الجمعة، ديسمبر 26، 2008

تاج العام

-

ارسلت لي اختي العزيزة مها زين .. مدونة (انها الحياة)

تاج جميل جدا وثري .. وانا اتباعا لمبدا تسديد الديون ( قريته عند الازهري ) هجاوب بعد كدة علي التيجان اول باول وواحد جديد مع واحد قديم لحد ما يخلصوا .. لان عندي شوية كدة

وبما ان ده كبير للاسف مضطرة يبقي لوحده

نبدأ ......

*************


لو كان ينفع تختار عصر تعيش فيه هيبقى انهى؟ ومين الحاكم؟
ينفع اختار عصرين ؟؟

انا هختار وخلاص

كنت احب اعيش في عصر قديم اوي ايام ماكانت الاخلاق الصالحة واضحة الصلاح والفاسدة واضحة الفساد وايام ماكانت الرجولة كاملة والانوثة كاملة .. والابيض ابيض والاسود اسود وذلك لاني اري اختلاط الصلاح بالفساد لدرجة عدم التمييز بينهم احيانا الان ..

تعبت من اللون الرمادي المنتشر في كل شئ وعدم وضوح مفاهيم الرجولة والانوثة الكاملين في نظري من رؤية الرجال والنساء عامة .. والحاكم هو شيخ القبيلة العادل

والعصر التاني اللي كنت اتمني اني اعيش فيه هو عصر عمر بن الخطاب واني اكون من المسلمين الاوائل واجاهد جهاد المسلمين الاوائل .. والحاكم طبعا العادل عمر بن الخطاب رضي الله عنه


*************


أول اولويه فى حياتى ...عيلتى ..شغلى ...أصحابى؟
عائلتي طبعا


*************

إيه اكتر حاجه بتحبها فى رمضان؟
التجمع الاسري والعائلي .. قراءة القرآن وختمه


*************

اوصف أجمل فطار ممكن تفطره؟
فطار رمضاني طبعا .. ممكن محشي ورق عنب .. صينية رقاق معاها شغال .. شوربة سخنة طبعا .. حبة خشاف صغيرين .. بس كدة كفاية


*************

لو انت حاكم هتكون عادل ؟ وهتعرف ازاى؟
اتمني اكون عادلة .. هحاول اقتدي بالنماذج العادلة واتقي الله .. بس دلوقتي مش ممكن اكون متاكدة من مدي العدل .. والحكم مسؤولية كبيرة جدا


*************

مين أكتر اعلامى بتحبه؟
بيتغيروا مع الوقت .. بس حاليا محمود سعد .. رغم اني لم اكن احبه سابقا نهائيا


*************

لو ممكن شغلانه تانيه تختار ايه؟
مدير طبعا .. مش عشان بحب المريسة والله

لكن اعتقد ان عندي افكار ادارية لطيفة جدا ( اه لو كنت مدير)


*************

تانى بلد تحب تعيش فيه بعد مصر ؟
عربي ( الامارات العربية ) .. اجنبي (اوربا بشكل عام )


*************

اوصف ترتيبات أجمل فرح ممكن تحضره؟
العروسة والعريس يحضروا في معادهم .. والفرح يبدا في معاده .. ورد كتيييير .. ممنوع اصطحاب الاطفال ..


*************

بتراعى كلام الناس والقيل والقال؟ وليه؟
لا .. لا اراعيه غالبا .. لانني احترم عقلي واحترم المجتمع معظمه .. اما جماعة القيل والقال لا يعجبهم العجب ولا الصيام في رجب فلا اهتم لهم ..


*************

صحيت من النوم لا موبايل ولا كمبيوتر ولا كاميرا ديجيتال ورجعنا لعصر الحصنه والحمام الزاجل؟
هزعل شوية.. لاني اتعودت علي رفاهية الحضارة .. مش هعرف اركب الحصان للاسف بس ممكن اتعلم .. مش هزعل علي الموبايل ولا الدش ولا الكاميرا .. هزعل علي السيارة وعلي السخان وعلي الغسالة الاوتوماتيك والزمن ده راجع راحع .. بس ياتري هنلحقه احنا ولا لأ .. الله اعلم


*************

السعاده هى ؟
ان اعيش بين ومع من احبهم .. والاحساس برضا الله


*************

عندك أمل؟ واسبابك؟
عندي .. لان دايما ربنا بيقف جمبي في احلك الظروف رغم اني كثيرا لا اكون مستحقه لفضله سبحانه وتعالي .. وهذا يدعوني للامل دوما .. كذلك اتذكر الحديث تفاءلوا خيرا تجدوا خيرا .. وافتكر فيا طبيعة متفائلة الي حد ما ..


*************

لما بتحب تهرب من كل حاجه بتروح فين ؟
بنام غالبا .. اما لو فيه فرصة هرب حقيقي يبقي البحر


*************

امتى أول مره أخدت فيها نفس وقلت ياااااااه أنا كبرت؟
لما اشتغلت ورحت الشغل لوحدي اول يوم من غير ما بابا يوصلني زي اول يوم في كل مرحلة دراسية سابقة


*************

بتشرب سجاير ولا لا؟ وايه رأيك فى الرجاله والستات اللى بتشرب؟
لا اعتقد انني ساجربها .. واري ان تجربتها هو اهمال متعمد في الصحة وعدم احترام الاخرين ممكن لا يدخنون


*************

بتعرف ايدك الشمال ازاى؟
حفظاها من وانا صغيرة .. مش فاكرة ازاي حفظتها


*************

اكتر اله موسيقيه بتحبها؟
الكمان


*************

ليه قله الذوق والنخوه اتعدموا؟
عشان مفهوم العيب اتغير في الاسرة وفي المدرسة وفي القدوة مع الاعمام والاخوال .. واصبح العيب هو عدم الفهلوة وعدم القدرة علي الرد علي الكبير قبل الصغير والباس الحقوق ماليس لها ..


*************

ايه الحاجه اللى لو حصلت هبقى سعيد ؟
مش عارفة .. مش حاجة معينة .. لكن حوار طويل بيني وبين الزمن


*************

تحب أرض زراعيه ولا اجنس عربيات ولا كام عماره ولا فلوس فى البنك؟
ارض زراعية


*************

تحب؟ البحر ولا النيل؟
البحر


*************

مركب ولا طياره؟
طائرة


*************

شخص مجنون ولا عاقل؟
عاقل


*************

تقرا كتاب ولا تتفرج على فيلم؟
حاليا .. فيلم


*************

اهداء التاج

اصدقائي .. اهدي التاج لـ


· مصطفي .. مدونة صورة ساخرة

· صدي الصمت .. مدونة صدي الصمت

· فشكول .. مدونة فشكول

· منامينو .. مدونة مش اسف علي الازعاج

· رارا .. مدونة نبضات قلب

· داليا .. مدونة قوس قزح

· مدحت محمد ..مدونة البصيرة

· صبرني يا رب .. رغي امراة غير مطحونة

· نعكشة .. مدونة نعكشة

· طالب ثانوي

واي حد يجاوب يا جماعة يبلغني عشان اروح اقرا لاالجابات فورا ..

تحياتي

هناك 48 تعليقًا:

Kiara يقول...

اجابات عبرت عنك

ايام ماكانت الاخلاق الصالحة واضحة الصلاح والفاسدة

*******

نفسي في عصر زي ده

نعكشة يقول...

عمري ما دوقت الخوشاف دة

والزمن ده راجع راحع .. بس ياتري هنلحقه احنا ولا لأ .. الله اعلم

مش فاهمة الجملة دية

......

تسلمي عالتاج يا قمر

سلام عليكِ

HERO يقول...

اهم حاجة ان انتي طلعتي عاقلة ههههههههه

انا بهزر طبعا انتي اعقل من العقل نفسه

واجباتك منطقية وعاجبني التفاؤل بتاعك وربنا يقدرك على تنفيذ احلامك ان شاء الله

تحياتي

khaled يقول...

السلام عليكم ...... انتى انسانة عاقلة.. وتنظرين إلى المستقبل بشئ من التفاؤل.. لك الود والاحترام

الفارس الملثم يقول...

انا بقي ساعات بتمني ارجع لعصر الحواديت ويمكن برده عشان زي ما قلتي بيبقي الابيض ابيض والاسود اسود مفيش الالوان الرماديه ومفيش الشر اللي لابس الف قناع ووش

اجابتك طبعا بتدل انك شخصيه عاقله ومتزنه وواقعيه وكمان شخصيتك قويه ,,ششفتي كل ده تحليل مبدئي من اجاباتك ممكن بقي تجي العياده عشان اكملك التحليل بس بعد ما تدفعي الفزيتا هههههههه

انا برده كان عندي تاج شبهه ابقي اجاوب عليه انا كمان لان البوست ده فكرني بيه

تحياتي

أسماء علي يقول...

اجابات جميلة تنم عن شخصية أكثر جمالا ..

دمتِ رائعة ..

و جميعنا نتمنى ذلك العصر .. حينما كان الرجال رجالا و النساء نسائا ..

لكن يبدو أن اللون الرمادي طغى و أنصاف الحلول أصبحت الحلول ..

دمتِ بود ..

الازهرى يقول...

انا بقيت قدوة ؟
احمدك يا رب

اجابات جميلة للغاية

وان كنا اختلف فى جزء صغير
ربما اوضحه فى اجاباتى


تحياتى دوما

kochia يقول...

_________________________________
مولان
_________________________________
اشكرك
تفتكري ممكن نخلق لنفسنا محيط زي ده ولا صعب ؟؟ انا اعتقد صعب
_________________________________

kochia يقول...

_________________________________
نعكشة
_________________________________
الخشاف ده جميل غالبا
يعني بصراحة مش اي حد يعمله .. وانا بحبه في ابسط شكل .. تمر منقوع في لبن ممكن زبيب
لكن انت عارفة بقي الناس بتحط فيه كل حاجة ..
------------------------------------
اما الجملة اللي انتي مش فاهماها .. انا اقصد ان طبعا الحرب القادمة ستفني فيها الاسلحة الحديثة وتختفي منها التكنولوجيا تماما استعدادا للعودة الي الاصل .. وربما تكوني قراتي عن حرب (هرمجدون) وعندها لن يكون هناك سوي الحصان للركوب والسيف للحرب
لكن الحرب القادمة سيفني فيها 400 مليون انسان علي الاقل كما قيل في الكتب
يا تري هل سنظل احياءا لنري عصر الحصان والسيف مرة اخري ؟؟؟
هذا هو التساؤل
تحياتي
_________________________________

kochia يقول...

_________________________________
HERO
_________________________________
اشكرك جدا .. بس العقل عمره ماكان 100%
وشئ من المسؤولية هو اللي بيخلي كفة العقل ترجح للاسف
_________________________________

kochia يقول...

_________________________________
khaled
_________________________________
اشكرك .. ومرحبا بك دائما
_________________________________

kochia يقول...

_________________________________
الفارس الملثم
_________________________________
اهلا بيك يا محمد .. بجد تحليل هايل وممتاز ولازم تكمل .. وعندك عيادة كمان
بس مكنتش اتصور انك تطلب الفيزيتا كدة عيني عينك ؟.. كان لازم تجر رجلي الاول .. اناهجيب زباين كتير ..
المهم يلا حل تاجك عشان نشوف الاجابات
تحياتي
_________________________________

kochia يقول...

_________________________________
أسماء علي
_________________________________
اشكرك .. وفعلا يبدو انه واقع لابد انت نتعامل معه
تحياتي
_________________________________

blue-wave يقول...

حلوة اجاباتك
تحياتى

Mina يقول...

طبعا اجابات جميلة جدا بتدل علي شخصية عاقلة ومتزنة
ولو فيها حبة رومانسية (خدي بالك الرومانسية بقت عيب في الايام دي)انما برضو قليل من الرومانسية يصلح المعدة ههههههههههههه
بس بجد بجد اجابات هايلة وجميلة
وتاج جميل بجد
ومتشكر قووووووووووووووووي علي الهدية الجميلة واوعدك هاجاوبه في اقرب وقت
تحياتي

kochia يقول...

_________________________________
الازهرى
_________________________________
يا فندم انت قدوة من زمان
ومنورني دايما .. ومستنية اجابتك
_________________________________

kochia يقول...

_________________________________
blue-wave
_________________________________
اشكرك
منور
_________________________________

kochia يقول...

_________________________________
Manamino
_________________________________
فين الرومانسية دي ؟؟ انا شايلاها خالص من التاج ؟؟ .. علي العموم فعلا معدتش تعبانة من حاجات كتير ..
وانا متشكرة لقبولك التاج ومنتظرة اجابتك عليه
تحياتي
_________________________________

Empress appy يقول...

نفس العصور تقريبا اللى اتمنيتها
بس المريسه مش افكار لطيفه يا قمر المدير لازم يبقى فاهم تنميه بشريه وعموما المدير الصح لازم يقعد فى مكانه مش اكتر من 8 سنين ويتنقل فى مكان تاني لان افكاره بتكون خلصت

romansy يقول...

ايه التاجات الجديده دى

اما بقى العصر اللى ممكن اختارعه عصر العدل والاخلاق اللى افتقدناها الايام دى
واعيش فى عصر عمر بن عبد العزيز
ربنا يحقق احلامك ونلاقى العصر الجميل

حسن حنفى يقول...

دايما التاج بيكشف اكتر عن اللي يحله

كلنا نفسنا نرجع لايام زمان اما الناس كانت ناس بصدق


دمتي بخير

أية الشقية الشعنونة يقول...

أمر بحالة اكتئاب مزمن
اعتذر عن التعليق
ارجو زيارة هذه المدونة فورا
www.lookkoko.blogspot.com

صدى الصمت - عاشقة الورد - يقول...

كوشيا الجميلة
اجاباتك جميلة ومنطقية وصادقة
أشكرك على الهدية الرقيقة والحقيقة مها كانت بعتتهولى بس كنت مأجلاة لأنى لسة مجاوبة على تاج فى العيد
عموماً أشكرك بشدة وهأحاول أرد علية فى أقرب فرصة
تحياتى

فاروق عادل يقول...

انا رديت على التاج بتاعك تعالى شوفية بقى

msafa يقول...

ممكن اجاوب على التاج رغم انى مش مدعى فى الاهداء
معلش اعتبريها غلاسه

نعكشة يقول...

اهاااااااااا

فخمتو

دايما كدة بتفيدينيبمعلوماتك
ربنا ما يحرمني منك
......

حاجة كدة علي جمب
انا افتكرت الخشاف انا بشربة علي طول

انا افتكرتك بتقول ي خرشوف

معلش

انا ساعات مبعرفش افتكر اسامي الحاجات

زهايمر بقة

يلا خير

سلام عليكِ

fashkool يقول...

ازيك يا كوشيا .. انا عندى نفس التاج يا كوشيا .. شوفى بقى انا حانزله فى يوم كدا وخلاص .. ورزقى على الله .. كنت فى مدونه جديده وصاحبتها قديمه وانا عارفها وبعدين جيت عندك .. تحياتى

بنت الغربة يقول...

حبيبتى كوشيا
اجاباتك ظريفه قوى ورومانسيه شويه
انا رأى ان كل ععصر وليه متطلباته
صعب نغير التكنولجيا اللى اتعودنا عليها ونرجع لوراا
اما الاخلاق فطبيعى ان مفهومها يتغير فى عصر العولمه ده
ربنا يستر على مستقبل ولادنا
تحياتى

Beram ElMasry يقول...

kochia

فى مستهل العام الهجرى الجديد ادعو الله لكم وللاهل ، ان يجعله عام خير ورغد ، وان يحفظكم وجميع العرب من كل سوء ومكروه ، وان يسبغ علينا نعمة الامن والامان وكل عام وانتم بخير
بيرم المصري

حـــــدوتـــــة يقول...

السلام عليكم

تاج جميل واجابات اجمل

سلالالالالالالالالالالالالالالالالالالالالالالالالام

kochia يقول...

_________________________________
~*§¦§ Appy §¦§*~
_________________________________
ايوة المريسة مش افكار لطيفة .. انا قلت كدة برده .. وانا مستنية اول 8 سنين مديرة وبعد كدة اقرر اكمل في الادراة ولا ارجع عامل مخلص في ماكينة العمل .. وهجهز من دلوقتي افكار تنفع لل 8 سنين اللاحقين
ايه رايك
تحياتي
_________________________________

kochia يقول...

_________________________________
romancy
_________________________________
اشكرك .. ويارب نقدر نعمل جزء من عصرنا اللي بنحلم بيه بادينا
تحياتي
_________________________________

kochia يقول...

_________________________________
حسن حنفى
_________________________________
اشكرك .. وفعلا ياريت نقدر
_________________________________

kochia يقول...

_________________________________
أية الشقية الشعنونة
_________________________________
يارب يزيح عنك كل اكتئاب وضيق نفس
اميــــــــــن
_________________________________

kochia يقول...

_________________________________
صدى الصمت
_________________________________
اشكرك وهنتظر الاجابة عليه ايا كان المرسل
تحياتي ليكي
_________________________________

kochia يقول...

_________________________________
طالب ثانوى
_________________________________
اوكي
_________________________________

kochia يقول...

_________________________________
msafa
_________________________________
ممكن طبعا ده شئ يبسطني
وانا هعمل تحديث واضيفك علي الدعوين
واتمني اقراه في اقرب وقت
تحياتي
_________________________________

kochia يقول...

_________________________________
نعكشة
_________________________________
سلامتك من الزهايمر يا نعكوشة
انتي لسة صغنونة علي كدة
منوراني دايما يا قمر
سلام
_________________________________

kochia يقول...

_________________________________
fashkool
_________________________________
تحياتي ليك واشكرك علي قبول التاج ومنتظرة اجابتك
_________________________________

kochia يقول...

_________________________________
بنت الغربة
_________________________________
اه صعب نغير عصرنا
ويمكن عشان كدة بنحلم
نورتيني
تحياتي
_________________________________

kochia يقول...

_________________________________
Beram ElMasry
_________________________________
اميـــــــــن
اللهم تقبل منك وادم الله السعادة علي المسلمين في مشارق الارض ومغاربها
تحياتي
_________________________________

kochia يقول...

_________________________________
حـــــدوتـــــة
_________________________________
اشكرك جداا
تحياتي
_________________________________

Mina يقول...

انا جاوبت التاج
تعالي شوفي الاجابات وخدي هديتك من عندي
يالله بسرعة

عمرو يقول...

أولا و قبل حتى سلامو عليكو عاوز أحييكى على اٍختيارك الموفق للأرض الزراعيه :) أيوه كده فرحتينى :9
التاج حلو و اٍجاباتك كمان عجبتنى و لاقيت حاجات كتيره مشتركه بينى و بين الأزهرى و بينك
تقبلى خالص تحياتى

Unknown يقول...

تاج واسمى اول اسم معلش بقى يظهر هكون آخر رد بس ان شاء الله أجاوبه

بس فيه مشكله هاجوبه متأخر شوية اعزرينى بقى وهتكونى اول من يراه ان شاء الله وانا مبسوط جدا بالتاج
بس كان عندى استفسار ليه عصر سيدنا عمر ما كان عصر الرسول ويمتد بيكى العمر لعصر سيدنا عمر والحمد لله أننا مسلمين فى الآخر ما احنا مش ضامنين لو كنا فى الوقت ده هنكون مسلمين ولا كفار الحمد لله على نعمة الإسلام الحمد لله أننا ولدنا مسلمين

مصطفى

kochia يقول...

_________________________________
Manamino
_________________________________
منور دايما واشكرك علي قبول التاج
تحياتي
_________________________________

kochia يقول...

_________________________________
عمرو
_________________________________
انا بحب الارض الزراعية جدا وكنت اتمني لو اعيش في مكان كدة
تحياتي
_________________________________

kochia يقول...

_________________________________
egyboy
_________________________________
حاسة انها متعةتعيش في ظل حاكم عادل
طبعا النبي عليه الصلاة والسلام كان عادل لكن عصره اتسم بالدين اكترمن السياسة او هكذا اعرف انا..
تحياتي
_________________________________