الجمعة، مارس 27، 2009

علي الماشي ...

-

غريبة اوي الحاجات اللي بنسمعها واحنا ماشيين في الشارع

-

ساعات نضحك عليها

وساعات نبكي مع صاحبها

وساعات نستغرب منها

-

بس الاكيد انها كلها بتعبر عن شئ من شخصيتنا وثقافتنا ..

النهاردة هقول بعض المواقف اللي استغربت منها

-

كنت يوما اجلس في ميكروباص ما لاقضي بعض المصالح العائلية .. وكان يجلس خلفي شابان في مقتبل العمر قال الاول:

- مش انا ناوي اخطب قريبا ان شاء الله ..
- والله .. طيب الف مبروك .. هتخطب البت اللي انت بتحبها
- انت اتجننت .. فيه حد يخطب بنت من منطقة ......
-
-

جدير بالذكر انني فتاة من سكان تلك المنطقة نفسها !!!!


كنت عاوزة الف اشوف شكله .. وربما اعرف منه اسم تلك الفتاة التي اقنعته ان المنطقة كلها موبوؤة وملوثة

ولكني تراجعت في اخر لحظة عندما وجدت صديقه يؤيد كلامه تماما ..

يبدو ان الامر معروف ومنتشر وانا اخر من يعلم فالتزمت الصمت وقررت انه ربما من الافضل الا يعرفا انني من تلك المنطقة ذاتها ..
-

-

هذه المرة كنت اركب وسيلة مواصلات عامة لاسافر من مدينة لاخري.. لاسمع من خلفي يتحدثون بصوت هامس جدا

-

- هي غلطانة .. وانا قلت لك خليها تقبل الفلوس وخلاص .. مهي لو هي ماخدتهاش هي.. غيرها هياخدها
- هي خافت .. مانت عارف بنتي مترددة
- بس 200 الف جنيه مش مبلغ قليل
- ايوة وهي بتندم دلوقتي
- بس الفرصة دي مش هتيجي تاني خلاص
-
-

الكلام دفعني للاسف اني الف واشوف شكل الناس دي .. فضول االقطة القاتل ..

نظروا اليَ بريبة فظيعة ونظرة تقييم شاملة ..

هل انا من عامة الشعب المصري اللي بيسمع ويقول وانا مالي ؟؟

ام هكون من المتميزين اللي بيحاولوا الوقوف في وجه الخطأ حتي وان لم يكن يخصهم..

ومع الاسف طلعت من الفئة الاولي ......

-

سمعته يقول لها ......

- ابن عمك هو اللي استفزني وامك كمان مشتركة معاه وانا اضطريت ارد عليه
- .......................... (صمت )
- انا عارفة انه اتقدم لك قبلي بس احنا خلاص متجوزين وهم لازم يعرفوا كدة
- ..........................(صمت )
- كل ده عشان انا فقير وهو غني .. مانتي وافقتي عليا وانا فقير ..
- .........................(صمت)
-ارجوكي يا مبادة .. سامحيني ويلا نرجع البيت
- وصلنا .. ماما اهي واقفة مستنية
- هو انتي اتصلتي وحكيتي ليها ؟؟؟؟
- ايوة
- كدة !!! طيب خدي شنطتك اهي معاكي .. انا مش نازل .. انا راجع مع السواق
-


الحكاية دي خليتني الوم علي الامهات الاتي يتدخلن في حياة بناتهي حتي يفسدنها..

لمجرد انها ناقمة علي وضع زوجها المادي ..

رغم ان الزوجة غالبا ماتكون مستقرة في البداية

(والزن علي الودان هو ما يفسد تلك العلاقة )...

-


4- كانت الفتاتان تجلسان في حرم الجامعة علي احد الارصفة ليتذاكرا موضوع السيكشن القادم عندما سمعا ...

-

- متخفيش يا حبيبتي .. انتي شاكة في حبي ليكي
- لا .. لكن ......
- من غير لكن .. الورقة دي هتثبت حبنا لبعض ..لحد ما نتخرج وبعد كدة كل شئ هيبقي رسمي
- لكن بابا ......
- انا بحبك اكتر .. ولا انتي مش واثقة في حبي ليكي ؟
- واثقة طبعا .. لكن .....
- انا كلمت ايمن خلاص .. هيجي يمضي وكل حاجة هتبقي شرعي .. وهيبقي فيه شهود ...
- طيب سيبني افكر ..
- انتي كدة بتجرحيني وبتشكي فيا ..
- لا متقولش كدة ..
- الموضوع ده لازم يتم قبل يوم الجمعة .. والا مش هنطلع رحلة اسوان
-


وللاسف معاد السيكشن حضر .. قبل ما يروا تتويج تلك التمثيلية الظريفة

هو لسة فيه بنات بيصدقوا الاكلام ده ؟؟؟؟؟

الله اعلم

-

وهذه الحكاية رغم غرابتها الشديدة الا انني اقسم انها حدثت وانا سمعتها بنفسي ..

حيث كنت مرة واقفة عند مكتبة لاشتري بعض الاشياء .. وجت بنت امورة تشتري برده .. فوجئت
بالبائع يتجاهلني ويتلفت اليها مما اثار حفيظتي بالطبع
ولكني سمعته يقول لها...
-
-
- انا حاسس اني شفت حضرتك قبل كدة !!
- لا الحقيقة معتقدش ..
- لكن انا متاكد .. تقريبا في راس البر السنة اللي فاتت
-
-
وعلي الفور تذكرت فيلم اشاعة حب
في ذلك المشهد التاريخي

الذي يعلم فيه (يوسف وهبي) ابن اخيه (عمر الشريف) كيف يوقع فتاة في براثنه ..
وتذكرت المشهد ولم اتمالك نفسي طبعا فضحكت بشكل واضح ..

ومش عارفة ازاي قرر انه يعاكس بتلك الطريقة الشديدة الوضوح والسذاجة
ولكنه اصر علي انها شاهدها في راس البر العام الماضي ..

بس الحقيقة مقالش انها شاهدها في مسابقة الجمال

وكنت اريد ان اري كيف سينتهي هذا المشهد ..
ولكني للاسف كنت متعجلة فاضطررت الي مقاطعته

فقلت ( ممكن تدرس موضوع راس البر ده بعدين وتجيب لي طلباتي )
واحضرها اخيرا لكن بعدما نظر الي نظرة ( مش ولابد) ...

قطاعة ارزاق بقي ....
اللهم لا تجعلنا من قطاعين الارزاق .....
-
-

هناك 61 تعليقًا:

صبرني يارب يقول...

ايه ده هو في كده ؟؟؟

بجد الحديث بتاع الزواج العرفي ده ؟؟

موضوع كده يتقال فىالشارع ؟؟

والبت مصدقه يعنى هو بتنجان ولا ايه

يادي المصيبه البني

ولا الحاج بتاع راس البر ده ههههههههههههههههههههه

ولا الى رفضت 200 الف وندمانه !!!!

خساره لو كانت ما ندمتش كانت ربنا اداها بالحلال

تحياتي ليكى بجد الدنيا دي فيها بلاوي كتير اوي اوي

وانا لما اكون ماشيه فى الشارع ابص فى وشوش الناس اقول لنفسي كل واحد من دول وراه يمكن حكايه او حكايات كتير يمكن تكون اغرب مما اتخيل

مـجـنـووون يقول...

ههههههههههههههههههههه

أيه يا باشا انتي بقي ودانك مش معاكي دي مع حد تاني



المهم

علي فكرة الحاجات دي كتير قوي تلقيها في المجتمع لأن بجد لسه في بنات عبيطه بتصدق الكلام ده
والزواج العرفي منتشر بطريقة كبيرة جدا يمك يكون علشان ظروف المعيشة ويمكن يكون علشان حب الأيام دي ويمكن يكون علشان ضعف أيمان أو بعد عن الله عزوجل

بس تعرفي بالنسبه للموقف الأولي الي غلط في بنات المنطقة الي انتي فيها كان المفروض تديله علي دماغه ويبقي عندك انتماء للمنطقة الي انتي فيها

تقبلي مروري سيدتي الجميلة
مجنووون

Habiba يقول...

الموقف الاول
انا لو مكانك هبص اشوف ويقولوا اللى يقولوه بس كان مفروض صاحبه يقوله انت هتخطب البنت اللى ماشى معاها ؟ بدال
"البنت اللى انت بتحبها"

الموقف التانى
معنديش الفضول اللى يخلينى ابص عليهم رغم انهم فكرونى بالمسلسلات

الموقف التالت
الله يكون فى عون الراجل وربنا يهد حماته

الموقف الرابع
ربنا يحفظ البنت دى بسذاجتها من الوغد ده ولو ان سذاجتها بهبل والكلام اللى قاله بيتكرر فىالمسلسلات بالنص ويبدو انها مش بتسمع مسلسلات !!

الموقف الخامس
:) انا كمان افتكرت الفيلم وقلت العبيط ده نسى انه فى 2009؟!
ولو مكانك كنت احرجت بسلامته علشان يلتفت ليا ويخلصنى :)

صاحب المضيفة يقول...

هههههههههههههههههه

ربنا يكون في عونك بجد

وربنا يستر على الشعب ده من الشياطين


تحياتي

norahaty يقول...

انا مابركبش مواصلات
لكن مجرد مشيك فى الشارع
بيسمعك العجب العجاب لان الناس
وللاسف بتكلموا علشان الناس كلهم يسمعوهم مش مجرد اللى جنبهم وبس
لأ برمصر كله لازم يسمع ...امال؟؟

Tamer Nabil يقول...

السلام عليكم

كويس انك قطعتى الحديث على البقال المراهق دة هههه

كل اللى كتبتى عنة بيحصل والله واكتر من كدة وفى بنات عارفة انة مش صادق بس عايزة اى حاجة تمارس بيها شهواتها وليكن عرفى


ربنا يكرمك

تحياتى

Khaled يقول...

الحياة فيها أكتر من كدة بكتير فيها إللى يشيب شعر الوليد ,..
و أعتقد إنها عينة بسيطة من ألوف الحاجات الغريبة إللى ممكن نعرفها

مهندس مصري يقول...

ههههههههههههه
انتي علطول رامية ودنك كده و بتسمعي التانيين
و لا انتي بختك ان كل اللي حواليكي صوتهم عالي

و لا تجسسوا
:)

شوية مواقف عجب
و اللي يعيش ياما يشوف

GeHaD-----(male) يقول...

انتي بترمي ودانك مع الناس ولا ايه؟
ههههههه
تحياتى

صوت من مصر يقول...

تصدقى انا مع الناس الى بيتجوزا عن حب لكن والله انا كمان فقير يعنى لو لحظتى كل المواقف الى كنتى كاتباها هتعبر عن كل واحد فينا فى نوع مننا فى شكل فى روح
شكرا

maha zein يقول...

هههههههههههههههههه
راس البر

تمام والله
طيب بخصوص موضوع الجواز العرفي ده
ليه متجراتيش وحاولتي تنصحي البنت او تخوفيها او اي حاجة

يعني كان المفروض تنبهيها
ربنا يستر علي ولايانا
سعات ربنا بيعمي قلوب وبيخليهم يصدقوا العتهة ده
ربنا يرحمنا برحمته

يا مراكبي يقول...

على فكرة إنتي بجد حظك غريب جدا إنك بتصادفي الحاجات دي .. بتفكريني بتجاربك العجيبة في "مذكرات نتاوي"

أحلى موقف هو آخر موقف .. بجد أنا ضحكت وإفتكرت الفيلم إياه ده .. أنا اللي أعرفه إن المعاكسات إتطورت كتير الأيام دي عن الأسلوب ده .. هههه

مدحت محمد يقول...

اوعى تكونى ساكنة فى منطقة كذا

بصى هقلك حاجة
فى ناس بتبقى عندها قدرة الاقناع

فبتقدر تقنع اللى قصادها

صابر وراضى يقول...

وعليكم السلااااااااااام



والله فعلا افلام ومسلسلات
وكل دا كوم والتليفونات كوم تانى

انا عن نفسى كل ما اعبر من تحت كوبرى بالسياره فى منطقه معينه واكون مشغل الراديو بتدخل موجات التليفون مع موجات الرديو وياااااااه على الكلام....
بلاوى سوده
ربنا يستر

حسن حنفى يقول...

هههههههه


حضرتك تعرفي لو كل واحد سمع كل حاجه حواليه وحاول يحللها حتي لو في نفسه هيموت من التعب من كتر المواقف الغريبه اللي بتقابل الواحد علشان كده سعات بيضطر يتجاهلها

عمرو يقول...

أنا بقى متأكد و واثق و أبصم بالعشره أن تدخل الأمهات فى حياة بناتهم سبب خراب تسعين فى الميه من البيوت .. ماشى ؟
أما بقى بتاع المكتبه فواضح أنه ماسمعش عن شرم الشيخ و لا الساحل الشمالى :))
أحيى فيكى ذكائك و كونك لماحه :)

مياسي يقول...

ههههه

أنا عن نفسي مصدقه كل اللي حكيتيه

بس قصةالزواج العرفي أكبر دليل على هبل البنات الذي لا ينتهي؛ ما فيش فايده يعني

وردة يقول...

كوشيا
موضوعك جميل
واللي يعيش ياما حيسمع
واللي يعيش اكتر
يسمع اكتر
بكرة نشوف العجب
بس ايه الحكاية انتي بترمي ودانك كتييير
هههههههههههه
سلام

الطائر الحزين يقول...

انها الحياه

No Fear يقول...

السلام عليكم
تعرفي و انا بأقرا البوست كنت عمال أضحك
بس فجاة لاقيت نفسي خايف و عاوز أعيط
ربنا يهدينا و يسترنا

No Fear يقول...

بالمناسبة
أنا ناوي أكتب بوست قريب من اللي أنت بتكتبيه ده بالظبط بس فيه كل حاجة و بأجمعه من زمان و عامل له ملف أسمه رمي ودن
:)

وميض ابتسامة يقول...

للاسف بالرغم من قسوة الاحاديث التى مرت عليك فى مناسبات مختلفة وهذه النماذج المؤسفة فهى قد اصبحت جزء من الواقع الذى نعيش فيه واصبحنا لا نندهش من سماع المزيد ..!!
والسؤال هل نملك ان نغيرها .. هل من الممكن ان نوقظ هؤلاء النيام ( بناتنا )من سبات السذاجة بدق نواقيس الخطر !!!
شكرا على الماشى ...

ahmed_k يقول...

هههههههههههه
رأس البر
طب مش يغير يعني رأس البحر
أو رأس العجل راس غارب أي جديد يعني

وبنات الجامعه في للأسف منهم لسه على نياتها ربنا يحفظ كل البنات ويرشدهم للصواب بس المشكله بتكون في النشئه
لو النشئه سويه مش ممكن تقع البنت
وتصدق تلك الأكاذيب

وحواديت الميكروباص كتييييير في الصح وفي الفشر أصل في ناي بتحب تسلي الطريق
على ما توصل

والتدخل في حياة الزوجين سواء من الأم أو أي قريب آخر بيكون في حالات كتيره هو سبب الدمار والخراب
والسبب أحد الزوجين طبعا في الأساس لأنه هو اللي أفشى سر حياتهم وسمح للغير بالتدخل ربنا يهديهم

بوست جميل
خالص تحياتي

همس الاحباب يقول...

ههههههه
ربنا يكون فى عونك
بس مع الاسف تلك المواقف بتحدث كثيرا
مع اختلاف الاشخاص والاماكن
ولكن غالبا نفس السيناريو والحوار
لكن موضوع الزواج العرفى ده انتشر انتشار رهيب بالرغم من كوارثه التى يعرفها الكبير والصغير
ولكن نقول ايه مراية الحب عمياء وصماء وخرساء
دمتى بكل ود

kochia يقول...

_____________________________
صبرني يارب
_____________________________
الظاهر كل حاجة بتتقال في الشارع واكتر من كدة .. بس انا اتكسفت اقول اللي اكتر من كدة .. واللي سمعته برده
والظاهر البنات لسة بتصدق للاسف
والناس كلها حكايات فعلا
_____________________________
تحياتي
_____________________________

kochia يقول...

_____________________________
مـجـنـووون
_____________________________
وداني ..
مانا عندي اتنين ودان
واحدة معايا والتانية سارحة في بلاد الله وخلق الله
المهم دي من مقومات الشر بتاعي
انت نسيت ولا ايه
خليها في سرك بقي
المهم
بالنسبة للموقف الاول .. اديله علي دماغه ؟؟
انا اصلا معرفوش ولا هو يعرفني
وبيني وبينك برده انا عارفة ان فيه شوية بنات مش ولابد هنا وهناك وده لا يعني اني مثلهم سواء رديت عليه او لم ارد
الامر مجرد رصد لانه رغم انه ماشي مع واحدة من هناك الا انه مش ناوي في الاصل يتجوزها
يعني مسالة تضييع وقت بالقصد والنية
واغواء بالقصد والنية

وانت منور انت وكل النزلاء الاخرين
_____________________________
تحياتي
_____________________________

kochia يقول...

_____________________________
Habiba
_____________________________
مرحبا بكِ
* صح كان مفروض يقوله كدة .. مهو مش ممكن يكون بيحبها
* الموقف التاني .. كتير بيجي في دماغي ان شكل اللي بيقتلوا مثلا او بيسرقوا المبالغ الضخمة دي او المرتشين او من مثلهم شكلهم مختلف عن الناس العاديين مثلي
كما ينتابك الفضول للنظر والحملقة في وجه العلماء المتميزين مع الفارق طبعا لعلك تتلمسين شكل العبقرية في ملامحهم
دول حد مختلف ..وعلي فكرة .. وجدت اختلاف في نظرة العين وفي قتامة البشرة
حاجة كدة من الفراسة يعني
بحب اطبقها كمان بعد ما قريت فيها شوية
* المواقف الاخري اعتقد انها متكررة باشكال مختلفة في المجتمع
حتي موضوع الزواج العرفي الذي رغم مذاره وكثرة الحديث عنه الا انه مازال منتشرا بشكل مرضي في المجتمع ويحتاج الي دراسة جادة مكثفة للتوصل الي العلاج
منوراني
_____________________________
تحياتي
_____________________________

kochia يقول...

_____________________________
صاحب المضيفة
_____________________________
يارب
منورني دائما
_____________________________
تحياتي
_____________________________

kochia يقول...

_____________________________
norahaty
_____________________________
مش بتركبي مواصلات ؟؟
فاتك كتير من الدنيا بتاعة اليةمين دول ..
اهي ده وده بلدنا في النهاية
_____________________________
تحياتي
_____________________________

kochia يقول...

_____________________________
Tamer Nabil
_____________________________
قطعت الحديث عشان كنت مستعجلة بس كنت عاوزة اعرف الفيلم ده هيخلص ازاي .. اه بيحصل اكتر من كدة
_____________________________
تحياتي
_____________________________

kochia يقول...

_____________________________
Khaled
_____________________________
اه فيها فعلا .. دي مجرد قشور بسيطة
_____________________________
تحياتي
_____________________________

kochia يقول...

_____________________________
مهندس مصري
_____________________________
لا والله مش رامياها علي طول .. بس برميها عند اللزوم وبرجع اخدها تاني .. مش بروح من غيرها يعني
اللي يعيش ياما يشوف
ولما تلاقي الكلام دخل ودنك حدف هتقفلها ازاي
_____________________________
تحياتي
_____________________________

kochia يقول...

_____________________________
GeHaD-----(male)
_____________________________
لا هي اللي بتروح تتفسح يمين وشمال وبترجعلي تاني
_____________________________
تحياتي
_____________________________

kochia يقول...

_____________________________
صوت من مصر
_____________________________
اه فعلا كلها بتعبر عننا
انا قلت في الاول هي انعكاس لشئ من ثقافتنا .. وحياتنا
_____________________________
تحياتي
_____________________________

kochia يقول...

_____________________________
maha zein
_____________________________
وتفتكري كانت هتسمع مني ؟؟
مظنش
دي معمول لها مسح مخ زي بتاع الافلام كدة
ده كان بيهددها برحلة مش هيسنح لها تطلعها
شئ سخيف جدا
ربنا يستر
_____________________________
تحياتي
_____________________________

kochia يقول...

_____________________________
يا مراكبي
_____________________________
والله ياباش مهندس كتير بيقولولي كدة لما احكي مواقف غريبة بمر بيها
اني حظي غريب
ومذكرات نتاوي الحلقات القادمة مازال فيها مفاجات غريبة انا نفسي استغربت منها
وتسعدني جدا متابعتك
نورتني
_____________________________
تحياتي
_____________________________

kochia يقول...

_____________________________
مدحت محمد
_____________________________
مدحت .. اوعي تكون انت وصاحبك اللي قلتوا كدة
اعترف
انت تعرف المنطقة دي ؟؟؟
الا صحيح السمة مالها بتاعة البنات ؟
وبعدين هو فيه حتة دلوقتي من غير سمعة ؟؟
محدش بيسيب حد في حالة ابدا
منور
_____________________________
تحياتي
_____________________________

kochia يقول...

_____________________________
صابر وراضى
_____________________________
البلاوي كتير
وعلي راي اللي قالوا اللي بيرمي ودنه بيسمع كتير
_____________________________
تحياتي
_____________________________

kochia يقول...

_____________________________
حسن حنفى
_____________________________
ساعات مش بعرف الا اني احلل اللي بسمعه وكتير بضايق وبفكر
للاسف
_____________________________
تحياتي
_____________________________

kochia يقول...

_____________________________
عمرو
_____________________________
اشكرك جدا ..
ودي مشاهد في الحياة فعلا ..
_____________________________
تحياتي
_____________________________

kochia يقول...

_____________________________
مياسي
_____________________________
طيبين فعلا لدرجة العبط
وبعدين بيتوحشوا من قسوة التجارب
ربنا يهدي
_____________________________
تحياتي
_____________________________

kochia يقول...

_____________________________
وردة
_____________________________
لا والله الكلام اللي بيجي لحد وداني
اقفلها في وشه بقي ولا افتح الباب؟؟
منورة
_____________________________
تحياتي
_____________________________

kochia يقول...

_____________________________
الطائر الحزين
_____________________________
نعم
انها الحياة
_____________________________
تحياتي
_____________________________

kochia يقول...

_____________________________
No Fear
_____________________________
والله هو فعلا شر البلية
وانا منتظرة موضوعك
_____________________________
تحياتي
_____________________________

kochia يقول...

_____________________________
وميض ابتسامة
_____________________________
هو ده السؤال
هل نملك ان نغيرها ؟؟؟
مش عارفة بصراحة
للاسف مش عارفة
_____________________________
تحياتي
_____________________________

kochia يقول...

_____________________________
ahmed_k
_____________________________
المفروض يغير راس البر ..
اشكرك جدا ومرحبا بمرورك
_____________________________
تحياتي
_____________________________

kochia يقول...

_____________________________
همس الاحباب
_____________________________
مراية الحب كذابة
عندك حق
منورني
_____________________________
تحياتي
_____________________________

حارة سد يقول...

أكثر ما لفت إنتباهي أنكي متعجبة ويلح عليكي الفضول لكي تنظري الى وجه هؤلاء الاشخاص

الأمر لا يحتاج الى تعجب ولا اندهاش ..كيف لا ونحن نتحدث عن شباب ناتج من إرهاصات كبت وقهر وسوء الحال

أنا لا أقدم لهم عذرا ولكن نظرة فقط على الجانب الآخر

فما من شيء إلا ولديه أصل ومدلول

لا يأتي العرَض ولا يشتكي العضو إلا إذا كان هناك مرض

فإما أن يعالج المرض وإما أن يبتر العضو ..هذا حتى يعيش الجسد

الحارة سد

علي محـمــــــد يقول...

السلام عليكم

بصراحه طريقة روايتك للمواقف حلوه جداً وتنفع تكون فكرة فلم حلو .. ذكرتني هذي الطريقه بفلم ليحيى الفخراني لما يروح محطة القطر ويطلب تذكره لأي مكان وبدون اهتمام لوجهة الرحله وكانت حلته النفسيه سيئه ويقابل حبيبته القديمه اللي اعتقد انها نيللي .. وكمان ذكرني بفيلم على جنب يا اسطه مشاهد بشوفها اشرف عبدالباقي من خلال عمله في التكسي طول الليل بصراحه الفلم حلو لولا احد المشاهد الأولى .. القصه اللي قلتيها لسمساره اللي في الجامعه هي فعلاً موجوده وانا سمعت عنها كثير لكني الومك على تجاهلك للي سمعتيه .. كان اولى بك انك تشديها بشعرها وتسلميها لأمن الجامعه والله حرقت دمي :( .. بالنسبه للعبقري بتاع المكتبه اقول .. حتى الشر يحتاج للإبداع زيه زي الخير في طريقة التنفيذ فهو يحتاج ادوات والشاطر دايما هو صاحب الإبتكار في اي خير وفي اي شر .. فعلاً كانت مداخلتك على هيافته حلوه وضحكتني كثير .

في امان الله

الشنكوتي الكبير يقول...

هههههههههههههههههههههههههههههه
هههههههههههههههههههههههه
هههههههههههههههههه

هههههههههههه

يعني الراجل مذاكر الفيلم وقعد يخطط وجاي يجرب الطريقه تقومي تسربعيه كده وتضيعي منه الحته
وبعدين مش احسن ما كان جربها فيكي انتي
ههههههههههههههه

تصدقي كتير الواحد بيسمع جزء من حوار وببقى هتجنن في المواصلات بسبب انهم بينزلوا او انا بضطر انزل واسيب القصه من غير ما اعرف النهايه
عايز اقولك ان الواحد ساعات بيسلي نفسه بأنه يقيم علاقة الناس ببعضها من طريقة نظراتهم لبعض واسلوبهم في الكلام
بعرف مين مرتبطين
مين متخانقين
مين حالفين ليموتوا بعض
ومين متفقين على مصيبه
ومين مش متفقين على حاجه غير انهم عايزين يعكوا الدنيا وخلاص
تسلم ايدك موضوع جامد

سلاااااااااااااااااااااااااااام

بس انا كنت عايز اعرف الواد بتاع العقد العرفي عمل ايه

اخوكي ايهاب

حنين القلب يقول...

انا مصدقاكى

لانى بشوف اكتر من كده

وبالنسبه للجواز العرف فيه كده كتييييييييييير وبرضه البنات مش بتتعلم

وبالنسبه للبياع انتى غلطااانه
كنتى كملتى فرجه على تحديث الفيلم القديم

اسلوبك جميل وطريقتك سلسه

تقبلى مرورى

شفقة هانم واحسان بك يقول...

ايه يا كوشيا انتى ملمعة الاوكر كده علطول
بس تعرفى كده حلو اوى تسمعى دبة النملة
ههههههههه
وحشتينى

غير معرف يقول...

في الحقيقه يبدو انك لسهخ مش خبيره بامور العالم اللي حواليكى ولو عايزه تسمعى حكايات اكتر من كده انا ممكن املي لكك مدونتك بحكايات اصحابها عايششين ويشيب لها الولدان بس للاسف انى انا اتعودت الكتمان ولا افشي اسرار الاخريين ويمكن اللله اعلم ده من ضمن عيوبي انى كتوم ومش باحكى لكن لازم تعرفي ان الحياه حكايات وحكايات وكل حكايه مدرسه بنتعلم منها .......


onyx

kochia يقول...

_____________________________
حارة سد
_____________________________
والله وقتها شعرت انني احب ان انظر اليهم لاري ملامح وجوه تقوم بهذه الافعال
وحلو اسمك
الحارة سد
_____________________________
تحياتي
_____________________________

kochia يقول...

_____________________________
علي محـمــــــد
_____________________________
ايوة طبعا اي حاجة محتاجة ابداع
مهو الضحك علي الناس ممكن يفشل برده لو مفهوش ابداع..
_____________________________
تحياتي
_____________________________

kochia يقول...

_____________________________
الشنكوتي الكبير
_____________________________
معلش الحقيقة كنت مضطرة اقاطعه للاسف
وفعلا ساعات بنمشي نسمع جمل كدة وراها معاني كبيرة
واكيد حياتنا احنا كمان وراها كتير برده
بس محدش يعرف
_____________________________
تحياتي
_____________________________

kochia يقول...

_____________________________
حنين القلب
_____________________________
اشكرك جدا
واهلا بيكي دائما
_____________________________
تحياتي
_____________________________

kochia يقول...

_____________________________
شفقة هانم واحسان بك
_____________________________
وحياتك الاوكر مصدية علي الاخر بس الحظ بقي
وانتي كمان وحشتيني والله
منوراني
_____________________________
تحياتي
_____________________________

kochia يقول...

_____________________________
غير معرف onyx
_____________________________
انا تقريبا عمري ما هبقي خبرة لا بالعالم ولا بالناس
شكلي كدة
غير قابلة للتعلم
واللي انا قلته ده مش اسرار
دي ناس اتكلمت في الشارع وفي اماكن عامة .. وانا لا اعرفهم ولا شفتهم قبل كدة ولا شفتهم بعد كدة
بس بجد نفسي اتعلم حاجة
_____________________________
تحياتي
_____________________________

ملكة بحجابى يقول...

بموت فى رمى الودان جامد
وخرجلنا حاجة تحفة
اللى يخربيت الدش بكسر الدال
بوظ دماغ البنات
ههههههههههههه
عثثثثل
تقبلى مرورى
وربنا يستر على ولايانا

ملكة بحجابى

kochia يقول...

_____________________________
ملكة بحجابى
_____________________________
اهلا بيكي
واكيد كل حاجة في الدنيا ميزة وعيب
بس مش عارفة البوست ده ياتري ميزة ولا عيب
_____________________________
تحياتي
_____________________________