الثلاثاء، يوليو 15، 2008

(3) shutdown

-
مشوار الالف ميل يبدأ بـــ shutdown
------------------------
ياااااه

اخيرا بقيت بعرف اروح السيبر لوحدي من غير ملاحظين
وبعرف اقعد ساعة من غير مشاكل

افتح جوجل ..
وابحث عن اي حاجة اقراهاواقوم

بس طبعا بقيت بخلي بالي من اني اكتب اي كلمة ليها اكتر من معني .
بقيت حريصة اني اكتب الحاجة اللي انا عاوزاها ..
وبصراحة بقيت بركز علي حاجات معينة

خاصة الاختبارات النفسية علي اشكالها
– يمكن عشان ليها صلة بتخصصي بشكل ما –
وانا كمان بحبها ..

هبقي اجيب لكم اختبار عبقري مرة تجاوبوه!!!
ما علينا

المهم علاقتي بالانترت لم تقوي علاقتي بجهاز الكمبيوتر للاسف الا قليلا

يعني برده كنت بروح السيبر الاقي الجهاز مفتوح
اعمل كليك علي علامة الانترنت
وبعدين اقفل الصفحة اللي فتحتها واقوم

بس كان لازم اقوي علاقتي بيه اكتر من كدة

بس مكنتش مدركة الحكاية دي لحد يوم كنت هناك كالعادة

والجهاز هنج ..
وانا مفهمتش اعمل ايه

ناديت علي الولد اللي قاعد بتاع السيبر اسئله

قاللي لا ده مش مهنج .. اعملي ( شت داون )

طبعا مفهمتش يعني ايه ( شت داون دي )

بصيت له باذبهلال طبعا

- ايه
- شت داون
- ايه شت داون يعني .. من فين
- شااااات دااااوووون ... اعملي شت داووون
- اها .. طيب ( من غير ما افهم برده )


اخد من ايدي الماوس

وقفل الجهاز
وعمل له ريستارت

وعرفت ساعتها ان ال ( شات داون ) دي يعني ( تيرن اوف)
انا كنت اعرف انها (ترن اوف ) مش شات داون
انا اعرف انهم معني واحد او متشابه طبعا
بس المعلومة اللي عندي ان الكمبيوتر ده كله مصطلحات
وانا كنت متمسكة بالمطلح

مكنتش اعرف انهم غيروا اسمها
او ان ليها اسم تاني
في الكمبيوتر اللي اتعلمت عليه كان (ترن اووف)

حسيت اني مش قادرة ابص له تاني

قمت لميت بعضي وقمت روحت

وقررت الزق لصاحبتي تاني

لازم تشرح لي كدة شوية حاجات يمكن تنفعني

كان لازم اعمل شاطرة يعني واقولهم مش عايزة منكم حاجة

المشكلة انه كان نفس السيبر بتاع المرة اللي فاتت
الفضايح كلها هتبقي هنا ولا ايه ؟؟؟

ربنا يستر


,,,,,,Kochia

-------

هناك 38 تعليقًا:

غير معرف يقول...

هههههههه
تيرن اوف فى ويندوز 98 وشات داوون فى ويندوز xp
ولا تزعلى روحك خالص انا كنت باقوم واسيب الميل مفتوح واجى افتحه تانى الاقى امه لا اله الا الله ضايفنى
اسال منين دة اتارى انا لما باروح السيبر معرفشى اعمل ساين اوت
يالله كلنا لها
المهم عرفتى ولا لسه تقفلى الكمبيوتر

Miss. Sosa يقول...

هههههههه فكرتيني وانا فى ثانوي اصل ديه كان اول تعامل ليه مع الكمبيوتر

انا كانت مشكلتي ان ايدي كانت خفيفة على مفتاح الباور والجهاز كان من شركة مفترية باين لازم تدوسي بقوة وانا كنت بعامله برفق اصل المدرسين كانوا عملين لنا رعب ومحسسنا انه هينفجر فى وشنا

===
تعليق بس علي غير معرف الويندوز بكل فيرجنتها شت داون مفيش تيرن اوف ده خالص

صاحب المضيفة يقول...

حلو قوي العلام اللي كل مرةبمشكلة شكل كده


وحلو قوي برضو لما ببيحصل حاجه بتلزقي لصاحبتك على طول برضو



ههههههههههههه


تحياتي

جمعاوى يقول...

ربنا يكو ن فى عون صحبتك

(::

(::

رحـــــال يقول...

مافيش تعليم ببلاش ..

قلنا خالى بالك ..


:)

مدحت محمد يقول...

هههههههههههههههههههههههه

على فكرة الكمبيوتر والنت اعتقد
انى كل سنة بتعلم فيه حاجة جديدة

لانه بجد بحر واسع اوى

انا الويندوز عندى تيرن اوف

ويندوز xb

انا مشفتش الشات داون خالص مالص

زى ما مس سوسة بتقول على العموم
هو تعلم النت والكمبيوتر بتيجى مع التجربة

أسامة الشاذلي يقول...

مسيرك تصاحبى الكومبيتور اكتر

tarek alghnam يقول...

اختى الكريمه
مذكراتك رائعه
وجميل اسلوبك
بعد كدة حتبقى دكتوراة فى الكومبيوتر
تحياتى ليكى

arsenalwy يقول...

ههههة

كويس ان هى جت فى نفسش السايبر لما يبقى سايبر واحد احسن من كذا واحد مش كدة؟؟؟؟؟


تحياتى

kochia يقول...

.
غير معرف يقول...
======================

اهلا بيك
واشكرك علي المعلومة بس انت يمكن خلطها
لان انا حاليا شغالة علي الاكس بي وعندي تيرن اوف وزمان فعلا كان شت داون
بس تصدق مكنتش اعرف اتغيرت ليه مكنتش واخدة بالي من فرق الوندوز ده خالص
بس دلوقتي بقيت تمام التمام
اطمن

تحياتي

kochia يقول...

.
Miss. Sosa
=================

اهلا بيكي دائما
وفعلا الواحد بيقول المواقف دي لانها حصلت فعلا وانا حاسة دلوقتي انها كانت طريفة لكن ساعتها كنت ببقي عاوزة الارض تنشق وتبلعني

وعلي فكرة انا حاليا عندي تيرن اوف
وقابلت شت داون
يعني الموقف كامل معايا بتفاصيله

تحياتي

kochia يقول...

صاحب المضيفة
==============

الاخ العزيز اشكرك علي مرورك
وعلي العموم هو ده دور الاصدقاء وانا لحد دلوقتي في اي مكان بشيد بدورها معايا
وبقول انه لولاها يمكن مكنتش بقيت كويسة في الكمبيوتر ابدا ولا عرفت فيه الا القليل

ومن هنا بوجه لها التحية
ولك كل التحية

kochia يقول...

.
جمعاوى روش طحن
==================

بصراحة عندك حق
بس هي الحمد لله استحملتني للاخر

تحياتي

kochia يقول...

.
رحـــــال
=================

اهلا بك
وفعلا كل حاجة بتمنها

تحياتي

kochia يقول...

.
مدحت محمد
============

اهلا بيك
فعلا النت ده بحر واسع اوي
والشت داون فعلا كانت في ال 98

تحياتي

kochia يقول...

.
Usama Shazly
==================

اهلا بيك

وشكرا علي مرورك
وطبعا الكلام ده كان زمان دلوقتي انا احسن بكتير

kochia يقول...

.
طارق الغنام
==============

اهلا بيك دائما .. اشكرك علي اعجابك بالمدونة وارجو ان تستمتع بها دائما

تحياتي

kochia يقول...

.
arsenalwy
=============
تفتكر ان سيبر واحد احسن
والله فكرة برده
احسن ما البلد كلها تتفرج عليا

تحياتي

اهو ده عيبه يقول...

يا ستى ولا يهمك
فضايح ايه بس محدش بيتعلم بالساهل
يعنى تفتكرى الولد اللى فى السيبر اتولد وفى ايده ماوس؟ اكيد لا

فى انتظار مذكرات جديدة ان شاء الله
تحياتى

HERO يقول...

هههههههههههه

اكيد منظرك كان لذيذ جدا وخاصة ان shut down دي يعني ا-ب كمبيوتر لا اسم الله ما شاء الله ليكي مستقبل باهر في الكمبيوتر باين عليكي
تحياتي

drpharma يقول...

هي دي فايده الصحاب

kochia يقول...

.
اهو ده عيبه
===============
اشكرك علي مرورك
وارجو تكوني قريتي الحلقات الاولي من المذكرات

تحياتي

kochia يقول...

.
HERO
==========
ليه كدة يا عم
ايوة الف باء كمبيوتر وانا كنت في مرحلة الف باء برضه
ودلوقتي بالف مدونة
شفت بقي انا شاطرة ازاي

kochia يقول...

.
drpharma
=============
اشكرك علي مرورك
وطبعا الصحاب الكويسين من نعم الدنيا

تحياتي

خالد كامل يقول...

على فكرة محدش اتولد و هو بيفهم فى الكمبيوتر
بس لو عاوزة رأيى
انك تتعاملى على الكمبيوتر من خلال النت احسن من انك تتعاملى من خلال الالعاب أو الفلام أو الاغانى و كدة
لييييييييييييييييه ؟
علشان النت ادمان
و بعدين انتى مدونة يعنى كدة كدة لازم هتقعدى نت كتير
و طالما هتقعدى نت كتير يبقى أكيد هتقابلك مشاكل مع الكمبيوتر
منها اللى هتلاقى نفسك بتحليها لوحدك
و منها اللى هتسألى فيها
و أؤكدلك انك طالما اتعاملى مع جوجل بالذات ... يبقى مافيش مشكلة
و الحكاية كلها حكاية وقت
و هتلاقى نفسك مع كتر القعدة قدام الكمبيوتر بقيتى (( بيل جيتس )) التانى
و سلام

اسلام الحضرى يقول...

ايوه انا مع فكره انك تلزقى لصاحبتك مع انى شايف ان الكمبيوتر مش تعليم ده بيجى بالممارسه وفى ناس خددت دورات ملهاش عدد ويا مولاى كما خلقتنى بالتوفيق ونشوفك كده حاجه كبيره فى الكمبيوتر

ربع ضارب يقول...

اخبارك ايه يا قمراية انا جيت اهه اردلك الزيارةاما بانسبة للكمبيوتر فانت كده تبقى فيه عبقرية اما انا اعمل ايه دانا كبيرى افتحه واقفله واخواتى زهقوا منى وقرابوا يخنقونى كل ما اعوذ حاجة اعملها على الكمبيوتر انده عليهميعنى مش بعيد فى الاخر يتخنقوا ويرمونى من الشباك وتيجى تزورنى المرة الجاية فى قسم العظام

Empress appy يقول...

معلش معلش كلنا مرت عليناالمراحل الفزيعه دى بس بتعدى والله كبرى دماغى ولا كأن حاجه حصلت هههههههههه

kochia يقول...

مهيج الجماهير
==============
اشكرك علي دعمك وتشجيعك
وفعلا الحاجات اللي انا بحكيها دي كانت من عدة سنوات اول ما اتعلمت كمبيوتر
ودلوقتي انا احسن كتير
ومكنتش تعرف هجرؤ حتي اعمل مدونة او حاجة زي كدة الا اذا كنت الي حد كبير عرفت اتحرك فيه بحرية

اشكرك علي مرورك وارجو ان تكون من زواري دائما
تحياتي

kochia يقول...

اسلام الحضرى
===========

بيني وبينك انا ساعات بلزق لها لحد دلوقتي .. او بطلب منها تقعد جمبي لما بكون عاوزة اعمل حاجة
بس الحمد لله انا عديت دلوقتي
كنت فين وبقيت فين

تحياتي

kochia يقول...

ربع ضارب
=============
هههههههههه اوعي يكون الربع الضارب ده الربع البايظ في عضمك من كتر الضرب
علي العموم اكيد انت مش بتحاولي فيه كتير عشان كدة لسة مش اوي
انا بقالي 5 سنين بتعامل مع هذا الجهاز لحد ما هو خلص عليا
انا ناوية اخلص عليه بس يمكن في الحياة الجاية ان شاء الله

وعلي فكرة انا زورتك بالصدفة وعلقت عندك عشان دمك خفيف اوي وطبيعية
وتحياتي لك دائما

kochia يقول...

appy
========

علي رايك
العبرة بالنهاية مش كدة
النهاية معايا لحد دلوقتي مدونة
تحياتي

يا مراكبي يقول...

الموضوع ده ظريف .. بس الموضوع التاني بتاع الخيانة شيق جدا بجد .. أحب أقرأ الموضوع لآخرة الأول .. وبعدين أقولك رأيي

في الإنتظار

انت تسال والكمبيوتر يجيب يقول...

المؤتمر الصحفى الذى عقده احوكم لواء دكتور محافظ امين شرطه عبده الرايق البوم صباحا فى تمام التاسعه وعشر دقائق واذيع على الهواء مباشرة على موجات اذاعة مصر الرئيسيه واعلن فيه اكتشافه الجديد للقضاء على نقص المال فى ايدى الكثيرين من ابناء الشعب ...هذا المؤتمر قد احدث ردود افعال عالميه واسعة النطاق وترجم الى كثير من لغات العالم كان آخرها لغة زيمبابوى ...ومن فاته الأستماع يمكنه الأستماع الى المؤتمر وتصريحات العلامه الدكتور لواء امين شرطه محافظ عبده الرايق فى مدونتنا او موقعنا وهما كالتالى
http://netonradio.blogspot.com
http://dear.to/cairo
والتسجيل موجود فى الأرشيف حلقة 2-7-2008

انت تسال والكمبيوتر يجيب يقول...

الأخت العزيزه صاحبة المدونه واصحاب التعليقات
جميله حكايات المدونه مع النت وبهذه المناسبه اقمنا مجموعه تحت عنوان انا والنت فى موقع الفيسبوك ليروى كل نتاوى عن تجاربه مع النت وكيف اثرت فى حياته وقد اذعنا بالفعل بعض هذه التجارب فى اول برنامج اذاعى عن النت والمدونات فى الشرق الأوسط وندعوكم للأنضمام الينا
وكافة التفاصيل فى موقعنا
http://dear.to/cairo

kochia يقول...

.
يا مراكبي
===============
اشكرك علي المرور
واشكرك علي رايك
واتمني انك تقرا موضوع الخيانة وفعلا اعرف رايك
وانا ان شاء الله لسة هكمله بخصوص المراة ثم ساتناول الرجل
لكن حبيت ارطب شوية علي المدونة

تحياتي

Unknown يقول...

كوشيا يا كوكو ..

انا موجوده هنا اهو
أي حاجه من دي تعصلج معاكي كلميني فورا :)

بجد مش بهزر .. يا ستي عادي اللي ميعرفش بكره يعرف :)

kochia يقول...

.
عاقلة علي ارض الجنون
=======================
اشكرك كل الشكر
وطبعا لو احتجت حاجة هسال

تحياتي