السبت، أبريل 11، 2009

(11) حسام .. من مذكرات نتاوي

-

الحقيقة مكنتش ناوية اكمل قصة حسام المرة دي ..

لاني مش متعودة انزل بوستين لمذكرات نتاوي ورا بعض

لكن بما انها حكاية واحدة .. قررت انزلها ..

-

المهم

نراجع علي الجزء الاول .. ونكمل

-

عملت بلوك علي صاحبنا ..

ومش عارفة ليه ممسحتوش علي طول ..

وبصراحة صحابي كانوا كتير فلم اهتم بشخص ما عليه بلوك

-

ونسيــــــــــــــــــــــــــــــته

-

ومرت الايام .. ممكن شهور .. ويمكن سنة

والاخ عليه بلوك واندمج وسط عشرات هم كمان عليهم بلوك

مش عارفاهم من بعض

ولا فاكرة عملت عليهم بلوك ليه ..

-

وحصلت ظروف وفكرت اعمل ايميل تاني

عليه ناس مختلفين بافكار مختلفة باسماء مختلفة

-

وعملته ..

-

لكن فاضي طبعا

وفي يوم كنت زهقانة جدا

ففتحت الايميل ملقتش اي حد من اصدقائي اللي اعرفهم فاتح ..

اللهم الا شخص واحد عليه بلوك هو اللي فاتح

مش عارفة هو مين !!

-

ومن فرط الملل قررت اكلمه ..

اتكسفت افك البلوك واقوله انت مين

رحت نقلته علي الايميل التاني الجديد اللي لسة لم استخدمه

-

اضفته

وقبلني فورا

-

وقالي

- انتي مين

-انا كوشيا ( لم يبدو عليه انه يعرفني )

-وجبتي ايميلي منين يا كوشيا

-جبتك من السيرش ( خدعة لا تبور )

-اه .. انا سمعت عنه قبل كدة مش فاكر امتي ولا من مين ( امممم .. ده من حسن حظي )

- طيب وانت مين بقي

-انا حسام ( برده مش فاكرة )

- اهلا حسام

-

-

وبدأ التعارف بيني وبين حسام
شخص لطيف ومهذب ..

مهندس بيشتغل في السعودية

-

( طبعا مسالة الصدق من عدمه دي مسالة قتلت بحثا ..

قد يكون كل الكلام صدق .. وقد يكون كله كذب ..

وقد يكون بين هذا وذاك .. ولكني اتعامل مع معطياتي )

-

ومرت ايام

وعلاقتي مع حسام توطدت في اطار محترم

والحقيقة الراجل ما قالش ابدا انتي لابسة ايه

ولا اعلمك الهاكر

ولا اي حاجة من هذا القبيل

وانا كمان اعتبرته صديق جيد

-

وفي يوم وانا اتحدث معه كالعادة

-كوشيا ..

-ها

-انا عاوز اعترف لك بشئ

( طبعا توترت .. مانا عارفة مفاجات النت )

-اعترف

-انا بحبك ..

- هااا !!!!


( الحقيقة لم افاجأ تماما لاني من فترة قرات بعض الاشارات

ولاني حسيت انه شخص كويس انتظرت التطور الطبيعي )

-

-وعاوز لما انزل مصر شهر 9 اشوفك ونتعرف

-امممممممم ( عملت مندهشة ومكسوفة طبعا )

-وان شاء الله نتفق .. واعجبك

-

( الحقيقة شخص لطيف لانه مقالش.. وتعجبيني ) ...

( انا هوافق عليه الولد ده )

-

-وبعدين .. لوعجبتني

-اتقدم لاهلك ونعمل خطوبة ونتفق

- علي العموم يا حسام انت شخص كويس وانا معنديش مانع اننا نتعرف علي بعض اكتر .. بس انا معرفش عنك حاجة .. ولا انت كمان تعرف

- انا مش عايز اعرف عنك اي حاجة غير اللي عرفتها وحسيتها من كلامك

- -

( يا سلام .. يبدو انه حبني بجد )

-

ورغم انه شخص كويس ..وحسيت ناحيته بارتياح .. لكن محبتهوش ..

يمكن لاني معنديش ثقة في معرفة النت

من ايام موضوع اول القصيدة ..

او يمكن لاني مش مستريحة لحاجة من جوايا ....

-

وحكالي بعد كدة علي شغله وعيلته وظروفه

وحاجات كتير بتفاصيل دقيقة

وابتدي ياخد رايي في حاجات تخص شغله وعائلته ومستقبله..

والحقيقة حسيت بثقة واستريحت ..

-

وكان عندي صديقة حميمة

هي الوحيدة تقريبا اللي بقدر احكيلها اللي عاوزاه احكيه ..

جدير بالذكر انها كانت بتشتغل برة مصر

وبتنزل اجازة شهرين كل سنة

-

ولما نزلت اجازة قررت احكيلها ..

بس لقيت انها كمان عاوزة تحكيلي الجديد اللي عندها

-

-كوشيا

-ها

-انا اتعرفت علي واحد محترم اوي وظريف وبحبه وبيحبني

-هايل .. ممتاز .. وعرفتيه منين ده .. بيشتغل معاكي هناك

-لا عرفته من النت

- النت .. يابنتي النت ده مش مضمون

-

رغم اني اعرف حسام من النت ..

لكن انا عارفة صاحبتي دي ..

لما تحب بتلغي عقلها .. وبخاف عليها بصراحة

-

- ايوة بس هو كويس وانا واثقة فيه

- وايه ظروفه ده

- هو اسمه حسام

- ( ابتسمت في داخلي .. لتشابه الاسماء .. لما احكي ليها هتبتسم هي كمان ) ..

- بيشتغل في السعودية

- ( الابتسامة اتسعت ..)

- مهندس في جدة ..

- غريبة دي .. كملي ( الفار ابتدي يلعب بقي )

- عنده 36 سنة .. معندوش اخوات .. ابوه ميت .. شقته في مصر الجديدة .......

-

( توالت منها معلومات اعرفها جيدا .. تخص شخص اعرفه جيدا )

ولم استطع التجاوب معها

لكنها من فرط الاثارة والسعادة استمرت ولم تنتبه لوجومي

- - ها وبعدين

- بصي بصي ... فاكرة المهندس اللي قلت لك اعرفي اسمه من فترة كدة اللي كنت ناسياه .. هو ده

-

طبعا واضح انها صاحبتي بتاعة الحلقة اللي فاتت ..

-

- لا مش فاكرة .. ( وفجاة لمعت الذاكرة .. لاتذكر الموقف ) ولمادري ماذا اقول

طيب واخر مرة كلمتيه امتي

- لسة من امبارح .. وهينزل مصر ان شاء الله شهر 9 يكلم بابا

- والله .. طيب ربنا يتمم بخير ان شاء الله

-

كان عندي النهاردة معاد معاه علي النت لما اروح البيت

مش عارفة اقوله ايه

هو طبعا ميعرفش انها صاحبتي

المفروض انا اللي كنت اعرفانا جبته منين

لكن متصورتش ان حد عنده القدرة دي

مش عارفة هدفه ايه ..

-

- وفجاة صاحبتي التفتت الي وقالت .. انتي بقي كنتي عاوزة تحكيلي ايه

- انا .. لا مفيش .. دانا كنت هحكيلك علي المصيف وعلي سفرية بورسعيد ..

-

وروحت البيت مترددة بين اني اسكت خالص .. وانسحب ..

وهو لو اتقدم ليها مش هقول له اني انا كوشيا اللي يعرفها علي النت ..

-

ولا اكلمه واهزأه واقول لصاحبتي ؟؟

-

شيطاني تغلب عليا

وقررت اني اكلمه ..


- هاي

- ازيك يا حبي ( حبك برص يا بعيد )

- الله يسلمك

- اخبارك ايه

- كويسة

- ايه الجديد عندك

- خرجت النهاردة مع صاحبتي .. اللي بتشتغل برة .. قلت لك عليها ؟

- لا

- دي صاحبتي وصديقتي وجارتي من 3 ابتدائي

- طيب كويس

- وهتتخطب شهر 9 .. لواحد اسمه حسام مهندس بيشتغل في السعودية وحكيت لي علي كل حاجة

- بعد سكوت طووووووووووووووويل ) هي صاحبتك اسمها ايه

- اسمها زينة

- بعد سكوووووووووووووووووووووت اطول) وانتي عايزة ايه دلوقتي؟

-

-

الحقيقة شوفت كتير وقليل لم اري بجاحة بهذا الشكل

-

- مش عايزة حاجة .. بس لازم تعرف ان اللي بتعمله في الناس بيتعمل فيك .. ودي اقل حاجة ممكن تحصل لك

- بس انا بحبك انتي ومعرفتي بيها لها ظروف .. وهي اللي متمسكة بيا ....

-

الحقيقة لم ارد عليه تاني لان الرد فاقد المعني ..

وعملت بلوك تاني .. وديليت هذه المرة

-

قررت اني اسكت شوية واشوف يمكن الموضوع بينها وبينه يخلص لوحده

ومكونش انا سبب جرح ليها ..

لكن الحقيقة هو لقي عصفورة ضاعت قال اما الحق التانية ..

او عليا وعلي اعدائي

-

اتصل بيها .. وقالها صاحبتك كوشيا .. عاوزة توقع بيني وبينك ..

وقالها كلام كتير محصلش ..

-

لكن لاننا صحاب قدام وفاهمين بعض كويس

هي فهمت قصده .. وسالتني وحكيت لها ..

-

ورغم ان علافتها بيه خلصت ..

لكن علاقتي بيها لم تعد ابدا كما كانت

-

وتعجبت علي تلك النماذج من البشر التي نقابلها علي هذه الشبكة

اردت ان اعرف لماذا ..

-

ولكن ان سالته ..

وايا كان رده لن استوعب ان تجرح وتكذب وتخدع انسان وثق فيك عامدا متعمدا

مع سبق الاصرار ...


انتهي

كوشيا

-

-

هناك 82 تعليقًا:

هانى زينهم يقول...

اللى يعيش ياما يشوف . واللى ييجى هنا يشوف اكتر . فى ايه ؟! ليه النت دايما مرتبط معاكى بالحاجات الغريبة دى ؟؟1 من الليس لمحمد لحسام ؟؟ هو فى ايه ؟؟ بس احيانا باحس ان النضوج هو توقع مفاجأت الحياة مهما كانت غريبة . وادينا اتعلمنا منك ان النت مش مكان للتعارف الحقيقى . ولا اقولك لا فى ناس محترمة بجد عشان كدة دايرة معارفى فى النت تتعد على الاصابع . بجد شكرا على الخبرات المجانية دى وان كانت مش مجانية من ناحيتك باتأكيد .

*الطالبة عفو الله *زوزو يقول...

يا سبحااااان الله دنيا صغيييرة اوي

بس خسارة صداقتك انتي و صحبتك تضيع بسبب الي اسم حسام دة

دنيااااا

النت دة عالم صعب اوي الواحد مش لازم يثق فيه ابدا

77Math. يقول...

ايه دااااااااااا

تخسري صاحبتك عشان واحد من النت ؟؟؟؟

صعبة قوي دي بجد !

يعني لو في الواقع ممكن، معقول، إنما شبح !

معلش دي مش صداقة :)


على كلّ ... المفروض بجد ما تلدغي مرتين من نفس الجحر :)

MǿиY El-Shreef يقول...

طب تصدقي يا كوشيا

والله العظيم حصلت فيا و ف اخت واحده صاحبتي

بس كان اسمه وسام

ويالهوي ع الي جرا

والله وصلت لانه كلم مامتي وكان مكلم باباها ف نفس الوقت

حجات عجيبة كده بتحصلنا ف الدنيا دي

والناس دي بيتهيألي كذبهم مرضي

ربنا يشفي

مـجـنـووون يقول...

بجد قصة تنفع تبقي فلم سنمائي

وعلي فكرة المثل الي بيقول ( الكدب ملهوش رجلين ) صحيح ميه في الميه لأن الي يكدب هيجي يوم وينكشف كدبه حتي لو كان صعب ان كدبه ينكشف

تقبلي مروري سيدتي
مجنووون

Shimaa Gamal يقول...

أحلى حاجة فى مذكرات نتاوى إنها بتثبت لكل الناس إن النت مجرد شارع كبير ، فيه و فيه . الأخ حسام ده أمثاله كثير و بيعملوا كده على النت و غير النت . و الدليل على إنه شخصية مريضة إنه ملمش الموضوع و إتكسف لأ كلم صاحبتك علشان يوقع بينكم .
بصراحة صاحبتك معندهاش حق تتغير معاكى و لو ليها حق فيكون فى حاجة واحدة إنك مش إنت اللى كشفتيه . إنك سكتى علشان خفتى على مشاعرها فى الوقت اللى كان من الأحسن إنك إنت اللى تقولى .
بس فى ناس كده زى الأخ حسام ده ، بيجرى فى عروقها ماء بارد .

صمت المشاعر يقول...

ياخبر ابيض

هو الكلام دا بجد والا حقيقي هههههههه

اقصد بجد والا هزار


انا اول مره ازور المدونه وان شاء الله تتكرر الزياره

احمد يقول...

ياااااه كوشيا انتى شوفتى كتير ومع كل دة محتفظه بروحك المرحه المتفائله
علشان كدة دايما باحذرك من الناس اللى بتعرفيهم من النت لانهم لابسين وشوش خلفها مرضى نفسينين او وحوش ادميه خالى بالك من نفسك دايما ولا تعطى الامان لاحد ابدا

غير معرف يقول...

الحمد لله إنه اتكشف في الووقت المناسب

الشخصيات اللى زي دي بيبقوا عاوزين مجرد التعرف ويوهموا نفسهم انهم عايشين في قصص حب

وفي الاخر اهو كله كلام وساعة الجد يظهروا على حقيقتهم

صعب طبعا تفرقي بين الحلو والوحش من خلال الكلام ع النت

بس يللا اهو محدش بيتعلم بالسهل

ربنا يحميكي ويبعد عنك الاشكال دي

وفي انتظار حلقات جديدة من مذكرات نتاوي اللى بجد جميلة أوي

تحيااتي

مذكرات مشاغب يقول...

هههههههههههههههههههههههههههه
واللهي حسام ده نحس
يعني من وسط التمانين مليون ميكلمش حد غيرك انتي وصاحبتك
وكمان الصاحبه الوحيده اللي بتقدري تكلميها في اسرارك
واللهي ده لو في فيلم عربي كنت هقلب وهقول ديه مبالغه غير مقبوله
لكن شكلي بعد كده هتفرج على اي فيلم مهما كانت لمبالغه اللي فيه
بعد الموقف بتاعك ده
بس بصراحه المفروض كنتي تقولي لصاحبتك اول ما اكتشفتي الموضوع
عشان تعرفيها وتخليها تحترس من التعامل معاه
وعشان في نفس الوقت متزعلش منك انك خبيتي عليها

تحياتي

hasona يقول...

السلام عليكم

الحياة فيها الكثير والكثير

هل نتعلم من تجاربنا
أو نتعظ من تجارب الاخرين
أم لكل حالة معطياتها وظروفها

رؤية يقول...

تحففففة
بجد تحفة

وماليش تعليق تانى
وعلى الرغم من انها تفور الدم
لكنها تثير الضحك


تحياتى

عمرو يقول...

ياللهول من قدرة البشر على التلون و الخداع و المراوغه !!
أنتى تصرفتى صح ميه فى الميه بدون شك و عملتى الصح و ما أملاه عليكى ضميرك تجاه صديقتك ..
غريبه أوى أمر النفوس البشريه الغير سويه !! هى فعلا جديره بالدراسه و التأمل ..
شكرا على البوست و تقبلى تقديرى ..

شاب كــ طخين ـــــا يقول...

انا كرهت كميه الكدب الموجوده على النت
برغم وجود ناس مبتكدبش
ومش عارف الناس الاكل شغلها انها تكدب وفى الاخير بيتفضحو دول ربنا يشفيهم بجد

الطائر الحزين يقول...

توقعت النهاية من الجزء الاول

بس فعلا غلط فى تفكيركم انتم الاثنين

No Fear يقول...

السلام عليكم
ده فيلم سينمائي
أنت بتتكلمي بجد و لا ده تأليفك

mohamed ghalia يقول...

الكذب والخداع هواية عند ناس كتير
ربنا يهديهم

فشكووول يقول...

العزيزه كوشيا
تحياتى
يا كوشيا يا بنتى النت عامل زى واحد لابس نطاره سوده وملامحه مش واضحه من خلف النضاره وعشان كدا معظم العلاقات الغير سويه اللى بتبتدى بالنت مصيرها الى ..........
طبعا حسام شاب وعايز يتكلم مع بناتات حلوات وسكاكير زيك
وما عندوش مانع يسبل لك وكمان لغيرك
هو شغلته كدا آخر النهار وخصوصا انه فى الغربه وليس له تسليه الا النت
بلاش التعارف عن طريق النت
طبعا فيه قصص مختلفه
لكن دا بيكون بعد التعارف الجدى بيكون هناك مقابلات ليس لها غرض الا انجاز بعض الاعمال المتفق عليها بين المدونين ولو تطورت بعد المقابلات دى دا بيبقى تطور طبيعى يمكن ان يسير فى طريق طبيعى
والنت ليس مكان للتعارف ولكنه مكان لتبادل الخبرات والمعارف
تحياتى ليك يا كوشيا

maha zein يقول...

امممممممممممممممممم
ده عادي علي فكرة
تعارفات لانت حتي لو مع شخص انتي عرفاه اصلا بتكون ديما مريضة وسيئة
صدقيني ان النت بيضيف حاجة غريبة وسيئة علي اي تعارف
يمكن لو كنتي عرفايه في الواقع مكنش قدر يخدعك
هو واحد في غربة وفاضي وعاوز يتسلي
وبيعتقد ان انتي السبب لانك اتكلمتي معاه
فيبقه عنده قناعة بأن اللى يعمله فيكي حلال طالما ارتضيتي ولكمتي ولد علي النت
حتي لو انتي كويسة وبنت حلال
في ناس مريضة وافكارها مريضة

وقال عوزة ايه دلوقت قال

مجداوية يقول...

السلام عليكم

:)
:)
:)

أحسن القصص المحبوكة فنيا بتكون واقعية

ماهو خيال الانسان عمره ما حيكون مثل الواقع

النت ده عالم مفتوح مش محدود زي ما احنا بتقول عليه وبيوريكي في يوم اللي ممكن لو قعدتي عمرك كله متقابلوش

واللي يعيش ويشيت ياما يشوف

:)

بالشفا

ومازلتُ أتعلم يقول...

شوفى ياكوشيا
رغم انى مش بحب الكلام مع حد معرفوش
وعايزة اقولك انه غلط اصلا كده
حتى لو صاحبتك قالتلك من الحلقة اللى فاتت كلميه
بس برده ماكنش المفروض تكلميه

بس مش ده الموضوع المهم
الموضوع المهم
انه غلط جدا انك تخسرى صاحبتك علشان حد
كان المفروض تقوليلها وتبلغيها قبل ماتكلميه
وماكنش هيحصل سوء التفاهم ده
تقبلى مرورى

وانا نفسى تعتبرنى اختك خايفة على كل البنات
فى امان الله

kochia يقول...

________________________________
هانى زينهم
________________________________
والله مش عارفة ليه حظي غريب في النت
بس فعلا انا شايفة كدة..
النضوج فعلا هو توقع مفاجأت الحياة مهما كانت غريبة .. وانا الان اتوقع جيدا ولكن بعد كثير من الضربات
وفعلا النت فيه ناس محترمة وان قلوا وانا هنا اسرد فقط الغرائب .. اما الامور العادية فلم اتحدث عنها رغم وجودها
وبالتاكيد هي خبرات غير مجانية ابدا
________________________________
تحياتي
________________________________

kochia يقول...

________________________________
الطالبة عفو الله
________________________________
فعلا .. صغيرة اوي
والثقة عملة نادرة في كل مكان هذا الزمان
________________________________
تحياتي
________________________________

kochia يقول...

________________________________
77Math.
________________________________
هو اي جحر اللي اتلدغت منه قبل كدة ؟
________________________________
تحياتي
________________________________

kochia يقول...

________________________________
MǿиY El-Shreef
________________________________
هم فعلا مرضي
________________________________
تحياتي
________________________________

kochia يقول...

________________________________
مـجـنـووون
________________________________
الكدب مالوش رجلين فعلا .. بس للاسف له ادوات بيؤلم ويجرح بيها
________________________________
تحياتي
________________________________

kochia يقول...

________________________________
Shimaa Gamal
________________________________
اني اقول ان ده مجرد مجتمع الشئ الاساسي اللي بحكي فيه ..
انا فعلا خفت اقول واتمنيت انا متعرفش ابدا .. بس يمكن كان لازم اقول
وعلي فكرة لو كنت قلت .. كانت هتبقي معاها نفس النتيجة
اما الدم البارد فمتوفر كتير
________________________________
تحياتي
________________________________

kochia يقول...

________________________________
صمت المشاعر
________________________________
بجد
واتمني تكرار الزيارة
________________________________
تحياتي
________________________________

kochia يقول...

________________________________
احمد
________________________________
اه شفت كتير والله .. وروحي المرحة دي خلقة ربنا الحمد لله .. وعارفة ان النت هو وش بيداري وراه كل حاجة .. وانا قبلت اتعامل معاه وانا عارفه هذه الحقيقة
ومش هدي الامان .. حاضر
________________________________
تحياتي
________________________________

kochia يقول...

________________________________
سمو الامير
________________________________
والله مش عارفة هو كان اوي علي ايه ..
وطبعا النت مش بيوضح الشخصيات ابدا كما يجب
واشكرك واتمني استمتاعك الدائم
________________________________
تحياتي
________________________________

kochia يقول...

________________________________
مذكرات مشاغب
________________________________
هو اللي نحس ولا انا وصاحبتي اللي نحس .. ولا تجمعت النحسات ؟؟
والحقيقة خفت اقولها .. مقدرتش
بس ايوة كان لازم
________________________________
تحياتي
________________________________

kochia يقول...

________________________________
hasona
________________________________
لابد ان نتعلم من تجاربنا اولا .. ونتعظ ايضا من تجارب الاخرين بالطبع
مهما كانت الظروف والمعطيات ..
________________________________
تحياتي
________________________________

kochia يقول...

________________________________
رؤية
________________________________
شكرا .. ومنورة
________________________________
تحياتي
________________________________

kochia يقول...

________________________________
عمرو
________________________________
اشكرك سيدي علي دعمك لتصرفي .. انت الوحيد من ايدني فيه
________________________________
تحياتي
________________________________

kochia يقول...

________________________________
أمبارح كان عمرى عشرين
________________________________
الكدب متعة لدي الكثيرين
________________________________
تحياتي
________________________________

kochia يقول...

________________________________
الطائر الحزين
________________________________
مش فاهمة ايه اللي غلط في التفكير بالظبط
ممكن توضحلي
________________________________
تحياتي
________________________________

kochia يقول...

________________________________
No Fear
________________________________
لا يا سيدي مش من تاليفي
كل ده حصل بالفعل والله
________________________________
تحياتي
________________________________

يا مراكبي يقول...

بجد صدفة من أغرب ما يمكن .. حاجة أقرب للخيال

لكن الحمد لله إن ربنا بيحبك إنتي وصاحبتك عشان يوفقكم لكشف الشخص ده عن طريق الصدفة النادرة جدا دي

حسن حنفى يقول...

اللي بيعمل كده بيجي يوم عليه وبيتعمل كده فيه وربنا بينتقم منه

للاسف كتير منهم مش بيكون ليهم اي هدف من ده غير خداع الناس وفقط

romansy يقول...

النت دا حكايه بس على فكره الحب بيحصل فعلا
ممكن يكون اعجاب فى الشخصيه فى الاسلوب
بس الاخ حسام دا كلامه كويس
بس افعاله غريبه شويه
بس اقولك كل مره حكايه مختلفه عن التانيه انتى بتجيبى الناس دول منين

صبرني يارب يقول...

الكذب على النت كذب طبعااااااااااا

هنتحاسب عليه

كان المفروض قولتي لصحابتك الاول طبعا لان رد فعله ده كان طبيعى جدا

وعلى فكره

هو ممكن يكون كان صادق معاكم انتم الاثنين

اها ماهو اساسا ما يعرفكوش

قالك اجهزلي كام عروسه لما انزل مصر انقي منهم


المهم لو لسه بتكلمي حد ما تعرفيهوش على النت خلي بالك من نفسك

على فكره

نفسي اعمل زيك كده واكتب عن الناس الغريبه الى قابلتهم على النت بس لسه ما خدتش قرار

تحياتي ليكى يا قمر

ووحشااااااااني يا وحشه

الطائر الحزين يقول...

قصدت ان يكون هذا الموقف قد سبب مشكلة بينك وبين صاحبتك

maioya يقول...

حتي انت ياحسام :lol:
ومااكتر حسامات

إبن مصر يقول...

السلام عليكم

مش عارف اقولك ايه بس يمكن انا دخللت اكتر من اربع مرات واخرج ومشس عارف اقولك ايه بس كل اللى اقدر اقوله النت لا يعتبر موضع ثقه الا فى حالات قليله جدا وهذا لا يعتبر 90% ممما فيه

الثقه فى النت مش مطلوبه وانتى والحمد لله كنتى لسه علىا لبر ويمكن مش اتعلقتى بيه

انا بس اللى مزعلنى شويه ان انتى وصاحبتك تسيبوا بعض بسبب بنى أدم زى ده
عموما حاولى انتى تقربى ليها ومش تبعدى عنها لأن من الواضح انها فعلا كانت متعلقه بيه

تحياتى لكى وخلى بالك على نفسك بقا من النت واللى فيه

ناجح

Miss. Sosa يقول...

بصراحة قصة مؤلمة اوي
مؤلمة لك ولصاحبتك واثرها السيء علي صداقتكمحاجة مؤسفة .

بس عموما هي دي النت , المكان اللي الناس بتخلع فيه اقنعتهم الحياتية ويبرزوا الوجه القبيح لرغباتهم واهواءهم , وقلما هتلاقي انسان الوجه الحقيقي له انساني .

نـــــور يقول...

ياسبحانك ياربى

الدنيا صغيره اوى حتى عالنت !!

حسيت بحاجات كتير انهيارات وتعجبات وخضات وانا بقرا الكلام لكن لا تعليق على حسام

والتعليق الوحيد
كان متوقع ان الصداقه تقل او ربما تنعدم

نايس بوست ياقمر

blue-wave يقول...

والله انتى بتلخصى اغلب علاقات النت الفاشله
تسلمى بجد

ahmed_k يقول...

هههههههههههه أبن الأيييه
ده طلع مزدوج الشخصيه
بس عارفه هو غلط أنه حافظ بيانات معينه عنه ومبيغيرهاش
علشان كده إتقفش
بس أحمدي ربنا فعلا إكتشاف الناس اللي زي كده بدري بتكون أفضل
وأساسا حب عبر النت بدون رؤيه مباشره
أمر شبه مستحيل
ممكن يكون إنجذاب او إرتياح
لكن حب صعب جدا

تقبلي خالص تحياتي

ماء تشرين يقول...

مش عارفه اقول ايه بس بجد لاتعليق غير انو في كتير من المرضي النفسين

الربان يقول...

تحياتي

سبحان الله...الدنيا اصبحت قرية صغيرة..
و الحمد لله ان كشف لك و لصديقتك الموضوع


المهم حضرتك كان ينبغي عليكي ان تخبري صاحبتك بالحكاية عندكا تيقنتي من ان حسام الذي يحدثك هو حسام نفسه الذي ينسج القصص لصديقتك...و كان ممكن جدا تكشفيه امامها ...

الكمين هذه المرة لم يكن بنفس دقة المرة السابقة.... :)

تحياتي و تقديري

غير معرف يقول...

انا شايف انك غلطانه انك صراحتيه وخسرتى جزء من صحبتك كنتى قفلتى عليهة وخلاص لكن هو ده كبرياء الانثي وغروررها........



onyx

عين فى الجنة يقول...

يقال ان عالم الشبكة العنكبوتيه ما هو الا فضاء افتراضى كبير ، واظن كل الغربان التى تعشش هناك كذلك

الازهرى يقول...

الايام دول
وزى ما انت خدعتيه قبل كده خدعك
صحيح كانت خدعته تقيلة وبايخه جدا لانه اتعرض لامور حساسة وشخصية
لكن فى النهاية الخداع خداع


قلتيلى بقى
عايزة تتعلمى هاكر ؟
**********************
ورغم ان علافتها بيه خلصت ..

علاقتها

صيدلانيه طالعه نازله يقول...

معظم اللى بيحب يتعرف و يرتبط عن طريق النت بيبقوا سيكو يعنى مضطربين
ازاى احب و اطلب واحده للجواز من غير ما اشوفها شخصيا افرض ما عجبتنيش افرضى بعد ما شوفتيه معجبكيش
القصص دى يا بنتى عمرها ما بتنفع خالص
و المفروض صاحبتك يبقى مخها كبير و تشكرك لانك انقذتيها من الخدعه اللى عايشاها و ربنا يرجع صداقتكم زى الاول تانى

kochia يقول...

________________________________
mohamed ghalia
________________________________
اه فعلا .. للاسف هواية
________________________________
تحياتي
________________________________

kochia يقول...

________________________________
fashkool
________________________________
ايوة طبعا انا الان اعلم ذلك جيدا
وانا قد اوضحت سابقا انها تجارب العام الاول مع النت تقريبا وامتد بعضها عام اخر او عامين .. واكيد انا االن اكثر نضوجا وفهما
او هكذا ارجو
________________________________
تحياتي
________________________________

kochia يقول...

________________________________
maha zein
________________________________
هي مش شرط تكون مريضة .. لكن الاكيد انها بتكون ناقصة كتير
وشوفتي البجاحة
ايوة ده اكيد مريض
________________________________
تحياتي
________________________________

kochia يقول...

________________________________
مجداوية
________________________________
طبعا الواقع اوقع كثيرا
ايوة هو عالم اوسع مما اتخيل .. ادخله وانا قاعدة في مكاني
الدنيا بين اديك
بالمميزات والعيوب
والحمد لله جت سليمة
________________________________
تحياتي
________________________________

kochia يقول...

________________________________
ومازلتُ أتعلم
________________________________
اكيد مكنش مفروض .. لكن لو كل واحد عمل المفروض بس عمر الدنيا ما هيبقي فيها غلط
واكيد انا عارفة دلوقتي انه كان مفروض اقولها .. لكن
كنت هوصل لنفس النتيجة
صدقيني .. انا ادري بذلك
________________________________
تحياتي
________________________________

kochia يقول...

________________________________
يا مراكبي
________________________________
هي فعلا صدفة فظيعة .. مش عارفة لو مكنتش قلت او مكنتش قالت كنا هنوصل لفين
جت سليمة
________________________________
تحياتي
________________________________

kochia يقول...

________________________________
حسن حنفى
________________________________
مش عارفة الهدف كان ايه غير التلاعب
بس مش غباء انه يوحد المعلومات ؟؟
________________________________
تحياتي
________________________________

kochia يقول...

________________________________
romansy
________________________________
مش عارفة والله بجيبهم منين وازاي
انا عارفة كويس انه ممكن الحب يحصل
بس نادر جدا
________________________________
تحياتي
________________________________

kochia يقول...

________________________________
صبرني يارب
________________________________
اكيد الكذب علي النت كذب برده
انا كنت بهزر لما سالت
وممكن يكون كان صادق فعلا وعاوز ينقي وده اللي انا برجحه
ومستنية كتابتك عن الغرائب اللي قابلتيها في النت
________________________________
تحياتي
________________________________

kochia يقول...

________________________________
الطائر الحزين
________________________________
اه هو فعلا سبب مشكلة للاسف
________________________________
تحياتي
________________________________

kochia يقول...

________________________________
maioya
________________________________
نعم .. ما اكثرهم
للاسف
________________________________
تحياتي
________________________________

kochia يقول...

________________________________
إبن مصر
________________________________
الان ادرك ذلك تماما .. لكن في بداية معرفتي به كنت اتعامل بنيتي
وانا وصاحبتي مسبناش بعض لكن اقول ان علاقتنا لم تعد كما كانت لكننا مازلنا علي صلة طبعا
________________________________
تحياتي
________________________________

kochia يقول...

________________________________
Miss. Sosa
________________________________
اتفق معكي تماما
هو وجه قبيح ويجد الكل لذه في اظهاره فقط عبر النت
عبر القناع
________________________________
تحياتي
________________________________

kochia يقول...

________________________________
نـــــــــــــور
________________________________
تحياتي علي توقعك الصحيح
ولا تعليق علي حسام فعلا
________________________________
تحياتي
________________________________

kochia يقول...

________________________________
blue-wave
________________________________
الفاشلة والغريبة كمان
مش كدة ؟
________________________________
تحياتي
________________________________

kochia يقول...

________________________________
ahmed_k
________________________________
هو مش حب طبعا
هو مكنش يتخيل الصدفة دي
اعتقد هو تفاجأ امتر مني ومنها
________________________________
تحياتي
________________________________

kochia يقول...

________________________________
ماء تشرين
________________________________
في فعلا كتير من المرضي النفسين
للاسف
________________________________
تحياتي
________________________________

بعبعه يقول...

فى ناس بيكدبوا على النت

مش لسبب اخر غير لانهم على النت

وخلي بالك انتى كمان كذبتي عليه مره

خالصين

kochia يقول...

________________________________
الربان
________________________________
المرة دي تقريبا مفيش كمين خالص
كان ممكن فعلا يبقي كمين ممتاز .. بس تدخل المشاعر والذاتية دايما بيبوظ الشغل
________________________________
تحياتي
________________________________

kochia يقول...

________________________________
غير معرف onyx
________________________________
انا متفقة معاك تماما
________________________________
تحياتي
________________________________

kochia يقول...

________________________________
راجى
________________________________
اذن فهو تعشش فيه الغربان ؟؟
ربما هذا صحيح
________________________________
تحياتي
________________________________

kochia يقول...

________________________________
الازهرى
________________________________
اه خدعته اتقل
لكن تقبلي للتعامل من خلال الشبكة .. هو قبول ضمني للخسائر التي يمكن ان تحدث من خلالها .. مش كدة ؟؟
هاكر لا
مش عايزة
________________________________
تحياتي
________________________________

kochia يقول...

________________________________
صيدلانيه طالعه نازله
________________________________
نسبة السيكو اللي في النت هي نفسها نسبة السيكو اللي في الواقع
اللي في النت دول عينة ممثلة للواقع تماما
بس بيعبروا عن رغباتهم السوداء بصراحة اكير
اما انا وصاحبتي .. فقد نعود وقد لا نعود تماما كما كنا
________________________________
تحياتي
________________________________

kochia يقول...

________________________________
بعبعه
________________________________
ايوة كدبت عليه فعلا
وخالصين عشان خاطرك
________________________________
تحياتي
________________________________

Unknown يقول...

وماذا تنتظري من هذا الذي يجلس خلف شاشة كالذئب ينتظر فريسته ليوقع بها يتخفى وراء قناع من الحب والطيبة وهو لا يعرف عنهما سوى حروفهما

إلا النت .. صداقة وبس
غير كده ......... لا لا لا لا

ويقى التواصل

سابرينا يقول...

لما قريت الجزء الأول
حسيت انه حيحصل حاجة كده برضة
لكن هتضحكوا عليها انتو الاتنين!
غريبة انك فقدتيها علشان واحد زي ده!

kochia يقول...

________________________________
معتز شاهين - باحث تربوي
________________________________
اعتقد رايك به كثير من الصحة
________________________________
تحياتي
________________________________

kochia يقول...

________________________________
sabrina
________________________________
اكيد الفقد مش بسببه .. لكن النفس مليانة بالمتقلبات
________________________________
تحياتي
________________________________