الخميس، يوليو 31، 2008

. العلم في الراس .. مش في الكراس

.
الاخوة الاعزاء
دي اول مرة اتكلم بشكل عام بعيد عن الموضوعات اللي بكتبها في المدونة
بخلاف التعليقات طبعا
وده لاني اول مرة احس اني بقيت عضو فعلا في اسرة المدونين
اذا اعتبرنا انها اسرة
وانا حسيت كدة اولا من ارسال كل من نعكشة ورارا ليا ما يسمي بالواجب
وكان اسمه تاج من شهر كدة وهو ما يرسل فقط للاصدقاء
بس مش عارفة غيروا اسمه ليه ؟؟

كمان لما حسيت ان فيه ناس بتدخل مدونتي دلوقتي
بتدور علي الجديد اللي انا بكتبه مش بس عشان الموضوع
ودي حاجة اول ما دخلت المدونات انتقدتها في نفسي
لكن دلوقتي عرفت انها حلوة وبتحسس الانسان انه محبوب في المكان اللي هو فيه
وانه له اصدقاء عاوزين يعرفوا بس انه موجود ..
حتي لو اصدقاء عبر الشاشة

عشان كدة انا سعيدة جدا بسؤال كل من افتدني
سواء هنا او علي الايميل رغم اني متاخرتش كتير ..
هو اسبوع بس يمكن اول مرة اتاخر اسبوع من يوم ما ابتديت
والنهاردة هتكلم بصراحة
وشفافية
وهجاوب علي كل السؤلات اللي جت لي
رغم اني مش بحب احل واجب خالص طول عمري
عشان العلم في الراس طبعا .. مش في الكراس
بس عشان خاطر عيون الحلوين اللي بعتوه
-------------------------------------------------------

الواجب الاول .. كالاتي
----------------------
  • من ارسله لك
  • اذكر قوانين الواجب
  • اذكر ست اسرار لا يعرفها من يقابلك للمرة الاولي
  • اهدي الواجب لمن تحب 6 اشخاص

الواجب الاول جالي من نعكشة .. صاحبة مدونة نعكشة
القوانين هي
ذكر مرسل الواجب .. نعكشة ..
الاجابة عليه
ثم ارساله لمن اختار
واخبر من ارسله لي بالاجابة

كدة تمام

ندخل بقي في الجد

ست اسرار لا يعرفها من يقابلك للمرة الاولي

بما ان السؤال ان الاسرار دي لا يكتشفها من يقابلني للمرة الاولي
يعني اللي يعرفوني مش هتبقي اسرار بالنسبة لهم

1- الخجل
اخجل عند التعرف علي اشخاص جدد واكون محرجة وقليلة الكلام
ويعتقد الاخرون انه تكبر او غرور
ولكن بعد التعارف بفترة غير قليلة استطيع ان اكون علي طبيعتي وانطلق

2- الفوبيا
عندي فوبيا من الحشرات الطائرة جدااااااااااا
ولو حشرة طائرة في مكان اخرج انا منه لحد ما هي تموت او تخرج واتاكد من ذلك ..
ماعدا الذباب والناموس طبعا

3- العصبية
شكلي هادي اوي وطيب ومن يقابلني للمرة الاولي مش ممكن يعرف
اني لما بضايق اوي اوي وبتنرفز ممكن ابقي عصبية جدا
وصعب التعامل معايا في الوقت ده والافضل انهم يتركوني لحد ما اهدي
ولما بهدي برجع زي البحر في اهدي حالاته

4- الحدس والفطنة
الشكل الطيب بتاعي برده الذي لا ينم عن داخلي تماما
يخفي عن الاخرين اني عندي حدس في التعرف علي الناس ..
بمعني اني الراي اللي بكونه عن شخص في اول تعارف بيني وبينه هو غالبا بيكون الصحيح
رغم ان كل الناس التانية ممكن تكون شايفة عكس ما اري ولكن في النهاية يتضح ان رايي كان الاصح

5- بميت راجل
بميت راجل عند اللزوم فعلا مع ان شكلي لا ينم عن ذلك خالص
واللي يشوفني لاول مرة يفتكر اني معتمدة علي " الكبار " في كل حاجة
ومش بعرف اروح مشوار لوحدي

6- فتاة اللحظة الاخيرة
عندي طاقة الاداء في اللحظة الاخيرة بشكل شديد جدا
واللي يشوفني لاول مرة لن يعلم تلك الطاقة
لاني في العادي طاقتي في العمل عادية الا تحت الضغط والحاجة
وهي ما يراه الاخرون في الظروف العادية
------------------------------------------------

نيجي بقي للواجب التاني والمرسل من العزيزة جدا

والواجب بتاعها اطول قوي بس يمكن سهل شوية
اهي صفات وخلاص

بس 16 كتير لوي عشان كدة هقول اللي يطلع من ذمتي
وهكمل من واجب نعكشة اللي فوق ده

اذكر 16 صفة
اهدي الواجب لمن تحب
  • 1- مرحة وبحب الهزار لكن مش بحبه من غير حدود
  • 2- بحب القراءة جدا منذ الصغر رغم اني حاليا لا اقرا بنفس القدر كما في السابق
  • 3- ذاكرتي ضعيفة احيانا
  • 4- صاحب صاحبي اوي ووبقي موجودة فعلا عند اللزوم ( الصديق وقت الضيق )
  • 5- قلبي ابيض اوي وبسامح بسهولة وكتير لحد مرحلة معينة لو قلبت وزعلت من جوايا مش بعرف ارجع تاني طبيعية مع الشخص اللي زعلني
  • 6- بخاف من الملاهي وركبت في حياتي مرتين .. والمرتين صحابي ضحكوا عليا واقنعوني اركب ونزلت تقريبا مش قادرة اقف علي رجلي ( فوبيا بره تقريبا )
  • 7- عندي رومانسية عقل .. وعقلانية قلب
  • 8- كسولة شوية طول ما الدنيا فيها وقت مفتوح لحد ما انضغط ببقي صاروخ
  • 9- بحب الصيف اكتر من الشتا بحب الليل اكتر من النهار
  • 10- عصبية لما بضايق اوي
  • 11- بخاف من المجازفة .. لكن او اتحطيت في موقف غصب عني اؤدي جيدا
  • 12- شخصيتي قوية الي حد ما ومش منقادة
  • 13- انطباعي الاول عن الناس غالبا صحيح
  • 14- خجولة وباخد علي الناس ببطء
  • 15- بحب السفر اوي
  • 16- واخيرا ومن باب الدعاية لمذكرات نتاوي احب اقوال اني ( جميلة رشيقة بيضاء )

(( الاخيرة دي هزار يا جماعة ))

ودعوة مني لزيارة موضوع جميلة رشيقة بيضاء ..

للي مش فاهم

بس ملقتش صفة 16 احطها

حاسة اني رغيت كتير اوي النهاردة

مش بحب الموضوعات تبقي طويلة

بس دول بقي اتنين في واحد


واخيرا ارسل التاجين او الواجبين لمن يريد اجابتهم فعلا
واخص بالذكر
عبدة الرايق مدونة عبدة الرايق.. تحية واحلي سلام لابن بلدي
مهيج الجماهير صاحب مدونة رقصني يا جدع و مدونة اي خدمة .. تحية له علي مدونته التعليمية المفيده
afew good men صاحب مدونة الاجنحة المكسورة بمناسبة عيد ميلاده وكل سنة وهو طيب
i am freedom صاحبة مدونة i am freedom ...احب اعرفها اكتر
وبثينة صاحبة عدة مدوانات وانا اتابع طيارة ورق مع احترامي لافكارها
وتحديثا اضيف .. maha zein
صاحبة مدونة اقلع همومك ومدونة انها الحياة ومشتركة في ثالثة
كدة انا ابقي دبست 6 تمام زي ماهو مطلوب
ولكل منهم الحق في اختيار الوقت المناسب له للاجابة الان او لاحقا
والاعتذارات مقبولة
واجب عن السؤالين السابقين او احدهما
طول عمري بكره الاسئلة المحددة وبسيب دايما سؤال من الاجباري
مش عارفة ليه
يعني كله اختياري في اختياري
بس لو حلتوهم لازم تبلغوني
تحياتي للجميع
سلام
----------------------------------------------------------------

هناك 74 تعليقًا:

جمعاوى يقول...

كده العلم فى المدونة

(::

أما عن الإسرة التدوينة

فمن عاشر القوم أربعين يوم صار منهم

على طول جدتى تقولى كده

دمتم بخير

عبده الرايق يقول...

جميله رشيقه بيضاء
خليتى عينى احولت وبقيت مرووش
كل ما اشوف واحده جميله رشيقه بيضاء رايحه ناحيه الموقف اياه اقول يمكن دى كويشا
وابص وراها الاقى واحده تانيه جميله رشيقه بيضاء
اقول يمكن دى كويشا
وشويه تانى الاقى واحده تالته جميله رشيقه بيضاء اقول يمكن استنسخت
وللمره الرابعه الاقى واحده شرحه اقول يمكن العيله اتفرعت
وللمره الخامسه الاقى واحده بسيطه الجمال مكلبظه سوداء اقول يمكن دى اللى رايجه تتخانق بالروسيات مع كويشا
وقعدت دماغى تلف لغايه لما واحد خبطنى بالعجله بصيت لقيت عملاق اسود كبير وعنيه بتطق شرار وقالى مش تفتح وانت ماشى ... قلت ده الميكروباص اللى بيقف فى الموقف

عبده الرايق يقول...

بالنسبه للبوست
انا متشكر جدا جدا لارسالك التاج لى
وانا لها انا لها
اما عن اجاباتك
فتنم عن شخصيه قويه جدا تثق فى نفسها لابعد الحدود
الف تحيه وسلام لبنت بلدى كويشا

kochia يقول...

جمعاوى روش طحن
===============
اشكرك
وايوة انا هنا من 40 يوم و40 يوم
يعني في حكم الامثال مدة طويلة

تحياتي

kochia يقول...

عم الدكاترة سي عبده بيه الرايق
=================================
سلامتك من الحول
انت قول بس " جزر " .. وكوشيا وكل الجميلات البيضاوات الرشيقات اللي تعرفهم يجضروا عندك هم والقطط بتاعتهم بدل ما عينك تتحول لا قدر الله وانت البلد محتاجالك
بس القطط مش بتاكل التعليقات بس
وبتاكل البني ادمين كمان
خلي بالك من نفسك بقي
واديك اخدت خربوشة بس صدقني غصب عني جت فيك غلط بس اهو كله بثوابه وابقي خلي بالك

والقطط برده هي اللي بتتصرف مع السود المكلبظين اللي بيفتروا علي الناس وانا مش هعمل راسي الكريمة براس روسية .. ولا انت رايك ايه ؟؟

kochia يقول...

عبده الرايق
===========
اشكرك علي رايك فيا اولا
واشكرك انك قبلته .. واتمني اشوف اجاباتك قريبا

واتمني انكون صراحتي اتفهمت كما اريدها لا كما يراها الاخرون

تحياتي

عبده الرايق يقول...

على فكره التعليق اللى اتمسح فى الاول ماكنشى بتاعى
وانا لايمكن اكتبه
اما اللى اتمسح التانى كان بتاعى وانا زعلت لانى لم اكتب سوى كلمتين وبس
وعموما
حصل خير وانا لايمكن ازعل منكى ابدا
ولو كل الجميلات الرشيقات البيضاوات هيجوا ومعاهم القطط بتاعتهم
بلاش
خلينا فى القبيحات البرميلات السودوات
مره اخرى
تحيه لكى
ولكل اخوانى فى السويس الحبيبه

kochia يقول...

يا عبدة بيه يا رايق
===================
طبعا عارفة ان التعليق اللي انا مسحته مكنش بتاعك
وانا عارفة بتاع مين
وبصراحة كنت متراهنة مع احد الاصدقاء علي تعليقات معينة .. والتعليق اللي انا مسحته ده لو كان فضل كان هيخسرني الرهان

وتعليقك اللي انا مسحته كان هيفضح اني تلاعبت في النتيجة عشان برده اكسب الرهان

دلوقتي انا بعترف اني غلطانة واني تلاعبت في النتيجة بس مكنش حد هيتضرر طبعا
وبعتذر لك اني مسحت تعليقك بس بما اني خلاص خسرت الرهان هسيب التعليق ده بقي ورزقي علي الله

وبعتذر للصديق اللي كنت متراهنة معاه هنا علي الملا
كان عندك شوية حق في اللي قلته

تحياتي لك
والمرة الجاية ابقي اغمزني وسيبني امسح التعليقات براحتي

سلام للمنطقة اللي من غير موقف

كيكى عوووووو يقول...

عوووووووووووووووووووووووووو
انا جيت اتخديتى
...........................
فتاة اللحظة الاخيرة
..................

رومانسية العقل....عقلانية القلب
امممممممممممممممممممممممممم
الجملتان دول علقوا معايا
اووووووووووووووووووووووووووووووى

بس فاهمينى تانى جملة
ازاى يعنى
...................
صفاتك حلوة بلذات
رشيقة وبيضاء
ههههههههههههههههههههههه
انتى عسولة خالللللللللللللص وسكرة بجد
................................
دومتى بخيررررررررررررررررررررر
وربنا يخليكى ويسعدك على طول الخط
عوووووووووووووووووووووووو

سبهللة يقول...

تعرفى انك تشبيهينى فى حاجات كتير
ماعدا القلب الابيض دى لانى مش بحب اسيب حقى لو حد زعلنى

نعكشة يقول...

:D

انا كمان عندي فوبيا الحشرات كلها ماعدا النمل وا لذباب و الناموس
بس ساعات بتخض من الذباب معرفش ازاي

اكتشفت مؤخراً انا كمان اني خجولة :D

شوف سبت الموضوع و برغي عن نفسي
انتي شخصية عسولة قوي

ربنا يكرمك يا رب
و عفارم عليكي يا كوشيا
بس برضو معرفتش درستي اية لوا بتشتغل اية ولا بتعمل اية في حياتك
فضولية انا
اصل اسلوبك جميل قوي ماشاء الله
ينم عن صوحفية ( حلوة صوحفية دية )
او واحدة منظمة في حياتها

دمتي سالمة

سلامٌ عليكي

الفارس الملثم يقول...

رومانسية العقل....عقلانية القلب

ممممممممممممم اكيد ده الافضل

بجد اجاباتك جميله اوي , متهيالي انتي قلتي حاجات كتير عن شخصيتك خلتنا نعرفك اكتر ,ومتنسيس تكملي مذكراتك النتاويه

تحياتي

مدحت محمد يقول...

ياربى انتى جاوبتى التاج

ياللا هو حظك التاج فيه تاجين تجاوبى التاج التانى بقى

ان شاء الله
بقلك هو انتى لازم تقولى
جميله رشيقه بيضاء

كدة حولتى عبد الرايق كدة
ههههههههههههههه

لو حصله حاجة ذنبه فى رقابتك بقى
ياللا سلام

kochia يقول...

كيكى
=======
اشكرك يا قمر
ورشيقة جميلة بيضاء دي تريقة علي موضوع كنت كتبته قبل كدة لنفس الاسم وانا موضحة ده في البوست

اشكرك جدا علي ذوقك
بس معرفتش انتي عاوزة تفهمي ايه
ابقي قوليلي

سلام
تحياتي

kochia يقول...

سبهللة
=========
اهلا عزيزتي
منورة .. وشئ يسعدني اني اشبهك

وعلي فكرة انا قلبي ابيض بمزاجي .. عشان اتمني الناس تسامحني لو غلط فيهم
لكن لما بقلب ببقي مستحيلة

تحياتي

kochia يقول...

نعكشة
=======
انتي اللي عسولة واشكرك علي التاج تاني

مش عارفة ليه بنات كتير عندها فوبيا مع اني مضايقة من نفسي جدا بسبب الموضوع ده وجاولت اعالجه كتير مع نفسي
دلوقتي وصلت اني مجريش من المكان هاربة بقيت باخد ساتر بس وبدعي ربنا يستر لحد ما يحصل انقاذ
وبتعدي الحمد لله

وانا قصدت اني محطش بيانات شخصية ولا شكلية حبيت احط بيانات انسان
مجرد انسان
والفكرة تتكون عنه من خلال كدة
واللي تحبي تعرفييه اساليني بشكل مباشر وانا هقولهولك بيني وبينك
ماشي

واشكرك علي رايك الجميل ده
ودمتي انت الاخري بكل السلام والسلامة
تحياتي

kochia يقول...

الفارس الملثم
==============
اشكرك يا محمد علي رايك جدا

وان شاء الله مذكرات نتاوي في الطريق

تحياتي

kochia يقول...

مدحت محمد
===========
اهلا مدحت
ايوة جاوبت التاجين
انا جالي تاجين ورا بعض يوم ورا يوم
واحد من نعكشة وواحد من رارا
وتموا بحمد الله

المهم عبده الرايق انا شفته بيعاكسني جمب الموقف انا وصحابي الجميلات الشقراوات البيضاوات بس عملت نفسي معرفوش عشان مصلحته

يبقي مين الغلطان بقي
وهو عندك بيقول فضل يدور في الموقف وينده ويقول هي دي كوشيا .. هي دي كوشيا ؟؟؟

وبعدين خبطته عجلة
يبقي ذنبي ؟؟؟؟
احكم انت .. اديك ابن بلد برده والخناقة مش هتطلع برة الاقليم

تحياتي

عبده الرايق يقول...

مدحت محمد
اوعى تصدق كلام كوشيا
انا الدكاتره عبده الرايق اعاكس بنات بلدى
نو
نو
نو
انا لما احب اعاكس بخطف رجلى لغايه المريخ او بلوتو واعاكس هناك

غير معرف يقول...

معلش انا بصراحة بهرب من الاسئلة دي وبحس اني حتكشف علي الآخر

ياريت تصبري علي شوية علشان انت عارفه شهر يوليو

وبعدين بدون مبالغة انا بجمع جميع صفات برج السرطان

ولكن

مستبد الشخصية

الديمقراطية ليها انياب

ماركة سي السيد وخلافه

عموما دا علشان لو اتاخرت تبقي عرفت شوية حاجات

وشكرا علي التاج

بس في حاجة حقولك عليه انا كمان
الصفة رقم
999

طويل وسيم عريض المنكبين ((مشعارف ابيض دي تفرق ولا لا--ولو اصلع برضو يبقي نفس الحالة ولا ايه ؟

هههههههههههههههه

يارب اشوفك دايما سعيدة مبسوطة

وخدي بالك من نفسك وانت في الموقف
انت وصحباتك

تحياتي ليكي يا جميل
ودمت بخير وحب

مواطن مصرى نايم يقول...

اولا دمك خفيف جداااااا
و اجاباتك جميلة
اما بقى حكاية ليه اسمة واجب
لان اللى عامل التاج بتاع ست حاجات عنك
المدونة لعلها خير
و هى مدرسة على حد علمى ان من هنا كان سبب التسمية
اما بقى الاسرة التدوينية
اكيد طبعا دا انتى الخير و البركة
اما بقى جميلة رشيقة بيضاء
الرايق بيقول انه اترووش
انا مصدقه

تحياتى

اسلام

Unknown يقول...

رشيقة جميله بيضاء وخجوله وإجابات جامده كمان


مبروك اللى انتى دخلتى الاسرة التدوينيه ولو انك داخلها من اول بوست

دمتى بخير

مصطفى

غير معرف يقول...

اعتقد ان كلامى صح ...........

غير معرف يقول...

كل سنة وانت كمان طيبة

عايز اعملك واجب ادبسك فيه

بس استني

عموما انت حتكوني اول واحد تاخدي الواجب اجاي

بس مش صعب الواجب علشان في الحب تكملة للشهر العظيم

تحياتي

واد غلبان يقول...

ياه اول زيارة والاقى تاج
والله وضحكت الدنيا ف وشى
انا كدا عرفت كتير عن صاحبة المدونة من اول زيارة
بس ايه موضوع الواجبات ده
===================
لا اعرف ان كنت تعرفين عن نفسك هذا القدر فانت محظوظة
انا لن استطيع ان اذكر صفتين فى نفسى
==========
قرأت "بيضء جميلة رشيقة"
ولا اتفق معك فى التصنيف
فلا ارى هذة المواقع جادة اصلا
ويبقى الصنف العابث الذى ذكرته هو الوحيد الحقبقى
============
اتمنى ان زيارتك لملعبى الغلبان

kochia يقول...

عبده الرايق
=============
انا شايفة انك انكرت انك لقيت المحافظة تدور عليا

علي العموم انا هعديها المرة دي
لكن المرة الجاية
.............

مش هقول بقي
انت حر

kochia يقول...

afew good men
===============
اهلا بيك
وطبعا ده اختياري زي كا قلت لك
ووقت ما تحب تعمله اعمله

ولكن
مستبد الشخصية
الديمقراطية ليها انياب
ماركة سي السيد وخلافه

اهي تصبيرة برده وحلوة الصفات دي
ومتخفش عليا انا بخرج متخفية
محدش هيعرفني

ويا سيدي انا في انتظار تاجك بس اتوصي بيا وعاوزة اسائلة حلوة ويكون نونو عشان الرغي الكتير مش لطيف

تحياتي

kochia يقول...

مواطن مصرى نايم
=================
اشكرك
علي رايك .. وعلي تعريفك ليا سبب التسمية .. ياريت بقي تقوللي كمان ليه اسمه تاج

وبالنسبه للرايق وكونك مصدقه دي حاجة انا هعمل علي تصحيهها

تحياتي

kochia يقول...

egyboy
========
اشكرك علي رايك ومروروك

وتحياتي

blue-wave يقول...

اجمل حاجه فى التاجات انها بتعرفنا بالناس اكتر
وانتى واضح انك حد جميل اوى
والصفات اللى قولتيها فيها قدر كبير من الصراحه
وخلتنا حبناكى اكتر
اتمنالك دوام التوفيق

kochia يقول...

غير معرف
=========
ارجو ان تكون الاجابات عجبتك
وقد يكون صح

تحياتي

RaRa يقول...

انا فعلا بلاقى نفسى فى عالم التدوين
وبحس انى دخلت دنيا تانية خالص

وميرسى على قبولك الواجب
وبجد انتى شخصية جميلة اوى اوى اوى
وانا مبسوطة بجد انى عرفت شخصيتك أكتر

kochia يقول...

واد غلبان
===========
اهلا بيك واتمني وجودك دائما
وموضوع جميلة رشيقة بيضاء كان تجربة
وحبيت اسجلها

تحياتي

kochia يقول...

blue-wave
===========
اشكرك جدا علي رايك
وفعلا ميزة التاج انك بتقرب من اصدقاء الشاشة

تحياتي

kochia يقول...

rara
======
اشكرك انتي انك ارسلتيه ليا واعطيتيني الفرصة دي

واشكرك علي رايك جدا

تحياتي لك

خالد كامل يقول...

الاخت العزيزة كوشيا
متشكر قوى على التاج
و انا ان شاء الله هنزله فى مدونتى
و بالنبة لاجابتك عليه
فأنا قولتلك انى كنت متوقع حاجات فى شخصيتك و لقيتها
و بالنسبة لموضوع طويلة رفيعة شقراء
فانا شايف ان المواقع دى اصلاً اللى بيدخلوا عليها بيبقى علشان يهيسو و بس
تحياتى ليكى
سلام

كاميليا بهاء الدين يقول...

أنا بحب دايما اقرأ التاجات

لانها بتقربنا من الناس اللى بنحبها

وبنعرفهم اكتر واكتر

وبيتأكد حبنا لهم اكتر واكتر

انتى انسانة رقيقة وجميلة


تحياتى وحبى

YaQeeN يقول...

السلام عليكم..

اولزيارهليا فى مدونتك الخاصه..

بجد ربنا يحميكى ويرعاكى..اجتزتى الامتحان بتفوق اصله واجب صعب قوى..
وجارى البحث فى مدونتك الخاصه..


تقبلى تحياتى..

ابو صهيب ( الجمعاوي الاصيل)سابقاً يقول...

اذاُ اهلاً ومرحباً بكم في اسرة المدونين

وادام الله عليكم الخير

حـــــدوتـــــة يقول...

السلام عليكم

دى اول زيارة ليا وإنشاء الله مش الاخيرة
شكرا على متابعتك لمدونتى
وارجو المذيد من التواصل

عرفتى تحلى الواجب مظبوط
واجاباتك جميلة اوى

سلالالالالالالالالالالالالالالالالالالالالالالالام

فراشة البساتين يقول...

عارفة

احلى حاجة فى اجاباتك

انها بتاعتك انتى

يعنى بتجاوبى من جواكى

فيه ناس تانية بتاخد التاج وتقعد تتمنظر بيه

يعنى تلاقيهم مثلا بيقولوا حاجات كلنا بنتمناها

مثلا

اتمنى فلسطين ترجع

اتمنى ربنا يحبنى

اتمنى معرفش ايه

المفروض يقولوا صفات عن نفسهم زيك كدا

مش يزوغوا من التاج

باجابات محايدة

.....................

احييكى على صراحتك

وصفاتك الجميلة

حبيبـــــــة القمـــــر يقول...

احلى مسا على عيونك ياقمر
اجاباتك واثقه ورزينه احب انا الدماغ دي اووووووووى
واكتر صفه لفتت نظري لما بتقولي "عندي رومانسية عقل .. وعقلانية قلب"
بس قوليل ازاي الواحد يعمل المعادله الصعبه دي
اصل القلب لو اصدر قرار العقل بيقف متنح وميقدرش ينطق

والعقل لو عملها وقرر بيدي القلب على دماغه ومش بيهمه صوته العالي ولا نزف جراحه

بس عارفه جميل انك بتقدري تحكمي على الناس

استمتعت بقراية اجاباتك
اتمنالك كل عاده وراحة البال

كيكى عوووووو يقول...

عوووووووووووووووووووووووو
انا جيت تانى اتخديتى تاااااااانى
............................
اقصد
رومانسية العقل
وعقلانية القلب...
بجد
الجملة معلقة
معايا
اوووووووووووووووووووووووى
..........................
عوووووووووووووووووووووووووو

funckydoctor يقول...

الناس اللى قبلى قالت كل حاجة
أنا بس بعدى أصبح :D

semsem يقول...

بجد ماشاء الله شخصيه جميله بجد
ربنا يحميكى
فى مفضلتى طبعا
:)))

كلام وخلاص يقول...

الواجب ده جميل جدا من ناحية عرفنا عنك اكتر ومن ناحية اكيد انتى فضفضتى
فتاة الحظة الاخيرة الكلمة دى فكرتنى بنفسى فى ايام الامتحانات لما كان نص المنهج بيتذاكر ف اخر لحظة
مدونتك كلها جميلة
سلام

kochia يقول...

مهيج الجماهير
=============
اشكرك علي قبولك التاج
واشكرك كمان علي رايك في الاجابات

ومستنية اجاباتك قريبا
ومتنساش تقوللي هنا

سلام

kochia يقول...

كاميليا
==========
اشكرك جدا جدا
وانتي من الناس الرقيقة اللي بحبهم بجد

تحياتي
وارحب بمرورك عندي دايما

kochia يقول...

miada ref3at..
===============
اهلا بيكي
وعجبني اوي موضوع جاري البحث ده
يا تري عجبك ايه تاني ؟؟

واشكرك علي رايك في نتيجة الامتحان
كنت فعلا احب اعرفها

تحياتي
وارحب بمرورك دائما

kochia يقول...

الجمعاوي الاصيل
==============
اشكرك وارحب بيك دائما

تحياتي

kochia يقول...

حـــــدوتـــــة
================
اشكرك
واتمني دوام التواصل

تحياتي

kochia يقول...

fire bird
============
اشكرك اولا علي المرور
وفعلا انا بشوف ناس بتحل كدة بس مش حاسة ان ده هدف التاج

وحتي لوكان هدفه ميكونش اول تاج ليا لان اول تاج المفروض اكون فيه نفسي

تحياتي لك واشكرك جدا
واتمني دوام التواصل

kochia يقول...

حبيبـــــــة القمـــــر
========================
اهلا بيكي
وايه التحية الجامدة دي
منورة
ومعادلة الرومانسيةوالعقلانية ان جيتي للحق من عند ربنا
انا محاولتش فيها كتير
بس ساعات ببقي روماننسية جدا لكن رومانسية لا تؤدي للغلط ابدا مهما كان الامر
وعقلانية جدا لا تؤدي للجمود والتحجر وعدم المراعاة ايضا مهما كان الامر
هبة من عند الله احمد عليها كثيرا
وان كانت في بعض الاوقات تسبب لي المتاعب
فعلا

اشكرك علي مرورك وارجو دوام التواصل
تحياتي

kochia يقول...

كيكى
======
اهلا بيكي تاني يا كيكي ياللي بتخضي الناس
قوليلي ايه حكاية عوووو دي
هواية ولا ايه ؟؟

منورة دايما
وتحياتي ليكي

kochia يقول...

funckydoctor
==============

يسعد صباحك ومساك
ومنتحرمش من مرورك دايما

تحياتي

kochia يقول...

semsem
=========
شكرا علي كلامك الجميل
وبما انك قلتي اني في مفضلتك
احب اقوللك اني بقبل النقد زي بالظبط ما الاطراء بيعجبني

واحب اسمع رايك دايما

تحياتني

kochia يقول...

كلام وخلاص
==========
اشكرك علي رايك
وفعلا رايك صحيح بالنسبة للتاجات

واللحظة الاخيرة ليها دور كبير في حياتي
تحياتي لمرورك

سمر الشافعى يقول...

بعيد عن التاج الا انى بحب اوى تعليقاتك سواء ردودك هنا او فى اى مدونه تانيه بحس فيها بجد بخبره معقوله فالحياه كمان عجبتنى مدونتك اوى وخفه دمك واسلوبك الجميل

تحياتى ليكى

maha zein يقول...

تمام تمام
ومفيش ادي البتاع الحلو ده لمها
يعني ايه طيب
مفيش حد يعني ناوي يعبرني بتاج ولا سلطانية حتي
ماشي يا رجاله
انتوا بتجبروني علي الانحراف
واني ادب وائلف عليكم واقول التاج ده جالى من حلاوتهم
ماشي
بس فعلا شكلك شخصة لذلية ومريحة
حسيتها حتي في كلامك
نسيتي تقولي انك متواضعه
حسيتها في كلامك

Asmaa mahaba يقول...

ههههههه
زى العسل ....بس تعرفى كوشى انا مبحبش التاجات معرفش ليه...؟؟
ثوانى ليا عوده

حسن حنفى يقول...

اجابات متميزه
تقبلوا مروري
ويارب تشرف في مدونتي

غير معرف يقول...

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

Ahmed Kamal يقول...

فرصة سعيدة اللي اتعرفنا بيكي أكتر ، لكن ده انتي صفاتك حلوة قوي ، كان المفروض الصفة رقم 16 تبقى حاجة تانية لحسن الشباب قلبهم هفهف :) و انتي عارفه من خبرتك على النت إن كله بيدور على كده :))

تحياتي لك

المنسى يقول...

صفاتك جميلة أوى تكشف عن شخصية إنسان مصرى بالفعل

وأسرارك كمان


وربنا يوفقك فى حياتك العلمية والعملية والدينية والتدوينية

وتبقى موجودة فى عائلة التدوين علطوووووووووووووول

تحياتى

kochia يقول...

سمر الشافعى
=============
اشكرك علي رايك الجميل واتمني دوام التواصل وارحل بيكي دايما عندي بكل السعادة

تحياتي

kochia يقول...

maha zein
===========
اسم الله عليكي من الانحراف
طيب والله ماهو راجع
والغلطة دي عندي انا
بس انا قلت تديه لمين يا كوشيا
اكيد مها صحابها كتير وجالها 20 تاج قبل كدة
وزمانها زهقت من التاجات
بس صدقيني لو اعرف كنت بعتهولك وبعت لك واحد من عندي كمان
وانا جالي اتنين في السكة انتي هتكوني اول واحدة تستلميهم

اتفقنا
علي العموم انا حطيت خمسة وهم المفروض 6
بجد خديه حليه وانا هعمل تحديث وهحط اسمك السادس
قلتي ايه ؟؟؟

اشكرك جدا علي رايك فيا
تحياتي

kochia يقول...

سومه...مجنونه فى بلد عاقل
==========================
علي فكرة مش كل التاجات تتحب
بس انا حبيت احله عشان هو اول تاج يجيلي
وبرده حبيت احله
لكن معرفش شعوري هيبقي ايه مع التاجات الاخري
اهلا بيكي دايما

تحياتي

kochia يقول...

حسن حنفى
=========
اشكرك علي رايك

وتحياتي

kochia يقول...

غير معرف
=========
؟؟؟؟
مفهمتش

kochia يقول...

أحمد كمال
=========
اشكرك جدا علي رايك
بس فين حلوة اوي دي
كسل ونسيان وفوبيا ؟؟؟

اما بالنسبة لجميلة رشيقة بيضاء الحقيقة ساعات بيكون عندي رغبة شريرة اوقع الناس فس شر اعمالها
هي دي الصفة رقم 16 الحقيقة
قلت اما اقول كدة او اعمل كدة
وفي الاخر انتصر الشيطان
وعملتها
والناس وقعت فعلا في شر الاعمال

تحياتي

kochia يقول...

المنسى
=======
اشكرك جدا علي رايك
وتحياتي لك دائما
وتحياتي لموضوعاتك الجادة الجميلة

يا مراكبي يقول...

شوفتي .. حتى في التعليقات هنا كل الناس ركزت جدا في جملة: جميله رشيقه بيضاء

الظاهر إن دي الجملة السحرية بتاعة اليومين دول .. تكونش شفرة؟

الرسائل الرومانسية يقول...

مدونة جديدة بفكرة جديدة نوفى نتمنى الزيارة وابداء الرأى

kochia يقول...

يا مراكبي
===========
اكيد كلمة فيها سر
يا تري ايه ؟