حبيبي ...... لوحة بازل

من شوية سنين كتير .. لما ابتديت احس اني بنت .. وابتديت افكر اني انثي.. ربما تحب وتتزوج في يوم من الايام .. خاصة لما لقيت نفسي احيانا باعجب بشخص ما.. واحيانا اخري اشخاص بيعجبوا بي ..

فكرت يا تري حبيبي ده هيبقي شكله ايه .. بيتصرف ازاي .. بيحب ايه وبيكره ايه .. علاقته بربنا ايه .. هتعلم منه ايه وهيتعلم مني ايه .. هيحبني قد ايه.. وهحبه قد ايه.. طوله .. عرضه .. لبسه ..صوته ..................الخ

حاجات كتير وتفاصيل كتير اوي فكرت فيها

تفاصيل زي لوحة البازل

متكونة من قطع كتير صغيرة .. ولما تحطها جمب بعضها تطلع الصورة ..

الصورة اللي انت يمكن عارفها او حاسسها وعاوز تكونها .. وساعات بيكون معاك صورة كاملة عاوز تكون البازل ده زيها ..

وابتديت اشوف الاشخاص من حولي .. اجمع القطع الصغيرة .. واحاول اكون لوحة البازل بتاعتي .. اللي انا عاوزاها ..

كانت ساعات اللوحة تطلع مشوهة .. ملهاش شكل .. وساعات تطلع وحشة اوي.. واحيانا تكون قطع كتير مفقود .. ادور عليها مش بلاقيها ..

بعد شوية قلت انا هكبر قطع البازل بتاعتي ..مش لازم تكون قطع صغيرة وتفاصيها كتير

كبرتها شوية .. وابتديت ادور تاني .. برده لوحتي مش عايزة تكمل .. ياتري مكن اتغاضي عن وجود قطعة او اتنين .. المهم اشوف الصورة وافهمها ؟؟؟

ومرتين تلاتة قربت اللوحة تكتمل وقربت احبها .. بس الظاهر اني كمان المفروض اكمل اجزاء صغيرة في لوحة بازل عند حد تاني .. ومكملتش .

خلاص انا هسيب التفاصيل الاقل اهمية وهركز في المهم وممكن بايدي ارسم التفاصيل اللي ناقصة وهحبها .. وهقبلها

بس حسيت ان الناس كتيرة اوي .. الوشوش متداخلة.. والتفاصيل متشابهة اوي .. والرغبات برده متشابهة ..مفيش حد مختلف عن حد ..التفاصيل الكبيرة هي هي في كل اللوحات

هدور علي التفاصيل الصغيرة تاني..

هي اللي تهمني اكتر .. هتدي الصورة طعمها وروحها

كلما كادت صورة تكتمل .. لا اجد منها الحزء الاهم

جزء في قلب اللوحة ..ترسم من حوله اللوحة بكل تفاصيلها الجميلة والعادية وتصبح العادية مع تكرار النظر اليها اجمل من الجميلة

انا هلخص بحثي .. هدور بس عن الجزء ده .. حاسة انه هيعرف يرسم ويبني حوله احلي لوحة بازل

.. رحلتي الي الاراضي المقدسة

الحمد لله ربنا انعم عليا الشهر الماضي ورحت عملت عمرة لاول مرة

ربنا بعتهالي فجأة وقبل مرور شهر كنت سافرت السعودية...

كانت تجربة جميلة اوي علي المستوي الروحاني والمستوي النفسي ..

والمستوي الثقافي كمان..

التجربة الروحانية يمكن كتير عاشها

لكن التجربة الثقافية اكيد بتكون شخصية وبتمس كل انسان حسب دماغه وتفكيره..

والتجربة الثقافية دايما بتكون اهم حاجة فيها الناس اللي بتقابلهم

كنت مع مجموعة معظمهم من كبار السن ..

وانا كنت اصغر واحدة فيهم واكبر واحد فيهم كان ما شاء الله من مواليد 1919...

التعامل مع كبار السن يعطي للشخص بعد جديد للتفكير

الشخص ده عاش واعيا عشرات السنوات .. مرت عليه الدنيا بكل ما فيها وعلمت عليه...

كل كلمة منه ممكن تكون حكمة .. وكل نظرة ممكن تحمل الف معني والف درس ..

وصمته ممكن يكون فلسفة جديدة ...انا يمكن هعرفها بعد 30 سنة كمان علي الاقل اذا كتب الله لي عمرا

كمان ضحكته وابتسامته لازم تكون علي حاجة صادقة جدا لانه شاف كتير وضحك كتير وبكي برده كتير

وانا اتعلمت من كل كبار السن اللي كانوا معايا في العمرة

كان معايا شخصية .. امراة عمرها 60 سنة ..

عندها اختين كفيفتين ..الاولي عمرها 47 والاخري اصغر قليلا ..

راحت بيهم العمرة .. لم تتزوج وتفرغت لاختيها تخدمهم وتراعي شؤونهم

انسانة لا تشعر اطلاقا انها بذلت شئ اكثر من غيرها ..

ولا تشعر انها يجب ان تشكر علي تفانيها في رعاية اختيها ( سبحان الله)

وكان معنا رجل وزوجته .. هي مريضة وهو الي يؤدي لها كل شئ تريده

كان لا يجلس ارضا لانها لا تستطيع الجلوس علي الارض

الا بعد ان يبحث لها عن كرسي ويطمئن لراحتها

وكان معنا ايضا سيدة قعيدة وابنتها ..

وورايت فيهما علاقة الام بالابن كاجمل وكاصدق ما يكون .. من الحب والرعاية والاهتمام مع فارق واحد

ان الابنة هي التي تقم بدور الام ....

ولان الدنيا دنيا .. قابلت ناس تانيين...

مش عارفة بقي هل ثمن تذكرة الطيارة

يتضمن الشوكة والمعلقة والسكية والاطباق اللي بتيجي فيهم الوجبة ؟؟؟؟؟ معتقدش طبعا

لكن بعض اشخاص من المجموعة اللي كانت معايا لمت ادوات المائدة كلها

( شوكة معلقة سكينة ومعلقة صغيرة .. اطباق الاكل )

وحطيتها في الشنطة بتاعتها

حتي شخص وبنته كانوا قاعدين جمب بعض

لمت السيدة الفاضلة الادوات كلها ( اقصد المناديل المستخدمة .. مهو ده اللي فاضل في الصينية )

لمت الادوات علي صينية واحدة واخدت الصينية التانية حطيتها في الشنطة !!!

ولا اعتقد انه مسموح بيه ؟ ولا مسموح ؟؟؟؟

مش عارفة ليه الناس بتعمل كدة

بصراحة تصرف غريب ومش حضاري اطلاقا..

وبرده بيزود المحصول الثقافي عندي كمسافرة اني اشوف البشر علي انواعهم

هل ده معتاد ولا ده حصل لما انا ركبت الطائرة لاول مرة

المهم كانت اول تجربة ليا في العمرة

وتجربة ركوب الطائرة لاول مرة بالنسبة لي ..

تجربة تستحق التسجيل .. لاني عندي فوبيا من الملاهي ..

والطائرة طبعا فيها شبه من الملاهي في لحظة الصعود والهبوط

بس عدت الحمد لله

واتمني تكرار التجربة .. وبالطائرة برده ان شاء الله

واتمني ان يرزقها الله لكل من يريدها

مقدمة

بسم الله الرحمن الرحيم

الحمد لله رب العالمين .. والصلاة والسلام علي سيد المرسلين وخاتم النبيين .. سيدنا محمد صلي الله عليه وسلم – وعلي اله وصحبه اجمعين

الحمد لله الذي هدانا لهذا وما كنا لنهتدي لولا ان هدانا الله

اما بعـــــــــــــــــــد...

يمر الانسان بالمواقف في الحياة وتمر به التجارب في الحياة ، مواقف تعلمه ... مواقف تعلم عليه ومواقف يعلم عليها .. وبين هذا وذاك تنمو الشخصية وتزداد قدرة الانسان علي رؤية ما هو صواب وما هو خطأ..

ارجو ان استطيع يوما ما ان اري ما هو صواب صواباً

وان اري ما هو خطأ خطأً

اللهم اجعل خير اعمالي خواتيمها .. وخير ايامي يوم لقاك‘‘