تيجان بالجملة

-

اخواني الاعزاء

كل عام وانتم بكل خير

واعاد الله تلك الايام المباركة علينا جميعا مسرورين سعداء

من فترة عاوزة اكتب موضوع جديد

بس اخيرا كنت قررت اني انتظر للعيد ان شاء الله وانزل حلقة جديدة من مذكرات نتاوي

اسمها ان شاء الله هو " محمد سيكو "

لكن ربنا بعت لي تاج من الصديق مهيج الجماهير صاحب مدونة ورقصني يا جدع ..

وتقريبا نفس التاج بعثه لي مواطن مصري نايم صاحب مدونة " قهوة نام يا مصري "

وكمان طالب ثانوي صاحب مدونة يوميات طالب ثانوي

وانا عندي تاجين مركونين من مدحت محمد صاحب مدونات البصيرة و مصري

ومدونة سحر الرومانسية اللي التاج داخلها مقفول عليه ومش عارفة اطلع منها عشان كدة هيفضل مؤجل للاسف

وتاج كمان من سوسة صاحبة مدونة البراءة ويوميات سوسة

-

وقلت اخلص الحاجات المركونة احسن

وهراعي الترتيب الزمني

الاول تاج مستخبي عند مدحت محمد مش فاكراه هيتنظر تاني

--

التاني تاج من الاخت العزيزة سارة اسمه

تاج الســعادة

س 1 / اية معنى السعادة من وجهة نظرك؟ حاسس انك سعيد ؟

معني السعادة من وجهة نظري اني اعيش مع الناس اللي بحبهم وانا عارفة انهم بيحبوني ..
وايوة الحمد لله حاسة اني سعيدة الي حد كبير جدا

س 2 / امتى حسيت انك ظلمت انسان ولية ؟ محتاج للحظة غفران منة ؟

مش ممكن اكون مظلمتش حد طول عمري , لاني انسان , اكيد ظلمت حد
بس لو ده حصل بيكون بدون ما اشعر لاني فعلا مش بتعمد ابدا اعمل كدة , عشان كدة مش قادرة احدد امتي حسيت بكدة , ودي فرصة اني اطلب من اي شخص حاسس اني ظلمته في يوم بدون قصد – اطب منه الغفران

س 3 / بتعمل اية لما تكون مضايق بعد ما تصلى ؟

بقرأ قران اذا كنت مضايقة جدا جدا , لكن اذا كنت مضايقة نص نص بنام

س 4 / امتى حسيت انك اتظلمت ؟ ولية ؟

كنت وانا اصغر شوية بحس احيانا بالظلم لما حد يقارني بشخص ممكن ميكونش فيه وجه مقارنة بيني وبينه
او تكون المقارنة مش عادلة ..
لكن حاليا مش بحس اني مظلومة فعليا لاني فور شعوري بشئ مشابه باخد موقف وبوضح الامور
لهذا السبب او لاي سبب تاني بحس انه هيظلمني او هيضعني في غير موضعي ..
وبرضي بالنتيجة في النهاية مادام حاولت في الحصول عليها

س 5 / اية اكتر احساس بيراودك هذة الايام تجاة نفسك والاخرين ؟

يعني هعترف اني حاسة اني مش مبسوطة من نفسي عشان مش بتسمع كلامي الصح دايما ,
اما الاخرين فاشعر بالرضا عن علاقتي بمعظم الناس حاليا

س 6 / امتى ممكن تتنازل عن حق من حقوقك ؟ والسبب ؟

اتنازل عن حقي لما اكون متاكدة 100% اني قادرة اخده ..
و بتنازل عن حقي لما يكون اللي واخده شخص عزيز عليا جدا جدا

وسبب التنازل الاول هو العفو عند المقدرة , وسبب التنازل الثاني هو رغبتي في رؤية ابتسامة الرضا والسعادة في عيون احبائي

================

===================

التاج التاني وصلني من الصديق مهيج الجماهير وهو تاج التدوين

وهو من التاجات الجميلة اللي عجبتني جدا

س 1 / بدأت تدون امتى .. و دخلت العالم ده ازاى ؟

بدات تدوين يوم 23/5/2008 يعني تقريبا من اربع شهور ,
ودخلت التدوين عن طريق صديق قديم بدأه قبلي بفترة قليلة هو المستنصر بالله صاحب مدونة اليقين ,
وفي الاول دخلت عشان اقرا موضوعاته وبعد كدة ابتديت اشوف واقرا موضوعات تانية وتعلقت بالعالم ده ومن ثم قررت اعمل مدونة لنفسي بعد يمكن فترة شهر من التصفح وقد كان وعملت مدونتي " قصاقيص "

س 2 / ايه كان انطباعك فى البداية ؟؟

في البداية كنت حاسة اني قاعدة في صالون ثقافي ,
كل الناس اللي فيه عارفة تفكر وعارفة تكتب وعارفين بعض كويس كما يبدو ,
حسيت اني متطفلة وعاوزة ادخل بصمت وعلي استحياء اسمع الاول واتكلم بس لو انا فاهمة هتكلم في ايه

س 3 / مين أكتر واحد بتهتم بتعليقه على بوستك الجديد ؟؟

هناك عدة اشخاص بهتم بتعليقهم جدا وبحب اعرف رايهم فعلا الي جانب كل راي احس انه جديد ومختلف وناقد نقد موضوعي بس مش مفضلة اني اقول اسماء لانهم مثلا 15 اسم وعدد السطور هنا محدود

س 4 / ايه أكتر حاجة اتعلمتها من عالم التدوين ؟؟

اتعلمت من التدوين اني اقرا تاني بعد ما كنت بعدت عن القراءة فترة لما لقيت ناس اصغر مني مع احترامي للجميع فكرها راقي جدا , كمان اتعلمت اني احترم الراي والراي الاخر بشكل اكبر مما كنته , وايضا اتعلمت منه انه ليس كل ما يلمع ذهبا

س 5 / ايه أكتر حاجة كرهتها ؟؟

كرهت فيه فكر او طريقة تعبير بعض اشخاصه

بمعني
ساعات الاقي كلام – من وجهة نظري – مفهوش اي فايدة من اي نوع
وساعات الاقي كلام – من وجهة نظري – فيه فكر وراي جميل لكن مكتوب باسلوب مبتذل او لغة لا استسيغها

س 6 / حاسس ان التدوين ليه تأثير ؟؟

السؤال ده واسع اوي

لكن اعتقد ان المقصود منه تاثير في المجتمع , ورايي انه في يوم ما هيكون له تاثير لكن حتي الان انا شخصيا كشخص جديد فيه مشوفتش تاثير كبير له قبل دخولي اليه والتاثير المفروض طبعا يكون علي المجتمع الخارجي

س 7 / تهدى التاج لمين ؟؟

رغم ان التاج جالي من صديق عزيز لكن انا شايفة الموضة اليومين دول بتقول يحل التاج اللي يحب يحله
انا بقول اللي عاوز يحل التاج يلمح لي بس وانا اهديه له فورا من غير اي تردد

يعني يا جماعة اللي عاوزه يقول هعمل تحديث واكتب اسمه يعني محدش يتكسف

اخيرا

انا مبسوطة بدخولي عالم التدوين لانه عالم حقيقي رغم رمزيته .. وافراده معظمهم صادق صدق حقيقي

واعتز بالصداقات الرمزية اللي عملتها من خلاله

-------