السبت، أبريل 24، 2010

...


مش عارفة ادخل كدة فجاة اقول ايه..


بس فتحت النهاردة المدونة بالصدفة لانها وحشتني ...

وانا مفتحتهاش من شهور

وكنت فاتحة النهاردة عشان اقفلها والم عزالي واكتب عليها للبيع .


لقيت فيها ذكريات لافكار سنة ونص عزيزة عليا جدا.


ولقيت فيه شوية من اصدقاء التدوين لسة فاكرني وبيسالوا عليا .


حسيت اني لازم ارد عليهم

واقولهم اني بجد متاثرة جدا من سؤالهم

وبصراحة رغم حسن ظني فيهم

الا اني لم اكن اتوقع انهم لسة بيسالوا عليا لحد دلوقتي .


حسيت قلبي دق وحسيت اني بحب ناس مشفتهمش

يمكن قرأوا بعض كلامي

وانا قرات بعض افكارهم وبس

فعلا انا تاكدت ان الروح ممكن يكون لها اصدقاء.


والنهاردة كان الاثبات الاخير ليا

اني ممكن اعرف حد فعلا من غير ما اشوفه من خلال بعض كلماته ..

بس اكيد كلمات صادقة حسيت بيها واثبتت صدقها مع الوقت .


بجد شكرا شكرا لكل حد سأل عليا ..

واكيد السؤال المنطقي اللي المفروض ارد عليه

بما اني كتبت النهاردة

انا كنت فين ؟


كنت في الدنيا ، زي كل الناس .

والدنيا دي عاملة زي الغسالة الاوتوماتيك

واحنا فيها زي الهدوم .


ساعات تلف يمين شوية وشمال شوية وتاخد نفس بين كل لفة ولفة

وكمان احنا ناخد نفس معاها .

وساعات تشطفك من اللي جوالك . الوحش والحلو كمان.


وساعات تلف بسرعة تعصر الهدوم وتعصرنا برده معاها.

تطلع منها تلاقي نفسك مش قادر تقف علي رجلك

لازم تتنفض وتتنشر تاخد هوا وشمس عشان تفوق تاني .


كمان حسيت اني مش قادرة اكتب حاجة جديدة حلوة

يمكن قرات حاجات وحشة لبعض الناس

اكيد لوكتبت هكتب احسن منها،


بس حسيت اني نفسي امتلك ربع فصاحة وذكاء وموهبة بعضكم

عشان اقدر اكتب..


عشان كدة اكتفيت بالقراءة من وقت للتاني..


وحاسة دلوقتي بمسؤولية ادبية نحو الاشخاص اللي فاكرني وبيسألوا

اعذروني لو سببت اي قلق لنفوسكم الرقيقة الصادقة

واوعدكم اني ابقي موجودة حتي لو مكتبتش

اكون موجودة في التعليقات لحد ما اكتب حاجة جديدة



مكنتش فاكرة اني هقول الكلمة دي وببتسم لما بشوف حد كاتبها

لكن يبدوا فعلا اني بحبكم!!!


هناك 20 تعليقًا:

صيدلانيه طالعه نازله يقول...

حمد الله على السلامه يا قمر
افتقدناكى جامد ووحشتينا جدا
لو سمحتى متغيبيش تانى
حتلى لو مكتبتيش

Dr-Ibrahim يقول...

فى إنتظار الإبداع..
تمنياتنا لكم بالسعادة والهناء..

Shimaa Gamal يقول...

الحمد لله إنك بخير ، و الله سعادتى بالبوست ده لا توصف .

لو سمحتى بقى إياك و الإختفاء تانى . قلقتينى عليكى جدًا و ما عرفتش أوصلك إزاى .

حمد لله على السلامة وحشتينى فوق الوصف

قلب ينبض لله يقول...

تصدئيني لو قولتلك انك كنتي علي بالي امبارح
قولت هي رجعت بعد طول غياب وبعدين قطعت فجأة ياتري في ايه

بجد مفتقدينك :)

عين فى الجنة يقول...

واجنا بنحبك كمان

Lobna Ahmed Nour يقول...

welcome back ya gameela

Mostafa Abdelmoneam Badr يقول...

الوهم مات
والذكريات
قالتلى حبك بالوجود
يا ريت تعود

افتكرتها من كلامك

حمد الله ع السلامة

الطائر الحزين يقول...

حمدا لله على السلامة

*الطالبة عفو الله *زوزو يقول...

و اخيييييييييييرا يا كوشيا

نورتي بيتك و مطرحك

بجد انا مبسوطة اوي بعودتك يا رب ديما منورانا و منورة عالم التدوين

على فكرة جميييل اوي المثل لي ضربتيه بتاع الغسالة دقيق اوي

تسلمي

في انتظار جديدك

متتاخريش علينا

تحياتي

Mina يقول...

واحنا كمان

الميكروباص يقول...

على فكره
مفيش أي مبرر للغلق
ولا يوجد أي مبرر للإبتعاد
ده الواحد بيدخل المدونات عشان يبعد عن الناس
واحيانا بيدخل عشان يشوف الناس اللي كان نفسه يختلط بهم لكن ارادة الله خلت الواحد يشوف ناس ما يعلم بهم إلا ربنا

اكملي وافتتحيها من جديد

أنا - الريس يقول...

ربنا يلهمك بكتابات جديدة وتجربة شخصية الواحد بيكون مضايق لما يتخلي عن شي خصوصا لو الشي ده بيمثله له أول طفل بالنسبة له,, دمتي كما تحبي بود ومحبه واخلاص

مدحت محمد يقول...

وحشانا

كيكى عوووووو يقول...

******
ابتسامه + وحشتينى اوى
وبنحبك

kochia يقول...

بعد الكلام ده كله متهيالي ارشح نفسي في الانتخابات وانا مطمنة ..
شكلي هبتدي الدعاية االنتخابية قريب جدا

يا مراكبي يقول...

الحمد لله ان التدوين قدر يكون همزة وصل بين مجموعة من الناس المحترمة اللي كان من المستحيل ايجاد رابط ما بينهم في الحياة العادية

عموما أكيد فترة وهتعدي والإلهام هييجي من تاني .. ما تقلقيش .. دي أمور معتادة

ترجعي دايما بالسلامة

غير معرف يقول...

اهلا بالغسيل ونضافته وربنا يخلي سافو ويخليكى لينا من وزقت للتانى تهزي افكارنا بكلامكالحلو


onyx

الازهرى يقول...

طبعا أنا راجع ووشى فى الأرض

بس تعذرينى لو عرفتى ازاى الغسالة واخدانى معاها وبتلف ولسه هتلف انا يعتبر فى هدنى بسيطة كده وراجع تانى

ولو راجعتى المدونة عندى هتلاقى الدنيا خربانة خالص

ادعى لى

صدى الصمت - عاشقة الورد - يقول...

أزيك يا قمر
الحقيقة عجبنى جداً وصفك للحياة بالغسالة الأوتوماتيك
فعلاً كلنا بنمر باللحظات والمواقف دى
لكن أكيد فيه خيط رفيع بيربطنا ببعض وبيخلينا نرجع تانى
وحشتينا بجد

ahmed_k يقول...

ألف حمد الله على سلامتك يا كوشيا
وبإذن الله دايما تفضل مدونتك متجدده ومتألقه كما كانت هي دوما
وكتاباتك بالفعل ممتعه ولها رونق وطبيعه خاصه وهذا هو المطلوب
أن ما يكتبه الشخص يعبر وبصدق عنه وعن أفكاره

وبإذن الله قريبا نرى جديد إبداعاتك
دمتي بكل خير