الأربعاء، يونيو 24، 2009

انا محسودة

-
يــــاه
-
اخيرا فتحت المدونة .. وكتبت فيها كمان
-
انا حاسة اني محسودة
وحد بصلي فيها بعين رضية
-
مش قادرة افتحها لا اقرا لحد .. ولا اكتب
-
والنهاردة حاسة اني بقوم بعم مجهد فعلا
-
انا حاسة اني فعلا محسودة
-
ناس كتير بتحسد اليومين دول
-
مجتمع النميمة والغيبة بتاع زمان
اللي كان غرضه الاساسي الفضول وتضييع الوقت
وساعات الهزار البايخ
-
اصبح هدفه الان الحقد والحسد
ومعظم الحوارات بقت كدة ..
ده كسب ايه وعنده كام وجاب عربية ولا اكتر
-
ودي اتجوزت مين وبيدها مصروف كام وبتضيعه علي ايه كل شهر
-
واصبح كل شئ مجال اما للتريقة ..
ده لو الشخص لم يصل الي حد المعايير المعروفة للحسد ..
-
واما للحسد ..
لو كان الشخص حقق من المعايير بعضها او كلها
-
طيب مال المدونة بتاعتي بالحسد والكلام ده

مين ممكن يبصلي فيها ويخليني كدة شهر كامل مش بفتحها ..
-
وكمان فيه ظاهرة كدة لاحظتها ..
ان الرجال اصبحوا هم الاخرين يميلون للقياس بتلك المعايير ..
-
كنت اعتقد ان الحسد والقر والنم والغيبة ده صفة خاصة بالنساء ..
او ببعضهم ..
لكن شكله مرض وامتد او فيروس وانتشر
-
اصبح الرجال لديهم معايير
ولديهم حب للغيبة ..
-
يمكن اللي حسد مدونتي عليا .. او حسدني علي مدونتي رجل ؟؟؟
ربما ..
-
كنت اعتقد كمان زمان .. ان الرجال يهتمون بالعمل اولا واجادته
ثم يتحدثون في المهم والرزين والوقور من الموضوعات
-
وفي لحظة لمعت في ذهني مشاهد من احد افلام ثلاثية نجيب محفوظ
بتاع سي السيد .. والست امينة ..
وتذكرت التناقض بين شخصية سي السيد مع مراته في البيت ومع الاخرين برة البيت
-
حتي انت يا سي السيد ؟؟؟
-
يعني مش بعيد ان اللي حسدني رجل !!!!!
-
ما علينا
راجل او ست
-
محسودة ولا بدلع
كلام جد ولا تخاريف الصيف والفراغ
-
مش مهم ...
-
المهم هقرا شوية قران .. وارش شوية مية بملح
-
واسمي الله
-
وافتح المدونة
يمكن الزباين يرجعوا يشتروا منها تاني ...
-
بسم الله الرحمن الرحيم
-
-

هناك 93 تعليقًا:

AHMED SAMIR يقول...

يا سلااااااااااااام
اول تعبيق بعد فك النحس
ابقي قولي لي على اسم مولانا اللي انتي عملتي عنده العمل
العود احمد

Unknown يقول...

لاباس عنك وعن مدونتك
انتى بس استعيذى بالله من
الشيطان الرجيم وكل شىء
حيبقى تمـــام التمـــــام

Unknown يقول...

وحمدلله على سلامتك
ووووووووحشتينا

KHALED يقول...

ههههههههههههههه

و ماتنسيش رجل العفريت و عرق الحلاوة

عودا حميدا

ahmed_k يقول...

حمد الله على السلامه نورتي دكانك قصدي مدونتك من جديد
بصي يا كوشيا الحسد ده موجود بالفعل
لكن الإبتعاد عن المدونات أعتقد أن لا صلة له بموضوع الحسد
ممكن تسميها ملل بعض الشيئ والرغبه في التغيير أو التطوير فالإنسان بطبعه ملول
أنا مثلا لي فتره كبيره كنت مبتعد عن التدوين لبعض المشغوليات وبعض الشعور بالملل لكن بعد فتره شعرت بالحنين للمدونه والمدونين فعدت من جديد
فلا مانع من الإبتعاد أوقات الملل لفتره ثم العوده بعدما يكون حاجز الملل قد تلاشى

ونورتي مكانك من جديد يا فندم

صيدلانيه طالعه نازله يقول...

اخيييييييرا حمد الله على السلامه
انا لسه داخله امبارح و لقيت اخر حاجه بتاع قضيه الهويه و اللى كنت معلقه عليها زمان
الحسد موجود و بيحصل و ربنا يبعده عنك يا قمره

الميكروباص يقول...

افتحي بس وانتي هتلائي الزباين على الباب
وانا عن نفسي كنت نايم على عتبة الباب عشان ألحق دوري


حمدا لله على السلامه

Mina يقول...

طبعا لازم الزباين يبقوا امم علي باب المدونة
علشان البضاعة اللي عندك مش موجودة عند حد تاني
وانا من موقعي هذا اناشد السيد الوزير المختص بالتحقيق في قضاضا الاحتكار بالتحقيق معاكي لاحتكارك البضاعة المباعة لا ترد ولا تستبدل
ههههههههههههههههههههههههههههههههه
نورتي البلوجر من تاني
وماتقفليش الدكانة تاني بعد كدة

غير معرف يقول...

الحسد فعلا مذكور في القرآن..

أقولك
صلي ركعتين
واقري شوية قرآن

وان شاء الله الحسد ده هيروح..:)


المهم
انك نورتي مدونتك من تاني
:)

Unknown يقول...

ازيك يا كوشيا اضم صوتى الى صوتك فعلا الحسد يقضى على المدونات حاليا ولا الكسل انا برضو بيصيبنى حالة من اليأس مبكتبش حاجه ومبدخلش مدونتى أصلا بس الحمد لله برجع لها تنى ومبسوط جدا انك كتبتى النهاردة وعلقتى عندى كمان بجد بكون فرحان بتعليقاتك وربنا يحميك واكتبى المعوذتين فى بداية المدونة ممكن تشيل عنك العين واوعى تعلقى خرزة زرقا المعوذتين وبس

دمتى بخير

نعكشة يقول...

لغض النظر عن الحسد
و الغيبة وا لنميمة
و الرجالة اللي بقوا رغايين زي الستات
و نمامين زيهم
و كمان بيحسدوا
مش مصدقة

اية يا بنتي
ما الرجال صنف من البشر
بشر
بني ادمين برضو
بيغلطوا برضو
يلا عامة
خير خير


المهم انك نورتي تاني

عوداً حميداً

احمد يقول...

المهم انك ترجعى لنفس نشاطك
ومواضيعك الرائعه

مـحـمـد مـفـيـد يقول...

عوداً حميداً
لا تطيلي الغيبه مره أخري:)

MǿиY El-Shreef يقول...

الف سلامه عليكي يا جميله

والف الف حمدلله ع السلامه

يارب تكوني بقيتي بخير دلوقتي

:)

kochia يقول...

______________________________
A.SAMIR
______________________________
يا اهلا يا اهلا
انا كنت شاكة اني هشوف زباين حلوين تاني
اهلا باول تعليق بعد فك النحس
اسم مولانا سر
انا الوسيط
ووقت ما تعوزه بس شاور
______________________________
تحياتي
______________________________

kochia يقول...

______________________________
norahaty
______________________________
اهلا بيك يا قمر
تعرفي انك من الناس اللي بفتكرهم دايما وانا قافلة المدونة او مش بكتب فيها وبحس بمسؤولية اني اكتب عشان يقروا
وبتفكر نقدك ليا بتاع اللي يغيب المفروض يقول
عشان كدة حاسة اني عاوزة اعتذر ليكي
وطبعا يارب كل حاجة اكتبها تعجبك
______________________________
تحياتي
______________________________

kochia يقول...

______________________________
Khaled
______________________________
ماشي يا عم خالد
انا مش نسياهم بس قلت مش هجيب سيرتهم بصراحة
منور
______________________________
تحياتي
______________________________

kochia يقول...

______________________________
ahmed_k
______________________________
منورة بالزباين وبيك
والحقيقة بقي هو فعلا ملل
وعدم قدرة علي تقديم الجديد
محبتش ابقي تحصيل حاصل عشان كدة فضلت الكمون لفترة
بس اشتقت تاني
______________________________
تحياتي
______________________________

kochia يقول...

______________________________
صيدلانيه طالعه نازله
______________________________
الله يسلمك
وان شاء الله تلاقي جديد يبسطك
الحسد موجود اه بس انا بصراحة كنت بدلع عليكم ..
______________________________
تحياتي
______________________________

kochia يقول...

______________________________
لورنس العرب
______________________________
اه صح شكلك كنت نايم علي العتبة
طيب ليه يابني كدة انت عارف بضاعتك محجوزة
الله يسلمك
______________________________
تحياتي
______________________________

kochia يقول...

______________________________
Manamino
______________________________
والله انا فعلا نفسي احتكرها
وزبايني ميشتروش من حتة تانية الا بضاعة مختلفة طبعا
والحمد لله شكلي كدة محتكرة نسبة كويسة
وان شاء الله مش هقفل
______________________________
تحياتي
______________________________

kochia يقول...

______________________________
hager za3bal
______________________________
ان شاء الله
هو شوية دلع علي شوية انشغال علي شوية ملل ومفيش كانع من شوية حسد
ربنا يشيل الهموم
______________________________
تحياتي
______________________________

kochia يقول...

______________________________
egyboy
______________________________
ههههههههههههه
فكرة برده
علي العموم انت عارف من زمان ان موضوعاتك بتعجبني
وخاصة الموضوع الاخير حسيت انه بيقول حاجة
ربنا يوفقك دايما ومتبطلش كتابة
______________________________
تحياتي
______________________________

الطائر الحزين يقول...

الواحد عاوز شوال ملح

همس الاحباب يقول...

هههههههههه
الحمد لله عودتك للمدونة
وانا حاسس انه معملوك عمل على رجل فار مسلوخ يتيم رشى ميه وافتحى الدكانة
وربنا يرزقك ان شاء الله
ممكن بنص جنيه جبنة
تحياتى

mohamed ghalia يقول...

ربنا يحفظك ومدونتك من كل عين يا كوشيا

حـــــدوتـــــة يقول...

السلام عليكم

يا سيتى لحسد ولا حاجة
انتى بس اللى كسلانة
عموما حمد الله على السلامة

سلالالالالالالالالالالالالالالالالالالالالالالالام

عايش... ولكن !!!! يقول...

حمدلله ع السلامه
هو دايما البعد عن اى شىء والرجوع له كده بيبقى متعب شويه فى الاول
دمتى بكل الود

غير معرف يقول...

وحشتيني جدا

اخبار الحر ايه

(صندوق الدنيا) يقول...

أين اختفيتِ يا بنوته
لا تغيبي مرة أخرى

Unknown يقول...

حمد الله عالسلامه يا عسل
انا عديت عليكى فى كذا بوست كده وان شاء الله مش هبطل اعدى هنا ابدا

وبعد الشر عليكى من الحسد
شغلى قرآن فى البيت

وارجعى زى زمان تدويناتك السابقه تدل على عقلك الكبير

تقبلى مرورى
سلام

ميرام يقول...

ههههههه
هبعتلك حجر ازررررق
(:
وهعدي كل يوم اتطمن
وحشتينا ..
(:

kochia يقول...

______________________________
نعكشة
______________________________
ايوة اهم صنف من البشر بس فعلا كنت اعتقد ان شوية حاجات كدة مش موجودة فيهم
انت اللي منوراني
افتحي التعليقات بقي
______________________________
تحياتي
______________________________

kochia يقول...

______________________________
احمد
______________________________
ان شاء الله
ادعيلي
______________________________
تحياتي
______________________________

kochia يقول...

______________________________
مـحـمـد مـفـيـد
______________________________
بجد هحاول جاهدة
______________________________
تحياتي
______________________________

kochia يقول...

______________________________
MǿиY El-Shreef
______________________________
انا بخير الحمد لله
وكله تمام
الله يسلمك دايما
______________________________
تحياتي
______________________________

kochia يقول...

______________________________
الطائر الحزين
______________________________
انا عندي كمية للظروف
لو عاوز ابعتلك
______________________________
تحياتي
______________________________

kochia يقول...

______________________________
همس الاحباب
______________________________
رجل فار مسلوخ
يا ساتر علي ده عمل
المهم
اهلا بيم ومنور الدكان
ونص جنيه جبنه ؟؟؟
ليه احنا في سنة كام ؟؟؟
______________________________
تحياتي
______________________________

kochia يقول...

______________________________
mohamed ghalia
______________________________
يارب يخليك
شكرا
______________________________
تحياتي
______________________________

kochia يقول...

______________________________
حـــــدوتـــــة
______________________________
بصراحة اه
كسلانة
والكسل برده وحش
______________________________
تحياتي
______________________________

kochia يقول...

______________________________
عايش... ولكن !!!!
______________________________
فعلا الرجوع بعد الركود متعب جدا
وان شاء الله استمر
مرحبا بك
______________________________
تحياتي
______________________________

kochia يقول...

______________________________
غير معرف
______________________________
انا من زمان مش بحب غير معرف دي ...
والحر جامد موت .. ربنا يهون ..
______________________________
تحياتي
______________________________

kochia يقول...

______________________________
(أم البنين)
______________________________
ان شاء الله
وكنت مستخبية
بصراحة حاسة بمسؤولية ومش عايزة اكتب اي كلام والسلام
ولا ايه ؟؟؟
______________________________
تحياتي
______________________________

kochia يقول...

______________________________
اسماء جمعه بنت الشمس
______________________________
منورة واهلا بيكي دايما
واشكرك واتمني استمتاعك الدائم
______________________________
تحياتي
______________________________

kochia يقول...

______________________________
ميرام
______________________________
ياريت لحسن انا خايفة اتنكس
______________________________
تحياتي
______________________________

!!! عارفة ... مش عارف ليه يقول...

جميل البوست ده

ممكن تبقي تبخريها

وتحطي على عتبتها خرزة زرقة :)


تحياتي
وليد

المنسى يقول...

سلامتك من الحسد
ألا بذكر الله تطمئن القلوب
وإحنا فى أيام مفترجة
رجب بدأ كل سنة وإنتى طيب
أقولك
خير الكلام ما قل ودل
ودى حالة بتيجى لكل الناس
متنزعجيش

سلااااااام

فشكووول يقول...

السلام عليكم كوشيا هانم
تحياتى
مش عارف اشمعنى احنا صحيح اللى بنثق ونحيل كل شيئ الى حكاية الحسد دى
صحيح هى وردت فى القرأن ... لكن احنا بنحمل الحسد فوق طاقته ومتقوقعين فيه
وحالة الكسل دى والله يا كوشيا هانم انا واقع فيها للركب وكسلان اقرأ وكسلان اعمل اى حاجه والحاجه الوحيده اللى بتبسطنى انى افتح التليفزيون واقعد قدام الجزيره وخلاص

اشكرك على تعليقك على بوست النمزجه وكمان على مشاركتك فى الجمعيه ونردها لك فى الافراح
تحياتى كوشيا هانم

فشكووول يقول...

عذرا كوشيا هانم
فقد قرأت المرأه المصريه واشكالياتها
ما يظهر على السطح من الجدال والنقاش هو فى حقيقة الامر لا يعبر عن الواقع
المرأه المصريه لها شخصيتها الخاصه وطوال العصور ... وما نراه هو صوره باهته فقط على السطح ولكن الحقيقه انها المحرك الرئيسى للحياه فى مصر
فالمرأه هى الام وهى الاخت وهى الزوجه وهى الابنه والخاله والعمه
معدنها اصيل اذا وضعت فى مكان حملت المسئوليه ونفذتها باتقان وهى لا تتورع عن حمل هذه المسئوليه ولا تهرب منها
فكل المجالات التى تجد المرأه نفسها فيها تقوم بمسئوليتها على اخير ما يكون
وهى المحرك الطبيعى والرئيسى للحياه
واسألى الحاجه ام اسامه ... هى اللى بتعمل كل حاجه وكل يوم وانا طالع الشغل الصبح بالثبور وعظائم الامور اذ لم انفذ لها تخطيطها اليومى ولو ما نفذتش يا داهيه دقى عمك فشكول يبقى بيقول يا ارض انشقى وابلعينى يا ارض يا ارض
مش عارف ليه الخلافات والنقاشات عن المرأه المصريه اللى هى اعظم امرأه فى الدنيا وهن تاج رؤوسنا جميعا ومن غيرهن لا نستطيع ان نذهب او نجيئ .. بس مين يخلى ام اسامه تقرأ الكلمتين الحلوين دول عشان اتعتق من العلقه اليوميه
تحياتى كوشيا هانم

Unknown يقول...

عودا حميدا نورتى المدونة وعالم التدوين يا قمر
يارب متغبيش تانى ابدا

لاسع افندى يقول...

حمدالله على السلامه
تحياتى

غير معرف يقول...

انا الغير معرف بتاع الحر

وحشتيني يا كوشي
عموما قولت اجي ابخرك

أمل حمدي يقول...

ربنا يرفع عنك اللهم امين

الحسد حتى في التدوين !!!!

الحمد لله انك رجعتي وان شاء الله تستمري ويبعد عنك اعين الحاسدين

سلام

كراكيب يقول...

طب ادخل برجلي اليمين
واقول قل اعوذ برب الفلق
وخمسة وخميسة في وش اللي يعدي برجليه ولا يصلي ع النبي

حمد لله ع السلامة ليكي وللبلوج
ومستنية قصقوصة جديدة من قصاقيصك
;)

miro el niro kwaniro

عين فى الجنة يقول...

واضح ان الحسد زال ، ربنا يحميكى من شر الحاسدين

وميض ابتسامة يقول...

عزيزتى

الحسد موجود فى القرأن ومحدش يقدر يقول غير كدة .. ومش بعيد تكون مدونتك اتحسدت ...!!
لكن بعد الاجراءات الوقائية التى قمت بها انا مطمئن ان الحسد ح يروح لحاله وان كوشيا ستعود احسن من الاول واكتر
اهلا بك مرة اخرى ياعزيزتى

خالص مودتى

micheal يقول...

يا ستي لا حسد ولا حاجة
ألف حمد الله ع السلامة وفي انتظار جديدك
:))
تحياتي

قوس قزح يقول...

دى عين و صابت اغلب المدونين
ركزى كده هتلاقى بعد نافورة الكتب اللى ضربت فى معرض الكتاب للمدونين .. اغلب المدونات عندها حالة من الكسل و الهم و الغم
حتى اللى بيكتب حاجة بيكون اغلبها شكوى لربنا من العيشة و اللى عايشنها

اعملى حسابى فى الملح معاكى و النبى
و انا هجيب عين العفريت ابخر بها :))

صدى الصمت - عاشقة الورد - يقول...

بعد الشر عنك من الحسد يا قمر
إنتى إنوى وتوكلى على الله وإرجعى نورينا تانى
فى إنتظار كتاباتك الرائعة
تحياتى

علي محـمــــــد يقول...

السلام عليكم

حلو تصويرك للفكره بهذا الاسلوب ..

بس على فكره الحكايه مش حكاية ستات او رجاله الحكايه كلها بسبب الفراغ ومع هذا ممكن تلاقي حد منغمس في الفراغ لكنه ما بيبصش لغيره .. وربنا ينتقم من رواسب الاشتراكيه اللي تربي الناس على كره الاغنياء والافضل منهم وهي في الحقيقه مش يتساوي بين الناس بطريقه عادله .. لا .. هي بتساوي بس بظلم الناس كلهم وتخليهم مثل بعض .

في امان الله

تسنيم محمود حسين يقول...

السلام عليكم ورحمة الله وبركاته

حمدلله على السلامه...وربنا يبعد عننا الحسد واللى بيحسدوا...هو فعلا الحسد مذكور فى القرآن وموجود فعلا بس انتى ترقى نفسك الرقيه الشرعيه قبل ماتنامى كل يوم وكله هيبقى تمام ان شاء الله...
وبالنسبه للغيبه والنميمه فعلا الرجاله كمان دخلوا فى الموضوع وبقوا -قاعدين على الشلت- يلا ربنا يهدينا ويتوب علينا..

والسلام عليكم ورحمة الله وبركاته

Dr Ahmed Said@Black Armor يقول...

حمد الله على السلامة والحمد لله ان العين سابتك
بس ربنا يستر ومش تروح لحد تانى
انا حاسس باحساسك لانى مريت بفترة زى دى
دمتى بخير

ليكوريكا يقول...

كلنا خدنا عين

هاتيلي شوية ملح :)

Unknown يقول...

عُدت الى الكسل
والاختباء ياكوشيا!

أسماء علي يقول...

حمد الله بسلامتك
ده الأهم
:)

و انطلقي من جديد
مستنية الجديد بقى
:)

كيكى عوووووو يقول...

صلى ع رسول الله***
لا انتى لازم تتباخرى بقى بيقولك يفرق نق الراجل من الست!!
ع فكرة وحشتينى

نـــــور يقول...

تعرفى انى كنت ومازلت حاسه بنفس الاحساس !!!!

بجد حاسه انى بعيده وبنزل البوست بالعافيه ومش قادره اقرا للناس بس انا متخيله انه صدا وبروماواكله دماغى مش حسد :)

فينك يارب ترجعى قريب

مدحت محمد يقول...

اقرأى قل اعوذ يرب الفلق ياكوشيا

kochia يقول...

اشكر كل الاصدقاء الاعزاء علي المرور والتعليق
وانا الحمد لله مرجعتش للكسل ولاحاجة.. انا بس كنت مسافرة بغير جو .. من غير كمبيوتر للاسف .. ورجعت الحمد لله
وسوف ارد علي التعليقات ان شاء الله واعاود نشاطي..

تحياتي للجميع
سلام

momken يقول...

انتى معمولك عمل على ورك جمل

ويفكه زار على صدر حمار

انتى تجيبى انتى تجيبى رغيف ولقمتين
وشوكه معلقتين

وتجيبى ورده بلدى

وتفضلى تقطفى فيها وتقولى

يابت اه....يابت لاء ...يابت اه.....يا بت لاء

يابت اه...يابت لاء

ولما تخلصى الورده هتروقى وتبقى زى الفل

انتى اصلا زى الفل غيرش هى عين وصابتك


تحياتى

♥نبع الغرام♥♪≈ يقول...

السلام عليكم


هههههههههههه

مساء الخير ياقمرايا اخبارك ايه
انا مستجده عندك

هههههههههه

بجد كنت مخنوقه شويه كده وقلت الف شويه فى البلوجر لاقيت العنوان شدنى

بصرحه انا جانى شوية ايام كده والله كنت قفلت المدونه

الله اكبر على حقد الناس اعوذ باله مش عارفه ياختى الناس دى ايه

ربنا معانا انا وانتى

تحياتى لكى ولمدونتك الرقيقه
وممكن اضيفك عندى

اختك

ايناس

قلم رصاص يقول...

السلام عليكم ورحمة الله وبركاته

حمدلله على السلامة وبالتوفيق ان شاء الله

في حفظ الله

عماد خلاف يقول...

الحمد لله العمل اتفك وبقيتى زي الفل
لكن شكلك هاتفضلي كل يوم محسودة لكن نعمل اية بقى ربنا معاكى يارب
المهم انا لدى مدونتين واحدة للمقالات بحلم ببكرة والتانية للمقالات
ارجو االتواصل
تحياتى لحضرتك
http://emadkhalaff.blogspot.com/

ابو صهيب ( الجمعاوي الاصيل)سابقاً يقول...

السلام عليكم ورحمة الله وبركاته

عوداً حميداً اختي الفاضلة


وايه الغيبة دي كلها

نرجوا عدم الابتعاد مرة اخرى

وننتظر منكم المزيد

الازهرى يقول...

صحيح انا داخل ومكسوف على انى اتأخرت فى الزيارة لكن الظروف الحمد لله انتهت

المهم بطلى تتلككى بالحسد وارجعى متعينا من تانى بتدويناتك الجميلة

فى الانتظار

بـِصَمتـِـ أميرة ــــى يقول...

ايوة يا اوختشى
هو الحسد بعينه
صابنى بردك من فترة كدة
بس ايه فكيته
هههههههههههههههه
خدى بوسة على ما اوسوم كدة
ممممممممممممممممموه
عشان وحشتينى
وربنا يكفينا شر الناس اللى ماورهاش غير تسليط نيران عيونها على الناس
وسمعينى سلام
ياحاسديييين الناااااس .. ترا رام
مالكم ومااال الناااس

:)

إبن مصر يقول...

السلام عليكم

ازيك وعامله ايه

انا بعتذر طبعا عن عدم وجودى الفتره الماضيه ولكنها كانت غصب عنى لبعض المشاكل الشخصيه وان شاء الله نسمتر مره اخرى مع المدونين

وعموما الحسد موجود ولكن لا اعلم من ممكن ان يحسد انسان بيكتب فى مدونه احنا ولا بنكتب فى الاهرام ولا الأخبار دى مدونه مجانيه اى حد له مزاج ممكن يعمل زيهافورا

عموما تمنياتى بالإستمرار والتواصل وان شاء الله نتواصل سويا

كل تقديرى

الازهرى يقول...

الله الله الله

وبعدين فى الغياب ده
ارجعى بسرعة والا ابعت استدعاء ولى امر

عالم حبيب يقول...

اللهم صلي وسلم على سيدنا محمد

هو مش حسد ولا حاجة .. احيانا بنظلم الحسد والحاجات دي لأنها مش بتكون هي السبب

بس أحيانا الواحد بتجيله فترة كده يحب يبعد عن النت والناس وكل حاجة

ننتظر جديدك ان شاء الله

رحلة البحث عن الوطن المفقود يقول...

ان شاء الله ترجعي بالسلامة

Ahmed Othman يقول...

الحسد موجود
فقد كان بالامس
و سيظل بالغد

المهم الا ننهار لنيرانه
نصمد حتى تأكل النيران نفسها
و تموت

ننتظر العودة

نعكشة يقول...

و الزباين هشتروا منها من غير ما تحطي بضاعة

؟؟؟؟؟؟؟؟؟؟؟؟


فينك؟؟!!

عسى أن تكوني بخير

يا مراكبي يقول...

انا متأكد ان مدونتك محسودة .. لأن الريدر بتاعي شاف البوست ده من يوم ما عملتيه وانا من ساعتها كل ما آجي أقرأوه الاقي حاجة تشغلني .. لحد ما أخيرا زال الحسد النهاردة وقريته

استغلي فرصة النهاردة دي وارجعي للتدوين بقوة

Dr. Ibrahim يقول...

مش محسودة ولا حاجة

هتلاقيه بس شوية إكتئاب من الصيف والحر :)

اقصوصه يقول...

عين يبنتي وما صلت على النبي

ع العموم شدي حيلك انتي

وادعي الدعاء المأثور

يااا رب يا هادي

هات الزباين

النحيادي!!

لووووووووووووول

آه وكفى يقول...

انا برضو ساعات كتير او بئيت في الغالب جيلي قرفة من المدونة معرفش ليه
الله اكبر يابتي في عين الجميع والزباين اهم رجعوا تاني انتي مش تتنسي ابدا

الازهرى يقول...

فاتك كتييييييييييييييييييير

حسن حنفى يقول...

ههههه

حمد لله علي سلامه حضرتك

الطائر الحزين يقول...

كيف حال حضرتك؟

micheal يقول...

جاي أسلم عليكي وأقولك كل سنة وأنتي طيبة
أتمني تكوني بخير

Unknown يقول...

السلام عليكم ورحمة
الله تعالى وبركاته
ارجو ان تكونى
بخير :وكل سنة
وانتِ بالف خير

علي محـمــــــد يقول...

كــل عـــــام وانتم بــخـــــيــر

نـــــور يقول...

كل سنه وانتى طيبه
مش هتظهرى بقى؟