوا بالانجلش .. رغم ان الخناق مينفعش الا عربي
لا تتردد
_________________________________

kochia يقول...

_________________________________
Dr Ibrahim samaha
_________________________________
لا دلوقتي مش هقولك .. بنضرب في المليان
_________________________________

kochia يقول...

_________________________________
الربان
_________________________________
اشكرك .. والمهم اننا تعلمنا التركيز والاهتمام والانجليزي
الي حد كبير
_________________________________

kochia يقول...

_________________________________
الطائر الحزين
_________________________________
ههههههههههه
تفتكر ؟؟
ربنا يستر
_________________________________

WhItE HeArT يقول...

هههههههههههه

انا لو مكانك كنت قلتله هدي اعصابك ياابو احمد صحتك عيب كده

وبعدين البؤين الانجليزي زمانك نسيتهم شفت بأه اخرة التهور

ههههههههههههه

بس بيني وبينك باين عليكم عارفين انجليزي كويس

ههههههههه

تحياتي

romansy يقول...

no
no no

بس


دول تلت كلمات اعرفهم كويس كده ولا لا
ربنا معاكى
وبعدين انتوا كان شكلكوا جعان قوى كده
نسيتوا نفسكوا ولا ايه

ابقى خدى بالك المره اللى جايه

تايهة في دنيا تايهة يقول...

انا برضو بعمل نفسي فاهمة انجليزي وعارفاه لكن اول ما بشوف العيال ولاد خالي اللي في الجامعة الامريكية بيرطنوا عنجليزي بجد مش بتاع امبابة اللي انا بتكلمه بفضل الانسحاب
البوست دمه خفيف جدااا
هعدي عليكي تاني

kochia يقول...

_________________________________
WhItE HeArT
_________________________________
مانا قلتله بعد كدة بس لما اتعرفنا عليه بقي
بس الحقيقة نادرا لما كنت بروح متاخرة بعد كدة وبيكون فعلا غصب عني
_________________________________

kochia يقول...

_________________________________
romansy
_________________________________
اخدت بالي بعد كدة تمام
وابقي اعرف كلمتين تلاتة كمان عشان تبقي 100 100
_________________________________

kochia يقول...

_________________________________
تايهة في دنيا تايهة
_________________________________
ممكن تبتسمي عن اللزوم وتكشري عند اللزوم
ده هيقوم بالواجب
او تبقي مصدعة عند اللزوم برده
_________________________________

فارس عبدالفتاح يقول...

اولاً : ربنا يوفقك

ثانياً : اطلب المساعدة

انا لا اجيد اللغة الانجليزية وبالاصح انا مييح وعملي يتطلب علي في بعض الاحيان ان اتحدث بالانجليزية مع بعض الفلبينيين والهنود وبعض الجنسيات العربية والغربية .

ولكن لضيق الوقت وبالاحرى انعدام اوقات الفراغ طوال 16 ساعة في اليوم .

فبالتالي لا اجد وقت لاخذ كرسي انجليزي او استطيع ان اجد من يعلمني او استفيد منه بعض الشيء .

والحقيقة اني اريد فقط ان اتعلم الحروف الانجليزية وكيفية القراءة والنطق بطريق صحيحة .

فاذا عرف كيفية القراءة الصحيحة والنطق .

استطيع ان اكتب وان اعرف الكثير من معاني المفردات .

فانا لا اريد الانجليزية للمحادث فقط بل كلغة استطيع ان اعتمد عليها في عملي واطور من عملي بشكل افضل .

فارجو ان تصفي لي بشكل عمل ودقيق كيفية تعلم الحروف الابجدية والطريقة الصحيحة للقراءة السليمة .

ان امكن ... مع الشكر

arsenalwy يقول...

كده برده ياكوشيا

مش عارفه الفرق بين فيفتين وثرتين

عادى بتحصل

قضيتى العيد فين فى السويس؟؟

آه وكفى يقول...

هههههههههههههههههه
عشان كده حطوكوا فاول مستوى
حسين بحالتكم
بس معلش بعد شوية هتتعودوا والحمدلله ان اللي بيديكم مصري كانت هتبئى مرهقة اكتر لو مبيعرفش عربي
طب عارفة انا اول مابدأت ادرس ايطالي مكنتش بعرف ولا حتى صباح الخير يعني ايه اللي بتديني كانت ايطالية بتعرف عربي لكن لو دبحتيها ما هتتكلم عشان ممنوع
الغريب بئى اننا كنا بنفهم!
ودلوقتي لما بيديني اي حد ايطالي برضو لما يجي يكلم اي حد من العمال وينطق كلمة واحدة عربي بنستغربه جداااااا
فكل حاجة تعود بعد كده انشاء الله مشهنعرف نتكلم معاكي عربي :0))

آه وكفى يقول...

ايه ده انا التعليق رقم 73 (سيفنتي ثري) p:
أحمدك يارب!

بسبوسة يقول...

احم احم
ايوة اكيد مسمعتوش

ابراهيم يقول...

الالتزام ثم الالتزام ثم الالتزام
اشكرك علي زيارة مدونتي واتمني التواصل الدائم بيننا

rovy يقول...

السلام عليكم

ايه الشطاره دى لا فعلا اللغه عندكم قويه جدا
اكيد المستر هو اللى مش عارف يفهمكم

دمتى بخير

تحياتى

ليكوريكا يقول...

فكرتيني بواحد زميلي

كل ميشوف واحد يسأله

(فكه) بالانجليزي يعني ايه

ولو قالها يبقي ده مولود في انجلترا

مقالهاش يبقي ياااااااااي وسوفاج كمان :)

موضوع جميل ...

كل سنه وانتي بخير

صاحب المضيفة يقول...

جامد قوي الموقف ده


ربنا يسهل وتكملوا الباقي من غير ما تروحوا على اساس انكم خلصتم وهمه لسه شغالين



:):):):):):):)

تحياتي

كيكى يقول...

ههههههههه
هو تلاقى قال بصوت واطى
وحشتينى والله اوى**
عوووووووووووووووو

رؤية يقول...

ههههههه
معلش
بتحصل فى احسن عائلنا امريكا وبريطانيا ما حصلش حاجة
واديكوا اتعلمتوا ينى ايهfifteeeeeeeeeen

تحياتى لك

انا حره يقول...

مووووووووحا

واحشانى ياقمر مش بتبانى ليه

انا كمان ناويه على كورس وربنا يستر من الفضايح ههههههههههه الواحد بيبقى منظره زباله وهوا متنح وفاتح بؤه كدا رغم انه دكتور

kochia يقول...

_________________________________
فارس عبدالفتاح
_________________________________
اولا اشكرك
ثانيا اعتذر بشدةعن تلبية طلبك بالمساعدة .. عشان تتعلم الحروف والنطق لا ينفع اطلاقا ان اعلمك انا لاني غير مؤله لتدريس اللغة كذلك ده محتاج استماع وحوار وده طبعا مش متاح
واذا كان ليس عندك وقت للكورسات او غيره انصحك بشراء سيديهات او شرائط معلمة بمناهج وبتستمع زي الكورس تمام وفي الوقت اللي يناسبك
وربنا يوفقك
افتكر ده افضل كتير
ولا ايه ؟؟؟
_________________________________

kochia يقول...

_________________________________
arsenalwy
_________________________________
مش عارفة الموضوع ضرب معايا شمال
انا مسمعتش اصلا قال كام والله
المهم العيد قضيته في البيت لاني مش بحب اخرج في الزحمة خالص
تحياتي
_________________________________

kochia يقول...

_________________________________
آه وكفى
_________________________________
تفتكري ده السبب ؟؟
الله اعلم
احنا اتعودنا فعلا وخلصنا ونجحنا وكله تمام
اطمني
وعلي فكرة انا درست لغة من معلمين بيتكلموا عربي ومن اخرين مش بيتكلموا
فعلا اللي مش بيتكلموا بيضطروكي انكي تبذلي مجهود وتشتغلي وده اللي حصل فعلا والحمد لله فعلا استفدنا كتير
وايوة انتي التعليقة سفنتي ثري
برافو
_________________________________

kochia يقول...

_________________________________
بسبوسة
_________________________________
انا بقول كدة برده محدش مصدق
مسمعناش
_________________________________

kochia يقول...

_________________________________
ابراهيم
_________________________________
تم يا فندم والله
تحياتي
_________________________________

kochia يقول...

_________________________________
rovy
_________________________________
المستر تعبنا جدا
والزبون غاليا علي حق مش كدة ولا ايه
اهو علي اخر الكورس نسي العربي والانجليزي
_________________________________

kochia يقول...

_________________________________
ليكوريكا
_________________________________
فيه ناي كدة عندها عقد معينة
ربنا يفك عقد الجميع يارب
قول امين
اميــــــــــــــــن
تحياتي
_________________________________

kochia يقول...

_________________________________
صاحب المضيفة
_________________________________
يا سيدي خلصنا وبقينا زي الفل
الحمد لله
_________________________________

مصطفي زهران يقول...

شرفت بزيارة مدونتكم واتمني تبادل الزيارت....بدون اكل او شرب

kochia يقول...

_________________________________
كيكى
_________________________________
منورة يا قمر ووحشاني عووووو بتاعتك
مفتقداها
هو قالها قبل ماحانا نروح او واحنا في حوار العيون
المهم مسمعناش فعلا لا فيفتين ولا ثرتين
الله اعلم
_________________________________

kochia يقول...

_________________________________
رؤية
_________________________________
ايوة دلوقتي لما بسمع كلمة فيفتين في حتة بعرفها علي طول
الله يكرمك شجعتني
_________________________________

kochia يقول...

_________________________________
انا حره
_________________________________
لا الحقي نفسك ..الا الدكتور لازم يكون الانجلش بتاعه مية مية
المهم انت كمان وحشاني جدا وانا بفتح في مواعيدي علي فكرة
اظهري انتي
تحياتي
_________________________________

kochia يقول...

_________________________________
مصطفي زهران
_________________________________
مرحبا بك
_________________________________

حزينه يقول...

عسل اوى
والله انا كمان كنت عايزة اخد
بس لما اخد لازم اخد كورس قبليه
ههههههه

حزينه

kochia يقول...

_________________________________
حزينه
_________________________________
مرحبا بك
وحلوة والله انك تاخدي كورس استعداد للكورس اللي بعده
فكرة كويسة
تحياتي
_________________________________