السبت، فبراير 14، 2009

(9) رجل اعمال ..( من مذكرات نتاوي )

-

هدخل بقي في الموضوع علي طول من غير مقدمات

-

كانت ليلة اخري وجهازي العزيز

-

بقيت محترفة ICQ

-

وبالذات لما قفلوا الشات العمومي بتاع ال smn


ضافني شخص يبدو لطيف

35 سنة ورجل اعمال ( علي كلامه ) وعاقل

ومقالش ليا السؤال اللطيف اللي بقت بفهمه " انتي لابسة ايه؟؟ "


مع اني كنت مجهزة الاجابة طبعا ..


ان بقيت ساعات بنتظر السؤال ده عشان اضرب فوق الاعناق بلا رحمة


لكن فلت من تحت ايدي


تعارفنا وكان كلامنا في حدود المهذب والمعقول ..


بعد اسبوع كدة من التعارف


عرف طبعا اني بشتغل في التربية والتعليم

القطاع اللي مالوش دعوة خالص بالدروس الخصوصية


الظاهر صعبت عليه

قاللي:


- مرتبك كام .


(امممممممم ) (مكنتش عاوزة اقول من الكسوف طبعا )

لكن وايه يعني


- 160 جنيه بالحوافز .. غير المكافاة طبعا


(( دلوقتي طبعا بعد الكادر مرتبي زااااااااااد والحمد لله ))

بقيت 440 غير المكافاة طبعا

المهم وقتها كنت

160


- بيكفوكي


- الحمد لله


- ايه رايك في 1000 جنيه في الشهر


(بصراحة توترت )


- ليه وازاي ؟

( يمكن يقصد شغل وانا الذكاء واللماحة بتبان عليا بسرعة )


- تقابليني مرتين في الاسبوع


اقابلك مرتين في الاسبوع يا .....

( طبعا قلت ده في نفسي وانا احضر لستة شتائم لم اشتم بها من قبل )

(الله يقرفكم مليتوا البلد)


قلتله بكل براءة وسذاجة


- اقابلك نعمل ايه ؟؟


- نتكلم


- نتكلم ؟


- اه


- ماحنا بنتكلم اهو .. هنقول ايه جديد


- الظاهر انتي فهمتيني غلط ..

احنا هنقعد في مكان عام ونتكلم كلام عام ومحترم


- وايه اللي يجبرك علي كدة ..

اكيد عندك معارف تشوفهم وتقابلهم


- انا هختصر ليكي الموضوع عشان تفهمي ..

انا كنت اعرف واحدة وسافرت من 3 شهور للخارج

وعلاقتنا كانت محترمة جدا وبنتقابل بس في اماكن عامة وسط الناس

وانا حاسس بفراغ وعاوز اتكلم مع حد مثقف وكويس


- طيب وليه تعرض عليا فلوس ..

مانا ممكن اتكلم معاك من غير فلوس من باب الصداقة


- لا .. الفلوس دي لازم ..

عشان تبقي بتشتغلي عندي ومالكيش اي حقوق عليا

اوعي في يوم تفكري انك تحبيني ولا تتجوزيني

ومش من حقك تساليني في اي حاجة

انا مش عاوز اتكلم فيها

ولا عيلتي ولا شغلي ولا اصدقائي

هم ساعتين في مكان عام انتي تختاريه

مرتين في الاسبوع وبس


( عبيط ده ولا ايه )

( اصبري يا بت يمكن مريض ومحتاج حد يرشده )

مارسي مهنتك بقي وقوليله كلمتين ينفعوه في الحياه )


- بص يا احمد ( كان اسمه احمد )


الصداقة محدش بيشتريها ولا حد بيبعها ..

اي حد من اصدقاءك ممكن يسمعك ويكلمك من غير فلوس


- لا


- طيب ايه رايك انا عندي استعداد اسمعك

لكن من غير فلوس ..

انا مش ببيع صداقتي وكلمتي بالفلوس ..

صحيح مش معايا كتير

بس عشان تعرف الصداقة معناها ايه


( الحقيقة هو مكنش صديق ولا حاجة

بس حسيت انه مسكين ووحيد وحبيت اديله ثقة في نفسه )



لكن الاخ رفض


رفض رفض قاطع وصمم علي مسالة الفلوس


وانا طبعا مش ممكن هقبل حاجة زي كدة ولا هقابله اساسا


(( اكونش صعبت عليه وحب يساعدني )) الله اعلم ..


قاللي انتي حرة

ولعلمك كتير غيرك يتمنوا الفرصة دي

بس انا اختارتك عشان دماغك كويسة


( هو كان شاف دماغي فين )

(ما علينا)


المهم قفل معايا


وبصراحة قلت اكيد بيهزر

وهيتكلم تاني يعتذر او اي حاجة


فص ملح وداب


ابتلعته الشبكة العنكبوتية

اللهم ارحمنا احياءا وامواتا

-

-

ياما فيكي بلاوي يا دنيا

-

-

هناك 67 تعليقًا:

صبرني يارب يقول...

عارفه يا بت يا كوشيا

انا لو عملت زيك كده وكتبت مذكراتي مع الشات والله العظيم اكتب كتاب

وبعدين تعالي هنا
شات ام اس ان ده كنتى بتدخليه امته

انا كنت بادخله زماااااان اوي

يعنى قولي من حوالي خمس سنين

شوفتينى هناك ؟؟؟

بس دي فريييييده من نوعها بتاعة الف جنيه مرتين فى الاسبوع دي يا اختي

وردة يقول...

ده شكله مجنون
1000 جنيه علشان يتكلم
محنا بنرغي طول اليوم ومن غير فلوس
يابنتي بطلي تدخلي الشات ده وجع ماغ
سلام

الازهرى يقول...

يمكن تكون له تجربة سيئة اثرت على ثقته بالصداقة النقية التى لا تباع ولا تشترى
كثيرا ما تتغير المفاهيم نتيجة حادث معينن او موقف ما
ليكن الله فى عونه
وفى عون الشات ..... منك


تحياتى وعتابى

الازهرى يقول...

على فكرة انا نزلت موضوع اللغة ومحتاج رأيك فيه

علي محـمــــــد يقول...

السلام عليكم

تحياتي ..

والله يا كوشيا انا مستعد اكلمه واقابله بميتين جنيه بس اشوفه بس الشلريب عليه .. :)
اعتقد ان هذا النوع من الناس يمتلك شخصيه ضعيفه جداً .. لأنه مسكين واعتقد كمان انه اصر على تسليمك مبلغ مالي عشان يكون له نوع من انواع الفضل عليك ويعتقد بهذا انه كاسر عينك .. وهذا يسمح له بالتمادي على اللي تقبل انها تقابله .. هو ما يبحث عن صديقه مثل ما قال هو يبحث عن وحده محتاجه فلوس وفي نظره ان المبلغ اللي عرضه مبلغ مغري بالنسبه للميه وستين جنيه بعد ضربه في خمسه تقريباً .. ولو كنتي قلتي له ان مرتبك خمس مية جنيه كان عرض الف ونص .. :) ..الخلاصه اللي عاوز اقولها ان هذا المريض يدور على الفقراء عشان يصتادهم بطريقة الطمع ..يعني يكون هدفه الأساسي انه يلقى بنت ناس تعاني من الفقر ويلعب على هذا الوتر ويطور علاقته فيها شويه شويه .. وهذا مو غريب لانه فعلاً في ناس تفكر بهذي الطريقه وانا قابلت منهم كثير ..يعني ممكن يهدي لوحده جهاز موبايل قيمته 2000 ريال عشان تتوقع في المره الثانيه هديه اكبر ..

مسكين ومريض نفسي هذا الشخص !

في امان الله

نـــــور يقول...

تصدقى كنت اول ماخلصت عماله اقول هقول ايه؟

بس حلوه
كلمه ياما فيكى بلاوى يادنيا
والله مكنتش هلاقى احسن من كده اقوله

يخرب بيت كده

maioya يقول...

هههههههههه
النت فعلا مليان من كل الاشكال
بس يمكن فلوسه كتير وعاوز يخلصها :)

الطائر الحزين يقول...

فيه حد يضيع فرصة 1000 جنية طي انا لو حد قالى اقابلك واديك عرة جنية مش هتردد انى اروح يس اصحى بدرى
=======
ربنا يرحمنا ويسترنا فى الدنيا والاخرة؟
شكل كتابة مذكرات نتاوى كتاب قادم

Heba Sayed يقول...

السلام عليكم

ده مين الاخ ده ..حقيقى عبيييييط

ويستاهل ان الشبكة العنكبوتية تاكله

ههههههههههههه

الله يصبرك على البلاوى دى

No Fear يقول...

السلام عليكم
ربنا يخفف عنه و يهديه

romansy يقول...

يا نهار
عارفه انه صعب عليا قوى
ممكن اللى يعرفك ويتكلم معاكى بيحب دايما يتكلم معاكى ومش يقدر يسبك ابدا
علشان دماغك كويسه على رايه
بس دى على فكره بتبقى احساس بس
مش اكتر
بس حته الفلوس دى
لا طبعا

kochia يقول...

_____________________________
صبرني يارب
_____________________________
الشات بحر واسع .. بس مش كل الناس قابلت فيه كل انواع السمك
وشات الام اص ان كنت بدخله زماااااااان فعلا من يجي 5 سنين ومعظم االحداث دي ايامه
بس مش كدة
محدش كتير هيقابل السمكة او 1000 جنيه دي
يلا بقي
رفست النعمة
----------------------------------
تحياتي
_____________________________

kochia يقول...

_____________________________
وردة
_____________________________
هو فعلا عنده مشكلة نفسية ما لكن انا مقدرتش اعرفها ولرا قدرت احل ولو حتي فتفوتة منها
ولو اخدتي بالك هتعرفي ان الكلام ده قديم .. والحكاية دي انا قلتها قبل كدة
بس علي فكرة لو بعمل شات دلوقتي زي زمان .. اعتقد هعرف ارد علي معظم الناس الا المستحدثين منهم
----------------------------------
تحياتي
_____________________________

هانى زينهم يقول...

سبحان الله هو لسة فى ناس كدة ؟؟؟ انتى بتجيبيهم منين دول ؟!!
لا حول ولا قوة الا بالله والله انتى ليكى الجنة على اللى بتشوفيه ده .

Noly يقول...

yah ya Kochia el net mlyan to7af kter, kowayes mnk asln enk lesa btdkholy w tetklmy m3a el nas el ghareba dy.

3la fekra bghad el nazr 3an moratabek eza kan kber wla la2, el mohm enk tekony bt7by shoghlk w 7asa enk bte3mly feh haga kowayesa, w moratabek dah haga leky msh ly 7ad tany.

sebek enty ahm haga el seka bel nafs :) rbna yowafa2ek ya gamila :)

kochia يقول...

_____________________________
علي محـمــــــد
_____________________________
وعليكم السلام
فين احنا دلوقتي وفين هو .. اللع اعلم فين اراضيه .. انا بكمته من اربع سنين مثلا..
والله كلامك ممكن يكون فيه شئ من الصحة .. رغم اني لم الاحظ ضعفا في شخصيته في الحديث سوي في هذه الجزئية الغريبة
وعلي العموم هو رمي في حتة غلط وجت سليمة الحمد لله
ربنا يشفي الجميع

----------------------------------
تحياتي
_____________________________

kochia يقول...

_____________________________
Habiba
_____________________________
اهي دنيا .. فيها كدة وفيها كدة
وللاسف ادينا عايشين وبنقابل
----------------------------------
تحياتي
_____________________________

kochia يقول...

_____________________________
maioya
_____________________________
ايوة يمكن
اللي معاه قرش محيره .. يجيب حمام ويطيره
----------------------------------
تحياتي
_____________________________

KHALED يقول...

مش خايفة تتحسدى لما تقولى إنك بتاخدى 440 جنية ........؟؟؟؟؟؟؟؟؟؟؟

تعرفى إن قيمة المبلغ دة من خمس سنين بس كانوا حوالى 200 جنية

تفتكرى بتحطى عليهم كام علشان تقدرى تروحى و ترجعى من الشغل بس

أعتقد إن اللى بيشتغلوا فى التربية و التعليم ليهم الجنة بدون حساب ..
بس علشان الصبر

إيمان قنديل يقول...

دايما بوستاتك حلوه زيك ، وبتشدني للآخر تعرفي أنا كنت بأفكر اعمل بوست واحد برضه عرض على واحده صاحبتي انه يتجوزها عرفي مقابل 5 الاف جنيه في الشهر

وكان برضه رجل أعمال وعايز يتجوز على مراته، وطبعا لما حكت لي الموضوع بعد رفضها ليه قعدنا يوم كامل نضحك ونتريق للصبح

إيمان قنديل يقول...

والله الموضع ظريف ههههههههههههه



يعني ممكن واحده مرتبها قليل أو مابتشتغلش تشتغل مكلماتيه برت تيم ،يعني زي بيبي سيتر بس للشحطه الكبار موش للأطفال ، وهي ممكن تاخد لها اتنين تلاته من دول في الأسبوع ،وأهي تزود دخلها برضه


اهو كلام والسلام


هههههههههههههههه

فعلا بوست حلو

حسن حنفى يقول...

ههههههههههه

1000 جنيه

سبحان الله والله يا ما في الدنيا

مرتين في الاسبوع هو درس

وبعدين الدرس مش بالف جنيه في الشهر

غريبه

سبحان الله

kochia يقول...

_____________________________
الطائر الحزين
_____________________________
كانت فرصة من كدة .. انا برده قلت كدة بس انت فاهم بقي جبانة ..
والله ان شاء الله بفكر في حكاية الكتاب دي ..
----------------------------------
تحياتي
_____________________________

kochia يقول...

_____________________________
Heba Sayed
_____________________________
تفتكري فعلا الشبكو اكلته ولا هو اكل حد تاني من الشبكة وانا ربنا انقذني ؟؟؟
مش عارفة
----------------------------------
تحياتي
_____________________________

kochia يقول...

_____________________________
No Fear
_____________________________
ايوة ربنا يهديه يارب
----------------------------------
تحياتي
_____________________________

kochia يقول...

_____________________________
romansy
_____________________________
والله ساعتها صعب عليا انا كمان جدا وحسيت انه وحيد وحزين ومحتاج فعلا عطف واهتمام .. لكن مخه ناشف

----------------------------------
تحياتي
_____________________________

kochia يقول...

_____________________________
هانى زينهم
_____________________________
والله مش بجيبهم .. هم اللي بيجيبوني
نصيب بقي
ربنا يشفي الجميع
----------------------------------
تحياتي
_____________________________

kochia يقول...

_____________________________
Noly
_____________________________
لا الحقيقة انا مش لسة بدخل واتكلم .. المرحلة دي خلصت من شوية كدة
وموضوع المرتب .. طبعا لا يكفي اني اكون بحب شغلي ولازم مرتبي يسد احتياجاتي والا تكون شغلتي سواء بحبها او بكرهها ملهاش لزمة
لاني لو ليا دخل تاني يبقي الدخل التاني كفاية ولو ماليش يبقي كدة لازم اشوف شغل اخر
ومش لطيف طبعا في سني ده اني اخد من بابا مصروف علي مرتبي
ما عينا
ده مش الموضوع
منوراني
----------------------------------
تحياتي
_____________________________

kochia يقول...

_____________________________
Khaled
_____________________________
خايفة اتحسد طبعا
مانا قربت المعوذتين قبل ما انزل البوست

وانا فعلا ايام ماكنت باخد 150 جنيه كانول بيكفوني اكتر من دلوقتي
وربنا يخلي بابا
وبعدين بلاش بقي تفكرني يا خالد انا يادوب تاقلمت نفسيا!!
الحمد لله
حمارتك العارجة تغنيك عن سؤال اللئيم
وما اكثر اللؤماء( صح الجمع ده ) هذه الايام
----------------------------------
تحياتي
_____________________________

kochia يقول...

_____________________________
GHARAM
_____________________________
ربنا يخليكي واشكرك جدا .. ده شرف ليا
والدنيا فيها كل نماذج البشر .. ولازم نتعايش
----------------------------------
وهي شغلانة حلوة علي العموم بس لناسها بصراحة
وانا مش ناسها
بس حلوة فكرة اتنين تلاتة منهم
اهو كدة يبقي تستاهل الحكاية
فاتت عليا دي
معلش بقي
ربنا يبعت
منوراني
----------------------------------
تحياتي
_____________________________

kochia يقول...

_____________________________
حسن حنفى
_____________________________
اه
1000 جنيه من خمس سنين
كانت ليها شنة ورنة وبتجيب شبكة عروسة
صح والله سبحان الله
----------------------------------
تحياتي
_____________________________

Unknown يقول...

انتي بتجيبي الناس دي منين
بس فعلآ النت مليان عالم مرضي دماغهم لاسعه

بعدين بطلي سوء نيه الراجل عايز حبة حنان مش اكتر

ده تاخديه و تطلعي بيه علي ابو العزايم بسرعه او العباسيه

هابي فالنتين يا قمر

(صندوق الدنيا) يقول...

إحمدي الله الذي نجاك من هذا الرجل يا أختي
لا أدري ماذا أقول
وهل المريض يرتب كلامه هكذا
ويخطط هكذا
ويستدرج البنات هكذا
ويختفي عندما ترفض
أظن أنه ليس مريضا نفسيا
لا حول ولا قوة إلا بالله

وميض ابتسامة يقول...

انا مش قادر اصنف الاخ احمد ده تحت أى بند .. لكن اللى انا متأكد منه انه مريض نفسيا .. وبيعانى من عقدة معينة الله اعلم بيها .. وزى انت ماقلت الدنيا ياما فيها .. حتى طريقة عرضه للموضوع فيه مادية باحتة .. بنظام المساومة والعرض الاقوى ..
شخصية سيكوباتية .. لكن شبه مهذبة

عموما هو لحق نفسه قبل بتر رقبته وأكيد هو صاحب مبدأ لانه لم يتكلم تانى

واخيرا ما تسيبك من ICQ ده لانه مش جايب غير وجع الدماغ والمرضى النفسيين دول اللى مش وراهم غير انت لابسة ايه والاسئلة البايخة دى .. ده مجرد اقتراح!

ربنا يصبرك ياعزيزتى لغاية منشوف ايه اخرتها ؟؟؟؟

مذكرات مشاغب يقول...

اعتقد ان احمد ده كان بيعاني من الحرمان وهو صغير ولا حاجه
او يمكن يكون كل كلامه ده من وحي خياله وانه ولا راجل اعمال ولا حاجه
بيهجص وخلاص
والف جنيه ليه؟؟؟
مش مستريح انا لموضوع يقعد ويتكلم دي
واشمعنى مرتين في الاسبوع
ليه مش اكتر ولا اقل
وليه مش عايز صداقه وعايز علاقه بين رئيس ومرؤوس
بصراحه الموضوع ميطمنش وانتي طبعا جادعه في موقفك

تحياتي

قيس بن الملووووح يقول...

"عندما يمضي بنا قطار العمر تسقط منا الكثير من التفاصيل الصغيرة التي قد تحول حياتنا الي براكين في الوقت التي لا تتحمل فيه الهزات البسيطة"

FOrty يقول...

فكره مجنونه ممكن يروح لدكتور نفسى يسمعه بالالف جنيه بتاعته
على فكره فى اليابان بنات الجيشا بيقوموا بالدور ده و بيكونوا على درجه عاليه من الثقافه برضه بس اكيد بيكلفوا اكتر من الف جنيه
هههههههههههه
تحياتى

ahmed_k يقول...

اللي معاه قرش محيره
يشتري طير ويطيره

بالتأكيد هذا الشخص واحد من أتنين
يا له أغراض خفيه من وراء هذا العرض
يا دماغه لاسعه
ولا كان حيدفع ولا حاجه أهي وسيلة إغراء بيستخدمها كتير يا صابت يا خابت

ربنا يهدي شبابنا للأصلح لهم بدل الحوارات الفارغه دي

تقبلي خالص تحياتي

صاحب المضيفة يقول...

انتي كده من حقك تضربي فوق الاعناق بلا رحمة بجد

:):):):)):)


انتي فعلا عجايبك لا تنتهي على النت

:):):):):)


كل التحية والاحترام

غير معرف يقول...

ههههههههههههههه

صحيح اللى يعيش ياما يشوف

واللى يدخل ع النت

يشوف أكتر ...

يا مراكبي يقول...

بجد بجد بجد: تجربك في الموضوع ده غير نمطية أبدا

ممكن تشوفي كده ياترى الألف جنيه بتاعته دي زادت زي ما إنتي زيدتي كده من 160 لحد 440 وألا لأ؟

يعني بالنسبة والتناسب المفروض يكون العرض بتاعه بسعر اليوم يوصل 2750 جنيه .. مش وحشين برضه .. وألا إيه؟

هههههه

kochia يقول...

_____________________________
EmY
_____________________________
اولا هم اللي بيجيبوني مش انا
والنت هو الدنيا
اللاسع هنا وهنا
واللي يحمل منهم يشيل
ةايوة فعلا هو كان عاوز حبة حنان
زمانه نزيل هناك دلوقتي
الله يشفيه
----------------------------------
تحياتي
_____________________________

kochia يقول...

_____________________________
(أم البنين)
_____________________________
الحمد لله علي كل حال
لا اعرف علي وجه الدقة اذا كان مريضا ام لا .. لكن هذا ما شعرت به اثناء التكلم معه
ربنا يشفيه اذا كان مريضا
----------------------------------
تحياتي
_____________________________

kochia يقول...

_____________________________
وميض ابتسامة
_____________________________
انا ارجح برده انه مريض نفسيا
وعنده عقده فعلا
وهو كان مهذب جدا علي فكرة ومقالش اي كلمة فوق الحدود .. او تحتها خالص
اما الاي سي كيو انا سبتني منه من زمان
انت لسة مش واخد بالك
المهزاخرتها خير ان شاء الله يارب
منور
----------------------------------
تحياتي
_____________________________

kochia يقول...

_____________________________
مذكرات مشاغب
_____________________________
يمكن بيهجص وخلاص
الله اعلم
اهو كلام
وتساؤلاتك كلها دارت في ذهني .. ولم اجد لها حلول
لذلك طبعا رغم انه صعب عليا وحسيت انه نفسيا تعبان لكن لم يكون في امكاني مساعدته
----------------------------------
تحياتي
_____________________________

kochia يقول...

_____________________________
مذكرات مشاغب
_____________________________
يمكن بيهجص وخلاص
الله اعلم
اهو كلام
وتساؤلاتك كلها دارت في ذهني .. ولم اجد لها حلول
لذلك طبعا رغم انه صعب عليا وحسيت انه نفسيا تعبان لكن لم يكون في امكاني مساعدته
----------------------------------
تحياتي
_____________________________

ReEm يقول...

هههههههههههههههه

بجد ده مش ممكن يكون انسان طبيعي شكله

النعمة كترانة عليه

قال 1000 عشان نتكلم بجد الدنيا مليانة ناس غريبة

صدى الصمت - عاشقة الورد - يقول...

والله ال يعيش ياما يشوف وال يتكلم شات يشوف ويعرف أكتر
ربنا يعينة على دماغة ونفسة
تحياتى

mohamed ghalia يقول...

هههههههههههههههههههههه
الدنيا ياما فيها والله
دمتى بكل الود

م/ الحسيني لزومي يقول...

اساس مشكلتنا اننا مستهلكي حضارة لا صانيعيها فنحن نمتطي السيارة كما نمتطي الدابة ونحاول ان نقهرها ونذلها في عامها الاول وبنفس الاسلوب البربري نستعمل جهاز الهاتف لاغتيال الزمن في حين انه وجد لانقاذ الزمن.
هذه العبارة رد بها الشاعر نزار قباني علي المذيع مفيد فوزي عام 1974 عندما سأله المذيع
تري هل نصل يوما ما الي مجتمع الكمبيوتر؟

kochia يقول...

_____________________________
قيس بن الملووووح
_____________________________
ايه اللي هيخلي التفاصيل تحول حيلتنا الي براكين مع مضي قطار العمر ؟؟؟
مش فاهمة منك حاجة !!!!!!!!
----------------------------------
تحياتي
_____________________________

kochia يقول...

_____________________________
OverFOrty
_____________________________
ممكن جدا ..
او ممكن يروح اليابان
يمكن ياخدوا اكتر من 1000!!!
اشكرك
----------------------------------
تحياتي
_____________________________

kochia يقول...

_____________________________
ahmed_k
_____________________________
انا بقول دماغه لاسعة
ولا ايه ؟؟؟
منور
----------------------------------
تحياتي
_____________________________

kochia يقول...

_____________________________
صاحب المضيفة
_____________________________
اهي عجايب فعلا ..
بس المثل بيقول اللي يمشي ياما يشوف
والنت ده المشي في المكان
منور
----------------------------------
تحياتي
_____________________________

kochia يقول...

_____________________________
سمو الامير
_____________________________
اه فعلا ..
اهي تجارب بنشوفها
----------------------------------
تحياتي
____________________________

kochia يقول...

_____________________________
يا مراكبي
_____________________________
لا العرض بتاعه بسعر النهاردة معقول كدة
وكمان في ظل الغلاء يبقي هو كان كريم كمان معايا
انا موضوع التجارب
فبجد .. كل اصدقائي وصحابي بيقولوا كدة
اني بقابل نماذج غريبة
وساعات بيقولولي انتي بتوافقي تكلمي الشخص الغلط
المهم فعلا .. التجارب غريبة جدا
----------------------------------
تحياتي
_____________________________

kochia يقول...

_____________________________
Reem
_____________________________
ربنا يشفي
علي رايك
ناس غريبة .. بس ربما يكونوا شايفين اننا الغرباء
----------------------------------
تحياتي
____________________________

kochia يقول...

_____________________________
صدى الصمت
_____________________________
فعلا ربنا يعينه علي نفسه
الشافي هو الله
----------------------------------
تحياتي
_____________________________

kochia يقول...

_____________________________
mohamed ghalia
_____________________________
حقا ما قلت
اشكرك جدا علي وجودك
----------------------------------
تحياتي
____________________________

د. ياسر عمر عبد الفتاح يقول...

قد كده مجرد إن حد يلاقى ناس يتكلم معاهم شىء غالى
قد كده الفراغ ممكن يعمل فى الناس البدع

قصة عجيبة جداً

kochia يقول...

_____________________________
م/ الحسيني لزومي
_____________________________
تري هل نصل يوما ما الي مجتمع الكمبيوتر؟
بما اننا نسير سوف نصل يقينا .. ولكم متي ؟؟ هذا هو السؤال الحقيقي
ارجو الا يكون بعد فوات الاوان
----------------------------------
تحياتي
_____________________________

kochia يقول...

_____________________________
د. ياسر عمر عبد الفتاح
_____________________________
ربما يكون الفراغ هو المشكلة
ولكن بالتاكيد ليست الاساسية
لان اي فراغ قد يعالج بطرق كثيرة كالعمل والرياضة والسفر وتنمية المواهب ..
فقد الصديق ربما هو المشكلة
----------------------------------
تحياتي
_____________________________

روووومي يقول...

سلام عليكم
ايه ده؟

هو فيه كده ؟؟؟؟؟

دي اخر حاجة كنت اتوقعها تحصل
ال صداقة بالفلوس ال
للدرجة دي الناس مابقتش بتحس
والفلوس دخلت في كل حاجة؟
صبرنا يارب

تحياتي لكي يا كوشيا

غير معرف يقول...

ههههههههههههه

دا حكايته حكاية معقول يدفع الف جنيه
كدا لمجرد مقابلة ليكون غرضه مش شريف
ياختي كويس انه الشبكة ابتلعته وريحتك منه
مدونتك جميلة اووووي

اختك : نوارة

doaa يقول...

يا عيني ده حالته صعبة قوي
بس بجد هو أكيد في حاجة غلط أو خلل معين مش مفهوم ياإما برده نيته وحشة بس مستني لما البنت تأخد عليه

تحياتي لك يا جميل

Unknown يقول...

اعتقد كوشيا انه كان بس بيتكلم
ووقت التنفيذ ما كنتيش حتلاقيه
لكن فعلا فعلا كتير ناس على الشات
عايزين فقط يتكلموا زى مابتقولى
مش عارفة لكن كتير فقط عايزين كلام
من مستوى معين(مش ضرورى خارج عن الادب)
لكن معرفش ساعات تحسى فيهم نوع من
الافتقاد للتكلم فى اشياء (وبرضة
مش ضرورى خارجة عن حدود الادب )
بالعكس ساعات بيبقوا مؤدبين جدااا
وطبعا ساعات تانية بيبقى (جر رجل)
واختبار و(جس نبض)يمكن (يعرف يصطاد)

Unknown يقول...

انما انتى فين كوشيا ؟
ليه غايبة من زمان كده؟
ارجو ان تكونى والاسرة بخير
ومنتظرررررررررررررررررررينك.