الجمعة، أكتوبر 24، 2008

OOOOPS!!!

--
----

الفيس بوك يا حضرات كائن غريب جدا ..

ابتدي ينمو بشكل جرثومي منذ ان وجد علي الشبكة العنكبوتية ..

ومن زمان .. من اول ما سمعت عنه .. وانا اتساءل عن ماهيته وفحواه ..

--

وتطوع بعض الاصدقاء لشرحه لي ولكني للاسف لم افهم كثيرا ..

ولكن ما وصلت له انه اذا اشتركت في الفيس بوك سوف يري كل اصحابي كل اصحابي

يعني اي حد هضيفه عندي علي الفيس بوك هيعرف مين اللي انا اضفتهم ايضا

حتي لو كان الاشخاص دول ميعرفوش بعض .. وهكذا ..!!

--

فيبدو ان عمنا الفيس بوك هذا هو التطور الطبيعي للانترنت ..

واخذ الكثير من صفاته الجرثومية العنكبوتية ..

بناءا عليه قررت ان اقاطع هذا الكائن اللي هو الفيس بوك

لاني بحب الخصوصية وهو ضد الخصوصية تماما ...

--

ومرت الايام وانا طبعا عندي فضول انترنتي ..

واي حاجة جديدة بسمع عنها في النت بحب اعرفها واجربها للاسف

ولقيت مع الوقت كل اصحابي ومعارفي وقرايبي ..

- مش فاضل غير بابا وماما -

--

لقيتهم كلهم بيكلموني عن الفيس بوك وازاي واحدة مثقفة زيي ولم اشترك فيه حتي الان ..

ولما شرحت لهم مشكلة الخصوصية المفضوحة بتاعة الانترنت قالولي

-

لا مهو فيه طريقة تمنعي بيها الحكاية دي .. " ده اوبشن " انتي بتختاريه

والله طيب خلاص اجرب بقي وابقي من مريدي الفيس بوك وامشي مع الحضارة والتطور الطبيعي .. امال يعني الحضارة تاخد الناس وتمشي والاقي نفسي في الاخر لوحدي من غير حضارة !!

-

وجاء اليوم الذي قررت فيه ان اعمل اشتراك في الفيس بوك ..

جدير بالذكر ان اختي وصاحبتي اياهم اللي سبقوني قبل كدة في حاجات كتير

كانوا سابقيني برده هنا لذلك مفيش غيرهم استرشد بيه كالعادة

--

مش عارفة همشي وراهم لحد امتي

ما علينا

-

ساعدوني وعملت الاشتراك .. ونسيوا يقولوا ازاي صحابي ميشوفوش صحابي وانا كمان نسيت اسال .. وحاليا بكل الفخر كل صحابي بيشوفوا كل صحابي علي اللعين الفيس بوك

-

المهم بعد ما عملت اشتراك وركبت قاطرة الحضارة مع المتحضرين

" الاخوة الفيس بوكيين "

مش عارفة استفيد منه ازاي

ورجع لي طبع غريب كنت حاولت اقتله من زمان ومش راضي يموت

هو اني مش بحب ابحر لوحدي في الجديد ولازم اخد العلم والمعرفة ممن سبقوني فيه ..

طبع وحش بس للاسف عندي

سالت اختي ..

- ها عملت الاشتراك اعمل ايه تاني

- لفي بقي في الخدمات اللي بيقدمها

- هي فين الخدمات دي

- اقرأي .. انتي مش بتعرفي تقرأي

- فين

- اقرأي ( بصوت عالي وعصبي حبتين )

-

ولاني بحب اخد العلم ممن جربوه اولا .. سكت وعملت هادية .. وقلت اصبر ..

بس الظاهر صعب عليها .. قالت لي

- طيب تعالي اقعدي معايا علي الاشتراك بتاعي وشوفي انا بعمل ايه وابقي جربي عندك

- وبابتسامة سعيدة طفولية قعدت زي الشاطرة اتعلم ( كالعادة )

-

ولقيتها بتفتح شوية حاجات وقالت لي

ده جروب انا مشتركة فيه بعرف منه اخبار

ودي اختبارات بتتعمل وممكن تبعتيها لحد او حد يبعتهالك من هنا

ودي هدايا ممكن برده تبعتيها لحد وممكن حد يبعتهالك

حاجات كلها لطيفة


وقالت لي وده بقي Kiki الكلب بتاعي علي الفيس بوك !!

وشربته مية .. واكلته .. ولاعبته كدة بلعبة !!

طبعا استغربت

ما علينا

-

وقعدت لوحدي وقلت خلاص انا لقيت سكتي في الفيس بوك ..

وكلها يومين وابقي مرجع فيه

-

وحاولت ابدأ بس برده معرفتش ابدا منين

اروح هنا واجي هنا .. عاوزة استمتع بوقتي

ولما احترت خالص قلت طيب اشوف منطقة الحيوانات كدة ..

-

وفتحت من اسمها عندي لانها ظاهرة عندي طبعا هي وصحابها وكلابها وكله

وقلت ادور علي قطة اربيها لاني شخصية كارهة للكلاب جدا وبحب القطط ..

لكن لم اجد قطط ..

--

وكنت عرفت برده ان فيه في الفيس بوك نبتة زرع ممكن تربيها وتسقيها وكل يوم تكبر ..

ايضا لم اجدها

-

وفي يوم قالت لي افتحي اكلي Kiki اصله من يومين ماكلش ..

طبعا فتحت مضطرة ااكل هذا الكيكي من الاشتراك بتاعي

--

وبعدين لقيت الفيس بوك بيقولي احصل علي البوكي بتاعك pokey

قلت اوكي بشكل تلقائي ..

فتح صفحة تانية بيقول تم اضافة التطبيق قلت اوكي ..

فجاة لقيت صفحة مليانة كلاب بيقولي نقي الكلب بتاعك!!!!!!!!!!!!!!!!

اتاري تطيبق البوكي" pokey " ده هو الكلب ..


كلب؟؟؟؟؟؟

--
قلت لنفسي طيب نقي كلب بدل مانتي قاعدة مش عارفة تعملي حاجة

وبعدين احذفيه ولا موتيه من الجوع

( شريرة مش كدة )

بس ده كلب الكتروني يعني مش هاخد فيه ذنب !!


نقيت كلب منقرش كدة وحلو .. لقيته بفلوس


واضطريت انقي كلب ببلاش ..

كلها كلاب حقيرة وشكلها وحش مفيش الا اللي شبه Kiki هم اللي حلوين

اضايقت بصراحة فنقيت اسوأ كلب فيهم علي الاطلاق مش عارفة ليه

مادام مش عارفة اجيب كلب شكله حلو !!

--

كلب اسود شديد السواد حتي بياض عيونة سودااء..

حزين وصغير وشكله جربان كمان ..

--

حسيت اني بتصرف بشكل تلقائي .. كنت عاوزة اتراجع .. مش عارفة كملت ليه ..

وفجاة برده لقيته بيقولي نقي للكلب اسم

كمان هنقي له اسم !!

--

ولان الكلب كلب اصلا .. ووحش جدا ..

شبه الكلب اللي اشتراه احمد حلمي في الفيلم للواد الصغير اللي كلبه مات ده ( مش فاكرة اسم الفيلم )

المهم اخترت له اسمoooopsاللي هي معناها يا ليلة ملهاش نهار مثلا ..

او يادي المصيبة .. اللي بتيجي في الافلام الاجنبي دي

--

وفجاة يا حضرات تحول oooops الي شغلي الشاغل .. وهاجس عندي

وحسيت انه مسئول مني وكأنه كلب حقيقي

--

اول ما افتح صفحته يهوهو واضع له الطعلم والماء والاعبه

لقيت نفسي مدبسة في حاجة بكرهها .. ومش قادرة اتوقف عنها

--

قلت اسيبه يموت من الجوع

لكن الفيس بوك لم يترك شئ للصدفة فهناك صفحة للكلاب الجعانة ..

يوضع فيها الكلب اللي محدش بياكله

يعني لو سبته جعان .. هتأكله جمعية الرفق بالكلاب الفيس بوكيية

--

رغم اني بكرهه لكن لقيت نفسي لازم افتح كل يوم عشان الكلب الاسود الحزين ده

ثلاث اربع مرات ااكله والاعبه

والاغرب كمان اني بافتح صفحة الكلاب الجعانة وااكل كلاب الناس اللي سايباها تموت

عشان اجيب نقط ااكل الكلب بتاعي!!

حاسة اني مسيرة مش عارفة اتوقف عن كدة

--

وقررت اخيرا بارادة صلبة اني افتح ادور علي قطة اربيها او نبتة زرع تنمو عندي

واترك oooopsلمصيره

واترك ادماني له .. لاني يبدو اني ادمنته

--

واناشد كل مستخدمي الفيس بوك

لو فتحت يوم ولقيت لستة الكلاب الجعانة فيها كلب اسود حزين ..

واسمه oooops محدش يأكله



----

هناك 117 تعليقًا:

afew good men يقول...

كوشيا الغالية

اصابتك لعنة الفيس بوك

afew good men يقول...

بصراحة ياكوشي انا رغم ادماني الشديد لتلك الشبكة ولاكن اشعر دائما انني والفيس بوك لا يمكن ابدا ان نكون اصدقاء

لا تقلقي اذا رأيت اوبس سوف اقتله

شرير جدا انا

عموما انا كل الحكايات دي ماعرفهاش
لاني من كارهي الفيس بوك

لا اعلم ما السبب

تحياتي ليكي

afew good men يقول...

ممكن تناشدي جمعية الرفق بالكلاب ان يتركو هذا الاسود الجربان حتي يموت لانك قد مللتيه

انا حره يقول...

انا كمان كدا مش بفهم اى حاجه فالفيس بوك دا غير الحاجات اللى بتتبعت والنبته اللى بتكبر بحس بهيافه الموضوع بصراحه

فالاخر سبت الاكونت بتاعى كدا للذكرى عشان لو حد سالنى عندك اكونت عالفيس بوك اجاوب بكل فخر ايوووووووه اومال ايه انت فاكرنى جاهله ولا حاجه

وبدخله كل كام شهر مره بس الحمد لله معنديش لا كلب ولا فرخه حتى

الازهرى يقول...

صديقتى العزيزة

للاسف الفضول قتل القط

هذا المجتمع معروف بكائناته الخبيثة التى تحب ان تضر الاخرين لا لشىء سوى المتعه
وان كان البعض جيدا الا اننى عندما حاولت الدخول اول مرة احسست بعدم راحة عموما
ولم اقربه حتى الان
ونصيحتى اليك قول الشاعر
ولو ان كل كلب عوى القمته حجرا
لاصبحت الحجارة مثقالا بدينار

وقول الشاعر
اذا خاطبك السفيه فلا تجبه
فخير من اجابته السكوت

تحياتى دوما

مهندس مصري يقول...

انا مش بأحب الفيس بوك
بس بقيت مضطر استعمله كوسيلة للتواصل مع بعض الأصدقاء و المدونين
لإستقبال دعوات و إضافة تطبيقات و إستقبال رسائل و إشتراك في جروبات
بس برضه انا بأتخنق من الجروبات
رجعنا لسيطرة الأدمين تاني زي المنتديات
طب و عليا من ده بإيه ما انا عندي مدونتي و حر فيها
علشان كده انا مش بأخش الفيس بوك غير لما تيجي لي رسالة على الميل تطلب مني اخش اشوف حاجة مهمة جات لي و بس
و بأشوفها بسرعة و اخرج
الفيس بوك عندي إضطرار مش حب

ahmed_k يقول...

هههههههههههههه
oooopsكويس أنك قلتيلي عشان مأكلوش
رغم اني مبدخلش عالفيس بوك خالص
ومليش أي خبره فيه
بس بعد كلامك ده قررت عدم الإلتفات للفيس بوك نهائيا

وتحياتي

blue-wave يقول...

هههههههههههههههههههه
والله انتى تحفه
انا كمان بكرة هذا الفيس بوء
ههههههههههههههههه

عصفور المدينة يقول...

تدوينة لطيفة تجسد حال التائهين في الانترنت
أنصح بتحديد هدف أو مجموعة أهداف لأي استخدام حتى لا يتحول إلى حالة من التوهان

لورنس العرب يقول...

ولله سبحان الله البتاع ده أصلا انا عمري ما دخلته
ووصلتني دعوات من اصدقائي كلهم تقريبا عشان ادخله ورفضت دخوله مش عارف ليه
وعلى الرغم من جلوسي امام النت يوميا مش أقل من 5 ساعات
لكن بردو فيه عداء بيني وبين الفيس بوك

فارس بلا جواد يقول...

اهلا
ازيك يا استاذه كوشيا

الفيس بوك حلو ووحش فى نفس الوقت
تحياتى

غير معرف يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههوووووووووووووووووووووووووووووووه مش فادر امسك نفسي بجد من الضحك لدرجه انى كملت الضحكه هوهوه........في الحقيقه كتباه بشكل جيد بس احب اصحح لك معلومه ان الفيس بوك ده موقع عمله طالب في الجمعه وضم له اصدقائه وبفي اشهر موقع علي النت الناس ممكن تخش وتعبر فيه عن افكارها وارائها . وباعتباري واحد من مثقفي المجتمع المصري لكن مادخلتش الموقع ده ولا حادخله لانى باحترم خصوصياتى وخصوصيات الاخرين .
ومره تانيه اهنيك علي الموضوع ده وتسمحى لي اكمل ضحكهوهوهوهوه...................



onyx

طالب ثانوى يقول...

ههههههههههههة بوست جامد جدا هو انتى اية اسمك على الفيس بوك انا لقيت حد باسم كوشيا كوشيا كوشيا بعت ريكويست محدش رد عليا خالص انا بقى من محبى الفيس بوك بشدة

Miss. Sosa يقول...

ههههههههههههه
oooooooooops يا كوتشيا
بس علي فكرة الكلب اللي كان مع احمد حلمي كان امور مش وحش امال البولدوج والبوكسر دول يبقوا ايه :D

على فكرة واضح ان في بنا توارد خواطر لاني اتكلمت عن الفيس بوك في مدونتي الاولى قبل كدا في موضوع القلة المندسة علي الفيس عوك وكنت بقول ازاي صاحبه مارك زوكربيرج اللي عنده 24 سنه تقريبا حقق ثروة منه وبقي اصغر ملياردير في العالم واحنا مجرد مستهلكين ومستخدمين وسوق للفكر الغربي لكن نقلدهم في التطور والابتكار حاشا لله .. نقلد في مساؤهم بس .

تحياتي وتقديري

ماما أمولة يقول...

كوشيا

الحمد لله اني جاهلة بهذا الفيس بوك

على فكرة بقى موضة اكتر الشباب

بيتباهوا بيه

ربنا يهدي

سردك للموضوع رائع جذبني من اول كلمة

لاخر كلمة

تسلم ايدك يا كوشيا

kochia يقول...

afew good men
###############
اجل
اصابتني للاسف
ولكنني احاول الشفاء منها
والفيس بوك يا صديقي لا يمكن ان يكون صديقا لاحد..اشعر انه يستفيد كثيرا اكثر مما يفيد ..
وارجوك خلصني من اوبس هذا الذي اسرني
واريد ان اتركه يموت ليس لانني مللته لانني للاسف لم امله ولو مللته فسوف ادعه وشانه ليدعني وشاني ولكنه اسرني وانا لا احل الاسر خاصة انني فعلا لا احبه
حتي الان !!!

########################
########################

kochia يقول...

انا حره
########
الظاهر انا هعمل كدة زيك
اديني ركبت قطار الحضارة وخلاص

تحياتي

#######################
#######################

kochia يقول...

الازهرى
#######
فعلا
بس هو الفضول العلمي مثلا فضول وحش برده ؟؟
متهيالي مش كل الفضول
بس هو الفيس بوك كدة له ناس وناس
يحب ناس وتحبه
يحب ناس وتكرهه
يكره ناس وتحبه
يكره ناس وتكرهه

انا بتاعة الكره المتبادل
تحياتي

#######################
#######################

kochia يقول...

مهندس مصري
###########
عاوزة اوصل للمرحلة دي
بس عاوزة ابقي عارفة الاول وامتنع بارادتي
مش امتنع عشان مش فاهمة

########################
########################

kochia يقول...

ahmed_k
########
اه متاكلوش الله يخليك
دعه لمصيره

المهم احسن برده متروحش علي الفيس بوك ده
امال عاوزة اعرف مين اللي بيحبه ؟؟

########################
########################

kochia يقول...

blue-wave
##########
متشكرين يا سي الاستاذ

#######################
#######################

kochia يقول...

عصفور المدينة
############
تحديد هدف أو مجموعة أهداف لأي استخدام حتى لا يتحول إلى حالة من التوهان

اشكرك علي النصيحة الغالية
حقا ما قلت

#######################
#######################

kochia يقول...

لورنس العرب
###########
عملت طيب
اوعي تعتب
لحسن فجاة تلاقي كلب مضيع كل وقتك

######################
######################

kochia يقول...

فارس بلا جواد
############
اه طبعا
عندك حق
للي يعرف يستفيد

#####################
#####################

kochia يقول...

غير معرف onyx
#############
كل ده ضحك
ربنا يبسطك
ورايك في الفيس بوك مشابه ليا بس انا حبيت اعرف بنفسي
انت بس لحقت نفسك من الكلب

########################
########################

kochia يقول...

طالب ثانوى
##########
ايوة انا كوشيا كوشيا كوشيا
الفيس بوك يوم ما عملت الاكونت مرضيش بكوشيا بس وقالي لازم اسم ثنائي ولما عملت الثنائي قاللي لا انتي الثنائي شبه بعضه لازم ثلاثي
وبناءا عليه بقيت كوشيا كوشيا كوشيا
بس انا جالي طلبات كتير فرفضتها كلها ومقبلتش الا اللي اعرفه وبما اني معرفش اسمك هناك اكيد رفضتك
جديدة بقي
ابقي قولي اسمك هناك وضفني تاني وانا اقبل
علي الاقل تشرح لي شوية شغل من هناك بعيد عن الكلاب

########################
########################

kochia يقول...

Miss. Sosa
###########
الكلب كان امور ازاي
ده كان اسود وصغير ومش باين له ملامح
التانيين بقي شكلهم اغرب واغرب وانا بكره الكلاب عموما الا الكلبة لاسي
ولقيتها بفلوس
اما بالنسبة لتوارد الافكار انا متاكدة من كدة
بس انتي اشجع مني حبتين ...
تحياتي

##########################
##########################

kochia يقول...

ماما أمولة
##########
اشكرك جدا
وهو فعلا كدة كما تقولين
بقي منظرة للاسف

تحياتي
ومنورة

####################
####################

صبرني يارب يقول...

يا ضنايا يا اختي

انا برضه على فكره عملت حساب على الفيس بوك ده من يجي سبع شهور

ما عملتش به اي حاجه عليها القيمه كل فتره ادخل ادعبس فيه واقول يمكن افهم

مافيش فااااااايده اخر مره كان من كام يوم لما دخلت الجروب بتاع سووو عشان فوزي

بس اول مرررررره اعرف موضوع الكلاب والقطط دي يا اختي

بس انا مش باحبهم هابقى اشوفلي زرعه بقى

اوووووووووبس يا مفتريه

تحياتي ليكى يا جميل

نعكشة يقول...

:D

والله انتي سكر بجد بجد يعني

ياعيني يا اوبس ياخويا خدتك لحم و رمتك عظم

يلا فداكي يا كوشي

سلام عليكي

ملكة في بيتي يقول...

كنت فاكرة اني الكائن الوحيد المعترض على الفيس بوك في هذا الكوكب
اسلوبك لذيذ قووووووي
سلمت يداكي

~*§¦§ Appy §¦§*~ يقول...

طيب هات اللينك انا هتصرف
على فكره انا بحب الفيس بووك جدا وشايفه انه مديلك مساحه كبيره من انك تقبلى مين وترفضى مين بجد
وغير كده بشوفه اسرع فى التواصل مع الناس
وبعدين لما الناس بتحول الكلب ده لكده بيعلموكى انهم بيراعوه وبيستجدوا الحنيه فى قلبك يا شيخه هههههههه
لا بجد انا شايفاها من زاويه تانيه يمكن انتى واخداها لعبخ بس انا لا
بجد عاوزه اللينك بتاع الكلاب ده

محمد عبد الغفار يقول...

يا ترى مفيش معييز؟

صاحب المضيفة يقول...

وبدأ أولى خطواتك نحو عالم الشهرة

كنت زيك كده برضو

والحمد لله عرفنا نبحر فيه واهي ماشية

بكرة كل حاجه تعمليها من غير اختك وصاحبتها بقى
:):):):):)

تحياتي

Khaled يقول...

انا باكرة الفيس بوك
حاجة اتعملت علشان حاجة والناس قلبتها حاجة تانية مالهاش هوية

قلب مصرى يقول...

خبرتى بالفيس بوك محدودة وعلشان كده مش هاكل الكل بتاعك اطمنى

كاميليا يقول...

oooooops

ياعينى عليك يا اووبس

هههههه

انا كمان مش من عشاق الفيس بووك ده خالص
مش فيه خصوصية حتى لو عملتى اوبشن الخصوصية
هههههه

افتكر مرة زمان حطيت عملت اكاونت على الفيس بوك
وحطيت شوية صور ليا فى بعض الزيارات لاماكن كتير
واكتشف ان الاصحاب واصحاب الاصحاب وغير الاصحاب تحت مسمى اشخاص يمكن ان تعرفهم شاف الصور دى
روحت هووووووب بسرعة لغيت الاكاونت وقولت لأ بلاش من الفيس ده

اسلوبك دوما يعجبنى جدا
ويشعرنى انك قريبة من القلب

كل الحب

أبو أسامة - مدونة كباية شاي يقول...

مسكينة يا أختي

أقولك نصيحة

اتبرعي بالكلب لأحد جمعيات قتل القطط الضالة

وبعد كده امسحي حسابك على الفيس بوك واللى عايزك هيلاقيكي على الإيميل ومفيش مشكلة تتفقوا على معاد على المسنجر

بس قبل ما تحذفيه متنسيش تحذفي كل الناس اللى عندك من على الحساب واحد واحد

تحياتي من القلب
مع أرق الأمنيات بالشفاء العاجل

mohamed ghalia يقول...

حااااااااااااضر مش هنأكله ههههههه
بصراحة أنا بستخدم الفيس بوك ليه جروب عليه بحط مواضيعى على المدونة عليه غير كده ملوش لازمة بالنسبالى
ومتفرقش كتير أفتحه ولا لا
تقبلى تحياتى
دمتى بود
وربنا يعينك على انك تهتمى بالقطة أو الزرع

habiba يقول...

بصى ياكوشيا
مش مجامله والله د حقيقه يااختى
اول مره ادايق من بوست ليكى
ومش عيب ف البوست ولا فيكى بقدر ماهو عيب فى كلمه فيسش بوك اللى مذكورة فيه

بجد بكره البتاع ده بشكل محدش يتخيله
فهمت فيه شويه حاجات لما اشتركت فيه مضطر علشان اقرا مقال كان واحد زميل ناشره ايام ارتفاع الاسعار
ومن ساعتها مش بستوعب فكره انى ادخل عليه اساسا
والكارثه بقى انى بعرف شوي حاجات فيه من تجاربى الخاص فى محاوله استكشاف هذا التحضر الرهيب عل رايك ولانى مكنتش شايفه اى وجه روعه فى اللى اعرفه كنت دايما بقول لا اكيد هو كويس وانا اللى مش فامه ليه حاجه
ولما قريت البوست بتاعك بس عرفت انى بفهم شويه فيه مش لدرجه الكلاب يعنى :)

انما زادت فكرت وعقيدتى عنه انه حاجه مالهاش لزوم الا فيما رحم ربى

تحياتى دايما
وخدى بالك من oooops
ولا سيبيه لجمعه الرفق بالحيوان عل رأى ادم

فاتيما يقول...

أنا حالياً بعيش فى مرحلتك الاولى يا كوشكش ...
يعنى مش بحب الفيس بوء على رأى آبى
مش عارفة ليه بس يمكن أغير رأيى قدام
أما فيما يختص بالسيد أوبس فالحمدلله إنه بيهوهولك و إنتى داخلة على الموقع
القطط بتاعتى لو أتأخرنا فى حط الاكل ليهم بييجوا يمشوا فوقينا و إحنا نايمين عشان يصحونا نأكلهم
و بيمشوا يكعبلوا امى ما بين رجليها و هيا رايحة الحمام تغسل وشها و تتوضى و كانوا هيكفوها على وشها مرتين تلاتة عشرة
بيشنكلوها تصورى ؟؟
و الله أوبس دا إبن حلال و عينه كلها حزن جميل
يلا أهو لقى اللى يداوى احزانه
تحياتى يا كوشكش

حسن حنفى يقول...

كل ده تاخير :((

اسف علي التاخير بس الدراسه ربنا يهدها لينا يارب :)

بس ليه بس كده يعني مش حرام اوبس كده هيموت وجمعيه الرفق الفيس بوكسيه هتزعل منك وممكن كمان اوبس يرفع قضيه عليكي بس هو مش عارف حقوقه
:d

ههههههههههه

ان شاء الله تلاقي اوبسايه ليه ويجيبوا بوبس صغنون كده :)

الربان يقول...

تحياتي

الفيس بوك فاقت شهرته برنامج ICQ حين
ظهر الي عالم الانترنت...

و من اجل جذب المشتركين و خلق ارتباط لهم
بالفيس بوك...كانت فكرة الكلاب و النبته...لانهم يعلمون ان الكثيرين يحبون
الحيوانات...فهي وسيلة جذب لدخول الفيس بوك لمرات يوميا...

اشكرك لانك اوضحتي لنا بعض ما يوجد في الفيس بوك...و خاصة انني لا ادخل هذا البرنامج...

تحياتي و تقديري

prince4ever يقول...

بوست زي العسل بجد يا كوشيا
بس انا واحد من عشاق الفيس بوك ده و قاعد ادامه ليل نهار لما عميت... هو حلو ...يعني بالنسبه لي وسيله للتواصل مش اكتر...بس في متعه...ممكن تتعرفي على مشاهير وتتواصلي معاهم...ومن كل حته ...لا هو لذيذ...انا عملت اكونت هناك من حوالي سنه او اقل و بعدين عملولي سبام لوحديهم كده فعملت اكونت جديد من حوالي شهر كده...بس ابن حلال يعني...
بس بجد بوست دمه خفيف جدا
سلام

عازفة الأوتار يقول...

هههههههه
حرام عليكى
بسببك انتى و اوبسسسس الناس فى الشغل بيقولوا عليا مجنونة
من ساعة ما فتحت الصفحة و انا عمالة اضحك زى الهبلة
بجد دمك زى العسل يالهوىطب تصدقى انى مشتركة على الفيس بوك و كنت زيك كدة و بقالى يومين بس بحاول اتعامل معاه و افك عقده
بس بصراحة لسه حاسة انى مش فاهمة حاجة اوى فيه
و اول مرة اعرف ان فى حد بيربى حيوانات على الفيس بوك
لا و ليهم صفحة بيلموا فيها الجعانيين منهم كمان

انا من زمان نفسى اربى قطة بس ماما بتخاف منهم
انا حدخل اشوف بقى القطط بتتجاب منين
طالما محل الكلاب اسمه بوكى
يبقى ممكن محل القطط يطلع اسمه كابوكى
يلا انا و حظى بقى
بس بجد دمك زى العسل

و انا دلوقتى كنت ناوية ارد على باقى المدونات بس حتركهم آسفة
و ادخل ادور على قطتى الشريدة الوحيدة
زمانها مستنيانى على نار :)

عازفة الأوتار يقول...

دلوقتى انا اصابتنى لعنة بوكى
و مرحتش كابوكى
واختارت كلب و سميته بوكى
جبتة و قعدت الاعبه شوية بس هو فضل يلعب بالطبق و أبدا مش عايز يبطل لعب
رحت قافله الصفحة بتاعته
دلوقتى انا مش عارفة اجيبله اكل منين ده
و مش عارفة اجيبه هو ذات نفسه تانى

ساعدينى وحياة اوبسسسس :)

kochia يقول...

صبرني يارب
##########
اهلا بيكي واشكرك جدا
هو الفيس بوك واسع والبحث فيه صعب
بس لازم الواحد يحدد الهدف منه
والا يتوه
ركزي علي حاجة حاجة زيي كدة
اوووووبس
وبجد لو لقيتي الزرعة قوليلي او ابتهالي وهتلاقيني في جروب 5 تدوين
ماشي

#########################
#########################

kochia يقول...

نعكشة
#######
هههههههه
لا والله اخدته عضم واهو بقي لحم
دانا بكله كل يوم ونادر جدا لما بنساه
وبلاقي اهل الخير ماكلينه وكله تمام

########################
########################

kochia يقول...

ملكة في بيتي
############
اشكرك
واهلا بيكي

######################
######################

kochia يقول...

~*§¦§ Appy §¦§*~
#################
شايفة انه مديلي انا مساحة كبيرة ؟؟؟
مش مديلي خالص
هو انا عارفة اتحرك فيه
وبعدين انتي مال اوبس صعب عليكي كدة اكني بعذبه
وعلي فكرة
انا عارفة هدف اللعبة دي طبعا رغم اني بصيت للامر من وجهة نظر اخري
واتذكر الان حكاية كنت قريتها في كتاب لمصطفي محمود انهم مرة نسيوا كلب في حجرة الامتعة في طائرة ونزلوا هبوط اضطراري في في دولة ما عشان ينقلوا الكلب من حجرة الامتعة لان الدنيا كانت برد ومفيش دفايات
افتكرت بقي الناس في الوطن اللي بتنام في برميل القمامة في الشتا عشان تحمي نفسها من البرد والمطر وتعجبت علي العالم الاول والعالم الثالث كذلك
صدقيني عزيزيتي انا لسة شريرة لكن اللقمة اللي هديها للكلب انسان اولي بيها
واللي انا فيه ده مش عدم حنية علي الكلب لكن اسي علي الانسان
ارجو انك تكوني فهمتي قصدي
علي العموم ضيفيني علي الفيس بوك وابقي اكلي اوبس
وهبعت لك اللنك
او دوريلي علي رزعة ولا قطة
ونعمل بدل وادفع الفرق
ههههههههههههه
سلام

#######################
#######################

kochia يقول...

محمد عبد الغفار
###############
لا مظنش

#####################
#####################

kochia يقول...

صاحب المضيفة
############
ان شاء الله بحاول
ربنا يسهل
تحياتي

###################
###################

kochia يقول...

Khaled
#######
وانا بكره الفيس بوك
عشان مش عارفة الحاجة اللي اتعمنل عشانها ولا الحاجة اللي بتستخدم فيها
لحد دلوقتي
بس هفهم ان شاء الله

######################
######################

kochia يقول...

قلب مصرى
#########
طيب شكرا
بس لما اجيب القطة مش هوصيكم بقي

#####################
#####################

kochia يقول...

كاميليا
########
اهلا بيكي
وانا كمان مبسوطة جدا انك بتحبي موضوعاتي وطريقتي واتمني دايما تبقي مبسوطة كدة

وفعلا الفيس بوك فيه عيوب عدم الخصوصية دي
المفروض فعلا تبقي محكومة
يعني فعلا لو عايزة احط صور لاصحابي بس
مش لازم الكرة الارضية تشوف
يعني انا هفضل وراهم بس لحد دلوقتي بالنسبة ليا عيووووووب

تحياتي

#######################
#######################

kochia يقول...

أبو أسامة - مدونة كباية شاي
###########################
اشكرك علي النصيحة
واعتقد اني هعملها لو فشلت في حل طلاسمه

تحياتي

##################
##################

micheal يقول...

ههههههههههه...ده أنتي علي اخرك من الفيس بوك بس ع العموم لو مش مقتنعة به فده شيء لا يعيبك وليس شيئا غريبا كما يصوره البعض
كل واحد حر
:)
فكرتيني أشوف قطتي عاملة إيه..زمانها عفنت
:)
تحياتي

kochia يقول...

mohamed ghalia
###############
اتمني ان شاء الله اوصل لمرحلة الاستخدام الافضل ليه

تحياتي

#######################
#######################

غير معرف يقول...

متشكر انك مش بتحبي زي الفيس بوك بس كنت عايز اعرف سبب كرهك للكلاب واصرارك علي انك عايزه تموتيه يمكن انا مش متعود منك انك تكونى عدائيه كده لكن انتى اكيد لا تقصدى القتل للكلب وارجو ان اكون غلطان في فهمى هذا من يوم معرفتى بيكى .........


onyx

أية الشقية الشعنونة يقول...

يالله ياكش يولع
ههههههههههههههههههههه
اية يبنتى القصص المثيرة دى
كلب وتلعبيه وتموتيه
حرام عليكى يبنتى
المهم اول ما تلاقى قطة قوليلى
على فكرة انا زييك بالظبط مش بفهم فيه خااااااااااااالص
وكل اصحابى يقولولى يبنتى انتى كده دافنة مدونتك بالحياة ولا حد هياخد باله منها
بس على مين انا لازم اكتشفه لوحدى وواحدة واحدة
هههههههههههههههههههههه
بت فقر
خلينى اشوفك وضيفنى على الياهو لان الهوت ساقط من عندى
عاوزة اشووووووووووووووووووفك بقاااااااااااا
تحياتى يا كوكو

شهد الكلمات يقول...

هههههههههههههههههه

انا بحب الكلاب جدا

و ها روح ادور علي موضوع تربية الكلاب دي و اشترك فيها

شكرا جدا

تحياتي

شهد الكلمات يقول...

ثم الكلب ده امووووووووووووووووورجدا و شكله طيب

جمعاوي يقول...

السلام عليكم كوشيا
بجد موتينى من الضحك
البوست يضحك اوى
===============
واناشد كل مستخدمي الفيس بوك


لو فتحت يوم ولقيت لستة الكلاب الجعانة فيها كلب اسود حزين ..


واسمه “oooops” محدش يأكله

====================
طبعا ز ما قلتى عن نفسك مش هاجيب كلام من حتة تانية:-

=============
(شريرة انا مش كده)
===============

ههههههههههههههههه يعنى انت هتجوعيه ةمش عاوزة الناس تأكله كمان بجد ايه الشر ده يعنى هو ذنبه ان حظه وقعه فى ايد حضرتك هههههههههه بجد ربن يخليكى لينا بدمك الخفيف ده دمتى لنا بخير وطبعا الكلب ابن ... مش هاكله طبعا وانا مش عارف طريق قطط لو عرفت ان شاء الله ابعت لحضرتك عنوان بيت القطط بتاعهم هههه يلا سلام

WhItE HeArT يقول...

ههههههههههههههههههه

والله هموت من الضحك

انا عمري مااشتركت في الفيس بوك بصراحه لإني مش فاضيله بس انتي كده هتخليني اشترك علشان ااكل الكلب انا كمان

ده انا عندي لعبه بأكل فيها الحصان كل اسبوع ومتضايق ااكل كلب كمان كل يومين

ههههههههه

لا بجد موضوع جامد

kochia يقول...

habiba
########
يعني اضايقتي اول ما سمعتي كلمة فيس بوك
طيب يا ستي بعد كدة هبقي اقول اللي ميتسماش عشان متضاقيش
علي العموم هو برنامج له مميزات لمن يناسبه من الاشخاص
والظاهر ان الاشخصا دول مش احنا

تحياتي

####################
####################

kochia يقول...

فاتيما
#######
ياريت كان عندي قطة
مكنتش اضطريت اربي كلب الكتروني
اهلا بيكي

########################
########################

kochia يقول...

حسن حنفى
#########
مش هيموت
ازاي كلب الكتروني يموت بس
ده وحش وكل الناس بتاكله
ومش عارف حقوقه كمان
طيب

#######################
#######################

kochia يقول...

الربان
#######
لتل قلت يمكن هدفهم هو الرفق بالحيوان
سواء كدء او كدة النتيجة واحدة بالنسبة ليا

تحياتي

####################
####################

kochia يقول...

prince4ever
############
يعني تفتكر ممكن الاكونت بتاعي يضيع وحد ياخده وياخد اوووبس ؟؟
والله ازعل عليه .. تصدق ؟
اشكرك

###################
###################

kochia يقول...

عازفة الأوتار
##############
سلامتك من الجنان
حد يقدر يقول كدة ؟
اللي يقول كدة بس قوليله تعالي اقرا واتجنن معايا
الفيس بوك لا يفهم بسهولة
بحره واسع اوي

بس بجد
زعلت عليكي لما عرفت ان لعنة اوووبس اصابتك
مش هتقدري تسيبيه والله
وهتلاقي نفسك كل يوم بتاكله وهو مجرد كلب الكتروني
تبقي اسيرة برنامج
ده ادمان رسمي

ما علينا
انا هساعدك ورزقي علي الله
شوفي يا ستي
الاول عندك البروفايل هتفتحيها وتلاقي فيها علامة + جمب كلمة WallI nfo Photos
تدوسي عليها عشان تضيقي حاجة وهتلاقي علامة + هتفتح ليكي لستة اختاري منها بوكي هتلاقيه نزل في السطر ده نفسه تحت اسمك مباشرة وبعد كدة ممكن تفتحيه من الحتة دي

اما الاكل بقي
انتي لما بتلاعبيه بتاخدي نقط .. اخدتي بالك منها ؟
النقط دي بتتجمع تفتحي من عند كلمة the store ولما تفتح هتفتحي منها كلمة puppy food
هتلاقي فيها عدد نقطك وهتلاقي تحت اكياس الاكل المخصوصة للكلاب

انا بقي باعب وباكل كلاب الناس كمان عشان اخد نقط كتير واعرف اجيب اكل كتير
وتصفحي بقي في المنطقة هيقولك ازاي تجيبي نقط اكتر وكدة يعني
وانا في الخدمة
وابقي طمنيني
سلام

########################
########################

kochia يقول...

micheal
########
طيب روح الحق القطة
دانت محظوظ ا عندك قطة

تحياتي

########################
########################

kochia يقول...

غير معرف onyx
#############
الناس بتتولد يا onyx بتحب اشياء او مؤهلة لحبها وبتكره اشياء او مؤهلة لكرهها
انا ولدت مؤهلة لحب القطط مثلا والارانب والنمر والصيف والبحر والليل واشياء اخري
وولدت مؤهلة لكره الكلاب والفئران والصرصور والشتاء وغيرها
ولم يحدث ما يغير هذا او ذاك وكان ممكن يحصل طبعا
وحقيقة الامر يالنسبة لاووبس تحديدا انا بكره ادماني له رغم انه لم يكن من اختياري
وبكره نظرته الحزينة رغم ليس هناك ما يجزن
وبكره كونه اسير ليا وانا لا املك له شيئا
وانا مش عايزة اموته .. انا عايزة يرجع الوقت ولا اختار شئ لا اريد ان اختاره في الاصل
وهو في الاول وفي الاخر مجرد برنامج
عارف فيلم او الافلام اللي تكلمت عن الذكاء الاصطناعي ؟؟
انا حاسة انه كدة
مكتفني وهو مجحرد برنامج
مجرد برنامج

فهمت قصدي ؟

kochia يقول...

أية الشقية الشعنونة
####################
ايوة هو عاوز وقت وروقان
بالنسبة للايميل انا ضفتك من بدري علي الهوت ميل هحاول اضيفك علي الياهو

تحياتي

########################
########################

kochia يقول...

شهد الكلمات
#############
طيب يا ستي
قوليلي بس نقيتي انهي شكل منهم
هم اربع اشكال
واحد اسود حزين زي بتاعي
وواحد شبهه حزين بس اصفر
وواحد شبه الفار
وواحد حليوة شوية زي كيكي بتاع اختي بني في اسود
نقيتي اي واحد منهم ؟؟؟

#######################
#######################

kochia يقول...

جمعاوي
######
ايوة وقع في ايدي
لو تشوف الهنا اللي هو فيه متصدقش
ولو بجد عرفت طريق قطط قولي
او معزة حتي علي راي محمد عبدالغفار

تحياتي

#######################
#######################

kochia يقول...

WhItE HeArT
############
انا بقول محدش ياكله تقول اشترك عشان ااكله ؟؟؟
فين لعبة الحصان دي ؟؟
ابقي قولي عليها

#####################
#####################

عازفة الأوتار يقول...

ميرسى على المساعدة يا قمر
انا فعلا شكلها اصابتنى اللعنه و انا اصلا عيلة اوى و بحب الحجات دى
و قبل كدة جبت لعبة اسمها بيبى بير
بتاع عامل زى الستوب واتش كدة
و فى حتة بتاع يفضل رايح جاى فى الشاشة و المفروض ده ابنى و كنت بربيه و لو حصله حاجة ولا تعب كانت بتبقى ايامهم سودة فى البيت و كنت عاملالهم بيه حكاية بس كان كتير بيموت من كتر ما بأكله هههههه
بس دلوقتى انا النت عندى فى البيت بايظ و لسه عايز يتوصل و شغلانه كدة
فدوجى مش حياكل غير الايام اللى انا بكون فيها فى الشغل
يعنى يوم الجمعة بقى صفحة الكلاب الجعنى تستضيفه
و حسألك سؤالين معلش انا بغتت عليكى

لو تعرفى مكان القطط على الفيس بوك ياريت تقوليلى
و عايزة اعرف فين صفحة الكلاب الجعانة علشان ااكلهم و اخد نقط

و بالنسبة للنقط انا فعلا لاحظتهم بس احيانا لما بلاعبه بالطبق سعات بيطلعلى انى نقصت نقظ مش زدت

ده ايه بقى ؟؟


معلش دوشتك معايا
بس انتى اللى عرفتينى على البوكى بقى :)

kochia يقول...

عازفة الأوتار
#############
ولا يهمك
بالعكس انا احب اساعدك اي وقت
اما بالنسبة للاسئلة بتاعتك
للاسف معرفش مكان القطط انا نفسي يبقي معايا قطة ولو انتي عرفتي مكانها برده ابقي قوليلي
-------------

والكلاب الجعانة هتلاقي كلمة كلاب جائعة بالانجليزي طبعا فوق البوكي بتاعك علي طول في صف كدة تالت حاجة تقريبا
وجواها هتلاقي تصنيفين
كل الكلاب
او
كلاب اصدقائي .. ودي لو حد من صحابك عنده كلب وانتي تاكليه وهو مش موجود
والنقط بتيجي انك تاكلي الكلب
او تهرشيله في راسه كدة !!!!
او تدوسي طليك علي بطنه او تلاعبيه
لكن اللعب هو الحاجة الوحيدة اللي ممكن يديكي نقط او ياخد منك ممكن يديكي -1 او +1 او +2 او +3 وانت وحظك بقي عشان تلاعبيه كويس
يعني لو مش معاكي نقط اكتفي بالاكل والهرش !!!

واي حاجة عاوزة تعرفيها تاني اساليني
ومفيش دوشة اطلاقا

تحياتي

######################
######################
وانتي بتختاري

norahaty يقول...

السلام عليكم ورحمة الله تعالى وبركاته
الفيس بوك ده .......!!!!!!
منه لله هو واللى عملوه
مش حاقدر اقولك غير كده
لكن منه لله عارفه ممكن تقولى
جابى لى استبحس فى نافوخى بجد
لكن الحمد لله المدونات انقذتنى منه
مبررررررررررررررررررررررررروك
ياكوشيا نجاتك من براثن الفيس بوك

GiGi يقول...

يابختك ياعم الكلب لقيتلك واحده زي القمر تاكلك
اهلا بيكى فى مجتمع الفيس بوك

Geo Amr يقول...

نصيحة منى بلاش تمشى ورا احد طالما انى انك بتحبى الخصوصية واعتراضك كان على الفيس بوك فخلاص بلاش منه

DR.HAMAS يقول...

أنا صراحة ليا حساب على الفيس بوك

بس مفهمتوش قوى لسة

و ربنا يستر علينا منه

و أنا أعتقد بأن كل شئ له سلبياته و إيجابياته

مفيش سلبيات على طول الخط

و لا ايجابيات على طول الخط




د.حماس

اجندا حمرا +Heart Beat يقول...

انتي عسل و الله

تصدقي ان الكلب صعب عليا هو شكله مش ولابد بس غلبان و مسكين اوي
انا ماكنتش اعرف عن موضوع الكلاب و القطط اللي في الفيس بوك دي
انتي اغريتيني اني ادور و اشوفلي حد ااكله
مرسي علي المعلومه الجميله بس قوليلي لاقيت قطه و لا لسه؟
بوست ظريف و دمع خفيف
مرسي ليكي عليه

عازفة الأوتار يقول...

اهرشله ... آدى اللى كان ناقص علينا
ماااشى لما نشوف اخرتها ايه مع البوكى ده :)
و انا حدور على القطط و لو لقيتها حقولك عل طول

و ميرسى يا قمر على الشرح و المساعدة
و سلامى لأوبسسسسس :))

ammola يقول...

كان عندى اكاونت عليه بس لقيته بالنسبة لى مش بيضيف اى شىء فلغيته
الناس اللى انا عايزة اتواصل معاهم عندى اماكن تانية اتواصل عن طريقها..عارفة احنا عيبنا ان كل حاجة جاية من هنااااك بتعجبنا اوى ولازم نقعد نقلدها ونتباهى بأه اننا اووه لا لا مشتركين ع الفيس بووك. لا وتلاقى البنات كل واحدة حاطة البوم صورها من يوم ما اتولدت وفى كل الاوضاع اللى لو اهلها شافوها حيرجموها.وطبعا الشباب عايز ايه يعنى غير الفرجة والبحلقة؟ وكله تحت مسمى الصداقة"البرييييييييييئة" بين الولد والبنت.. عارفةالموقع ده لو كان اللى عامله واحد عربى كان زمان عدد المشتركين واحد بس
:)
تحياتى لك ولاسلوبك المتنوع بثراء

يا مراكبي يقول...

طيب واللي يخلصك منه ويدوسلك عليه بعربيه؟

kochia يقول...

norahaty
##########
منه لله هو واللى عملوه
امين
وانا والله لولا نشاطي الاخر كان جالي منه استبحس برده
بس انا وراه والزمن طويل

تحياتي

######################
######################

kochia يقول...

GiGi
######
الله يكرمك يارب ويسترك
تشكر يا عسل

###################
###################

kochia يقول...

Geo Amr
########
لا انا احب اتعرف عليه من بابا عدم الجهل وبعدين هقرر لو معرفتش احافظ علي خصوصيتي طبعا
اشكرك علي النصيحة

########################
########################

kochia يقول...

DR.HAMAS
#########
فعلا عندك حق
وده الشئ اللي خلاني احاول اعرف فعلا

تحياتي

#######################
#######################

kochia يقول...

اجندا حمرا +Heart Beat
######################
ده شكله صعب عليكي
امال لو شفتي اوووبس الحقيقي
ده شبهه بس من نفس الفصيلة
التاني اسود عن كدة وحزين اوي عن كدة
وللاسف لم اجد قطط
يلا
ربنا يبعت
سلام

######################
######################

kochia يقول...

عازفة الأوتار
#############
اه والله تهرشي راسه
وقفاه
شغل كلاب بقي

المهم انا في الخدمة اي وقت
سلام

######################
######################

kochia يقول...

ammola
########
عندك حق والله
احنا عاوزين نعمل مثقفين ونعمل زي الاجانب
والمفروض اننا حاجة وهم حاجة تانية
بس الخواجة بقي ..

اشكرك علي رايك

تحياتي

########################
########################

kochia يقول...

يا مراكبي
########
يبقي ليك الحلاوة

#####################
#####################

Hina wi Hinak يقول...

الحمد لله، أنا لسه ثابت على رأيي، ومدخلتش الفيس بوك، رغم إن الناس كلها جوه! أنا بسمع إنك ممكن كمان يكون عندك بيت، موش بس كلب على الفيس بوك... تنظميه وتستقبلي فيه ضيوف... إدمان، علشان كده الفيس بوك ده في طريق وسيادتي في طريق تاني

Beram ElMasry يقول...

عـــين الشــــمس عيانـــــة ومعصوبــــه بشـــال الليـــل
وفــــــــاس الحـــــزن منكـــودة ومرفوعـــة تهـد الحيـل
هجمـــت علينـــــــا عصابــــة زى الطوفــــان والســـيل
خلــــــــوا شبابنــــــا منكســــــر راضــــى يكـون الذيـل
باعـــــــــوا علينـــــــــا وهمهــم ووفـوا من دمانا الكيل
ولا خلـــوا فى البلـــد فــــارس ولا حتــى حداهــا خيــل

غير معرف يقول...

انا مستنى لما تكتبي القصه ........



onyx

kochia يقول...

Hina wi Hinak
##############
بيت كمان
يا صلاة النبي يا صلاة النبي
والله خير
لما اشوف حكاية البيت دي ايه
بس اكيد هيكون بفلوس في ظل الازمة العقارية
ربنا يسهل بقي ان شاء الله

#########################
#########################

kochia يقول...

Beram ElMasry
##############
ها ؟؟
مين ؟؟
فين ؟؟

طيب ايه اللي عمل في الشمس كدة ؟
وايه اللي جابها النواحيدي؟
تاهت اظن ؟

ربنا يستر علينا من العصابة واللي يتشدد لها ان شاء الله

#######################
#######################

seven يقول...

هههههههههه
انا برده فى نفس الموقف
مربى حيوان لحد دلوقتى
مش عارف هوه فار ولا قطة ولا كلب
بس برده لازم كل يوم احميه اوكله
واخليه يلعب اوجبله هدوم وعفش للبيت
حاسس انه مسؤليه جمدة اوى
هههههههه
واللى جبلى يخليلى
هههههه

هانى زينهم يقول...

مش عارف ليه احنا كل ما تطلع حاجة جديدة لازم نبقى فيها حتى لو ما ريحتناش او كانت ضدنا كاشخاص ؟
عموما الفيس بوك زيه زى حاجات كتير بقت مفروضة علينا حتى لو مش بنحبها ويا ستنى هى يعنى جات عليه ؟؟

شباب روش طحن يقول...

هو الفيس بوك معمول عشان كده أساسا يسحب الواحد ويخليه مواطن فيس بوكاوي انا شخصيا بحدد هدفي من كل حاجة بعملها وبناءا علي كده بحدد أنا عايز إيه بالظبط من الفيس بوك وببدأ أنفذ ده فعلا فشوفي إنتي عايزه إيه بالظبط منه وخليكي ماشيه بناءا علي ألي أنتي عايزه منه لكن أوعي تخليه يتحكم فيكي

وسعيد بالتعرف علي مدونتك لاول مره

Sherif يقول...

حتة سكر

هو انتى مش ممكن تبيعيه أو تتنازلى عنه لناس كبار او ماعندهمش ولاد يتسلوا بيه؟

هو فعلا الآداب العامة محفوظة برة .. وماحش هايسيب كلب يموت من الجوع .. بس حتى الفكر الرأسمالى ماسابش اللعب .. كله بالنقط .. وكل ماتكسب تقدر تعمل حاجة تانية .. يعنى مافيش حاجة بلاش

رائعة .. فى انتظار ماحدث

وميض ابتسامة يقول...

والله العظيم هو ده الروقان بعينه ..
انا ياعزيزتى كوشيا مستغرب من تورطك الشديد مع كلب ضال من كلاب الفيس بوك وقال ايه بيأكل ويشرب واسمة oooops كمان..دى حكاية تضحك والله
عموما انا اوعدك انى لو قابلته بالصدفة مش حأكله ..عشان ذنبه يبقى فى رقبتك وخليها تكمل بقى ..
عارفة والله انا مشترك فى الفيس بوك ولغاية هذه اللحظة خايف منه لانه فعلا فظيع .. وتحسى معاه انك فاتحة ابوابك وشبابيكك على البحرى لك من هب ودب

عموما البوست ده فعلا حكاية..وحدوتة

تحياتى .. وعذرا على تأخر تعليقى فقد كنت اعانى من مشكلة فى النت.

kochia يقول...

غير معرف onyx
##############
فصة ابه حضرتك اللي انت مستنيها ؟؟


#############################
#############################

kochia يقول...

seven
########
صح والله مسؤولية
بس ابقي اعرف لنا ايه نوع الحيوان ده


###############################
###############################

kochia يقول...

هانى زينهم
###########
لا مجتش عليه
اشمعنا هو يعني
بس عندك حق ان فيه حاجات كتير بتتفرض علينا

###########################
###########################

kochia يقول...

شباب روش طحن
#############
فعلا افضل شئ انك تكون محدد هدفك منه
ومن اي شئ والا تنزلق
اشكرك علي التصيحة واهلا بيك دائما

تحياتي

#########################
#########################

kochia يقول...

Sherif
#######
والله فكرة
اعرضه للبيع واكسب من وراه اي حاجة
فعلا مفيش حاجة ببلاش

تحياتي

#######################
#######################

kochia يقول...

وميض ابتسامة
#############
لازم تخلي بالك لانه فظيع بجد
وخاصة لو لقيت نفسك متدبس في كلب حزين كدة زي اوووبس
علي العموم لو قابلته صدفة وماكلتوش انا متاكدة ان ناس تانية كتير هتاكله
وبعدين احنا قادرين علي ذنوب الكائنات الحية لما نشيل ذنوب البرامح كمان
يلا
الامر لله
تحياتي

########################
########################

ojg يقول...

اووووووبس
:))
اسم على مسمى
والله يا أختي
انا برضو نفس المضووع تقريبا حصل معايا
مكنتش ناويه خالص علي الفيس بوك ده
الى ان سمعت عن لعبه
Who has the biggest brain
ومن اول مره لعبتها
وانا خلاص ادمنت
وبقيت بدخل كتير جدا عشانها
زيك كده تمام
خاصه ان في برضو ترتيب وناس بتلعبها غيرك وحاجات
الناس دي بتفكر صح قوووووي
فكرة صغيرة لطالب جامعه
تتقلب لأشهر موقع وتبقى ادمان كده؟؟
بس سيبك انتي اخبار اوووبس ايه؟
:))

kochia يقول...

ojg
####
علي فكرة انا كنت الاول بلعب من حساب اختي اللعبة دي
Who has the biggest brain
ولما لقيت اني بجيب درجات كويسة قلت لازم اشترك برده عشان اسجل نتائجي لنفسي
ووصل بيا االمر لحد اوووبس

اما اخبار اوبس فانا طبعا لسة اسيره له وبدخل ااكله كل يوم
الجديد بقي ان فيه اصدقاء مدونين لما قروا الموضوع راحوا اشتروا كلاب من الفيس بوك برده وسايبنهم من غير اكل
بقيت بدخل ااكل اووبس وااكل كيكي كلب اختي وااكل كمان كلاب بعض المدونين اللي سايبين كلابهم من غير اكل
مش عارفة الامر هيوصل بيا لفين
ربنا يستر

تحياتي
########################
########################

mony يقول...

هههههههههه
ضحكتيني و الله


انا ليا حساب علي الفيس بوك بس زهقت و بطلت ادخل عليه

بس انا عايزة الحساب هو اللي يموت مش اوبس

بنت الغربة يقول...

انا عارفه انك مش هتقرى التعليق علشان البوست قديم بس برضه انت دمك زى العسل

kochia يقول...

mony
#####
الواقع الاليم بيقول
لا الحساب هيموت
ولا اووبس وهيموت
احنا اللي هنموت قبلهم

تحياتي

##########################
##########################

kochia يقول...

بنت الغربة
##########
قريت التعليق اهو في نفس اليوم وبرد عليه كمان
واشكرك علي رايك جدا
بس معلقتيش ليه علي البوست الجديد ؟؟

#####################
#####################

عمرو فكرى يقول...

lol