الأربعاء، يونيو 25، 2008

..غـريـزة الاصــلاح



ربنا سبحانه وتعالي خلق الانسان بعدبد من الغرائز التي تعينه علي الحياة

زي غريزة الجوع.. لو مش هيجوع وبفكر ياكل هيموت ..
وغريزة العطش طبعا

وغريزة الامومة اللي من غيرها ربما الامهات يزهقوا من زن ولادهم ويرموهم
كمان غريزة الجنس اللي برده ربنا خلقها في الانسان للحفاظ علي الجنس البشري


وغيرها اكيد من الغرائز والحاجات اللي قالها العالم " ماسلو " الشهير
وحطها في الهرم بتاعه اللي سمي بعد ذلك هرم ماسلو

وطبعا من انبل هذه الغرائز هي غريزة الامومة
شئ جميل وحساس ومختلف عن كل حاجة تانية

الام دي بتضحي براحة ووقت وصحة واكل ونوم وكل حاجة بمنتهي السعادة ..
عشان خاطر الولد الصغير ده اللي وجد في الدنيا عاجز عن كل شئ

وبعدين الولد بيكبر وامه تفضل تراعيه مختلف انواع الرعاية

ومع تطور الجنس البشري تطورت غريزة الامومة ..
وتوسعت مع توسع المخاطر الدنيوية اللي ممكن تصيب الولد وممكن تفسده
ولو فسد هيصيع مجهودها معاه في تربيته

وفجاة وصلت فكرة الاصلاح وبقت جزء من غريزة الامومة
ومع تطور الجنس البشري تطور الاصلاح ..
وانفصل عن غريزة الامومة .. واصبح غريزة بحد ذاته..

((غــريــزة الاصــــلاح))

تتبناها المرأة .. بصفتها حزء من غريزتها الاثيرة الي نفسها ..
وبصفتها غريزة تميزها عن الرجل باختلاف الغرائز الاخري التي يشترك فيها مع المراة...
الامومة

وكل هذا اخذ في التطور الانساني حقبة زمنية قصيرة

والان غريزة الاصلاح هي غريزة متاصلة في اعماق معظم النساء

وفجأة .. وبالمقدمات او بدونها ...
اعطت المرأة الحق لنفسها "كأم تاريخية" ان تصلح الرجل "كابن تاريخيا"


والان اطرح تساؤلاتي :
  • هل فعلا الاصلاح جزء من غريزة الامومة لدي المراة ؟
  • هل امتد الاصلاح من الام نحو ابنها الي المراة نحو الرجل ؟
  • هل الحب يؤدي الي ظهور الاصلاح ؟ ام ان البدء يالرغبة في الاصلاح قد يؤدي الي الحب ؟
  • هل الحب يتضمن اصلاح دائما ؟
  • هل وجود ميول اصلاح عندي امراة نحو رجل يؤدي دائما الي نمو الحب؟
  • هل توجد علاقة بين الاصلاح والتمللك ؟
  • هل توجد غريزة اصلاح في الرجل نحو المراة ؟
  • واذا وجد .. هل يؤدي الي الحب من احد الطرفين نحو الاخر ؟

انا رايي ان الاصلاح كغريزة لدي المراة-
ليس كل النساء بالطبع -
غريزة تدفع المراة الي ان تحاول اخراج افضل ما في الرجل من اخلاق وتصرفات حسنة
معتمده علي ميله اليها
لتنتسب اليه في النهاية وتفخر به وتفخر بنفسها لانها ساهمت في اصلاحه

كثيرمن الرجال يستجيبون
مستمتعين بشعور الرعاية والاهتمام المنصب عليهم من تلك المراة ...
والبعض الاخر يمل بعد بعض الوقت ويتوق الي الرجوع الي حياته العادية
بدون القواعد الجديدة التي فرضت عليه بشكل لطيف ومحبب جدا من تلك المراة

والقلة يلفظ هذه النوع من محاولة الاصلاح من البداية
لانه يري فيه نوع من التملك والسيطرة
وذلك رغم ميله اليها

وفي النهاية وبعد الملاحظة
نسبة نجاح المراة في الاصلاح والحصول علي من اصلحته لا تزيد عن 50%

بهذه النسبة .. هل يستحق الامر المجازفة ؟؟

لا ادري..................

================================

هناك 18 تعليقًا:

رفقة عمر يقول...

عارفه لو فيه حب حقيقى ممكن تحصل المعجزة والاتنين يتغيروا للافضل سواء الرجل محاولته لاصلاح المراه او المراه محاولتها اصلاح الرجل الحب والتفاهم بيحقق دة
المهم مش يكون هناك مؤثرات خارجيه تؤثر على هذا الحب وتحاول افشاله
موضوعتك جميله فعلا

نعكشة يقول...

أعتقد والله اعلم

إن الواحد بطبعوا بيحب يصلح من نفسو و من حوالية
بطبعوا بيحب الناس و يخاف عليهم

يعني مثل لو انا لاقيت واحدة زميلتي الشارع ومحجبة و لابسة ضيق لو قربت منها ههمس لها و اقولها الافضل كذا و كذا بحب

لو واحد قاعد جمبي او ماشي ورمي ورقةف يالشارع هقولوا او هقولها لو سمحت بلش ترمي ف يالشارع و ساعات مبقولش
بس الغريزة جويا بتقولي قولي

المهم

دة بالنسبة إني بحب الناس اللي حواليا

فأكيد لو فيه حد بحبوا مخصوص او بكنلوا شعور اكتر من الناس سواء صديقة او صديق او ابن او اخ فانا هحاول اصلحوا علي قد ما اقدر

الفكرة بقة
انتي بتقولي نسبة الاصلاح ناجحة بنسبة 50% دية نسبة عالية جداً

يعني لو مليون واحد خمسميت ألف واحد بيتصلحوا

انا عن نفسي شايفة لو الاصلاح بينجح بنسبة 1% برضو هفكر فيه و حتي غن فشلت محاولاتي يكفيني شرف المحاولة

جوزيتي خيرا علي الموضوع

سلامون عليكي

الفارس الملثم يقول...

احنا ممكن نقول غريزة الاصلاح اللي انت اتكلمتي عليه بمعني الحضاره ورغبة الانسان في السمو باخلاقه وسلوكياته , لكن المشكلة ان مش دايما بتكون الحضاره او الاصلاح بيكون للافضل , فبعض القيم اللي اكتسبتها بعض المجتمعات خاصة الغربيه تحت دعاوي الاصلاح كانت في حقيقتها افساد زي الحرية اللي باتت نوع من الانحلال او حتي اقرب للفوضي ..

بس انتي ليه اعتبرتي المرأه هي اساس الاصلاح , هو المجتمع كله بيضع قواعد الاصلاح اللي هي بتبقي مستمده من اكثر من مصدر زي الدين والعرف والتقاليد وكذلك الخبرات والتجارب اللي بتمر بالمجتمع

تحياتي

kochia يقول...

الاخت رفقة عمر
فعلا لو فيه حب بين الطرفين .. هيتغيروا للافضل لان الطرفين هيبقوا عاوزين بعض .. وهيبذلوا كل الجهد انهم يناسبوا بعض ويسعدوا بعض ..
لكن انا بتكلم عن نظرية ان واحدة تتعرف بشكل ما – او تقابل في الحياة شخص تجد فيه عيب واضح ( مثل الكذب .. او مصاحبة البنات .. او عدم التدين .. او .... الخ ) وتقرر انها تحالو تعديل هذا السلوك وبعد فترة تعتقد انها مرتبطة بيه وانه مش هيقدر يعيش من غيرها .. وبعد شوية تحبه .. وبعد شوية تقرر انها ترتبط بيه لان – حسب وجهة نظرها – مفيش حد هيفهمه وهيسعده زييها
وهو علي الجانب الاخر يسعد بالاهتمام كجال كل الرجال فبالتالي يحاول ان يكون عند حسن ظنها .. وعندما بفتر اهتمامه بها بعد فترة – مثل كل الرجال – ان لم يحدث الحب الحقيقي – عندما يفتر اهتمامه يعود كما كان او علي الاقل يصبح الشخص الجديد ولكنه لا يقبل منها هذه الوصاية
الرجل يحب الجديد .. وهي في هذه الحالة تكون (جديد) وعندما تصبح هي (قديم ) يبحث هو عن ( جديد ) اخر
ان لم تملأ فراغ عقله وقلبه
اشكرك علي مرورك ورايك
واسعد بك دائما

تحياتي

kochia يقول...

العزيزة نعكشــــــة
الظاهر علي رايك ان الاصلاح غريزة عند كل الناس مش عند الستات نحو الرجال بس .. وفعلا ناس كتير بتزعل لو حاولت تصلح حد والشخص ده لم ينصلح .. سواء كان رجل او امراة
اما النسبة فهي كنسبة طبعا جيدة .. لكن النسبة هنا في الحصول علي من اصلحته
يعني ممكن تفضلي ورا واحد لحد ما يبقي كويس وبعدين هو يجب واحدة تانية
انا شايفة ان نسبة 50% لفقد من اجببت نسبة كبيرة جدا وخسارة فادحة لشخص احب وينتظر الحب ممكن احبه
ولو فشلت بصراحة مش هيكفيني شرف المحاولة لان جرح القلوب لا تبرأ بسهولة

تحياتي

kochia يقول...

الفارس الملثم
انا اتكلمت عن غريزة الاصلاح لدي المرأة المنبثقة من غريزة الامومة نحو الرجل
هي طبعا الفكرة ممكن تمتد للمجتمع وهو ما يحدث منذ الازل
لكن السؤال
هل يجب موافقة الطرف الاخر علي محاولة اصلاحه ام يقرر الطرف الاول اصلاح الطرف الثاني بغض النظر عن رايه ؟
ولو رفض .. هل من حقي فرض رايي عليه ؟
ولو وافق .. هي انتظر مكافاة علي نجاحي في الاصلاح ؟

تحياتي

المستنصر بالله يقول...

انا بصفتى راجل باقولك عندك حق الست لازم يكون لها دور كبير فى اصلاح الرجل اللى بتحبه لانه مش هايتقبل ده من اى حد غير منها هى بس انا مقتنع جدا بمثل وراء كل فاشل امرأة وكمان وراء كل ناجح امرأه لازم كل ست تشوف كويس عيوب الراجل اللى بتحبه وتتقبلها ثم تحبها ثم تحاول اصلاحها بكده هاتكون امراه عظيمة ادت دورها على اكمل وجه انما الست اللى تشوف عيوب الراجل اللى بتحبه وتكرهها وتكرهه بسببها وماتحولش من اصلاحها واصلاحه انا اعتقد دى مش ست اساسا دى نكره مالهاش وجود فى المجتمع لازم المجتمع كله يلفظها هى وامثالهاصدقينى عيوب كتير ومشاكل كتير سببها ان الست اولا واخيرا بعدت عن ربنه سبحانه وتعالى وعن تعاليم ديننا واصبحوا صوره باهتانه للمراة لاتصلح ان تكون زوجه ولا ام ولا اخت ولا حتى فرد من المجتمع طبعا الكلام مش عام علشان ماحدش يزعل بس المعظم كده
موضوعك جميل وهايل زى العادة
تحياتى

نعكشة يقول...

هوه لازم اصلح الناس من اجل أن امتلكهم؟؟
أو من اجل أن احصل علي ما أصلحتوا؟؟؟

هوه أنا يمكن عشان محبتش قبل كدة
متخيلة إن ممكن الانسان اللي بيحب حد دة يتمنالوا الأفضل

فإذا كان الافضل دة مع واحدة تانية يبقي هذا النصيب

وبما إني مجربتش جرح القلوب
فمعرفش بتبرأ بسرعة ولا لأ
بس اعتقد إن بإيدنا اننا نداويها
لو إحنا عايزين

معرفش و مقدرش افتي

بس الاصلاح من اجل الاصلاح
اسمي بكثير من
الاصلاح من اجل امتلاك من اصلحنا

معرفش انا دخلت غلط لوا صح

دمتي سالمة

سلامون عليكي

جمعاوى يقول...

50% بس ؟!!

من وجهة نظرهم


يكفيهم شرف المحاولة

رفقة عمر يقول...

الاخت العزيزة كوشيا
برضه هاقولك اذا كان حب حقيقى هاتنجح المحاوله باذن الله
واذا لم تنجح يكفى انها كانت صادقه ويكفى لها شرف المحاوله
المهم ان يبعد عنهم الحاقدين والمتطفلين الذين يدخلون لافشال اى علاقه جميله
ربنا يكفيناشرهم
ربنا يرزقك اللهم امين

Tamer Nabil Moussa يقول...

بوست مميز

الاصلاح فى كل شىء سواء كان حدث موقف انسان

ممكن واكيد

بس وجود النية والقلب الصادق واى علاقة بين اثنين لو مبنية على حب تفرق كتير فى شكل ومضمون العلاقة

انا نزلت الحلقة الثالثة من ارض النور
لما تنزلى بوست تعالى وعرفينى لو مش جيت

تحياتى

kochia يقول...

المستنصر بالله
اشكر مرورك ... صحيح ان الرجل هيتقبل الاصلاح فقط من امراة يحبها .. او امراة يعلم انها تحبه
هي ممكن تشوف عيوله وتتقبلها .. لكن تحب عيوبه ليه اذا كانت ناوية تقاومها وتصلحها ؟
لا انا مش معاك في كدة
هي ممكن تعرف عيوبة وتتقبلها وتتعايش معاها وتحاوزل صحيح انها تعدلها لكن لو حبت العيوب يبقي مالوش لزمة المجهود
بس السؤال اللي انا بطرحه
لو ست صلحت راجل .. وبعدين راح منصلحا لامراة اخري.. هل ستندم ؟
ام فقط ستاسي عليه ؟
والامر معكوس

اشكرك وتحياتي

kochia يقول...

نعكشـــــة
طبعا مش لازم اصلح الناس حتي امتلكهم .. ولكن اليس هذا ما يحدث احيانا؟؟
ولكن المرأة هنا تفكر بشئ من الانانية
الا تغير الام شيئا ما احيانا عندما يحب ابنها او يفكر في الزواج ؟
اذا كنت واقعية سوف تعترفين بهذه الحقيقة
نفس الامر
ولكن
الاصلاح بدون هدف اسمي بكثير ولكن لا تقدر عليه جميس النفوس البشرية

تحياتي لك

kochia يقول...

جمعاوى روش طحن
مرحبا بك دائما

انا عن نفسي 50% بس قليل عليا
وانا لا يكفيني شرف المحاولة لان لو كنت من ال 50% الاخري سوف اتاذي بشدة

تحياتي

kochia يقول...

رفقة عمر
اذا كان حب حقيقي هتنجح المحاولة
بس ايه هو الحب الحقيقي؟؟؟

عندك حق
تحياتي

kochia يقول...

Tamer Nabil
انت قلت الخلاصة بصراحة
"وجود النية والقلب الصادق واى علاقة بين اثنين لو مبنية على حب تفرق كتير فى شكل ومضمون العلاقة"

هو ده الكلام
النية الصادقة والقلب الصافي

تحياتي .. وهبقي اقوللك المرة الجاية علي الموضوع الجديد
المرة الجاية ان شاء الله بجهز الحلقة التانية من مذكرات نتاوي

رفقة عمر يقول...

اختى العزيزة كوشيا زهره بالصينى
اترك الامر لله وفى الاول والاخر كل شئ بقدر وكل واحد بياخد نصيبه اللى مكتوب له فى اللوح المحفوظ من قبل ميلاده لو كلنا عملنا اللى علينا وسلمنا امورنا لله هاترتاح نفوسنا ونرضى باقدارنا
ربنا يسعدك ويقدر لك الخير اللهم امين
عارفه باحب التفاعل فى التعليقات جدا والنقاش مش باحب تعليقات موضوع جميل جزاك الله خير
هو دة التعليق بحق

kochia يقول...

رفقة عمر
فعلا المفروض هدف التعليق هو التفاعل
بس لو كان الموضوع محتاج لان ساعات بشوف موضوعات مقفولة مش جدلية زي الموضوع ده
بس اكيد انا كمان بحب التعليق المتفاعل
لان اللي هيقرا بعد كدة هيفهم المناقشة وصلت لحد فين

وعلي رايك كل واحد بياخد نصيبه
المشكلة اننا ساعات بنجري في اتجاه بكل قوتنا ويطلع مش نصيبنا في الاخر
المفروض بقي الرضا بقضاء الله والايمان بان ماهو لك سوف ياتيك

تحياتي