الثلاثاء، مايو 27، 2008

.. رحلتي الي الاراضي المقدسة


الحمد لله ربنا انعم عليا الشهر الماضي ورحت عملت عمرة لاول مرة

ربنا بعتهالي فجأة وقبل مرور شهر كنت سافرت السعودية...

كانت تجربة جميلة اوي علي المستوي الروحاني والمستوي النفسي ..

والمستوي الثقافي كمان..

التجربة الروحانية يمكن كتير عاشها

لكن التجربة الثقافية اكيد بتكون شخصية وبتمس كل انسان حسب دماغه وتفكيره..

والتجربة الثقافية دايما بتكون اهم حاجة فيها الناس اللي بتقابلهم


كنت مع مجموعة معظمهم من كبار السن ..

وانا كنت اصغر واحدة فيهم واكبر واحد فيهم كان ما شاء الله من مواليد 1919...

التعامل مع كبار السن يعطي للشخص بعد جديد للتفكير

الشخص ده عاش واعيا عشرات السنوات .. مرت عليه الدنيا بكل ما فيها وعلمت عليه...

كل كلمة منه ممكن تكون حكمة .. وكل نظرة ممكن تحمل الف معني والف درس ..

وصمته ممكن يكون فلسفة جديدة ...انا يمكن هعرفها بعد 30 سنة كمان علي الاقل اذا كتب الله لي عمرا

كمان ضحكته وابتسامته لازم تكون علي حاجة صادقة جدا لانه شاف كتير وضحك كتير وبكي برده كتير

وانا اتعلمت من كل كبار السن اللي كانوا معايا في العمرة


كان معايا شخصية .. امراة عمرها 60 سنة ..

عندها اختين كفيفتين ..الاولي عمرها 47 والاخري اصغر قليلا ..

راحت بيهم العمرة .. لم تتزوج وتفرغت لاختيها تخدمهم وتراعي شؤونهم

انسانة لا تشعر اطلاقا انها بذلت شئ اكثر من غيرها ..

ولا تشعر انها يجب ان تشكر علي تفانيها في رعاية اختيها ( سبحان الله)


وكان معنا رجل وزوجته .. هي مريضة وهو الي يؤدي لها كل شئ تريده

كان لا يجلس ارضا لانها لا تستطيع الجلوس علي الارض

الا بعد ان يبحث لها عن كرسي ويطمئن لراحتها

وكان معنا ايضا سيدة قعيدة وابنتها ..

وورايت فيهما علاقة الام بالابن كاجمل وكاصدق ما يكون .. من الحب والرعاية والاهتمام مع فارق واحد

ان الابنة هي التي تقم بدور الام ....


ولان الدنيا دنيا .. قابلت ناس تانيين...

مش عارفة بقي هل ثمن تذكرة الطيارة

يتضمن الشوكة والمعلقة والسكية والاطباق اللي بتيجي فيهم الوجبة ؟؟؟؟؟ معتقدش طبعا

لكن بعض اشخاص من المجموعة اللي كانت معايا لمت ادوات المائدة كلها

( شوكة معلقة سكينة ومعلقة صغيرة .. اطباق الاكل )

وحطيتها في الشنطة بتاعتها

حتي شخص وبنته كانوا قاعدين جمب بعض

لمت السيدة الفاضلة الادوات كلها ( اقصد المناديل المستخدمة .. مهو ده اللي فاضل في الصينية )

لمت الادوات علي صينية واحدة واخدت الصينية التانية حطيتها في الشنطة !!!

ولا اعتقد انه مسموح بيه ؟ ولا مسموح ؟؟؟؟

مش عارفة ليه الناس بتعمل كدة


بصراحة تصرف غريب ومش حضاري اطلاقا..

وبرده بيزود المحصول الثقافي عندي كمسافرة اني اشوف البشر علي انواعهم

هل ده معتاد ولا ده حصل لما انا ركبت الطائرة لاول مرة

المهم كانت اول تجربة ليا في العمرة

وتجربة ركوب الطائرة لاول مرة بالنسبة لي ..

تجربة تستحق التسجيل .. لاني عندي فوبيا من الملاهي ..

والطائرة طبعا فيها شبه من الملاهي في لحظة الصعود والهبوط

بس عدت الحمد لله


واتمني تكرار التجربة .. وبالطائرة برده ان شاء الله

واتمني ان يرزقها الله لكل من يريدها

هناك 8 تعليقات:

Miss. Sosa يقول...

السلام عليكم
ماشاء الله الف مبروك علي العمرة وان شاء الله عمرة مقبولة وذنب مغفور

النماذج الانسانية اللي وصفتيها بجد رهيبة بجد قشعرت وعينيه دمعت .. على فكرة انا بحب كبار السن اوي ودايما اصحابي اكبر منى في المرحلة العمرية علشان بحسهم انضج واكثر خبرة

جميلة جدا الابيات اللي قرأتيها بجد استمتعت بيها .

أخيرا اشكرك جدا لمتابعتك لمدونتي وانها عجبتك وانك قريتي القديم والجديد .. انا اصلا بشفق عليكم من طول البوست وبحاول اقسمه علشان مش تزهقوا وتملوا.

ربنا يكرمك يارب ويبارك فيكي وشفافيتيك النابضة بين كلماتك.

Tamer Nabil Moussa يقول...

الف مبروك على العمرة


عمرة مقبولة وزنب مغفور ان شاء الله

الناس الكبار بجد بركة

الابيات جميلة تسلمى عليها

اشكرك على زيارة مدونتى واضافتى عندك انا كمان ضفتك واتمنى التواصل الدائم ان شاء الله

تحياتى

المستنصر بالله يقول...

الله نفسى اطلع عمرة قوى
تقبل الله منك عجبنى موقف الاخت اللى ضحت بحياتها علشان اخواتها
اثرت فيا فعلا

صاحب المضيفة يقول...

ليس من ذاق كمن سمع


اسالي مجرب


يارب يرزقنا مرات ومرات


وبعدين الواحد في السفر فعلا بيشوف حاجات تجيب المرض من الناس


لكن يالا

الحمد لله على كل حال


وعقبال ميت مرة يارب وكمان الحج بقى


تحياتي

kochia يقول...

-
Miss. Sosa
=================
الله يبارك فيكي
وان شاء الله يرزقك الله بزيارة البيت الحرام

وارجو استمتاعك الدائم بالمدونة

تحياتي

kochia يقول...

.
Tamer Nabil
==============
اشكرك والله يبارك فيك
وتحياتي الدائمة لك

kochia يقول...

.
المستنصر بالله
=================
ان شاء الله تطلع قريب
تحياتي

kochia يقول...

صاحب المضيفة
===============
اشكرك علي مرورك
وبارك الله فيك

تحياتي