الاثنين، أبريل 25، 2011

تخاريف سخونية


· السخونية دي شئ لذيذ اوي .. بتخلي الدماغ عالية .. والجسم تقيييل .. الذراع لوحده طن عاوز حد يشيله معاك
· والصور السينمائية بتمر امام عين الشخص المسخون وكانه فعلا امام شاشة السينما العظيمة مش بيتهياله
· صور عجيبة كدة بتمر بسرعة مرور الحلم في ثواني لكن كل تفصيلة فيها واضحة كانها اخدت اكتر من وقتها
· ايه اللي بيخلي اللسان يتكلم لوحده وقت السخونية .. وليه بيقول حاجات عجيبة كدة مش مترابطة
· ايه اللي بيخلي برنامج الورد كل مرة افتحه اعمل اللغة عربي واختار الخط واعمل اتجاه الكتابة من اليمين وبرده اعملها كل مرة مش عملتها قبل كدة 100 مرة والمفروض يعمل كدة لوحده ويتعلم
· هو الريس مشي خلاص .. هو فعلا حصلت ثورة في مصر
· كنت ناوية انتخب جمال سنة 2005 وكنت بقول اهو شبع وخلاص احسن من غيره
· هو لازم الواحد يبقي عنده هدف عشان ميجيلوش اكتئاب .. طيب يعني من سكات استسلم للاكتئاب ولا افكر في هدف ..مش عايزة افكر ممكن حد يفكرلي ؟
· مش هنتخب البرادعي ولا عمرو موسي .. هنتخب الفريق شفيق ولو مرشحش نفسه هنتخب حمدين صباحي حتي لو اسمه مش عاجبني
· ليه فيه ناس جبانة في الدنيا حتي من مواجهة نفسها .. انا عارفة واحد اقول اسمه ؟؟؟
· مش معني اننا الصبح اننا منورش النور لاننا ممكن نكون الصبح والدنيا ضلمة برده .. ليه ؟ عشان الشيش مقفول طبعا
· هو الكدب عادة ولا عبادة ولا جين وراثي ولا فهلوة ولا ايه ؟ .. بس لذيذ .. فيه تفوق علي الاخر .. ليه ؟ مش عارفة
· عندي رغبة شديدة اوي اني اضرب ناس بالقلم صفعا صفعا صفعا .. ممكن اقول اساميهم ؟؟
· زمان كان التدقيق الاملائي بيظبط لي الكلام لما بكتب غلط دلوقتي مش لاقياه ولازم اراجع كلمة كلمة .. حاجة مزعجة اوي
· هو لما العين تطفي وتنور كدة يبقي ده قلة ايه ؟؟ قلة فيتامينات ولا قلة ادب
· الفيس بوك ده فيه ناس سخيفة جدا الا بعض الناس بصراحة .. اساميهم ؟؟ لا مش هقولها عشان ساعات بيضحكوني
· الجروبات الكتير اللي علي الفيس بوك دي قاعد عليها ناس بتفهم ولا عيال ؟؟ بيسألوا اسئلة عقيمة جدا ساعات وكانهم اذكي مخلوقات الارض
· الفيس بوك ده بقي كائن ظريف لكن لسة مش اليف ممكن يفترس اي حد في اي لحظة .. لازم احطه في القفص عشان لو اتهور يلاقي حاجة تحكمه
· ليه قلبي كدة بيوجني علي ناس قلبهم زي الطوبة مبيحسش .. اقول اسمهم ولا ايه .. مش قادرة خلاص عاوزة انام بقي ॥


هناك 27 تعليقًا:

موناليزا يقول...

ألف سلامة عليكى:)

مجداوية يقول...



السلام عليكم

هو أنا محستش إنك سخنة إلا لما قولتي حتنتخبي شفيق

:)

كده لازم كمادات صاقعة بسرعة
ومتكليش لا سمك ولا بيض
:)

فاتيما يقول...

عاجبنى قوى التلويح بهقول اساميهم دى ..
وعاجبنى رآيك ف الفيسبوك كمان
لأنى حاسة بكدا من ناس كتير حواليا اخترقوا هذا العالم وتعبوا منه
وحاليا التويتر يحتل نفس المساحة
وبرضو بياكل ناسه

انا بتفرج
وما زلت ف مدونتى الغلبانة
بحسها ركن دافى وهادى
و مش مفترس والحمدلله

سلامتك م الخطرفة
بس انا زى الطيبة مجداوية
هقول شفيق يا راااااجل برضو ؟
معقول !!!


سلامتك الف سلامة
وخالص حبى يا كوشكش

kochia يقول...

موناليزا
========
الله يسلمك .. وتسلمي يارب من كل شر يا موناليزا

kochia يقول...

مجداوية
=======
اهلا بيكي ومنوراني
الحقيقة بما انك ذكرتي الموضوع فانا شايفة ان الفريق شفيق راجل نضيف في عهد فاسد ولا يوجد دليل ادانة له حتي الان واول ما يوجد دليل عليه انا اول واحدة هتكلم عنه بالسوء وهنسحب من تشجيعه
واذا حكمنا عليه بعهده يبقي لازم نحكم علي انفسنا كذلك لان كلنا - المعترضون - صالحون في عصر فاسد ايضا
تحياتي

kochia يقول...

فاتيما
========
فطوم الحبيبة
بصراحة المدونة من غيرك ملهاش طعم وانا مبسوطة اوي انك بخير واني شفتك النهاردة ومدونتك من الرواسخ اللي مينفعش افتح المدونة من غير ما ابص عليها
وبموت في كوشكش منك بجد ولو حبيتي تقولي سموحة منك انتي بس مقبولة

اما اساميهم يا ستي - كان نفسي اقول بجد بس يلا فلتوا المرة دي لكن المرة الجاية لا ممكن ابدا

الفيس بوك دي بقي بلعة بلعت الناس كلها وخاصة بسبب الشهر اللي اخدها اثناء الثورة .. دلوقتي الراجل الفيسبوكي ده راجل محترم - الله يرحم ايام زمان لما كان الفيس بوك خطيئة

اما الفريق شفيق بقي انا قلت راي فيه في ردي علي تعليق مجداوية .. اظن تكوني قرأتيه
منوراني
تحياتي

غير معرف يقول...

tفكرة روعة
والسلاسه في سردها ممتازة
انا كمان هانتخب شفيق ..يس هو يرضي يرشح نفسه
ناس غيره بتلاقي7 انفار بتقولها اترشحي بيترشحوا علي طول
لكن ده الناس لمتله 300000 توقيع وهو زاهد في الحكم

طالب الولاية لا يولي وشفيق مطلبهاش
ولو علي فلم عصر مبارك.. يبقي المفروض يوقفوا معاش بابا عشان كان بيقبضه في العصر البائد..

kochia يقول...

غير معرف
========
اشكرك علي رأيك
انا متفقة معاك ان طالب الولاية لا يولي ودي من الاشياء التي جعلتني اضيف الي الفريق شفيق اسهم عندي
وانا مازلت علي كلامي اللي قلته للاخت مجداوية .. يوم ما يظهر عليه البلاوي اللي ظهرت علي غيره اكيد هشيله من حساباتي وكثير اخرون
ومازلت اري انه لو كان نضيف في عصر فاسد يبقي هو اكثر نظافة من كثيرين
وان شاء الله معاش والدك حلال وميقفهوش
تحياتي

الازهرى يقول...

عندي رغبة شديدة اوي اني اضرب ناس بالقلم صفعا صفعا صفعا .. ممكن اقول اساميهم ؟؟


اوعى اكون انا منهم
وربنا اقفل السويس من اولها لآخرها
انتوا فاكرينها سايبةولا سايبة

كتير الواحد يقعد مع نفسه ويطلع تخاريف السخونية تخاريفها أهون منها

تحياتى دوما

*الطالبة عفو الله *زوزو يقول...

ههههههههههه
ضحكتيني بجد هو انتي كدة لما بتكوني سخنة
الف الف سلامة عليك قمرتي
بس بصراحة عسسسسسسل و انتي عايشة في تخاريف السخونية
على سيرة الفيس انا مش عارفة القاكي هناك ابقي ضفيني اوكي و متخفيش مش حكون سخيفة هههههه

مرة تانية الف سلامة ليك حبيبتي

احمد يقول...

ياااه والله زمان
بققالى كتير اوووى مامرتش من هنا ولا علقت

حمدالله على السلامة

طبعا انت عنونتى الموضوع انه تخاريف سخونية علشان ما تزعليش حد انتى عارفة انى دايما متحيز لموضوعاتك وبتعجبنى جدا
لكن كلامك فى البوست دة ممكن يزعل ناس منك موجودين على الفيس عندك وانا منهم طبعا كل واحد هايشك فى نفسه
وكل واحد هايقول طيب ضايفانى ليه ماهى لو عايزة تمسحنى تمسحنى بدل ما تتريق عليا
وكمان ممكن ناس تقول مين فينا ما فيهوش عيوب كلنا فينا عيوب
وصفع الناس بالقلم كلام صعب جدا لايخرج من كوشيااللطيفة ام قلب كبير

يمكن زى ما بتقولى تخاريف سخونية بس انا اشك انها تخاريف

احمد

momken يقول...

بصى اجابه كل الاسئله دى كمدات ميه بارده

وهتبقى زى الفل والاجبات هتيجى لوحدها


الف سلامه عليكى


تحياتى

kochia يقول...

الازهرى
======
ياباشا دانت عمي
وانا اقدر اقول كدة عليك برده؟؟
وبعدين هو انت عندي علي الفيس بوك؟ اوعي تكون عندي ومتنكر؟؟
بس لامؤاخذة السويس دي متتقفلش بسهولة كدة
وصحيح تخاريف السخونية اهون
تحياتي

kochia يقول...

الطالبة عفو الله *زوزو
===================
انا لما بكون بسخنة ببقي حاجات كتير
الله يسلمك واشكرك جدا وانا مبسوطة اني لقيتك علي الفيس بوك مع اني مش من هواة الفيس بوك
ومعتقدش ابدا انك هتكوني سخيفة واكيد هبقي سعيدة بمعرفتك اكتر
تحياتي

kochia يقول...

احـمـد
=======
انا مبسوطة انك رجعت وبصيت تاني علي مدونتي
الله يسلمك ومتحرمش من نقدك اللطيف ابدا ان شاء الله
واذا كلامي زعل ناس يا احمد .. مهو ناس كتير مزعلني علي الفيس بوك برده ومش بقولهم انهم زعلوني - ومش هقول
وانت بالذات مش منهم عشان انت حد عندك الشجاعة انك تقول اني مزعلاك في كذا وعندك الشجاعة تقول انتي زعلانة مني ليه .. انما كتير معندهمش الشجاعة دي وهم دول اللي انا زعلانة منهم وعشان انا كوشيا اللطيفة علي رايك محبتش اقولهم في وشهم ولا رضيت اقول اساميهم مع ان كان ممكن .. لكن انا بحب اسيب الناس براحتها ومطرح ما العقول بتسوق صحابها يمشوا
وصحيح كلنا عيوب .. وصدقني انا من الناس اللي بقبل النقد جدا وبالعكس بحب اسمعه كمان عشان ابقي احسن المهم يبقي نقد موضوعي وخارج من شخص عارفة انه يتمني اني اكون شخص افضل
انما فيه اصحاب طبعا زيك كدة الكلام ده مش ليهم - واكيد انت عارف كدة
وهي سخونية بصراحة بس مش تخاريف...

تحياتي دائما

kochia يقول...

momken
======
هههههههههه
والله صح
كمادات واخلص من اللي انا فيه ومخي يروق تاني
الله يسلمك
واشكرك علي مرورك

تحياتي

غير معرف يقول...

طيب ارد\ علي اي واحده فيهم؟

onyx

kochia يقول...

onyx
=====
اللي تعجبك ترد عليها رد
او ممكن اللي نختلف معاها اوي .. او اللي متفق معاها اوي .. او ممكن تكتفي بان تقولي ازيك وخلاص

منور يا هندسة

غير معرف يقول...

طيب ازيك وخلاص


onyx

صوت من مصر يقول...

تصبحى على خير ......
متنسيش اعسلى سنانك وايدك ورجلك قبل النوم.........
انصحك كونى دوما داخل الحرارة حتى تبدعى

غير معرف يقول...

ثقافة الهزيمة .. العتبة الخضراء‏

و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار.

و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير. ..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!!

باقى المقال ضمن مقالات ثقافة الهزيمة بالرابط التالى www.ouregypt.us

يا مراكبي يقول...

دي تخاريف جامدة جداً :-)
ألف سلامة .. شفاكِ الله وعافاكِ
---
فاتني 9 بوستس .. خمسة منهم كانوا عن الثورة .. ولاحظت فيهم عامل مُشترك وهو نفس الأمر اللي أنا لاحظته وعانيت منه، ألا وهو عدم احترام الرأي الآخر واستبدال ديكتاتورية مُبارك بديكتاتورية الرأي .. للأسف
---
أما البوستس الباقيين العاطفيين فعجبني جداً منهم قصة حب .. فكرته جديدة .. كل حاجة دايماً بتيجي مش في وقتها المُناسب، أما البوست هو وهي .. عجبني جداً الإعتراف اللي في الآخر ده .. بيحبها وبيقاوح .. ووقع برضه في الآخر
:-)

kochia يقول...

onyx
====
الله يسلمك

kochia يقول...

صوت من مصر
===========
اشكرك
وبحاول لا انسي موضوع غسل السنان ده
وانت من اهل الخير
:)

kochia يقول...

غير معرف
ثقافة الهزيمة .. العتبة الخضراء‏
هلا

kochia يقول...

يا مراكبي
===========
الله يسلمك ياباش مهندس
9 بوستس مرة واحدة .. المهم لحقتهم ونورتني بالتعليق
عدم احترام الراي الاخر بقي شئ مزعج جدا الفترة الماضية وحتي الان لحد الحساسية
واشكرك علي رايك في البوستات الاخري ويسعدني اعجابك بيهم طبعا
تحياتي

غير معرف يقول...

دنتى طلعتى حكايه انا حبيت اسلوب السخونيه بتاعتك اوى بس لوقلتلك الف سلامه هتخفى وانا عايزه من ده تانى يا كوشيا بصى كلها عجبانى طيب نفسى اقرالك حاجات اكتر اعمل ايه دنا دخلت بالصدفه علشان بنتى حبيبه سخنه وكنت عايزه اسعفها يارب ديما كده ابداع ويشفبلى بنتى ومتشوفيش سخونيه بجد ابدا بحق وحقيقى - ام بيدو السويسى-