OOOOPS!!!

--
----

الفيس بوك يا حضرات كائن غريب جدا ..

ابتدي ينمو بشكل جرثومي منذ ان وجد علي الشبكة العنكبوتية ..

ومن زمان .. من اول ما سمعت عنه .. وانا اتساءل عن ماهيته وفحواه ..

--

وتطوع بعض الاصدقاء لشرحه لي ولكني للاسف لم افهم كثيرا ..

ولكن ما وصلت له انه اذا اشتركت في الفيس بوك سوف يري كل اصحابي كل اصحابي

يعني اي حد هضيفه عندي علي الفيس بوك هيعرف مين اللي انا اضفتهم ايضا

حتي لو كان الاشخاص دول ميعرفوش بعض .. وهكذا ..!!

--

فيبدو ان عمنا الفيس بوك هذا هو التطور الطبيعي للانترنت ..

واخذ الكثير من صفاته الجرثومية العنكبوتية ..

بناءا عليه قررت ان اقاطع هذا الكائن اللي هو الفيس بوك

لاني بحب الخصوصية وهو ضد الخصوصية تماما ...

--

ومرت الايام وانا طبعا عندي فضول انترنتي ..

واي حاجة جديدة بسمع عنها في النت بحب اعرفها واجربها للاسف

ولقيت مع الوقت كل اصحابي ومعارفي وقرايبي ..

- مش فاضل غير بابا وماما -

--

لقيتهم كلهم بيكلموني عن الفيس بوك وازاي واحدة مثقفة زيي ولم اشترك فيه حتي الان ..

ولما شرحت لهم مشكلة الخصوصية المفضوحة بتاعة الانترنت قالولي

-

لا مهو فيه طريقة تمنعي بيها الحكاية دي .. " ده اوبشن " انتي بتختاريه

والله طيب خلاص اجرب بقي وابقي من مريدي الفيس بوك وامشي مع الحضارة والتطور الطبيعي .. امال يعني الحضارة تاخد الناس وتمشي والاقي نفسي في الاخر لوحدي من غير حضارة !!

-

وجاء اليوم الذي قررت فيه ان اعمل اشتراك في الفيس بوك ..

جدير بالذكر ان اختي وصاحبتي اياهم اللي سبقوني قبل كدة في حاجات كتير

كانوا سابقيني برده هنا لذلك مفيش غيرهم استرشد بيه كالعادة

--

مش عارفة همشي وراهم لحد امتي

ما علينا

-

ساعدوني وعملت الاشتراك .. ونسيوا يقولوا ازاي صحابي ميشوفوش صحابي وانا كمان نسيت اسال .. وحاليا بكل الفخر كل صحابي بيشوفوا كل صحابي علي اللعين الفيس بوك

-

المهم بعد ما عملت اشتراك وركبت قاطرة الحضارة مع المتحضرين

" الاخوة الفيس بوكيين "

مش عارفة استفيد منه ازاي

ورجع لي طبع غريب كنت حاولت اقتله من زمان ومش راضي يموت

هو اني مش بحب ابحر لوحدي في الجديد ولازم اخد العلم والمعرفة ممن سبقوني فيه ..

طبع وحش بس للاسف عندي

سالت اختي ..

- ها عملت الاشتراك اعمل ايه تاني

- لفي بقي في الخدمات اللي بيقدمها

- هي فين الخدمات دي

- اقرأي .. انتي مش بتعرفي تقرأي

- فين

- اقرأي ( بصوت عالي وعصبي حبتين )

-

ولاني بحب اخد العلم ممن جربوه اولا .. سكت وعملت هادية .. وقلت اصبر ..

بس الظاهر صعب عليها .. قالت لي

- طيب تعالي اقعدي معايا علي الاشتراك بتاعي وشوفي انا بعمل ايه وابقي جربي عندك

- وبابتسامة سعيدة طفولية قعدت زي الشاطرة اتعلم ( كالعادة )

-

ولقيتها بتفتح شوية حاجات وقالت لي

ده جروب انا مشتركة فيه بعرف منه اخبار

ودي اختبارات بتتعمل وممكن تبعتيها لحد او حد يبعتهالك من هنا

ودي هدايا ممكن برده تبعتيها لحد وممكن حد يبعتهالك

حاجات كلها لطيفة

وقالت لي وده بقي Kiki الكلب بتاعي علي الفيس بوك !!

وشربته مية .. واكلته .. ولاعبته كدة بلعبة !!

طبعا استغربت

ما علينا

-

وقعدت لوحدي وقلت خلاص انا لقيت سكتي في الفيس بوك ..

وكلها يومين وابقي مرجع فيه

-

وحاولت ابدأ بس برده معرفتش ابدا منين

اروح هنا واجي هنا .. عاوزة استمتع بوقتي

ولما احترت خالص قلت طيب اشوف منطقة الحيوانات كدة ..

-

وفتحت من اسمها عندي لانها ظاهرة عندي طبعا هي وصحابها وكلابها وكله

وقلت ادور علي قطة اربيها لاني شخصية كارهة للكلاب جدا وبحب القطط ..

لكن لم اجد قطط ..

--

وكنت عرفت برده ان فيه في الفيس بوك نبتة زرع ممكن تربيها وتسقيها وكل يوم تكبر ..

ايضا لم اجدها

-

وفي يوم قالت لي افتحي اكلي Kiki اصله من يومين ماكلش ..

طبعا فتحت مضطرة ااكل هذا الكيكي من الاشتراك بتاعي

--

وبعدين لقيت الفيس بوك بيقولي احصل علي البوكي بتاعك ” pokey”

قلت اوكي بشكل تلقائي ..

فتح صفحة تانية بيقول تم اضافة التطبيق قلت اوكي ..

فجاة لقيت صفحة مليانة كلاب بيقولي نقي الكلب بتاعك!!!!!!!!!!!!!!!!

اتاري تطيبق البوكي" pokey " ده هو الكلب ..

كلب؟؟؟؟؟؟

--
قلت لنفسي طيب نقي كلب بدل مانتي قاعدة مش عارفة تعملي حاجة

وبعدين احذفيه ولا موتيه من الجوع

( شريرة مش كدة )

بس ده كلب الكتروني يعني مش هاخد فيه ذنب !!

نقيت كلب منقرش كدة وحلو .. لقيته بفلوس

واضطريت انقي كلب ببلاش ..

كلها كلاب حقيرة وشكلها وحش مفيش الا اللي شبه Kiki هم اللي حلوين

اضايقت بصراحة فنقيت اسوأ كلب فيهم علي الاطلاق مش عارفة ليه

مادام مش عارفة اجيب كلب شكله حلو !!

--

كلب اسود شديد السواد حتي بياض عيونة سودااء..

حزين وصغير وشكله جربان كمان ..

--

حسيت اني بتصرف بشكل تلقائي .. كنت عاوزة اتراجع .. مش عارفة كملت ليه ..

وفجاة برده لقيته بيقولي نقي للكلب اسم

كمان هنقي له اسم !!

--

ولان الكلب كلب اصلا .. ووحش جدا ..

شبه الكلب اللي اشتراه احمد حلمي في الفيلم للواد الصغير اللي كلبه مات ده ( مش فاكرة اسم الفيلم )

المهم اخترت له اسم“oooops” اللي هي معناها يا ليلة ملهاش نهار مثلا ..

او يادي المصيبة .. اللي بتيجي في الافلام الاجنبي دي

--

وفجاة يا حضرات تحول “oooops” الي شغلي الشاغل .. وهاجس عندي

وحسيت انه مسئول مني وكأنه كلب حقيقي

--

اول ما افتح صفحته يهوهو واضع له الطعلم والماء والاعبه

لقيت نفسي مدبسة في حاجة بكرهها .. ومش قادرة اتوقف عنها

--

قلت اسيبه يموت من الجوع

لكن الفيس بوك لم يترك شئ للصدفة فهناك صفحة للكلاب الجعانة ..

يوضع فيها الكلب اللي محدش بياكله

يعني لو سبته جعان .. هتأكله جمعية الرفق بالكلاب الفيس بوكيية

--

رغم اني بكرهه لكن لقيت نفسي لازم افتح كل يوم عشان الكلب الاسود الحزين ده

ثلاث اربع مرات ااكله والاعبه

والاغرب كمان اني بافتح صفحة الكلاب الجعانة وااكل كلاب الناس اللي سايباها تموت

عشان اجيب نقط ااكل الكلب بتاعي!!

حاسة اني مسيرة مش عارفة اتوقف عن كدة

--

وقررت اخيرا بارادة صلبة اني افتح ادور علي قطة اربيها او نبتة زرع تنمو عندي

واترك “oooops “ لمصيره

واترك ادماني له .. لاني يبدو اني ادمنته

--

واناشد كل مستخدمي الفيس بوك

لو فتحت يوم ولقيت لستة الكلاب الجعانة فيها كلب اسود حزين ..

واسمه “oooops” محدش يأكله

----