الاثنين، أكتوبر 05، 2009

عالم تالت

-

بدأ العام الدراسي باستعداد رهيب في الاعلام علي راسه التليفزيون الي جانب كل انواع الاذاعات المقروءة والمسموعة .. بتعليمات مشددة علي الجميع باتباع الطرق التي تمنع انتشار المرض وانتقاله من فرد لاخر

وفي ظل هذا الاستعداد حاول كل مسؤول ان يدلو بدلوه في هذا الامر وطبعا كان لازم يكون لينا من الحب جانب ...

انا شخصيا اعتقد ان المرض ده لو دخل مصر علي مستوي القاعدة هياكلنا كما تاكل النار .. اي شئ .. القش بقي او الحطب او الورق .. الحقيقة مش قادرة احذر سرعة الانتشار بس هيكون الامر خطير ..

دايما بنقول كلام جميل .. كلام دقيق .. احصاءات ..تعليمات ..

احنا عرب .. ولعبتنا الكلام ..

لكن في النهاية كله .. مجرد كلام ..

مش عارفة ليه افتكرت اغنية علي الحجار يا مصري دلوقتي

حاسة انها اغنية معبرة اوي

-

يا مصري ليه دنياك لخابيط والغلب محيط

والعنكبوت عشش ع الحيط وسرح ع الغيط

ومهولاتي تحب تظيط ساعة الفرح زغاريط تنطيط

وفي المياتم هات يا صويت وفي المظاهرة تسخن تشيط

وفي الانتخاب تنسي التصويت

-

المهم

حضرت الاجتماع الشامل الذي عقد بمناسبة الدلو .. قصدي يعني موضوع اننا لازم نعمل اللي علينا وننبه علي الانفلونزا ..

كان اجتماع عرفت منه حاجات مهمة في الموضوع

وعرفت كمان ليه احنا عالم تالت

-

عالم تالت عشان بنقول حاجة ونعمل حاجة

عالم تالت عشان دايما ننصح بعض بالشئ اللي مش بنعمله

عالم تالت عشان بنلوم وننقد شئ ونعمله ونمارسه كل يوم

-

بنعمل اجتماعات عشان نحارب انفلونزا الخنازير ؟؟؟

-

الاجتماع اولا في مكان مغلق سئ التهوية .. بكثافة خمسة اشخاص في المتر المربع

اجتماع لم يتردد شخص وهو يسلم ويقبل الاخر ليرحب به بعد غياب ايام او اسابيع واكثر تقدير شهرين

اللهم الا واحدة لوحت واخري سلمت باليد

وان حاولت ان اتملص من حضن ولا من شوية قبلات ..

انتوا عارفين الستات بقي ...

اللي تمصمص .. واللي تبص كدة بصة (مالها دي ؟)

واللي تصمم انها تعمل الواجب وتقبل .. حيث لا تجد نفسك الا مندفعا لتستقر راسك علي الكتف المقابل ثواني او دقائق مثبتا عنقك كعنق البطة المستعدة للمقصلة.. ولكن حاسة السمع مازالت تعمل حيث سمعت في تلك الاثناء المحاضر وهو يقول ..( ممنوع القبلات .. ممنوع لمس الفم والعين والانف .. ممنوع ......) ثم يطلق سراحك اخيرا

والناس بتقول .. مالك يا حبيبتي

خليها علي الله

طيب مهو كله علي الله فعلا .. بس احنا هنا بنقول ايه وبنتفق علي ايه

مش ننفذ مرة اللي بنقوله ..

وموعد موت وحياة كل شخص مكتوب عند الله منذ الازل ..

ولكن ...

ايها العالم الاول .. كم اشتاق ان انتمي اليك ..

-

-

ملحوظة ..

مرحبا بانفلونزا الخنازير .. مصر المضيافة ترحب بك ضيفا عزيزا .. فلتاكل حتي تاكلنا .. ولتشرب حتي ترتوي

هناك 58 تعليقًا:

خالد كامل يقول...

welcome to Egypt
سيبك انتى
و الله واحشانى و عارف انى مقصر
بس معلش أدينى رجعت تانى
و على فكرة انا غيرت الايميل
بقى
mnaffad@hotmail.com
سلام

غير معرف يقول...

قلنا بلاش كلام في السياسه او مايثير الجماهير وانتى حره


onyx

آه وكفى يقول...

اه على رأيك كلنا خايفين من الانفلونزا و مبنعملش اي حاجة تحجم من انتشارها حتى الجامعة اول مرة اشوفها زحمة في حياتي اول يوم دراسة كانت السنة دي ,, بيرحبوا بالانفلونزا
هى اكتر حاجة مرعبة بجد المواصلات

عالم حبيب يقول...

ربنا يستر

Unknown يقول...

أفعالنا غير أقوالنا
وأفعالنا دائماً عاطفية
وقتـية انفعالـــــية ذات
تأثير ومدى محدود للغاية.
ربنا يستر:)اقولها كنوع
من طمأنة نفسى قبل
الاخرين :(

شفـقــة و إحســــان يقول...

كلها ندوات واجتماعات ومؤتمرات لزوم الرغي والتصوير والدعايه والذي منه
كموفلاش يعني
إنما شعبنا مايتخافش عليه أبدا من أنفلونزا الخنازير
لان الشعوب التعبانة ياعيني اللي صابها المرض كانت كبيرها بتاكل الخنازير
انما احنا بقى فبناكل من مقالب الزبالة اللي كانوا بيرتعوا فيها الخنازير نفسها
يعني جايبين من الآخر

والله انا مش بابالغ
كام مرة شفت ناس غلابة بينكشوا في مقالب الزبالة وبياكلوا منها
ودعيت في سري وانا باصورهم
منك لله ياللي في بالي

تقبلي تحياتي
إحسان بك الغلبان

هانى زينهم يقول...

صدقينى الموضوع كله اكل عيش !!
كله بياكل عيش حتى على حساب الناس وتخويفهم . ربنا يستر .

صبرني يارب يقول...

لو كانت انفلونزا الطيور طلعت من عندنا

كانت تطلع انفلونزا الخنازير

وهانفضل كده بعبلنا طول عمرنا

قلتلكم تعالوا نهاجر

غير معرف يقول...

قل لن يصيبنا الا ما كتبه الله لنا

والاعمار بيد الله

اعملى اللى عليكى واتبعى تعليمات المحافظه دى


وان شاء الله هيحصل كل خير

حنين

mohamed ghalia يقول...

معاكى حق مرحب ويامراحب كمان بلدنا تنمى اى حاجة

Mohaly يقول...

hmmm. there is something wrong in all this swine flu thing

in general it is good to see people at last concerned about being clean (at least for a change)

نـــــور يقول...

بصى ربنا سبحانه وتعالى بيقول "ياايها الذين امنوا لا يضركم من ضل اذا اهتديتم"
ومادمتى شايفه نفسك صح لا تعبأى بنظرات "مالها دى" خالص لانها لا بتقدم ولا بتأخر ولو اتسخطى قرد مش هتقدرى ترضيهم
!!

طوبه فضه وطوبه دهب يقول...

والله عندك حق واحنا بقينا عالم تالت من شويه ما هو من اللى بنعمله ربنا يهدى

afew good men يقول...

كوشي اخبارك ايه
بداية كل سنة وانتي طيبة بمناسبة العبور

ثانيا كل سنة وانتي طيبة بمناسبة المدارس

السؤال مادام كلو بينجح

واعمال السنة بقت اي كلام

ليه بيفتحو المدارس اصلا

كل سنة وانتي طيبة

إبن مصر يقول...

السلام عليكم


هتعملى ايه يعنى غير كده ما باليد حيله

فعلا عالم تاااااااااااالت

حسن حنفى يقول...

المشكله ان اغلبنا عارفين المشكله بس اغلبنا برضه مش بيعمل علي حلها او علي الاقل يبدأ بنفسه

kochia يقول...

مهيج الجماهير

اهلا اهلا
ازيك يا خالد وحمد الله علي السلامة
منور

kochia يقول...

onyx

اهلا يا باشمهندش
منور
بس مش هناقشك في رايك

kochia يقول...

آه وكفى

الناس بتجري زي ما يكون عاوزة تجرب او فاكرة نفسها واخدة تطعيم
والواصلات فعلا الاكثر رعبا

kochia يقول...

عالم حبيب

يارب

kochia يقول...

norahaty

ايوة بس ليه اقوالنا غير افعالنا
امتي هنبقي قد كلامنا
يارب نوصل

kochia يقول...

شفقة هانم واحسان بك

ايوة
لزوم الرغي
خلينا كدة نرغي للابد
يلا الامر لله

kochia يقول...

هانى زينهم

ايوة فعلا
كله اكل عيش

kochia يقول...

صبرني يارب

يا شيخة هتطلع ان شاء الله
الطيور ماشي لكن الخنازي كمان

kochia يقول...

7annen

ربنا يستر
ماحنا هنعمل اللي علينا والامر لله

kochia يقول...

mohamed ghalia

ايوة
البلد مضيافة جدا
حتي في دي
ربنا يستر

kochia يقول...

Mohaly

اه والله عندك حق
بس ياتري الاهتمام بالنظافة ده هيستمر قد ايه ؟؟؟
اشك انه هيستمر كتير ..

kochia يقول...

نـــــــــــــور

والله انا بحاول وربنا يستر
كل شئ بامر الله

kochia يقول...

طوبه فضه وطوبه دهب

اكيد من اللي بنعمله
احنا نستحق ان نكون عالم تالت

kochia يقول...

afew good men

اهلا بيك وكل سنة وانت طيب
وسؤالك وجيه اوي
والاجابة تجدها فقط في العالم التالت برده

kochia يقول...

إبن مصر

ربنا يستر

kochia يقول...

حسن حنفى

كلنا خايفين نبدا
لاننا هنلاقي نفسنا ماشين لوحدنا
للاسف

KHALED يقول...

عندك غلطة إملائية
أحنا عالم رابع .. سابع قولى الأخير
عارفة لية ..

لإن فينا عباقرة و عندنا موارد و خير كتير ولسة منهوبين و متكلبشين و على الغلا مش قادرين

البلاد الفقيرة متأخرة بفقرها وقلة مواردها و إحنا مش كدة

غير معرف يقول...

عزيزتى كوشيا

هونى على نفسك فلا زال فى الجعبة الكثير مما يجعلنا نحب بلدنا .. بيكفى اننا نحب بعضنا بغض النظر عن مالها دى .. واننا بنقول حاجة ونعمل عكسها

هذه فقط صورة تمرد .. وعند من الضيق والاحباط .. لكن السبب بسيط وواضح

كنا دول من العالم الثالث .. فاصبحنا دولة من العالم الآخر !!

Dr. Ibrahim يقول...

ربنا يسترها ..

موناليزا يقول...

انا ايضا اشتاق للعالم الاول:)

يا مراكبي يقول...

:-)

كلنا نتمنى أن ننتمي للعالم الأول بالطبع .. حيث يفعلون ما يقولون .. أما في العالم الثالث فنحن نفعل مالا نقول

أعتقد أننا أدنى من العالم الثالث

micheal يقول...

هههههههههههه..فعلا مصر مضيافة
أهلا بيها
بخصوص البوس فأنا الحمد لله مش مقتنع بموضوع بوس الولاد من زمان قبل ما الخنزرة يطلع وتقريبا كل صحابي بدأوا يتحاشوا الموضوع ده معايا من زماااااان
:)
الله يكون في عونك
أغنية الحجار عارفها..معبرة جدا
تحياتي

Tamer Nabil Moussa يقول...

السلام عليكم


بجد احنا بتوع كلام وبس

لكن افعال فهى قليلة جداا ان وجدت

مع خالص تحياتى

مدحت محمد يقول...

منتظرين بوستات جديدة

momken يقول...

اصلا اصلا
العالم التالت يسكنه كائنات تتغذى على الاوبئه والامراض

ونتنفس الفيروسات ونقول حلوة اوى
كمان


تحياتى

تسنيم محمود حسين يقول...

السلام عليكم ورحمة الله وبركاته

والله عندك حق ... احنا كده عاملين زى اللى بيغيظوا فى نفسهم .. نقول حاجه ونعمل عكسها تماما .. ونحذر من حاجه ونعملها بحذفيرها...
ربنا يرفع عنا البلاء والوباء.. ويارب ننفذ مره اللى بنقوله...وربنا يستر...

والشلام عليكم ورحمة الله وبركاته

Ahmed Kamal يقول...

العالم الثالث بقى زحمة قوي ، أظن المفروض نشوف لنا عالم رابع نستخبى فيه ، أصلنا جربنا العالم الأول و الثاني قبل كده ، لكن الرابع حايبقى انجاز تاريخي زي ما احنا عارفين .


تحياتي بعد طول غياب

micheal يقول...

جاي أدحرج السلام والتماسي
:)

شفـقــة و إحســــان يقول...

ربنا يرحمنا يارب من المرض ده ويحد من انتشاره الواحد بجد مبقاش عارف يلاقيها منين ولا منين

غير معرف يقول...

????????????????????




onyx

اقصوصه يقول...

الله يبعد المرض وشره عن المسلمين

Shimaa Gamal يقول...

كل سنة و إنت طيبة
يا رب الإختفاء يكون خير

واحشانى

غير معرف يقول...

مهزلة مصرية جزائرية بقلم عبد البارى عطوان

تحتل اربع دول عربية المراتب الاولى على قائمة الدول الأكثر فسادا في العالم، اضافة الى افغانستان، حسب منظمة الشفافية الدولية، ولكن لم يخطر في بالنا مطلقا، ان تستخدم انظمتنا الرياضة من اجل تحويل الانظار عن فسادها ودكتاتوريتها القمعية، وبذر بذور الكراهية بين ابناء الأمة الواحدة، مثلما شاهدنا في الايام العشرة السوداء الاخيرة، التي بدأت وانتهت بمباراتي فريقي مصر والجزائر، في تصفيات نهائي كأس العالم الصيف المقبل في جنوب افريقيا.

نحن امام حرب حقيقية، وعمليات تجييش اعلامي ودبلوماسي لم يسبق لها مثيل، وكل هذا من اجل الفوز في مباراة كرة قدم بين فريقي دولتين وشعبين شقيقين، من المفترض ان الفائز من بينهما سيمثل العرب جميعا في هذه المسابقة الكروية الدولية.

عندما قرأت انباء عقد الرئيس حسني مبارك اجتماعا طارئا لاركان دولته، ابتداء من مجلس الوزراء ومرورا بقائد جهاز المخابرات، وانتهاء برئيس هيئة اركان الجيش المصري، تبادر الى ذهني ان مصر على ابواب مواجهة مصيرية مع اعداء الأمة والعقيدة......

باقى المقال فى صفحة الحوادث بالرابط التالى

www.ouregypt.us

Beram ElMasry يقول...

عيد سعيد
أدامه الله على الجميع بالخير والبركة
وحفظ عليكم الصحة والسلامة

micheal يقول...

عيد سعيد

حـــــدوتـــــة يقول...

السلام عليكم

كل عام وانتم الى الله اقرب

وعيد اضحى مبارك

نـــــور يقول...

كل سنه وانتى طيبه وعيدك سعيد ان شاء الله :)

مدحت محمد يقول...

حبيت بس اقلك كل سنة وانتى طيبة

وابقى طمنينا عليكى

Unknown يقول...

كل سنة وأنت طيبة
ياكوشيا أضحى مبارك
عليكِ بـــــأذن الله

ahmed_k يقول...

كل سنه وأنتي طيبه يا كوشيا
وعيد سعيد عليكي وعلى كل أسرتك

وفينك من زمان طولتي الغياب

حسن ارابيسك يقول...

فينك ياكوشيا وحشاني بقالك كتير ندعوا لكي بالتوفيق إن شاء الله في كل مراحلك الدراسية والعملية
وإن شاء الله نراكي وسطنا جميعاً بخير
تحياتي
حسن أرابيسك

Shimaa Gamal يقول...

مختفية فين يا جميلة

طمنينى عليكى