الأربعاء، نوفمبر 19، 2008

مزمزيل من فضلك





يا تري حصلك مرة ان حد سألك سؤال

حسيت انه سؤال سخيف اوي

ومعرفتش ترد عليه ؟؟؟

او ربما مرة سألت انت حد سؤال

وبعدين لقيت انه مش لطيف ومكنش يجب انك تسأله ابدا ؟

يمكن بتحصل احيانا...

وساعات التعليقات هي اللي بتكون سخيفة

جدااا جدااا


لكن الاكيد ان فيه ناس الفضول والتطفل علي حياة الاخرين عندها ..

هوايـــــــــــــــــــة...-


ومش بيحسوا بكدة للاسف الا اذا تعرضوا لنفس السخف من اخرين

كتير بيعمل كدة .. بيسال في ما لا يخصه .. ويتطفل علي ما لا يعنيه


لكن الاكتر

هو من يتعرضوا لهذا السخف


كنت عند احدي صديقاتي ذات مرة .. وكان عندها اربع صديقات اخرون ..

بينهم واحدة مخطوبة

وطلب منها الحاضرون ان يروا صورة خطيبها لو كانت معها

وفعلا البنت طلعت صورة خطيبها .. وهي كانت بنت متوسطة الجمال


وعندما رأو الصورة

انفجروا الثلاثة ضاحكين

وسمعت


- هي المرحومة ماتت امتي ؟؟

- يا حول الله يارب

- انتي حلوة تعملي في نفسك كدة ليه ؟

- مش خايفة علي عيالك يطلعوا شبهه؟


طبعا انا فهمت ان صورة الراجل طلعت وحشة ..

وكان عندي فضول فظيع واشوفها انا كمان ..


بس كنت قاعدة علي كرسي بعيد ..

وبعد ما قالوه مقدرتش اقولها وريني الصورة

يكفيها ما لاقت من احراج


وبعد حوالي 10 دقائق .. واحدة منهم قالت

بس المهم الاخلاق .. والحب

ونظرت اليها نظرة فضول


هو انتي بتحبيه ؟

( وكانها تستبعد ان يحب اي شخص صاحب هذه الصورة )


اشفقت كتيرا علي الرجل...

واشفقت علي خطيبته التي تحول وجهها الي عرض مستمر متتالي من الالوان

واعتقد ان تلك العشرة دقائق مرت عليها كعام


وهذا النوع من الفضول السخيف ثم التعليق السخيف ثم الاسئلة السخيفة هو شئ للاسف موجود في المجتمع


وللنظر الامثلة


فتاة في سن الزواج مثلا لم تتزوج بعد .. وايا كان سنها ..

وبالاخص طبعا ان كانت كبيرة قليلا


بتتعرض لاسئلة او تعليقات

او نصائح كمان

اقل ما يقال عنها انها سخيفة


زي مثـــــــــــلا


- هو انتي لسة .......؟

- هم الرجالة اتعموا ولا ايه .. ؟ هئ هئ هئ..( ضحكة غير مفهومة المعالم )

- ابقي غيري العتبة يا حبيبتي ؟

-اممممممم ( مع نظرة فهم عميقة ) ابقي حطي مكياج وانتي خارجة ..

-

طيب الحمد لله البنت اتخطبت

نسمع بقي الاسئلة السخيفة اللي البعض بيسالوها

للام مثـــــلا ..


- هو خطيب بنتك بيقبض كام ؟؟؟

- هي الشبكة بكام ؟ والمؤخر هتكتبوه كام ؟

- شدوا عليه عشان يعرف انها مش رخيصة

- اوعوا توافقوا لو الشقة مش تمليك

-

ولو البنت انفصلت عن خطيبها

نسمع ....


- هو مين فيكم اللي ساب التاني ؟؟؟

- انا برده كنت عاوزة انصحك بكدة بس انتي بقي استعجلتي ووافقتي عليه لانه مينفعش خالص

- انتي تستاهلي احسن من كدة

-
البنت اتجوزت بقي .. بعد اسبوعين جواز

نسمـــع

- ها .. مفيش حاجة جاية في السكة ؟

- هو بيديكي مصروف ولا لا ؟

- انت بتدفعي من مرتبك حاجة ؟

- اوعي تحطي حاجة في البيت لحسن ياخد علي كدة ..

- هو بيساعدك في البيت .. لازم تخليه يساعدك !!

-

طيب بعد سنتين جواز .. بدون انجاب

نسمـــــــــــــع


- هو العيب من مين ؟؟؟؟

- طلع عندك ايه ؟

- جوزك كشف ولا لأ ؟

-

لو واحدة اشترت حاجة دهب

نسمــــع


- هو ده كام جرام ؟ بكام ؟

- جبتي الفلوس منين ؟

- هو جوزك دفع معاكي ؟

-

كمان فيه شئ ..

احيانا يصيب المرض اناسا يسبب لهم السمنة الشديدة او النحافة الشديدة

بشكل مفاجئ ....

وبدون مراعاة

نسمـــــــــــع


- انتي تخنتي كدة ليه .. ؟

او ..

- انتي خسيت اوي ؟؟ انا معرفتكش ؟؟

-

والامر لدي الرجال موجود اكيد..

ويمكن انا اعتقد انه اقل لان المفروض ان الفضول اصلا عند الرجال اقل

لكن رغم كدة برده بنسمع اسئلة وتعليقات سخيفة


يعني مثــــــــلا

اي حد بيشتغل في ظل الظروف دي ..

- انت بتقبض كام ؟

- انت هتدفع في البيت ؟


لو واحد خطب جديد


- ها .. خطيبتك حلوة ؟؟

-انت احلي ولا هي ؟؟

- ماخدتش ليه فلانة .. دي احلي كتير ؟


-اكيد

فيه اسالة تانية .. بس انا معرفهاش

(لو حد من الرجال يتطوع ويقولنا علي سؤال سخيف يتعرض له يبقي متشكرين)

لكن المهم ليه كل واحد ميفكرش قبل ما يسال سؤال زي كدة او يعلق التعليقات دي

انها تضايق وانها محرجة

وان الشخص اللي بيسالهاله امامه ثلاثة حلول

اما انه يحرج ولا يرد

او انه يحرج ويرد كذبا

او انه يرد رد ابوخ واسخف علي الشخص اللي ساله

-

لماذا لا يكون كل شخص فينا حساس ومراعي للاخر

او يكون محضر خير عندما يعلق او ينصح هذه النصائح الغالية للاخرين


اكيد الدنيا هتبقي احسن كتير

والمشاكل هتقل كتير-


انا علي الاقل شايفة كدة ...


ملحوظة / جدير بالذكر ان البنت اللي اتكلمت عنها فوق تركت خطيبها بعد اسبوع من هذه الحادثة .. وده كان من حوالي ثلاث سنوات ..


-

هناك 113 تعليقًا:

Dr Ibrahim samaha يقول...

ماهو مش مودينا ورا إلا الأسئلة السخيفة دى.......وهما مالهم؟

مش عارف انا

من الأحسن كل واحد يشوف مصلحته وبلاش عادة القعدة على المصطبة.........

تحياتى لك

د إبراهيم

مولان يقول...

اووووووووووووووووووف


بجد مش بحب التطفل ده


بجد ايه ده فعلا بيحصل العن من كده

نهر الحب يقول...

سبحان الله
الناس دول كتيرجدا ومتطفيلين بشكل غبى وغريب اوى وكأنهم لهم حق التطفل وحساب الاخرين والتدخل فى حياتهم
بلا رحمة
00 عارفة من كتر سخافتهم فى كتير بيأذيهم دا جدا

فاتيما يقول...

ساعات الناس يا كوشكش بتعتبر دا نوع من أبادءالأهتمام بالآخر
يعنى بيسأله عشان يطمن عليه و ينصحه ليكون مش واخد باله ...
بصى انا بسأل أسئلة كتير زى دى
عشان مبقاش عاملة بريئة يعنى
بسمش سألها غير لأقرب المقربين ليا
يعنى صديقة او اخ اوقريب لا أشعر بينى و بينه بحرج
لكن بعاً فى العموم
غالباً مبيحصلش
و ممكن يحصل من غير ما الواحد يقصد
تقى هتخلينى اخد بالى بعد كدا
طب كتر خيرك يا جميل
و تحياتى ليكى
و لموضوعك المتميزة

mony يقول...

لا حول ولا قوة الا بالله

طيب ايه رأيك بأه ان الراجل اللي كان خاطب البنت ديه بعد ما سابوا بعض لو راح اتقدم لواحده من اللي اتريقوا علي صورته كانت حتوافق عليه بشده

لا حول ولا قوة الا بالله


الناس ساعات كتير مابتلاقيش حاجة تتكلم عنها فبتشوف ان ده نوع من انواع الحديث الشيق
و اهه بدل ما نقعد ساكتين
نجيب في سيرة ده شوي و ده شوي


ربنا يرحمنا و يهدينا جميعا

انا حره يقول...

على فكره ياكوشيا اوقات الفضول والرغى وان الواحد يتحشر فاللى ليه فيه واللى ملوش بيبسط الطرف التانى وبيعتبر الفضولى الحشرى دا مهتم بيه وبنى ادم ودود وحبوب ودمه خفيف

ولو بقيتى فحالك ومسالتيش يبقى انتى مش مهتمه

مثلا صحباتى الانتيم منهم ناس متجوزه وواحده حامل والله والله انا اتكسفت اسالها هيا حامل فولد ولا بنت لحد الشهر التامن وفالاخر الاقى كل خلق الله سالو وعرفو وانا انتيمتها معرفش

بعتبر دا تطفل وابسط حاجه ممكن تخاف من الحسد او تعتبرنى حشريه فبقصر واقول انا مالى

صحبتى التانيه مره لقيتها بتتكلم مع واحده والبنت دى نازله فيها اسئله

هوا جوزك بينزل كام يوم

بيجى الساعه كام

بتقعدى مع حماتك ولا لا

بتعاملك ازاى

ها مفيش حاجه فالسكه

طب ليه ماتروحو لدكتور

فضلت ساعه نازله رغى لحد ماانا زهقت والتانيه منشكحه اوى وبتجاوب بكل فخر وسعاده معرفش ليه

صباح الصباح يقول...

اية يا بنتى

دانتى شايلة ومعبيا على الاخر

السخافة مالهاش نهاية وطول اليوم بنتعرض لسخافات مالهاش مثيل

بس الايام دى انا مش باقابل سخافات كتير

انا بقابل غباااء منقطع النظير

(أم البنين) يقول...

فعلا عندك حق
بس مش لازم نعطي أهميه للناس..
والإنسان الواثق من نفسه لا تؤثر فيه آراء الآخرين
تحياتي وتقديري

Shimaa Gamal يقول...

أنا بسمى الناس أمثال الثلاث بنات اللى إتريقوا على الصورة ولاد الحلال و معروف طبعًا إنهم مش ولاد حلال ولا حاجة . هم أشخاص غاوية الخراب . زى بالضبط اللى بتسأل هو إنتى متجوزتيش ليه و زى اللى تعلق على ردك بإنه النصيب بكلمة لأ شدى حيلك كده و إتجدعنى .
زى اللى تسأل هو ما فيش بيبى ، و زى اللى تقول لازم المرة الجاية لما أزورك تكونوا ثلاثة .
المشكلة الحقيقية مش فى إن الأسئلة محرجة ، و لكن لإن الأشئلة دى فى معظم الأوقات بتكون بغرض التجريح .
يعنى هى البنت اللى متجوزتش و عايزة تتجوز غلطتها يعنى إن النصيب لسه ؟
و لا اللى عايزة تجييب أطفال و ربنا مأزنش ، لازم تتسئل فى كل دقيقة هو إنتى فيكى عيب ، زى مايكون قضاء ربنا ذنب .
و بالقياس حاجات كثير . ربنا يكفينا شر ولاد الحلال

Hina wi Hinak يقول...

الفضول موش حاجة وحشة، بالعكس، الفضول دائما بيكون أفضل معلم، من خلاله ممكن نتعلم حاجات كتير نجهلها، وبدونه لما كان لدينا أي من الإختراعات أو الإكتشافات اللي بات معظمها ضرورة من ضروريات حياتنا اليومية.
أما ما يدور حوله موضوعك، فده موش فضول، ممكن نسميه برود أو إنحشار... تدخل في أمور الغير التي لا تعنينا، غالبا ما يكون بغرض الشماتة أو المقارنة بين المتدخل والمتدخل عليه... سلوك مريض جدا لا يمارسه إلا مريض خلقيا (بضم الخاء)... وأعتقد أن أفضل الردود على مثل ما ذكرتي من أسئلة سخيفة، هو "وإنت مالك"

habiba يقول...

لا اله الا انت سبحانك ان كنت من الظالمين

اولا برافو بجد انتى جبتى حاجات كتير اوى فى الموضوع يمكن انا مكنتش اعرف بعضها

بس المشكله ان لو كل واحد قبل مايعيب فى الناس او يتساخف عليهم حط نفيه مكانهم او شاف عيوبه الاول مش هيعمل كده
ربنا يهدى

Beram ElMasry يقول...

العزيزة . kochia
السلام عليك ىرحمة الله
( ارجو الا نصل الي الجوع ) ليس بالرجاء وحدة لاننا على الطريق ومكرهون
فى مدونتك وجدت صورة دقيقة لوضعنا الاجتماعى وسلوكياته ولا يغير ذلك الابخلق حياة كريمة لكل مواطن
سعدت بزيارتك

ماما أمولة يقول...

هم دول الناس اللي مش وراها حاجة

ناس فارغة من جواها

ربنا يبعدهم عنك يارب

جميل يا كوشيا طرحك للموضوع

تسلم ايدك

هانى زينهم يقول...

مش هاقولك ان ده مرض نفسى وان اللى بيشكك فى حاجة ممكن تكون عينه هتطلع عليها واحيانا بيكون قصر ديل انما هاقولك " الجحيم هو الاخرون ".
يعنى احسن حاجة فى الدنيا نعمل اللى احنا شايفينه صح واللى مش عاجبه يشرب م البحر .

غير معرف يقول...

هاي يا كوشي وحشتيني
الموضوع جميل وفيه رصد لتصرفاتنا كلنا مع اختلاف الدرجات.

كان ليه وحدة جارتنا,اول ما اتختبط سألت:هو خطيبك بيقبض كام يا دادي يا بنتي؟
سؤال 2:هووارث حاجة من ابوه؟
سؤال 3:هو بيساعد امه في مصاريف البيت؟(لا يا حبيبتي انت الاول,, يكفيكي بعدين يساعد امه)
سؤال 3:هوانت متعرقيش معاش امه كام؟
سؤال4:تلاقي امه عندها دهب كتير,,مش كده؟
سؤال5:انت استرخصت في الشبكةليه؟؟(محوشاهم لامه يا خيبه)
ومليون سؤال من ده,الحل الوحيد ان الانسان يسمع ويسكت او يقاطع الشخص الفضولي علشان منموتش بالنقطة.


الي الامام يا كوشيا

دادي ام جني..

romansy يقول...

حياتنا يا عزيزتى
كلها تساؤلات
بس مش عارفين بقى مين الصح ومين الغلط

اللى بيسال اصلا بيسال ليه
هو ماله هو
اهم حاجه الطرفين يكونوا راضين
بس تقريبا دا بقى حالنا
والحشرين كتروا
قوى

maha zein يقول...

يا عيني
سابته
ليه كده
اكيد شككوها فيه وهي اصلا مكنتش متمسكة بيه
عموما في ناس فعلا بتسال دون قصد
بس سؤالها بيبقه محرج واللى بيمع بيتحرج يحرج السائل

لا حول ولا قوة الا بالله

الناس مبقاش ليها كلام غير في احوال الناس

Khaled يقول...

الحاجات دى مابتحصلش غير بين البنانيت أما فى عالم الرجال فالمسألة بتكون عادة أوقح ....

ههههههههههههههه
بوست هايل

هى فوضى يقول...

فى ناس كتير متطفلة
وبتخنق الواحد بس لازم كمان الواحد يوفقهم عن حدهم

لماضة يقول...

لا اسمعي الارخم بقى

واحد زميل فاضل
بيسالني انا باخد كام في الشهر
وقعد يحسبلي بيطلعلي صافي كام في ايدي
بعد الموصلات والمصاريف

شفتي ارخم من كده
هههههههههههههههه

لورنس العرب يقول...

ولله هو الفضول والفراغ بيدفع الناس الى انهم يسألوا عن اشياء لا تخصهم
لكن الحقيقه كله كوم والسؤال عن الحمل كوم
يعني واحد يسألني عن صديقي هو مراته حامل ولا لأ- طيب انا ارد عليه اقول له ايه؟
يعني مثلا هسأل صاحبي واقوله مراتك حامل؟
طبعا شيء غير معقول
بس فيه ناس بتسأل عن الحمل بشكل سخيف شويه
يعني مثلا واحد يقول لواحد مراتك مش حامل ليه ده انتم بقالكم 5 شهور متجوزين!!!
المفروض تبقى حامل!
الحقيقه الواحد بيقف يسمع ومش عارف يعمل ايه
بس دي قلة ادب الصراحه

صاحب المضيفة يقول...

كلامك بيحصل بالظبط وبيخلي الواحد فعلا في المواقف دي هاينفجر من الغيظ

وبرضو

الواحد بيحرج انه يحرج الللي بيعمل كده

لكن يبدو ان في ناس مش بيكون عندها من الأحمر فعلا


ربنا يعافينا يارب

وبجد انا زعلت جدا على البنت اللي سابت خطيبها ده

لا حول ولا قوة الا بالله

وميض ابتسامة يقول...

للاسف عادتنا احنا المصريين المتوارثة بتخلينا فضوليين .. واصحاب قدرة غير عادية للتدخل فى شئون الاخرين بل والفتوى فيما نجهله اصلا ..وده شئ سخيف .. ناهيك عن الاسئلة الحرجة التى تناولتيها فى هذا البوست المميز .. وهذا ايضا من اسخف عادتنا وملاحقتنا فى التعامل مع الاصدقاء والزملاء وفيما بيننا داخل الاسرة الواحده..
لو كل واحد يخليه فى حاله ..ويتعلم كيف تكون اللباقة والفطنه ..كنا ح نبقى احسن بكتير مما نحن فيه..
مراعاة مشاعر الغير هى نقطة غاية فى الاهمية .. والاستخفاف بها صورة سيئة لصاحبها امام الآخرين

مع خالص تحياتى

زوجه يقول...

عارفين ايه مشكلتي
مشكلتي عكس المطروحه او ممكن تكون جزء منها
مش قادره اكون سخيفه علي الشخص سخيف عليا
مش بقدر ارد رد سخيف في كل معاملاتي إلا نادرا جدا وبيبقي من الضغط العصبي
ربنا يهدينا

وردة يقول...

بحييكي جداعلي الموضوع ده لانك لمستي حاجة كلنا بنتأذي منها وهي الفضول والتدخل فيما لايعنينا
والله احنا ساعات بنتجرح من الاسئلة دية وخصوصا لو الموضوع شخصي جدا
اكيد انا لو محتاجه احكي وافضفض حعمل كده من غير ما حد يفرض ده عليا واكون محرجة وساعتها ممكن يكون ردي وحش او حتي ابتعد نهائيا عن الشخص ده
اكيد انا كمان مش ملاك بس علي قد ما بقدر بحاول مكنش حشرية
وشكرا

صبرني يارب يقول...

دى انا باسميها غتاته اجتماعيه

وحشريه وقلةذوق

ودول يامااكثرهم يا اختي

حاجه تقرف

arsenalwy يقول...

كوشيا

السلام عليكم

ايه ده موسوعة ياناس ايه كل الأسئله دى ما هو ده اللى جايبنا لورا الناس كل شغلها دلوقتى الناس التانيه

بالنسبه لموضوع الأسهم عينيا ليكى هعمل بوست اوضح فيه كل حاجه

blue-wave يقول...

فعلا والله حاجه تدايق
ليه الناس دايما حاشرة نفسها فى اللى مالهاش فيه؟
حاجه غريبه بجد

شهد الكلمات يقول...

ما طبعا شركوا الراجل و طلعوه قرد هاتطيق تبص في وشه بعد كدة
انتي عارفة المشكلة ان احنا مش بنحط نفسنا مكان غيرنا يعني لو واحدة من اللي اتكلموا دول كانت شكلها وحش زي عريس البنت دي كان هايكون موقفها اية و هاتحس باية لية مش بنقتنع من جوانا ان خلقتنا دي بتاعة ربنا وهب حد شكل حلو ومش هاقول و التاني وحش لان ربنا مش بيخلق حاجة وحشة
ثم المفروض لما نشوف حد ربنا حرمه من نعمه وهبنا بيها نقول الحمد الله الذي عفانا مما ابتلى به كثيرا من خلقه و فضلنا عن خلقا كثيرة
دي النقطة الاولي

اما بقي رغي الناس فواضح انك محروقة منهم زي انا هاطق من الحشارين اللي عندي في الشغل مش بيسيبوا حد في حاله
رغم برده لو هما بقي اللي اتحطوا في نفس الموقف هايكونوا مضايقين

ثم بقي حاجة كدة بيني و بينك بما اننا في الهوا سوا الحشري ده بيدور علي المؤدب اللي مايعرفش يقل في ذوقه و يحرجه و يقعد بقي يستفسر منه و الخيبة التاني يفضل يكر لانه مكسوف يحرج الحشري الاولاني !!!!

بس خلاص

mohamed ghalia يقول...

فعلا الفضول ده مشكلة
ناس بتتدخل فى كل حاجة وبيهدوا النفوس
على الأخر ههههههههههه
تحياتى

الفارس الملثم يقول...

هي الاسئله نوعين , نوع بتحمل ود وبتكون سببها معرفه اكثر للشخص او للتقرب منه ... وفي اسئله تفوح منها رائحه الفضول اللي هدفه التلصص علي اسرار الاخر وربما حتي الشماته ..

تعرفي اللي يغيظ ان واحد يقوم باعطاء راي في شئ دون ان يطلب احد منه ذلك واحيانا كتير بيكون راي سخيف لكنه يثير الحنق والضيق , وعلي فكره في ناس بتحترف اصطياد الاخطاء والعيوب لاعطاء لانفسهم احساس بالتميز

تحياتي

أحمد المسلم يقول...

السلام عليكم ورحمة الله وبركاته

قال رسول الله صلى الله عليه وسلم : " من حسن إسلام المرء تركه ما لا يعنيه " .

لذا لو تعرض أحد لمثل هذه الأسئلة السخيفة فأفضل حل هو سؤالهم وما شأنكم ؟ .

أيضا يجب علينا ألا نسمح لغيرنا بأن يقول رأيا سخيفا يؤثر على قراراتنا ، والسلام ختام .

اجندا حمرا + هارت بيت يقول...

للأسف ياعزيزتي الناس فضوليه بطبعها و فيه ناس بتتدخل في اللي مالهاش فيه و بتتعمد احراج غيرها
انا مش بحب النوعيه دي من الناس و يوووه كتير اتعرضت لمواقف محرجه و تضايق بس الحمدلله طلعت منها صحيح في وقتها ضايقتني و احرجتني بس الحمدلله انا فين و كنت فين

غروب يقول...

عندك حق والله

انا اول مره اجى مدونتك

بس بجد بجد ومن غير مجامله عسوله اوى وجميله

كفايه ان طريقه الكلام مش مستفذه ولا ممله

ندخل في الموضوع

بجد بتخنق جدا لما حد يسالنى اسئله من دى

عارفه انا لسه مكمله عشرين من كام يوم

والاقي ناس بتقولى انتى ايه اللى اخر خطوبتك

شئ غريب جدا هو انا المفروض اتخطب في سن كام يعنى؟؟؟؟؟؟10 ؟؟؟

وغيرها كتير وللاسف لانى مش بعرف اصد حد او ارد عليه رد وحش برد بزوق بس بتخنق من الشخص واقفل منه وخلاص

فعلا الناس محتاجه تتعلم ازاى تتكلم وتراعى مشاعر الاخرين

بحييكي جدا على الموضوع واتمنى نبقي اصحاب علطول

غروب

kochia يقول...

Dr Ibrahim samaha
ــــــــــــــــــــــــــــــــــــــــــ
صحيح ..اذا اهتم كل شخص بما يخصه لاصبحنا افضل بكثير
تحياتي
ــــــــــــــــــــــــــــــــــــــــــ

kochia يقول...

مــــولان
ـــــــــــــــــــــــــــــــــــــــــ
ايوة بيحصل العن
بس انا قلت كفاية دول .. هيادوا الغرض
تحياتي
ـــــــــــــــــــــــــــــــــــــــــ

kochia يقول...

نهر الحب
ـــــــــــــــــــــــــــــــــــــــــ
ايوة بيسببوا الاذي بدون ما يشعروا .. ولو الامر نفسه حصل معاهم بيكون رد فعلهم اسوأ بكثير
تحياتي
ـــــــــــــــــــــــــــــــــــــــــ

kochia يقول...

فاتيما
ـــــــــــــــــــــــــــــــــــــــــــ
حلوة اوي كوشكش منك .. بحبها جدا
هو ساعات بيكون اهتمام .. لكن الاسئلة دي لازم تكون من حد قريب اوي ومتكسفش اني ارد عليه
وكمان فيه اسئلة وتعليقات سخيفة ملهاش رد وعمرها ما هتيجي مش شخص قريب
وفيه كمان تعليقات الغرض منها ان الشخص يعرفك انه واخد باله من الموضوع الفلاني .. وانه ذكي يعني وبيفهمها وهي طايرة
واسباب كتير صدقيني مش بس اهتمام
الاهتمام الحقيقي بشخص اني اهتم اني مجرحوش
تحياتي
ـــــــــــــــــــــــــــــــــــــــــــ

kochia يقول...

mony
ــــــــــــــــــــــــــــــــــــــــــ
والله كانت هتوافق فعلا .. بس فيه ناس كدة
وعلي فكرة كل واحدة فيهم دلوقتي متجوزة جوازة انقح من التانية ..
دي انا بسميها قلة ذوق وتفاهة
يارب يرحمنا
تحياتي
ـــــــــــــــــــــــــــــــــــــــــــ

kochia يقول...

انا حره
ــــــــــــــــــــــــــــــــــــــــــ
يمكن السؤال بيبسط الطرف التاني .. لكن لما تكون واحدة مش مخلفة وحد يقولها هو انتوا مخلفتوش ليه لحد دلوقتي .. او روحي اكشفي .. او هو العيب مي مين .. ولو من الزوج تقولها لاااا متسكتيش وخليه يتعالج .. هو احنا واخدين منهم ايه غير حتة عيل .؟؟؟؟
كلام مش ممكن يبسط حد من وجهة نظري
وفيه حاجة ممكن تتسال وحاجة لا
وفيه حد ممكن اساله وحد لا
واعتقد ان اللي بترد علي خصوصيات حياتها بفخر وسعادة .. اما انها عاوزة توصل حاجة ومعلومة معينة للطرف الاخر .. زي مثلا الراحة المادية .. او تمكنها من السيطرة علي الزوج .. او ذكائها في بعص التصرفات
والسبب الاخر ان لم يكن هذا الشخص حبيب او حكيم كما قال المثل الشعبي فاذن من تحكي خصوصياتها .. حمقاااء
تحياتي
ــــــــــــــــــــــــــــــــــــــــــ

kochia يقول...

صباح الصباح
ـــــــــــــــــــــــــــــــــــــــــ
من حيث شايلة اه
ومعبيه .. اه
بس مش علي الاخر الحمد لله
عشان انا بعرف اوقف التطفل عند حده لما بيزيد وبيرخم اوي
ومن السخافة للغباء خيط رفيع الناس بتتنطط بينهم
تحياتي
ــــــــــــــــــــــــــــــــــــــــــ

kochia يقول...

(أم البنين)
ـــــــــــــــــــــــــــــــــــــــــ
الانسان الذي لا يؤثر فيه كلام الناس 100% مش طبيعي اعتقد
حتي لو بالتفكير او الارق من هذا الكلام
ومكنش برده المثل قال
الزن علي الودان امر من السحر
اللهم اعفنا واعفو عنا
تحياتي
ــــــــــــــــــــــــــــــــــــــــــ

kochia يقول...

Shimaa Gamal
ــــــــــــــــــــــــــــــــــــــــــ
اه والله .. ولاد حلال جدا
وصحيح عندك حق
شدي حيلك يعني ايه ؟؟
تروح سوق الكانتو تشتري عريس بتلاتة صاغ مثلا ؟؟
والله كلامك كله مظبوط
وقلتي تعليقات انا مكتبتهاش بس كنت لازم احطها .. واشكرك علي اضافتها
يارب سلم
تحياتي
ـــــــــــــــــــــــــــــــــــــــــــ

kochia يقول...

Hina wi Hinak
ــــــــــــــــــــــــــــــــــــــــــ
اه هو انحشار وبرود وتلامة فعلا
" غالبا ما يكون بغرض الشماتة أو المقارنة بين المتدخل والمتدخل عليه... سلوك مريض جدا لا يمارسه إلا مريض خلقيا (بضم الخاء)... ""
وعجبني التعليق فحطيته تاني
هذه هي الحقيقة
تحياتي
ـــــــــــــــــــــــــــــــــــــــــــ

kochia يقول...

habiba
ــــــــــــــــــــــــــــــــــــــــــ
والله بفكر في كدة
افكر اقولها شوفي نفسك الاول ماتي فيكي كذا وكذا .. لكن اتكسف اقول كدة واتكسف اجرح حد مهعما كان وقح للاسف
وانا شخصيا لو تعرضت لكدة بخرج من الموضوع بشكل لبق وحازم .. بس بشوف قدامي كتير وببقي عاوزة ارد عنهم ساعات
ربنا يهدي فعلا
تحياتي
ـــــــــــــــــــــــــــــــــــــــــــ

kochia يقول...

Beram ElMasry
ــــــــــــــــــــــــــــــــــــــــ
تفتكر الحياة الكريمة عي اللي هتغير الخلق ده ؟؟
معتقدش لان انا شفا السلوك ده من ناس يحيون الحياة الكريمة كمان نتمناها حميعا
ده دين
واخلاق
وعقل
تحياتي
ــــــــــــــــــــــــــــــــــــــــ

kochia يقول...

ماما أمولة
ـــــــــــــــــــــــــــــــــــــــ
اشكرك يا عزيزتي .. ويارب يبعدهم عننا ونرتاح من القر والزم
تحياتي
ـــــــــــــــــــــــــــــــــــــــ

kochia يقول...

هانى زينهم
ــــــــــــــــــــــــــــــــــــــــ
" الجحيم هو الاخرون ".
حقا حقا ما قلت " توكيد لفظي " ههههههه
المشكلة في الاحراج والجرح
حتي لو الاخرون شربوا من البحر
وهذا ما اقصده
فلنراعي الاخرون ولا نجرحهم
تحياتي
ــــــــــــــــــــــــــــــــــــــــ

kochia يقول...

غير معرف دادي ام جني..
ــــــــــــــــــــــــــــــــــــــــ
ايه جارتك دي ؟؟؟؟
يا ساتر ؟؟
بس هم دول اللي بتكلم عنهم
ويمكن جارتك دي كانت الالهام
منوراني دايما
تحياتي
ــــــــــــــــــــــــــــــــــــــــ

kochia يقول...

romansy
ـــــــــــــــــــــــــــــــــــــــــ
الحشريين كتروا فعلا جداااااااا
ربنا يرحمنا منهم
تحياتي
ـــــــــــــــــــــــــــــــــــــــــ

rara يقول...

والله معاكى حق
الحياة كلها بقت سخيفه

kochia يقول...

maha zein
ـــــــــــــــــــــــــــــــــــــــــ
ده فضول وتطفل غير مبرر اطلاقا
ربنا يعفنا
تحياتي
ـــــــــــــــــــــــــــــــــــــــــ

kochia يقول...

Khaled
ــــــــــــــــــــــــــــــــــــــــــ
اوقح ؟؟؟

يعني البنانيت رحمة بقي
انا بقول كدة برده
انهم رحمة في كل حاجة
تحياتي
ــــــــــــــــــــــــــــــــــــــــــ

kochia يقول...

هى فوضى
ــــــــــــــــــــــــــــــــــــــــــ
ايوة الظاهر لازم .. بس لما تكون ست كبيرة في سن والدتك
هتقولها ايه بس ؟؟
المفروض من نفسهم
تحياتي
ــــــــــــــــــــــــــــــــــــــــــ

kochia يقول...

لماضة
ــــــــــــــــــــــــــــــــــــــــــ
بصراحة مشفتش ارخم من كدة
بس شفت رخامة زي كدة
تحياتي
ــــــــــــــــــــــــــــــــــــــــــ

حـــــدوتـــــة يقول...

السلام عليكم

والله عندك حق فى اسئلة كتير الواحد بيسمعها
وبيبقى عايز يخنق اللى بيسأل

سلالالالالالالالالالالالالالالالالالالالالالالالالالالالالالام

kochia يقول...

لورنس العرب
ــــــــــــــــــــــــــــــــــــــــ
هههههههههه
حلو اوي سؤال مراتك مش حامل ليه ؟؟؟
سخافة منقطعة النظير .. والله حتي لو هزار لانها محرجة
هي قلة ادب فعلا
تحياتي
ـــــــــــــــــــــــــــــــــــــــــ

kochia يقول...

صاحب المضيفة
ــــــــــــــــــــــــــــــــــــــــ
ايوة فيه ناس معندهاش من الاحمر خالص
عافانا الله فعلا
تحياتي
ــــــــــــــــــــــــــــــــــــــــ

kochia يقول...

وميض ابتسامة
ـــــــــــــــــــــــــــــــــــــــــ
اه هي عادة سخيفة وبندعي انها اهتمام بالاخر
اطلاقا
هي اهتمام بالنفس
واتفق معك تماما
تحياتي
ـــــــــــــــــــــــــــــــــــــــــ

kochia يقول...

زوجه
ــــــــــــــــــــــــــــــــــــــ
ربنا يهدينا جميعا
ــــــــــــــــــــــــــــــــــــــ

kochia يقول...

وردة
ـــــــــــــــــــــــــــــــــــــــ
اشكرك وفعلا هذا ما يحدث
وفعلا لو عاوزة اتكلم هتكلم .. لكن فيه حاجات لا يصح السؤال عنها
تحياتي
ــــــــــــــــــــــــــــــــــــــــ

kochia يقول...

صبرني يارب
ــــــــــــــــــــــــــــــــــــــــ
هي فعلا تقرف
ربنا يعافنا
تحياتي
ــــــــــــــــــــــــــــــــــــــــ

بنت الغربة يقول...

حبيبتى كوشيكا انا اول مرة ادخل عندك وان شاء الله مش الاخيره -اسخف حاجه فى الدنيا الناس الحشريه -خصوصا الى دماغه فاضيه ومعندوش حاجه يقولها-بيدولر على مشاكل غيره علشان يقارنها بحياته ويشوف مين احسن وفى الاخر كل الناس زى بعض -وربنا يهدى الجميع

kochia يقول...

arsenalwy
ــــــــــــــــــــــــــــــــــــــــ
هو ده اللي جايبنا ورا فعلا
تحياتي
ــــــــــــــــــــــــــــــــــــــــ

kochia يقول...

blue-wave
ـــــــــــــــــــــــــــــــــــــــــ
سؤال مش عارفة اجابته
ـــــــــــــــــــــــــــــــــــــــــ

kochia يقول...

شهد الكلمات
ـــــــــــــــــــــــــــــــــــــــــــ
الحشري ده بيدور علي المؤدب اللي مايعرفش يقل في ذوقه و يحرجه و يقعد بقي يستفسر منه و الخيبة التاني يفضل يكر لانه مكسوف يحرج الحشري الاولاني

جبتي المفيد
لازم نضرب بعد كدة علي النافوخ
تحياتي
ــــــــــــــــــــــــــــــــــــــــ

kochia يقول...

mohamed ghalia
ــــــــــــــــــــــــــــــــــــــــــ
ايوة ربنا يرحمنا منهم
تحياتي
ــــــــــــــــــــــــــــــــــــــــــ

kochia يقول...

الفارس الملثم
ــــــــــــــــــــــــــــــــــــــــــ
ايوة فعلا
الراي والفضول بدون سبب وبدون فهم واصطياد الاخطاء هذا اشرهم
عافانا الله
تحياتي
ـــــــــــــــــــــــــــــــــــــــــ

kochia يقول...

أحمد المسلم
ــــــــــــــــــــــــــــــــــــــــ
اشكرك علي رايك السديد
فعلا هذا ما يجب فعله
تحياتي
ــــــــــــــــــــــــــــــــــــــــ

kochia يقول...

اجندا حمرا + هارت بيت
ـــــــــــــــــــــــــــــــــــــــــ
يعني بقيتي بتعرفي تردي كما يجب ؟؟
يارب كلنا نوصل لكدة
تحياتي
ـــــــــــــــــــــــــــــــــــــــــ

kochia يقول...

غروب
ــــــــــــــــــــــــــــــــــــــــ
هههههههههه
صحيح سؤال غريب ومستفز
ومرحبا بيكي دائما
تحياتي
|ـــــــــــــــــــــــــــــــــــــــ

kochia يقول...

rara
ـــــــــــــــــــــــــــــــــــــــ
يارب يرحمنا
ـــــــــــــــــــــــــــــــــــــــ

kochia يقول...

حـــــدوتـــــة
ــــــــــــــــــــــــــــــــــــــــ
ايوة فعلا وبنمسك نفسنا
تحياتي
ــــــــــــــــــــــــــــــــــــــــ

kochia يقول...

بنت الغربة
ــــــــــــــــــــــــــــــــــــــ
ان شاء الله مش الاخيرة
فعلا هم عاوزين يقارنواويفاضلوا مش كلها محبة
تحياتي
ــــــــــــــــــــــــــــــــــــــ

Mohamed Hamdy يقول...

مش هقول اكتر من جمله مفكر مهم بصراحه نسيت اسمه .. الاخرون هم الجحيم .

فعلا الناس دى قادره تحول حياة الاخرين لجحيم مش عارف ليه بيعملو كده

تحياتى

Rania يقول...

التطفل و السخافه بقت مرض مزمن فى مجتمعنا دلوقت

تحياتى

تسنيم حسين يقول...

السلام عليكم

أنا بقى مش عارفه....كل واحد بيدخل فى اللى مالوش فيه ليه...هم فكرهم ان دى فهلوه....لأوألف لأ دى سخافه وهيافه...وفى النهايه البنت اتخطبت ما اتخطبتش اتجوزت ما اتجوزتش خلفت ماخلفتش...ده كله قدر ربنا....
وفى الأخر لا يتدخلوا فى مالا يعنيهم حتى لا يسمعوا مالا يرضيهم..
مشكوره على الموضوع
دمتى بخير

والسلام عليكم

dyab يقول...

مشاركة فعلا روعة
واقعية
بتحدث كل يوم
مفيدة جدا
عمل جيد و الي الامام

rovy يقول...

السلام عليكم

عندك حق فعلا فيه ناس تافهه و مؤذيه و مش بتعرف تعيش من غير ما تلاقى حاجه تتكلم فيها او حد تتريق عليه او حتى تعمل نفسها ام العريف و تنصح بغلاسه و تدخل فى شؤن غيرها ..

ربنا يهدى الجميع

تفديرى و تحياتى

رئيس جمهوريه نفسى يقول...

اسخف سوال اتعرضت لية بعد ما فسخت خطوبتى الوحيده وكان السوال بعدها بكام يوم انت حتخطب مين علشان تسيب خطيبتك وكانى سايبها علشان واحده غيرها
موضوع الاسئلة السخيفة لو كل واحد احترم مساحة الخصوصية فى حياة الاخرين اكيد حتختفى الاسئلة السخيفة

علي محـمــــــد يقول...

السلام عليكم

انا قبل لا اعلق نفسي اسألك كم سؤال ..؟
توصليهم لصاحبتك ..
هي البنت اللي سابت خطيبها عندها كام سنه ؟ وبتشتغل والا لا ؟ وعندها عربيه والا بتركب مواصلات ؟ وهل كان ممكن يتحسن وضعها المادي والنفسي لو ماسبتش خطيبها ؟ :(
طبعاً اعتذر عن كتابة الاسئله دي - لأنها ببساطه من الأسئله السخيفه اللي تكلمتي عنها واطلب منك عدم توصيلها :)
والله يا اختي الفاضله لقد اصبتي موضوع مهم جداً - وفي اعتقادي ان ماتحدثتي عنه هو (الذوق) ورفاعته - فهناك من يفتقدون الذوق واللباقه في حديثهم وتصرفاتهم وهم لايهتمون لردة فعل من يقابلهم تجاه مايقولون - واعتقد ان افكارهم محدوده - اتصور ان الذوق موهبه رائعه وتعبر عن صاحبها بشكل كبير واعتقد ان اصحاب الذوق الرفيع هم دائماً اصحاب شخصيات مميزه - فلا يجب سؤال الناس عن خصائصهم الدقيقه - ولأكون منصفاً في تعليقي على الجزء الأول من البوست وهو تعليقات الصديقات على صور ذلك الشاب أقول .. مع احترامي الشديد لصديقتك اقول انها لاتمتلك شخصيه قويه تستطيع من خلالها ادارة منزل ذلك الشاب في حال كانت زوجه له .. فهي تغيرت مفاهيمها وقناعاتها بخطيبها لمجرد دقائق قضتها مع صديقاتها وهم يسخرون منه .. وكان يجب عليها ان تدافع عنه بنبرة غضب لكي يعرف الجميع حدودهم فلكل فعل ردة فعل :( .. لايمكن ان تفرض احترامك دون ان تضع حدود للتعامل معك :) .. جميل ان يكون الشخص لبق في حديثه وطيب في تعامله واديب في لفظه ولكن هذا لايعني سهولة التجاوز عن الأدب والحدود .. كنت اتمنى من صديقتك ان تستبدل ذلك الحرج بشيءٍ من الغضب لكي تتبدل الأماكن ويكونون هم في حالة الحرج وهي في حالة القوه :)

اعذريني على الإطاله ولكن الموضوع يحتاج الكثير والكثير من الحديث - وانا اتوقف هنا عن التعليق من باب (الذوق فقط)

شكراً لك

في امان الله

كفايـة طيبـة يقول...

ياربي

بجد كل حاجة اتقالت سخيفة

كأنك يابنتى جمعتى كل حاجة سخيفة بتتقال من الناس

الناس مبتسبش حد فى حاله

متجوزتش يقولوا ليه اتخطبت يقولوا هتتجوزى امتى ...تتجوز يقولوا هتخلفى امتى ... تخلف يقولوا هتخاوى الواد امتى .... وكل الكلام من ذلك القبيل

ولعلمك انا كنت فاكرة ان الستات الكبار بس اللى كدة
بس دلوقتى بقت البنات الصغيرة كمان بقت كدة

ربنا يهديهم :)

مـجـنـووون يقول...

والله يا غاليه الي يدي للناس فرصه أنهم يدخلوا في حياته يبقي يستاهل إلي يحصله

لأزم يحط النقط علي الحروف من الأول ويبين لكل واحد مكانته ويوضح له الحاجات الي مينفعش أنه يتخطاها

وبعدين إلي ياخد علي كلام الناس عمره ما هيرتاح

وحطي قدامك ديما المثل بتاع جحه وابنه والحمار

والمثل بيقول الناس مبيعجبهاش العجب ولا الصيام في رجب

تقبلي مروري سيدتي
مجنووون

norahaty يقول...

السلام عليكم ورحمة
الله تعالى وبركاته
تدخل الناس فى شئون الاخريين
هواييييييييييييييييييييييية
وإدمان لبعض الناس ماتحلى العيشة الا
بهاولو كل واحد بص فى حاله حيلاقى كتير حاجات واجبة الاصلاح لكن تعملى
ايه فى الناس الحشرية!!!!!

afew good men يقول...

كوشيا الجميلة جدا

اخر تعليق والحمد لله ضمنت الجايزة

امنية حياتي

الناس تحترم خصوصيات بعض

حتي الاهل يحترموا خصوصيات ابنائهم

حالة احترام جميلة

اما الاسئلة المحرجة

فمن كان بيته من الزجاج لا ....

مين فينامش فيه عيوب

عموما دا قدر والقدر احيانا يحمل السعادة بوجه مختلف

يشقي الانسان
فقط بارادته

تحياتي ليكي كتير جدا

afew good men يقول...

وايه العنوان الجامد دا

كوشي
انتي بتذاكري من ورايا

تحياتي

الي الامام دائما
متنساش هدية اخر تعليق

OverFOrty يقول...

لا حلوه بجد اسئله كلها من واقع الحياه و بتتكرر تقدرى تقولى اكلشيهات
بس بالنسبه للرجاله ملقتش اسئله مماثله كتير يمكن اشهرها المرتب بتاخد كام
ويمكن بين الشباب لو واحد مرطبت بواحده بسألوك ها وصلت معاها لحد فين ها قول متخبيش
يمكن الفضول اقل شويه بين الرجال احتمال؟؟

صدى الصمت يقول...

والله عندك حق ياما ناس بتتدخل فيما لايعنيها وتتحشر بسخافة وتعتبر ان لها الحق فى تعديل نظام الكون وحياة البشرية كلها ،
أثرتِ موضوع غاية فى الأهمية أحييكِ

kochia يقول...

Mohamed Hamdy
ـــــــــــــــــــــــــــــــــــــــــ
ايوة كلمة الاستاذ / هاني زينهم
الجحيم هو الاخرون .. فعلا قد يكون ذلك حقيقيا تماما
ـــــــــــــــــــــــــــــــــــــــــ

kochia يقول...

Rania
ـــــــــــــــــــــــــــــــــــــــــ
فعلا اتفق معكِ تماما
ـــــــــــــــــــــــــــــــــــــــــ

kochia يقول...

تسنيم حسين
ـــــــــــــــــــــــــــــــــــــــــ
فعلا بقت ظاهرة للاسف
كفاية
دي دعوة
ـــــــــــــــــــــــــــــــــــــــــ

kochia يقول...

dyab
ـــــــــــــــــــــــــــــــــــــــ
اشكرك جدا .. وفعلا للاسف هي حاجة بتحصل كل يوم
ـــــــــــــــــــــــــــــــــــــــ

kochia يقول...

rovy
ـــــــــــــــــــــــــــــــــــــــ
ناس تافهه و مؤذيه
حقا ما قلتي
ربنا يهدي
ـــــــــــــــــــــــــــــــــــــــ

kochia يقول...

رئيس جمهوريه نفسى
ـــــــــــــــــــــــــــــــــــــــــ
فعلا سؤال سخيف .. وتلاقي الناي بتنسج قصص عشان تثبت لنفسها انها صح
فعلا ياريت نحترم خصوصيات بعض
ــــــــــــــــــــــــــــــــــــــــــ

kochia يقول...

علي محـمــــــد
ـــــــــــــــــــــــــــــــــــــــ
فعلا هي مسالة ذوق وقلة ذوق
وصحيح هي لا تملك شخصية قوية .. وقد تكون غير مقتنعة به اصلا ولكن هذا لا يقلل من بشاعة التعليقات التي قيلت
واشكرك هعلي ذوقك في النهاية ولم تكن لتضيرني لو زودت عن هذا
تحياتي
ــــــــــــــــــــــــــــــــــــــــ

kochia يقول...

كفايـة طيبـة
ـــــــــــــــــــــــــــــــــــــــــ
الناس مبتسبش حد فى حاله
صحيح ليه كدة ؟
وفعلا الفضول والسخافة امتدت لكل الاعمار
بعد ان كان المبرر هو الاهتمام اصبح فضول وتطفل ونظرية العنب الحصرم
ـــــــــــــــــــــــــــــــــــــــــ

kochia يقول...

مـجـنـووون
ـــــــــــــــــــــــــــــــــــــــــ
إلي ياخد علي كلام الناس عمره ما هيرتاح .. لكن مش هتقدر متفكرش ومتضايقش
الافضل ان كل واحد يلتزم احسن
تحياتي
ـــــــــــــــــــــــــــــــــــــــــ

kochia يقول...

norahaty
ــــــــــــــــــــــــــــــــــــــــ
صحيح نعمل ايه في الناس الحشرية ؟؟
سؤال وجيه جدا
تحياتي
ــــــــــــــــــــــــــــــــــــــــ

kochia يقول...

afew good men
ـــــــــــــــــــــــــــــــــــــــــ
انت مش اخر تعليق ولا حاجة .. مالكش جوايز عندي
وصحيح بيوتنا كلنا من زجاج لماذا نجرح في بعضنا البعض
واشكرك علي اعجابك بالعنوان
لكن بذاكر ايه من وراك ؟؟؟
تحياتي
ـــــــــــــــــــــــــــــــــــــــــ

kochia يقول...

OverFOrty
ــــــــــــــــــــــــــــــــــــــــ
ايه وصلت معاها لحد فين ؟
سؤال سخيف فعلا
ربنا الفضول اقل عند الرجال .. ولكن الاسئلة اكثر سخافة فيما بينهم
او اكثر وقاحة كما قال " خالد" في تعليقه
تحياتي
ـــــــــــــــــــــــــــــــــــــــــ

kochia يقول...

صدى الصمت
ـــــــــــــــــــــــــــــــــــــــــ
صح بيفكروا ان من حقهم تعديل البشرية
تحياتي
ـــــــــــــــــــــــــــــــــــــــــ

دعوة للأمل يقول...

اكيد الناس دية مبيعجبهاش العجب و لا الصيام فى رجب و فعلا عندك حق هو دة اللى بيحصل و اللى بيقول كدة دة بيبقى انسان ضعيف من داخل و عندة نقص و بيحاول يعوضة بكلام قد يجرح مشاعر الاخرين بس اقولك على نصيحة و لا يهمك من كلام الناس


تحياتى لكى
و الموضوع جميل اوى

يوميات نائمة في الأرياف يقول...

ييييييييييييييييه
الاسئلة السخيفة دي
انا ذهلت اوي لما عرفت انها سابت خطيبها
ربنا معانا في المجتمع ده
رنا

اقصوصه يقول...

فعلا معاج حق

النا سما تتر حد فحالها

ولا يراعون حتى

ابسط قواعد الذوق

بتدخلهم بشكل فج وجارح

وابدائهم لملاحظات

في غير موضعها الصحيح

تقبلي مروري

kochia يقول...

دعوة للأمل
ـــــــــــــــــــــــــــــــــــــــــ
اشكرك .. وفعلا عندك حق
دة انسان ضعيف من الداخل و عندة نقص و بيحاول يعوضه بكلام قد يجرح مشاعر الاخرين
تحياتي
ـــــــــــــــــــــــــــــــــــــــــ

kochia يقول...

يوميات نائمة في الأرياف
ــــــــــــــــــــــــــــــــــــــــ
اهي دنيا
تحياتي
ــــــــــــــــــــــــــــــــــــــــ

kochia يقول...

اقصوصه
ـــــــــــــــــــــــــــــــــــــ
اهلا بيكي
فعلا ده اللي بيحصل للاسف
نعمل ايه ؟؟
تحياتي
ـــــــــــــــــــــــــــــــــــــ

soska يقول...

ههههههههههه بتحصل بس مش معنى ان بنت عملت كده تتعقدي فيهه بنات محترمين مش كتير لكن فيه وحتى الليس دول برضه مش كلهم بالسفاله دي اكيد فيه منهم اللي احساسه كده بس محترم اما الرجاله فأنا هقولك على حاجه دماغ الراجل الشرقي اللي كوبي و بيست يعني مادام حضرتك قبلتي تكلميه يبقى الامر مايمنعش اجرب و هي يعني كانت بنت خالتي ولا تعرفني و حتى احتمال كبيييييييييير اوي ان البنت اللي قالتلك انا ليس دي تبقى راجل بس بيجبهالك واحده واحده ههههههه
على العموم انتي قدامك حلين
لو عايزة تتكلمي مع حد و تبقوا اصدقاء من غير ما يفهمك غلط
الحل الاول انك تغيري الشراب قصدي انك تكلمي راجل مش شرقي يعني شوفيلك واحد ايطالي مثلا سكره كده واحد من الحاضارات اللي مافيهاش اوض نوم و بيجامات او تتعرفي على ولد مثلي يكون صديق اليف هههههههه يمكن متتقبليش فكره ان يكون عندك صديق مثلي وممكن الاوروبي ولا الاجنبي برضه يكون سافل فالحاله دي يبقى توفري مصاريف النت و بلوجك في جيبك معلقينك حواليكي اللي يقولك شرابك لونه ايه تقطعيه فالمدونه اكيد مش كل اللي بيعلقه هنا ملايكه يا كوتشيا لكن مادام فيه ناس كتير بتدخل و هيتقري التعليق من كل الناس هتلاقيهم بيحترموا نفسهم عشان البرستيج والسمعه فخليكي مع جروبات و متحاوليش كمان تتصاحبي على حد اوي من النت لأن اغلبها بتكون اي كلام لأن مش كل واحد بيكتب كلام حلو بيططلع شخصيه محترمه والله يابنتي ممكن تقولي على مجنونه بس فعلا دي الحقيقه
طولت في اول مره اعلق بس الموضوع خلاني اندمجت بصراحه

afew good men يقول...

اخرتعليق واوعي مش تبعتي الجايزة

تحياتي

kochia يقول...

ــــــــــــــــــــــــــــــــــــــ
soska
ــــــــــــــــــــــــــــــــــــــ
عزيزتي
يبدو انك علقتي علي الموضوع التالي هنا
اسمحي لي ان ارد عليكي في الموضوع نفسه
تحياتي
ــــــــــــــــــــــــــــــــــــــ

kochia يقول...

ــــــــــــــــــــــــــــــــــــــ
afew good men
ــــــــــــــــــــــــــــــــــــــ
ايوة جايزة اخر تعليق
ماشي يا عم
مش هحرمك منه ان شاء الله
تحياتي
ــــــــــــــــــــــــــــــــــــــ

seven يقول...

المشكلة فى الشعب المصرى
انه بيحب يتدخل فى خصوصيات
الاخرين حتى لو مش علاقتو بيهم
قوية
هيه عادة سيئة بس نعمل ايه بقة

kochia يقول...

seven
ــــــــــــــــــــــــــــــــــــــ
ايوة فعلا شعب فضولي جدا
دي من سماته الحقيقة
تحياتي
ــــــــــــــــــــــــــــــــــــــ