الجمعة، يونيو 13، 2008

..ثـلاثــــة ريــــالات

3-
المواصلات في المكان اللي انا ساكنة فيه وحشة اوي
يعني سكة اللي يخرج ميروحش .. واللي يروح ميخرجش
كدة طول اليوم تقريبا

اللهم الا يوم الخميس لو انت عاوز تخرج ومتروحش مش هتعرف تخرج اصلا..
ولو انت عاوز تروح ومتخرجش مش هتعرف تروح اصلا

معاناة معاناة معاناة

لكن بالليل ( بعد الساعة 10)

سواقين الميكروباص ( وهي وسيلة المواصلات المتوفرة ) ( الي جانب التاكسي )

سواقين الميكروباص الله يكرمهم ..
بعد ما يخلصوا طبعا قعدة القهوة ويتبسطوا
يقررا يروحوا عشرات الناس اللي واقفة في الشارع عاوزة تروح ومش لاقية حاجة تركبها ..
ومستخسرة تركب تاكسي ب 15 جنيه يمكن تجيب بيه حاجة لولادها افضل

الناس _ وانا منهم طبعا _ تشوف السواق من دول قام من علي الكرسي في القهوة
تجري علي العربية بتاعته عشان تقف جمب الباب عشان تعرف تركب

يقرر السواق يروح الناس لكن بشرط
ملحوطة:

الاجرة بتاعة الميكرباص 50 قرش ..
وطبعا السواق بياخد 50 قرش رسميا من ايام ما كانت الاجرة ب 35 قرش
ما علينا ده مش موضوعنا
المهم الشرط اللي بتسمعه وهو واقف علي الباب قبل صعود الناس


- الاجرة جنيه يا حضرااااات
-
جنيه ليييييه .. مش هي نص جنيه
-
لا جنيه .. اللي مش عاجبه مايركبش
- جنيه جنيه بس نروح


الحمد لله اني جمب الباب .. مهي الناس كتير ومش كله هيعرف يركب
( لكن فجاة واحد يتسحب من لسانه )

- جنيه كتير ياسطي .. حرام عليك
- خلااااااااااص .. بلااااااااش .. شوفوا حاجة تانية تركبوها


( ويتقفل الباب قفلة قوية حازمة متضامنا مع صاحبه )
( عشرات الناس اللي واقفة تنظر نظرة حارقة صاعقة قاتلة مميتة للشخص اللي اتسحب من لسانه وقال كدة )

لسان حالهم بيقول ( اذهب عليك اللعنة .. ثكلتك امك .. انت طلعتلنا منين.. روح يا شيخ )
وتنتشر الناس بعيد عن الميكروباص تضرب بعينها في اتجاه القهوة ..
يمكن سواق تاني بقرر يقوم يشتغل
(وزي ما يكون الميكروباص ده هياخدهم كلهم )
وتتهافت بعض الناس علي السواق الاول تحاول تقنعه


- خلاص يا عم .. اهو رزقك ...
- يللا اتكل علي الله ...
- افتح الباب واستهدي بالله ...


وينظر واحد منهم الي الجمع صائحا
( موافقين يا جماعة )
وقبل ما حد يرد طبعا زي مجلس الشعب كدة ( موافقون )
موافقييييييييييييييين


بنظرة المنتصر .. يتفتح الباب حتة صغيرة ويقف السواق جمبه ..
وكانه عاوز يقرر مين يركب ومين ميركبش
طبعا الشخص اياه اللي اتسحب من لسانه مش هيركب ..


ومين هيركبه؟
السواق مش هيركبه .. يمكن يعمل له شغب في نص الطريق ..

واهو عقاب برده عشان يحرم يتدخل مرة تانية
والناس مش هتركبه .. اهو مكان وهيفضي لغيره

وللاسف ساعات بيكون حد مشي بعيدا عن الميكروباص
وميعرفش يقرب منه تاني ولا يركب مع التلاحم اللي ملتصق ببعضه وبالباب

المهم دي قصة المواصلات الظريفة اللي بتحصل لنا كل ما نحب نخرج
اتعلمت منها الزق جمب الباب لو وصلتله لحد ما المفاوضات تخلص
يمكن اعرف اركب

وسافرت العمرة
حسيت اني سبت كل حاجة وحشة ورايا
مكة والمدينة بلدين عاش فيهم الرسول عليه الصلاة والسلام
نفسه فيهم .. خطواته علي ارضهم
يااااااااااه
قد ايه انا سعيدة

عملت العمرة الحمد لله .. وحبيت اعمل عمرة تانية
قالولي لازم تروحي مسجد التنعيم تنوي الاحرام من هناك


رحت انا وبعض رفيقات الرحلة وكان الوقت ليلا وللاسف الاتوبيسات العامة انتهي موعدها
وهناك ميكروباصات خط سيرها لمسجد التنعيم .. والاجرة ريالين


توجهات لركوب الميكروباص وجهزت الريالين انا والاخوات


وللاسف كان هناك زحام علي الركوب
سالت السائق


- مسجد التنعيم
- ايوة يا ست ..( وحجزني عن الصعود ) وتابع .. الاجرة ثلاث ريالات

ابتسمت.. وسمعت الاخوات يناقشونه في الاجرة وكيف انها ريالين وتصبح ثلاثة
قلت الانسان هو الانسان في كل مكان ..
وصعدت السيارة بسرعة قبل ما حد منهم يتسحب من لسانه .. وافقد مكاني المتميز جمب الباب
وكنت اعلم جيدا من المنتصر في هذه المناقشة

وانتهت المناقشة ودفعنا طبعا 3 ريال والحمد لله عملت العمرة التانية علي خير ...




هناك 19 تعليقًا:

KHALED يقول...

تقبل الله منكى ..
إنما حكاية الميكروباصات دى فى كل حتة
على ما أعتقد

تحياتى

عروسة ننوسة يقول...

تقبل الله ....سيبك انتى من سواقين التاكسى والميكروباص اهم حاجة انك عملتى العمرة ربنا يكتبهالنا...تحياتى

صاحب المضيفة يقول...

ههههههههههههه

ربط جميل بالوقائع دي


لكتن ده واثه أليم بنحياه كلنا في أي مكان دلوقتى



حسبنا الله ونعم الوكيل

ma 3lina يقول...

بس ياترى جنسبة السواق في مكة ايه ؟؟؟
الخوف انه يكون مصري برضه .. تبقى كده التمهة لابسانا لابسانا

:)

فعلا حاجة تحير .. هل اقدر اطلب من الناس كلهم يمتنعوا عن ركوب الميكروباص اللي صاحبه جشع وبيستغل حاجة الناس فيزود مكسبه .. عشان لو كلهم امتنعوا هو اللي حيرجع في كلامه وينزل الأجرة .. ما هو كمان ميقدرش يفعد من غير شغل ..

هل اقدر اطلب من الناس كلهم كده .. طب ما هما كمان عايزين يروحوا مشاوريهم ومش حيقدروا يعطلوها يومين تلاتة لغاية ما السواق يعتبر ويتعظ ومش كل الناس معاه ال 15 جنيه عشان تاخد تاكسي ..

طب ايه الحل والموقف دا بيتكرر في اشكال كتيرة .. حنفضل مستسلمين لجشع واستغلال كل صاحب مهنة معندوش ضمير ..

Tamer Nabil Moussa يقول...

عارفة لو كل الناس طلع لسانها وقالت زى الرجل اللى متهم بسحب لسانة وحصل اتفاق وكل مرة مدة السواقين غصب عنهم هتمشى كلام الناس لكن طول ما هيا شايفة الناس ضعيفة واللى تقول علية ماشى خلاص النهاردة جنية بكرة اثنين

تحياتى

جمعاوى يقول...

تقبل الله

و جعله فى ميزان حسناتكم


و الإنسان - أياُ كان - بطبعيته طماع

kochia يقول...

Khaled Farag :
صحيح حكاية الميكروباصات في كل حتة ..
لكن
اليس من حقنا الاعتراض!!!


عروسة ننوسة
اشكرك .. والحمد لله عملت العمرة
وعقبالك ان شاء الله

kochia يقول...

صاحب المضيفة
ايوة سيدي الفاضل .. الاستغلا في كل مكان .. دي اوضح الصور وابسطها


ma_3alina
الحقيقة الحمد لله جنسية السواق مكنتش مصرية .. هندي تقريبا .. بس بيتكلموا عربي لبلب
وانا علي فكرة استسلمت .. الاول كنت بقول لا زي اللي اتسحب من لسانة .. وساعات بعد ما بطلع الميكروباص انزل تاني والاقي نفسي نازلة لوحدي بعد ما الناس كلها كانت بتتكلم ومرة في مرة في مرة وصلت للنقطة اللي الناس وصلت لها قبلي
مش عارفة ياس .. ولا استسلام ولا ايه
نفسي ارجع اجادل في الحق من غير حرج ومن غير استسلام زي زمان .. بس بحس ساعات ان الدنيا ضاغطة اوي علي الناس
اللهم ارحمنا

kochia يقول...

Tamer Nabil
علي فكرة انا ساعات بقف في صف المسحوب من لسانه وبحاول اشجع الناس ونقف فعلا ونرفض نركب وتيجي عربية تانية نركب بسرعة ويغغلي الاجرة برده
نركب برده
ونقول المهم ان الجشع الاول ماخدناش|!!!
طيب ما الجشع التاني اخد
مش بنفتكر بقي
المهم نروووح


جمعاوى روش طحن
جزاك الله خيرا
الانسان طماع فعلا .. بس المفروض احنا نقاوم الاستغلال حتي لو مقدرناش نوقفه
ده رايي

المستنصر بالله يقول...

مبروك العمرة وتقبل الله وبعدين انا عاجبنى اسلوبك اوى ازاى حلو اوى كده

صلطح يقول...

تقبل الله منكى ورزققك بحج بيته الكريم

=============================
بس مفيش جديد الاستغلال موجود فى كل شئ مش فى الميكروباص بس
لكن فى المصالح الحكوميه وكل حاجه
==================
وصلطح صلطح ياعم الحاج

بيتنا القديم يقول...

إنا نشكو مما تشكى انت منه..!!

(:

على العموم مبروك على المدونة الجميلة

ومبروك على العمرة

ومبروك على شغلانتك خاطبه

ومبروك على همتك العالية

ومبروك على اي حاجه حلوة

تحصلك في حياتك مقدماً

حقاً الإنسان هو الإنسان

(:

جميلة الجملة دي..!!

بالحق

مبروك انك منسحبتيش من لسانك ولزمت

الباب ومبروك اكتر وصولك للبيت بسلامة

الله

(:

Jana يقول...

حمدا لله على السلامة
وتقبل الله

فكرتينى بيوم ما البنزين غلى ..وقفلوا المحطات عشان البنزين بسعر امبارح يتباع بكرة بالسعر الجديد
الجشع والاستغلال ..اصبح سمة العصر

لا تحيدى عن موقفك والزمى باب الميكروباس..المهم تروحى وخلاص..
ولو لسانك اكلك يعنى ..ارمى كلمتين فى الخباثة ..المهم البيه الباشا عمو السواق ميشوفكيش

شكرا لوضعك مدونتى فى قائمة مفضلاتك

اتشرفت بمعرفتك
تحياتى وتقديرى

غير معرف يقول...

والله مشعارف اقولك ايه
حنفضل بس كل اللي نقدر نعمله نسخر
من الواقع
نحاول نقول لا بس في النهاية
موافقوووووووووووووووووووووون
قهرا لا اختيارا

امني ان ياتي اليوم لنختار تعليمنا
وظائفنا
مواصلاتنا

نتمني ان نملك الاختيار بدون ضغط او استغلال

جميلة المدونة
استمري
تقبل الله منا ومنكم

kochia يقول...

المستنصر بالله
الله يبارك فيك .. واشكرك علي اعجابك بالاسلوب .. وانا بتعلم من حضرتك

============================

صلطح :
هو معني اسم حضرتك ايه
صلطح ايه ؟؟؟
ومين اللي مصلطح
المهم ..
الله يبارك فيك وعقبالك ان شاء الله
وعندك حق الاستغلال بقي في كل حتة وبقي سمة الحياة
اخاف نوصل لمرحلة نستغل احنا كمان مراكزنا واحنا مش حاسين
اشكرك علي مرورك

kochia يقول...

بيتنا القديم
مرحب بيك وشرفتني
والله يبارك فيك x خمسة
واشكرك جدا وانا مبسوطة ان المدونة عجبتك
وطبعا ساعات بنسحب من لساني بس مش دايما حد بياخد باله
ربنا يستر

=============================

Jana
الاخت العزيزة .. اشكرك علي مرورك
ونصيحتك هي اللي بعمل بيها دلوقتي .. مهو مفيش حل تاني في ايدي
وساعات بقول كلمتين في تانيب للسواق وخلاص من غيظي بس لما يمشي ويبقي في نص السكة او وانا بدفع
يعني اي حاجة والسلام
وانا تشرفت بمعرفتك ومعجبة بموضوعاتك جدا

تحياتي

kochia يقول...

afew good men
مرحبا بك
اللي في ايدينا اننا نرفض الواقع ونحاول نغيره لكن لو مقدرناش هنعمل ايه ؟
كل واحد بيعترض بطريقته
اللي بيسخر واللي بيقاطع واللي بيشجب واللي بيستسلم
نعمل اي حاجة بس المهم ميكونش الاستسلام
تحياتي

أحلام عمرنا يقول...

اسلوبك جميل اوي بجد
طريقتك في التعبير احلى واحلى
فعلا اسوبك شيق ولذيذ
ربنا يخليكي ويكرمك يا رب

kochia يقول...

أحلام عمرنا
شكرا علي كلامك اللطيف وياري دايما تستمتع وانت بتقرا في مدونتي
واشكرك علي مرورك

تحياتي