الخميس، مايو 12، 2011

وبعدين ...

حاسة ان كل حاجة حوالينا اصبحت محتاجة للنقد

او كل حاجة حولي انا

ولا انا اللي اصبحت احترف النقد واستلذه

بقيت اصحي الصبح اقول ياتري هسمع ايه وحش النهاردة وانا مقطبة حاجبيٌ استعدادا لابداء رأيي

رأيي الناقد طبعا...

مش عارفة ده شعور طبيعي عند الكل بحكم الخروج من مرحلة الطفولة وصدر الشباب لمرحلة "اعمل عقلك" وشكل العقول تعبانة وعاوزة تليين مثلا ..؟؟

ولا الشعور ده عندي انا بس .. وعقلي بس اللي عاوز تليين

خايفة اكون بطلت تفاؤل وهبقي متشائمة ؟

وبطلت ابتسام وهفضل مكشرة؟

مع ان العادي بتاعي اني اتفائل بدخلة الصيف

حتي ثورة 25 يناير

كنت فرحانة بيها اول كام يوم .. وبعدين انتقلت من الفرحة والاعجاب بها لمرحلة النقد وبقيت شايفة عيوب كتير فيها وفي المتغنين بها سواء شاركوا او لم يشاركوا .. وكرهت المليونيات جدا

ايوة بعترف ..بكره المليونيات .. وتصنيفي عدوة من اعداء الثورة لن يزعجني اليوم في شئ

اهو

شفتم

بقول المتغنين .. وبقول اعداء الثورة

كلام كبير

وده في حد ذاته نقد وعدم نظر للنصف المليان من الكوب

يمكن المشكلة في محتوي الكوب ذاته

او محتوي صدر وعقل من ينظر الي الكوب اصلا

صحيح انا طبيعتي ناقدة لكن ليس لهذا الحد

وحشنتني الطفولة وروح الطفولة اللي فضلت معايا لحد فترة قريبة

قالولي محتاجة تغيير جو .. طيب هغير جو وهشوف

اما اني هبقي اكثر نقدا وحنقة علي الناس كلها .. او ربنا يعفي عني وارجع مرحة ولطيفة تاني

هناك 19 تعليقًا:

غير معرف يقول...

ثقافة الهزيمة .. العتبة الخضراء‏

و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار. و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير.

..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!! باقى المقال ضمن مقالات ثقافة الهزيمة بالرابط التالى

www.ouregypt.us

الميكروباص يقول...

انا عن نفسي كنت مع الثوره إلى الخطاب الثاني لمبارك
ووقتها قلت للناس اننا غير جاهزين لإستلام البلد في وضعها الحالي
انت أطحت بالرئيس والبوليس والمخابرات وجهاز المخابرات الداخلي
كان يجب ان يكون هناك اعادة ترتيب وهذه كان يفعلها مبارك- وغير صحيح ان البعض قالوا انه كان سيضحك علينا ويبقى في منصبه لأن العالم شهد عليه والميدان موجود
لكن كلامي دائما كان بيقف في الزور
واستلمنا البلد وحدث ما نحن فيه الآن
وبأت نغمة الفلول وانت عدو الثورة وانت كاره للحريه والكلام اللي مالوش لازمه الذي اسمعه يوميا
بس انا لقيت الحل
اللي بيقولي كده بقوله انت فله، انت شمعه منوره، انت مفيش منك 2، وانا من الفلول وانا من المنتفعين وانا مش هنقد حاجه لأن كل حاجه حوالينا لا تستحق النقد لأن كله تمام و100%

الميكروباص يقول...

كل لما أكتب تعليق في موقع مفكرة الاسلام يطلع واحد يشتمنى
وفي النهايه واحد ترك لي البريد الالكتروني بتاعه عشان أروح واعمل معه مناظره لأن انا من فلول الحزب الحاكم
كل ده لأني قلت ان موضوع النيل لم يتم حله وان العالم انضحك عليهم في موضوع اللجنه الشعبيه وان اتفاق عنتيبي ساري ولكن فقط تم تأجيل التوقيع لحين وجود رئيس لمصر- لكن اعضاء اللجنه الشعبيه ضحكوا على الناس مع الاسف، الكلام مش عاجب، هانعمل ايه، قلت له خلاص، اضحك يا سيدي على روحك

kochia يقول...

اعتذر للاصدقاء الذين علقوا علي الموضوع وتعليقاتهم اتمسحت من البلوجر مع الموضوع باكمله .. وانا نزلت الموضوع تاني
شكرا علي مروركم
تحياتي

نـــــور يقول...

طب تصدقى انى زعلت لما عرفت انك من اعداء الثورة؟
هسامحك بس لانك زعلانه من كل حاجه مش منها بس

سلامتك من التشاؤم ياجميله

فينك قاطعتينى فجأه وبدون مقدمات ومره واحده مالقتنيش عالفيس عندك هو ايه اللى حصل؟

الازهرى يقول...

ولا قبلين
كلنا هذا الانسان

الوضع لا يسر عدو ولا حبيب وربنا يسترها الايام الجاية

مصر محتاجة كل ناسها علشان تنهض ولو واحد بس وقع كلنا هنروح فى داهية

كاميليا بهاء الدين يقول...

هذا شعور طبيعي جدًا يتوازى مع الأحداث والتغيرات المتسارعة والتي تفوق قدرة تخيلنا وتتبعنا للأمور..
كنت أتابع الثورة لحظة بلحظة وها أنا أتابع توابعها من مضادات لها.. وهذا أمرٌ متوقع، ولكن حقيقة لم أكن أتوقعه بهذه الصورة الكبيرة.

ثمار الثورة قادمة بإذن الله
وسيتذوق حلاوتها كل من عاش مرحلة تطهير الأرض من الضار.

كوني كأنتِ متفائلة دائمًا
وتذكري أنكِ من المحظوظين
الذين عاصروا هكذا حادث رائع.

وردة لقلبك.

kochia يقول...

moataz_farouk
==============
علق وقال
========
انا عن نفسي كنت مع الثوره إلى الخطاب الثاني لمبارك
ووقتها قلت للناس اننا غير جاهزين لإستلام البلد في وضعها الحالي
انت أطحت بالرئيس والبوليس والمخابرات وجهاز المخابرات الداخلي
كان يجب ان يكون هناك اعادة ترتيب وهذه كان يفعلها مبارك- وغير صحيح ان البعض قالوا انه كان سيضحك علينا ويبقى في منصبه لأن العالم شهد عليه والميدان موجود
لكن كلامي دائما كان بيقف في الزور
واستلمنا البلد وحدث ما نحن فيه الآن
وبأت نغمة الفلول وانت عدو الثورة وانت كاره للحريه والكلام اللي مالوش لازمه الذي اسمعه يوميا
بس انا لقيت الحل
اللي بيقولي كده بقوله انت فله، انت شمعه منوره، انت مفيش منك 2، وانا من الفلول وانا من المنتفعين وانا مش هنقد حاجه لأن كل حاجه حوالينا لا تستحق النقد لأن كله تمام و100%
------------------------------------
كل لما أكتب تعليق في موقع مفكرة الاسلام يطلع واحد يشتمنى
وفي النهايه واحد ترك لي البريد الالكتروني بتاعه عشان أروح واعمل معه مناظره لأن انا من فلول الحزب الحاكم
كل ده لأني قلت ان موضوع النيل لم يتم حله وان العالم انضحك عليهم في موضوع اللجنه الشعبيه وان اتفاق عنتيبي ساري ولكن فقط تم تأجيل التوقيع لحين وجود رئيس لمصر- لكن اعضاء اللجنه الشعبيه ضحكوا على الناس مع الاسف، الكلام مش عاجب، هانعمل ايه، قلت له خلاص، اضحك يا سيدي على روحك

kochia يقول...

moataz_farouk
==============
انا هبدأ بيك يا معتز لانك علقت وتعليقك طار مع ازمة البلوجر مع الموضوع كله وانا نزلت الموضوع تاني وجبت تعليقك من الايميل
وهو عملها معاك قبل كدة .. لقيت تعليق لك علي الايميل وملقتهاش هنا علي المدونة
المهم
انا كمان مع الثورة من البداية ، كنت سعيدة بها وقلت اخيرا اتحركنا وبلدنا هتكبر وتنظف وتحلو .. فوجئت بصراحة من التصرفات الكتير اللي بتحصل وعرفت ان العيب مكنش في النظام بشكل مطلق .. لكن العيب فينا احنا ، تفكيرنا ، تصرفاتنا ، اخلاقنا ، تربصنا لبعض ، عدم استماعنا لبعض وعدم تقديرنا لبعض ، تشكيكنا في وطنية بعض وحاجات تانية كتير رغم ان المصري بالذات حبه لبلده كبير اوي مش هقول اكتر من كل البلد لكن علي الاقل زي احسن البلد في كدة .. زعلانة جدا من حال الشارع .. من اعتماد القوة العضلية في فرض الراي في التفرقة الطائفية الدينية من الاعتصامات الفئوية .. حاجات كنت فاكرة اننا هنبقي اكبر منها للاسف مطلعناش اكبر وطلعنا لسة صغيرين وياما هنتعلم
اتمني بس نوصل من غير خسائر كتير
وانا متفقة معاك ان الامر كان محتاج حكمة مننا كشعب اكتر من كدة بكتير بعد ما تحقق المطلوب
وموضوع الشتيمة ده بقي عادي جدا ان حد يلومني علي رايي بحدة عجيبة كاني من بلد تانية وجاية اقول رايي
بصراحة جوايا تفاؤل بس مش قادر يشم الهوا من الوضع والظروف
المهم ندعي ان الفترة دي تعدي وهنعتبرها نقاهة بلد
منورني
تحياتي

kochia يقول...

نـــــــــــــور
================
نور العزيزة
انا يا حبيبتي مش من اعداء الثورة
انا من اعداء الفوضي
وللاسف بعد الثورة حصلت فوضي حتي في الاخلاق فاختلط الامر .. بس كدة
ومحدش يرفض ابدا ان البلد تنظف من الفاسدين والمرتشين الا اذا كان منهم .. وانا مش منهم الحمد لله
وردي علي معتز ممكن يوضح لك اكتر انا مضايقة من ايه
----------------
اما بقي موضوع مقاطعتك طبعا ده غير مقصود خالص .. انا اصلا بقالي فترة مش بدخل او بدخل نادرا جدا وبالتاكيد انتي من الناس العزيزة علي قلبي وسامحيني لو قصرت غصب عني
والفيس بوك انتي مكنتيش عندي اصلا قبل كدة انما انا ضفتك .. عرفتيني ؟؟
صورة البروفايل هي نفسها
واكيد هزور مدونتك قريبا
حالا ...
تحياتي

kochia يقول...

الازهرى
=======
الباشا
والله بجد انا خايفة علي البلد جدا من كل حاجة
من اللي بيحبوها بجهل اكتر من اللي بيكرهوها
حاسة لسان حالها بيقول دلوقتي اللهم اكفني شر اصدقائي .. اما اعدائي فانا كفيل بهم
ربنا يستر

kochia يقول...

زهرة الكاميليا
===============
الحقيقة كلامك فيه تفاؤل وفعلا انا محظوظة اني عاصرت الحدث الجلل ده
وبقول دايما ان الفترة اللي انا عايشة فيها هي اللي هتتكتب في التاريخ
وانا من الجيل اللي شاف مصر قبل وهيشوفها بعد ان شاء الله ..
انما قلقانة جدا علي البلد .. وكاني لم اشعر بها قبلا ولا شعرت اني ذات وطنية وعصبية علي بلدي قبلا
عاوزاها تعدي
ونعدي معاها من ظلام العقول اللي فيه البعض وربما اكون انا منهم
هحاول انفذ وصيتك
متوراني
تحياتي

شهد الكلمات يقول...

وحشنتني الطفولة وروح الطفولة اللي فضلت معايا لحد فترة قريبة

يااااااااه فكرتيني بالذي مضى

بس ما تقلقيش واضح انها حالة عامة :((

تحياتي

يا مراكبي يقول...

عايزه الحق وألا إبن خالتُه؟

الثورة عملت حراك من أعلى ما يُمكن في كافة المستويات، وبالتالي ظهر لينا كل ما كان في الباطن والنفوس، ومن هنا اتفاجئنا كلنا بمليون حاجة جديدة ما كانت موجودة قبل الثورة، وبالتالي أصبح النقد أمر لا مفر منه، لأن المُتغيرات كتيرة جدا جدا

وأغلبها للأسوأ للأسف

:-(

kochia يقول...

شهد الكلمات
===========
صحيح حالة عامة ؟
الل يطمنك يا هاجر .. يعني هنخف ف ان شاء الله

تحياتي

kochia يقول...

يا مراكبي
========
لا ابن خالته طبعا .. جربنا الحق كتير...
ايوة هو حراك قوي
وايوة قلب اللي جوانا زي ما تسونامي كدة جابت اللي في بطن البحر .. حاجات عمرنا ما شوفناها
وللاسف الاسوا كتير ..
وللاسف هو ده اللي مضايقني جدا لاني مكنتش فاكرة السوء بالحجم ده
انا عارفة انها مسالة وقت .. واتمني يعدي بقي ونرجع للروح الحلوة اللي احنا عارفينها..
تحياتي

karim يقول...

اولا شكرا لمرورك الكريم, ثانيا كلنا حاليا قلقانين و مش فاهمين الدنيا رايحة على فين بس الاكيد اننا مش هنتعدل التاريح بيقول كدة الشعوب العربية لا تستطيع ان تكون مثل اوروبا و امريكا فى الحريات لازم جيل يتربى من صعرة على كدة و دة قدامة مش اقل من 50 سنة, ربنا يستر

غير معرف يقول...

صباح الخير
في الحقيقه عندك حق الثوره بقيت ماسخه وانا اعتقد الثوره كان مدتها اسبوع واحد فقط واصحابها ضاعت منهم
الحاجه التانيه بالهندسه كده ميدان التحرير بمساحته كلها اللي ممكن يقف فيه محشورين حوالي 120 الف بس مش مليون كما يدعون واي واحد عنده برامج هندسيه ممكن يجيب مساحته من النت او من جوجول ايرث ويوزع في المتر اربع اشخاص واحسبوها ياجماعه
المهم اتمنى الخير لمصر

onyx

kochia يقول...

onyx
====
صباح الفل يا باشا
والله يا ماجد حاسة اني بجد مضايقة من حاجات كتير بتحصل .. ومن تعنت البعض .. وخايفة فعلا اننا ننزلق من دولة نامية لدولة مش علي الخريطة .. وربنا يستر
انما موضوع ميدان التحرير ده مثير اوي .. صحيح هم عرفوا عدد الناس اللي في الميدان ازاي بالظبط كدة ؟؟؟؟