السبت، مايو 31، 2008

حبيبي ...... لوحة بازل


من شوية سنين كتير .. لما ابتديت احس اني بنت .. وابتديت افكر اني انثي.. ربما تحب وتتزوج في يوم من الايام .. خاصة لما لقيت نفسي احيانا باعجب بشخص ما.. واحيانا اخري اشخاص بيعجبوا بي ..

فكرت يا تري حبيبي ده هيبقي شكله ايه .. بيتصرف ازاي .. بيحب ايه وبيكره ايه .. علاقته بربنا ايه .. هتعلم منه ايه وهيتعلم مني ايه .. هيحبني قد ايه.. وهحبه قد ايه.. طوله .. عرضه .. لبسه ..صوته ..................الخ

حاجات كتير وتفاصيل كتير اوي فكرت فيها

تفاصيل زي لوحة البازل

متكونة من قطع كتير صغيرة .. ولما تحطها جمب بعضها تطلع الصورة ..

الصورة اللي انت يمكن عارفها او حاسسها وعاوز تكونها .. وساعات بيكون معاك صورة كاملة عاوز تكون البازل ده زيها ..

وابتديت اشوف الاشخاص من حولي .. اجمع القطع الصغيرة .. واحاول اكون لوحة البازل بتاعتي .. اللي انا عاوزاها ..

كانت ساعات اللوحة تطلع مشوهة .. ملهاش شكل .. وساعات تطلع وحشة اوي.. واحيانا تكون قطع كتير مفقود .. ادور عليها مش بلاقيها ..

بعد شوية قلت انا هكبر قطع البازل بتاعتي ..مش لازم تكون قطع صغيرة وتفاصيها كتير

كبرتها شوية .. وابتديت ادور تاني .. برده لوحتي مش عايزة تكمل .. ياتري مكن اتغاضي عن وجود قطعة او اتنين .. المهم اشوف الصورة وافهمها ؟؟؟

ومرتين تلاتة قربت اللوحة تكتمل وقربت احبها .. بس الظاهر اني كمان المفروض اكمل اجزاء صغيرة في لوحة بازل عند حد تاني .. ومكملتش .

خلاص انا هسيب التفاصيل الاقل اهمية وهركز في المهم وممكن بايدي ارسم التفاصيل اللي ناقصة وهحبها .. وهقبلها

بس حسيت ان الناس كتيرة اوي .. الوشوش متداخلة.. والتفاصيل متشابهة اوي .. والرغبات برده متشابهة ..مفيش حد مختلف عن حد ..التفاصيل الكبيرة هي هي في كل اللوحات

هدور علي التفاصيل الصغيرة تاني..

هي اللي تهمني اكتر .. هتدي الصورة طعمها وروحها

كلما كادت صورة تكتمل .. لا اجد منها الحزء الاهم

جزء في قلب اللوحة ..ترسم من حوله اللوحة بكل تفاصيلها الجميلة والعادية وتصبح العادية مع تكرار النظر اليها اجمل من الجميلة

انا هلخص بحثي .. هدور بس عن الجزء ده .. حاسة انه هيعرف يرسم ويبني حوله احلي لوحة بازل


هناك 7 تعليقات:

صاحب المضيفة يقول...

كل واحد في الدنيا دي مش كامل لذلك هاتلاقي اللوحة عمرها ما بتكمل لكن ممكن نوصل بيها لمرحلة قريبة من الكمال

وده فقط هو المتاح


وغير كده مش هانعرف وهانتعب جدا لو فكرنا بالشكل ده


يارب يرزقك فوق ماتتمنين لكن كله بالدعاء بيجي


تحياتي

ma_3alina يقول...

اقول لك حاجة .. ما تشغليش نفسك بلوحة البازل وما تحوليش تكونيها

ايوه ما تشتغربيش من كلامي .. سيبك من لوحة البازل

ساعة لما يجي الشخص المطلوب حتعرفي لوحدك أنه هو .. حتى لو ما كانش مطابق للوحتك .. واول ما تشوفيه مشاعرك كلها حتقول بس هو ده ...

تحياتي

dyab يقول...

معني جديد و جميل كل واحد فينا عنده لوحة البازل الخاصة بيه و كل واحد بيحاول يجمعها علشان يوصل للصورة الصح لحبيبة اللي بيدور عليه بس زي حال كل الناس ناس جمعت الصورة صح ناس معرفتش تجمع الصورة اصلا جمعت جزء من الصورة بس للأسف ماتنفعشي صورة ياتري كل واحد فينا عمل ايه؟

Miss. Sosa يقول...

حلوة اوي فكرة البازل والمكعبات والقطع الكبيرة صاحبة المميزات العامة والقطع الصغيرة اللي مليانه تفاصيل

عجبتني او الفكرة والتشبيه
لكن لو اتكلمنا على الواقع الدنيا مابتمشيش كدا خالص

انا اؤمن بتجاذب الارواح رغم اختلاف الشخصيات والطباع
هو نوع من الجنون واللاعقلانيه بس احيان بتلاقى اتنين انجذبوا لبعض بدون اي تشابه في الصفات بينهم ورغم التباين ورغم ايمانهم بالاختلاف اللى بينهم الا انهم مصرين يكملوا ويغيروا ويتغيروا علشان يوصلوا لنقطة الوسط اللي هيكونوا فيها مزيج من شخصيتين كانوا شتان قبل ما يشوفوا بعض

حصلت وبتحصل لكن الجواز والحب بالقلم والمسطرة والشرزط والمواصفات بغيض بالنسبة لي

kochia يقول...

السلام عليكم

صاحب المضيفة :
اكيد مفيش حد كامل.. وانا كمان مش كاملة واعتقد ان فكرة عدم الكمال وصلت برده من خلال الموضوع .. صح ولا ايه ؟

ما علينا :
انا فعلا شيلتها من بالي .. الحكاية دي تطور للفكرة عندي
والواحد لما يبقي صغير وبيدور علي حاجة معينة .. غير لما يكبر شويةويعرف ان الاحساس غير كل حاجة

دياب :
اشكرك علي مرورك وتعليقك .. واتمني انك تستمتع بكل حاجة بكتبها

مس سوسة :
بصي يا سوسو .. اسمحيلي اقوللك سوسو .. رغم ان فكرتك ان المكان ده بتاع التعليقات عجبتني .. وكنت هعملزيك فيها لكن لقيت ان فيه حاجات ساعات بتعمل حوار
انا معاكي في موضوع تجاذب الارواح رغم اختلاف الشخصيات .. بس النوع ده من التجاذب بيكون قائم علي الكيميا زيما بيقولوا .. ساعات بينجح وساعات بيفشل .. رغم كدة انا مكنتش بتكلم عن ده
انا بتكلم عن حلم اني تنجذبي لحد فعلا وبعد ما تعرفيه تلاقي فيه كل احلامك
ومش ممكن تحلمي بحد مجرد من كل شئ .. لازم هيكون حلم فيه شوية تفاصيل .. زي الدين والاخلاق والرومانسبة والرقة ...... الخ
وانا معاكي ومش بحب القلم والمسطرة
دول ينفعوا في المدرسة بس لكن مينفعوش في العلاقات الانسانية

تحياتي لك

norahaty يقول...

السلام عليكم ورحمة
الله تعالى وبركاته
اتيت للتدوينة هذه
عن طريق feedjet
اقولك نصيبك سيأتى
اليكى من غير بازل!!
وانا مع مس سوسا:
تتجاذب الارواح المتشابهة

kochia يقول...

norahaty


اهلا بيكي اي وقت
اشكرك انك قريتي موضوع قديم وكمان علقتي عليه

وعندك حق كل شئ نصيب
بس هي فضفضة بس

تحياتي