الاثنين، أكتوبر 20، 2008

تيجان مرة اخري!!!!!

---

اصدقائي الاعزاء

تيجان مرة اخري!!!!!

رغم ان اسئلة التيجان بتكون ساعات صعبة .. او يمكن عاوزة صراحة اكتر مما يملكها الشخص .. او شوية تفكير وخلاص .. لكن في النهاية بتعبر فعلا عن شئ من التقارب ومن الاهتمام

لذلك انا اشكر الاصدقاء اللي افتكروني وارسلوا لي تيجان

--

وهبدأ بحل الجديد حالا .. وانا كنت هبدأ بالترتيب قدر الامكان لكن مش هينفع اوي

لان عندي جملة تييجان تتحل مع بعض .. وتيجان مفرده من كذا مدونة

هحل المفردة ثم احل اللي علي بعض من مدونة واحدة

--

التاج الاول

من حسن حنفي صاحب مدونة sheva .. وهو حل شوية تاجات وخصني منهم بهذا التاج ..

--

  • · أذكر صفتين لا يعرفها من يحدثك لأول مرة ؟

السؤال ده كان تاج كامل وانا حليته قبل كدة وبدل الصفتين ست صفات وهو في موضوع

العلم في الراس مش في الكراس

--

  • · أذكر صفتين يراها الناس فيك وهى ليست كذلك ؟

السؤال ده لانه صعب ومعرفتش ارد عليه لوحدي وعشان كدة سالت فيه شخصين من اقرب الناس الي وهم اخوتي وهم ادري الناس بي .. وده كان رايهم والحقيقة انا متفقة معاهم في الراي بس سالتهم يمكن عندهم راي اخر

الصفة الاولي هي الشجاعة .. يري البعض احيانا اني شجاعة جدا لما بقول راي او اتحمس لقضية لكن انا في الحقيقة لست بتلك الشجاعة التي ابدو بها دائما للاسف

الصفة الثانية هي الطيبة .. حيث يري الكثير جدا انني طيبة اوي يمكن بسبب ان شكلي طيب او صراحتي احيانا وهو ليس صحيحا تماما لاني ساعات ببقي شريرة ومش بسكت علي حقي .. زي ما اخواتي قالولي

--

·أذكر ثلاثة من مدوناتك المفضلة؟

ثلاثة بس قليل جدا ... لان انا فعلا عندي مدونات مفضلة وبقرا موضوعاتها فورا اول ما بشوفها ..

وبما اني صعب التزم بعدد ثلاثة مدونات فقط فاعتقد اني سوف اعبر هذا السؤال لانه مينفعش اقول ثلاثة مدونات بس من عشرة مثلا مميزين ..

--

  • ·لو معك ثلاث وردات لمن تهديها ؟

واحدة ليا هحطها علي مكتبي في الشغل

والتانية ههديها لخالتي الكبيرة

والثالثة ههديها لاختي

--

  • ·من هو افضل رئيس عربى برأيك برر بسببين ؟؟

والسؤال ده كمان هعبره ..

اكيد فيه منهم رئيس كويس .. لكن المنطقة كلها مش كويسة .. ولو حد كويس في جانب في جوانب تانية قومية وعربية واسلامية محتاجة اعادة نظر.. من الكل ...

--

  • ·شئ فعلته وندمت ؟

اني توقفت عن استكمال الدراسات العليا بعد ما بدأت فيها للاسف


  • · شئ لم تفعله وبردو ندمت ؟

اني لم احاول جديا تغير مجال ومكان عملي رغم رغبتي بذلك ..حتي الان

---
--

التاج الثاني

وصل من الصديق Manamino صاحب مدونة مش اسف علي الازعاج
وهو تاج مزدوج الاول هو تاج التدوين .. وانا حليته قبل كدة في موضوع تيجان بالجملة
اما التاح الاخر هو
تاج الاحلام
--
--

ü أذكر 5 أحلام على الاقل تخص ماضيك وتحلم فيها بتغيير أشياء ماذا ستعدل وماذا ستترك ؟

1. كنت احلم اجيب مجموع اكتر من كدة في الثانوية العامة .. واهملت مع سبق الاصرار ولو رجع الوقت هحاول اغير ده

2.!حلمت اني ابقي متدينة ووربنا يرضي عني وابقي راضية عن نفسي بس ده محصلش لحد دلوقتي .. ولحد دلوقتي بحلم بكدة

3. امممممم مش عارفة ايه تاني بس اكيد فيه .. لو افتكرت هبقي اقول

--

ü أذكر 5 أحلام على الأقل تخص مستقبلك ؟

1.احلم اشتغل في مجال تاني مش مختلف تماما لكن متميز اكتر اقدر اقدم فيه اكتر من قدرات اعتقد انها موجودة عندي.

2.احلم اكمل الدراسات العليا واتخصص في مجال احبه وابدع فيه واستفيد وافيد غيري

3احلم يبقي عندي عربية bmw

4.واشياء اخري ...

--

üأذكر شخصين على الاقل متواجدين فى حياتك حاليا كنت تود وجودهم قبل الان بزمن ؟

راضية تماما الحمد لله عن الاشخاص الموجودين في حياتي حاليا ..

ومحدش فيهم جديد كنت اتمني وجوده قبل كدة لامهم كلهم معايا من زمان

--

ü أذكر شخصين على الاقل غير متواجدين فى حياتك حاليا كنت تود وجودهم الان او فى حياة أولادك مستقبلا ؟

جدتي رحمها الله .. رغم انها جدتي يعني كبيرة وقديمة بالنسبة لوقتنا ده لكن مخها وذكائها وتفكيرها وحكمتها افتقدتهم جدا بعد وفاتها وكنت اتمني انها تبقي موجودة في حياتي دايما اسمعها وهي بتحكي وتسمعني وانا بشكي واستفيد منها .

--


---
واخيرا ..
اشكر كل الاصدقاء الذين ارسلوا لي تيجان ..
وانا سعيدة بها جدا
ولسة طبعا عندي مجموعة اخري ان شاء الله هحلها قريبا جدا
واهدي التاج الاول والثاني لمن يريده عامة
واخص بالذكر كل مدوني السويس وبورسعيد
احب بلدين الي قلبي

-----


هناك 38 تعليقًا:

blue-wave يقول...

اجابات تحفه ماشاء الله
وصراحه متناهيه
انا كمان نفسى يكون عندى عربيه bmw
وادينا ذاكرنا فى الثانويه ودخلنا طب عملنا بيه ايه يعنى:))
تحياتى

مهندس مصري بيحب مصر يقول...

كل دي تاجات ربنا يكون في عونك
:)

كـــيــــــــارا يقول...

مبرووووك التيجان ياقمر

وليه توقفتي عن الدراسات العليا حاولي ترجعي ليها :)

غير معرف يقول...

تصدقي لما قريت ردودك كنت متوقع ردود غير كده خالص بس انتى رديتى ردود مش صحيحه وخبيتى ظنى يمكن استعملتى الدبلوماسيه فيها بس انا متاكد ان عندك ردود للاسئله مختلفه عن اللي كتبتيه وده واضح من مدوناتك القديمه الللي يقراها كلها ممكن يفهم مابين السطور.


onyx

حسن حنفى يقول...

يارب حضرت تقدري تحققي كل احلامك

اللهم امين :)

الفارس الملثم يقول...

ايه ده انا كل ماجي الاقي عندك تاجات ,معلش الواحد يقر شويه هههههه

بالنسبه لحكاية الندم علي حاجات معملنهاش , دايما الانسان عنده احساس الندم ده ويمكن برده لو حقق الحاجات دي مش ايكون سعيد , لان دي طبيعة الانسان دايما

اشمعنا السويس وبورسعيد يعني ايه التفرقه العنصريه دي مممممممممم

جميله اوي اجابتك يا كيوتشا وربنا يحققلك كل اللي تتمنيه ان شاء الله

تحياتي دائما

انا حره يقول...

بى ام دبليو حته واحده ياست كوشيا

طيب نبتدى ب 128 الاول وتاتا تاتا نوصل لفوق كدا

بس يالا يعنى هيا الاحلام بفلوس

ربنا يكرمك ياقمر ويكتبلك الخير

نعكشة يقول...

برغم انك مجاوبتيش علي بعض الاسئلة و كل شوية اعبرة اعبرة

بس اوك

يا رب تحققي كل احلامك

و حكاية انك عشان مبتسكتيش علي حقك تبقي شريرة دية نظرة خاطئة

الشر يعني واحد بيعمل شر في الناس

معتقدش انك شخصية شريرة




اعتقد ان ماذالت الفرصة سانحة انك تاخدي الماجستير تاني

لو انتي عايزة روحي اسئلي تاني

ربنا يعينك يا رب

اتمنى لكِ دوام الصحة و راحة البال

سلام عليكي

romansy يقول...

التيجان مش بتروح الا لاميرات
ودى اجمل تاج لانك انتى اللى حلتيه
يارب دايما كده يحقق احلامك يارب

المنسى يقول...

السلام عليكم كوشيا
إزيك
يارب تكونى بخير
أولا بطمنك إنى الحمد لله بخير ومتشكر جدا لسؤالك
كل الحكاية إن عندى بس شوية مشاكل فى بداية الدراسة هتحل قريبا بإذن الله

بالنسبة للتاج طبعا إحنا كلنا أتعرفنا عليكى قبل كده
بتاع الواجب فى الراس برضو
بس صفتين الشجاعة والطيبة دول أنا كنت عارف منهم واحدة الشجاعة
واضحة جدا فى كتاباتك
لكن الطيبة أكيد حد زيك مش شرير
بس مكنتش معروفة يعنى

وكل التاجات إللى بتجيلك دى
دليل على حب الناس ليكى
ربنا يرزقك بحب الناس كمان وكمان
بجد
أحسن نعمة فى دنيتنا
تحياتى ليكى
ومعلشى مقدرتش أقرا غير تاج واحد
سامحينى
سلام

Alkomi يقول...

نياههاهاهاهاهاهاهاها

كوشيا فريسة التاجات

الازهرى يقول...

العزيزة كوشيا

انا اصدق انك طيبة والدليل كمية التوريط فى التاجات دى كلها

والدراسة يمكن استكمالها كما تم التوقف عنها المهم هو الارادة
تحياتى على الردود وربنا يحققك امانيك

قوس قزح يقول...

تصدقى فكرتينى ان عليا تاجين مش جوابتهم


انا كمان كنت اتمنى ان جدتى تكون ما زلت على قيد الحياة

أمير البلانكو يقول...

kochia

ازيك

ميرسي الاول علي زيارتك لمدونتي

ثانيآ

انا شايف ان أحلي حاجات في التاجات دي انها عرفتنا علي شخصيه جميله زيك

بجد انا شايف انها أسئله صعبه لكن في النفس الوقت أجابات انا شايف انها صادقه

تحياتي ليكي

نـــــور يقول...

ربنا يحققلك كل الل بتحلمى بيه
دبلوماسيتك نافعه وليست ضاره
ومن حقك طبعا تعدى اى سؤال
بلوجر عنده حريه :)

ربنا يرحم جدتك وبابايا يارب
دمت بخير

جروب الاسلام يقول...

ما شاء الله المدونة رااااااااااااااااااااائعة
و يا سلام على القالب بقى
لانه زى بتاعى بالظبط
هههههههه

شكار لك على البوست
و الى الامام دائما

Beram ElMasry يقول...

العزيزة الفاضلة . kochia
سلام الله لك
بامانة مش عارف لية لما اشوف اسم مدونتك ينتابنى شعور بالراحة واستشعر بانى فى الغورية او سوق السلاح حيث الاصالة وطهر القلوب
المهم شكرا لزيارتك
كنت فى مدونتك لكنى خرجت مسرعا لمجرد رؤيتى للتاج وكانى اهرب من لص اومتابعة نشال لانى لم اعرف بعد ما الابداع فى نشر اسرارى وخصوصياتى على مدونة
تحياتى ولا تحرمينى الزيارة

kochia يقول...

blue-wave
############
مرحب يا دوك
بكرة تجيب البي ام ان شاء الله ومحدش يبقي قدك

تحياتي

##################################
##################################


مهندس مصري
###########
تكرم
مش عاوز حاجة منهم ؟؟
والله انا عاملة طيبة ومش ببعتها لحد الا لما يقول

ولسة عندي يجي خمسة فب الدولاب

##################################
##################################

kochia يقول...

كـــيــــــــارا
#################
هحاول ارجع ان شاء الله
بجد نفسي والله
ربنا يسهل

#################################
#################################


غير معرف onyx
#############
جميل انك احيانا لا تجد الشئ الذي تتوقعه .. لان ده بيعمل اثارة فكرية وتشوق انك تكمل .. اما اذا كنت تقصد انه عمل لك ممل يبقي مكنتش كملت قراءة افضل
وردودي صحيحة وانا بحب الصدق ولو مش بحب اقول مش بقول لكن مش بكدب
واكيد عندي ردود مختلفة .. وده من الابداع اللي الحمد لله ممكن يجيلي في لحظات نادرة خلتني اعمل المدونة دي
علي العموم شرفتني واحب اسمع رايك دايما

#############################
#############################

kochia يقول...

حسن حنفى
##########
اشكرك
وانت كمان ان شاء الله

##############################
##############################

الفارس الملثم
#############
طيب ايه رايك ابعتهولك؟
والله عاوزة ابعته لناس كتير بس الدنيا زنقة عندي قلت يمكن الناس كمان مزنوقين
بس انا هعمل تاج نفسي وابعته .. انتظره قريبا
والسويس وبورسعيد عشان السويس بلدي وبورسعيد فيها اهلي وفيها ايام حلوة عشتها

وربنا يخليك وبجد لو عاوز التاجات قولي الفهالك وابعتهالك لحد المدونة عندك

##################################
##################################

kochia يقول...

انا حره
########
اه بي ام
ايه يعني
بكرة ربنا يبعتهالي ولا تعلمي نصيب الواحد ايه وفين
واللي يحلم ب 128 هيجيب عجلة
واللي يحلم ب البي ام ممكن يجب تويتا
يعني لازم احلامك تبقي فوق
وصح مادام مش بفلوس نحلم
منحلمش ليه

###############################
###############################

نعكشة
######
يا ستي فوتي
بالنسبة للماجستير ان شاء الله ناوية
بس المشكلة اني ناوية من زمان
اشكرك جدا
ومنوراني دايما
تحياتي


##############################
##############################

م/ الحسيني لزومي يقول...

ممنون جدا لزيارتكم مدونتي المتواضعه
وارغب في دعمكم للحملة الشعبية للقيد بالجداول الانتخابية من خلال مدونتكم الرائعة.
مع خالص تقديري واحترامي

مـجـنـووون يقول...

بجد أجابات في الجون

ويا رب يحقق ليكي كل أحلامك

وعلي فكرة التيجان بتبقي صعبه قوي يعني الواحد علشان يجاوب علي الأسئلة دي بياخد وقت كتير قوي

واجب ولبد منه


تقبلي مروري
مجنووون

غير معرف يقول...

http://nomercy89.blogspot.com/
اتمنى زيارتك
فارس

kochia يقول...

romancy
########
اشكرك جدا
وتحياتي

#############################
#############################

المنسى
######
اهلا بيك وان شاء الله دايما تكون بكل خير
واشكرك علي مرورك رغم انك مش فاضي
تحياتي

#############################
#############################

kochia يقول...

محمد الكومي
###########
مالك مبسوط اوي كدة ليه
تكونش فرحان فيا؟؟

#############################
#############################


الازهرى
########
اشكرك علي مرورك
وان شاء الله هحاول ارجع تاني ربنا المعين
تحياتي

############################
############################

kochia يقول...

قوس قزح
########
طيب روحي حلي التااجات
الله يرحم امواتنا جميعا يارب

#############################
#############################

أمير البلانكو
############
اشكرك علي مرورك
واشكرك علي رايك كمان

تحياتي

############################
############################

kochia يقول...

habiba
########
طيب الحمد لله انه من حقي
هي دي فايدة البلوجر
الله يرحم الجميع

##########################
##########################

جروب الاسلام
##########
اشكرك علي رايك
وفين مدونتك اللي شبهي دي ؟؟


##########################
##########################

kochia يقول...

Beram ElMasry
##############
ليه الشعور بالراحة ؟
اصل انا بحب الاطراء للمدونة بصراحة
ابقي قولي ليه بترتاح
ومتخفش من التاجات مش بتعض
رغم انها ممكن تبقي تحدي جميل ليك لو ترد عليها بالشعر
تصدق فكرة
ابقي فكر فيها كدة وقولي

############################
############################

م/ الحسيني لزومي
###############
اشكرك علي زيارتك
وانا مقتنعة بموضوع بطاقة الانتخاب ده جدا
ومعنديش مانع طبعا اشترك في الحملة بس ازاي
يعني ياريت يتعمل ليها برنامج

############################
############################

kochia يقول...

مـجـنـووون
###########
والله
في الجون صحيح ؟
وفعلا صعبة الواجبات والله
ايوة لابد منها
وانا مش بكرهها

##########################
##########################

فارس
#####
مرحب بيك
ومنور البلوجر

#########################
#########################

غير معرف يقول...

ربنا معاكى

التاج رائع

ربنا يكرمك

صاحب المضيفة يقول...

ربنا ينولك التدين الصح قريبا باذن الله تعالى


اجابات جميلة ورقيقة

تحياتي

funckydoctor يقول...

بجد أسلوبل خفيف يا شريرة :D
يا رب تحققى أحلامك يا رب
والمذاكرة بتاعت ثانوى هأو ولا ليها لازمة
انتى أحسن حالا من اللى ذاكر
سلامات

mohamed ghalia يقول...

إجابات رائعة
تدل على شخصية أروع
ربنا يحقلك كل أحلامك
بالتوفيق دايما
دمتى فى سعادة

غير معرف يقول...

kochia

كل تاج و انتي بخير

بخصوص الصفات اللي ممكن مانلاحظهاش في نفسنا شوفي انتي ممكن الناس تكوني شايفه انك شجاعه في مواجهه كتير من المواقف لكن انتي شايفه عكس كده تفتكري نمشي تبع كلام اللي قدامنا و لا كلامنا؟
اجابات عجبتني علي افضل رئيس عربي و اتفقنا في موضوع اننا وقفنا استكمال الدراسات العليا بعد مابدأنا لأني انا كمان عملت كده و للأسف ندمت شويه

لكن لو لسه عندك الاراده انك تكملي ابدأي من السنه الجايه

ربنا يحققلك كل اللي نفسك فيه و بتتمنيه
تحياتي ليكي و كل تاج و انتي بالخير

kochia يقول...

MaGn0liA...
###########
اشكرك جدا
تحياتي

#######################
#######################


صاحب المضيفة
###########
امين يارب
اشكرك جدا
تحياتي


#######################
#######################

kochia يقول...

funckydoctor
##############
اشكرك علي المرور
واكيد اللي ذاكر كويس علي الاقل حس انه عمل اللي عليه
لكن انا للاسف لا
تحياتي


##############################
##############################

mohamed ghalia
################
اشكرك جدا علي رايك
تحياتي



##############################
##############################

kochia يقول...

اجندا حمرا +Heart Beat
######################
مش عارفة نصدق نفسنا ولا نصدق كلام اللي قدامنا
لو عارفة يمكن مكنتش احترت في حاجات كتير
وبالنسبة للدراسات اتمني اني اتابع السنة الجاية وتكون عندي العزيمة القوية لكدة
وانتي كمان

تحياتي


###############################
###############################