الاثنين، يونيو 09، 2008

احـقـاقـا لـلـحـــــــــق



عشان ابقي عادلة وموضوعية ومش متحيزة .. بعد الموضوع السابق
(جميلة رشيقة بيضاء) كان لازم اقول برده دماغ الطرف التاني كان فيها ايه...

طبعا انا الطرف التالت

البنات والستات اللي كلمتهم تحمسوا جدا .. ووافقوا علي الفكرة .. لدرجة ان ناس معرفهمش كلموني واعطوني بياناتهم وظروفهم وطلباتهم وصورهم كمان
بس بشرط ان الكلام كله يبقي عن طريقي والاتفاق عن طريقي لحد المرحلة اللي العريس المفروض يروح فيها البيت يشوفها ..



حتي كلام علي النت لا..
والتليفون لا .. الا بعد اثبات الجدية..
والرؤية علي انفراد طبعا لا .. وانا كمان مكنتش مؤيدة الفكرة دي خالص..
تقريبا كانوا عاوزين يحصدوا النتائج لكن لو فيه مخاطر تقف عندي واشيلها انا


( وده حصل كتير .. بس مش وقته بقي )

المهم انا طبعا تقريبا كنت ساذجة وفكرت انه عادي وهيحصل
الناس هتقول لا ليه مادام المراد من رب العباد هيحصل وهيلاقي العروسة المناسبة
وسوقت للموضوع وبقيت مشهورة اوي في الشغل وفي المنطقة وبين صحابي اني خاطبة !!!


ومكدبش عليكم انا كنت متاكدة اني هنجح

معظم البنات عاوزة تعيش .. تستقل .. مع زوج .. وربنا يرزقها بابناء ترضي بيهم شوقها لغريزة الامومة الفطرية اللي فيها.. وكانوا بيوافقوا علي معظم العروض اللي قلت لهم عليها ..


وكل اللي عاوزاه من الزوج ده انه يكون محب عطوف قادر علي فتح بيت ماديا ويعاملها بالحسني ويتقي فيها ربنا
لكن الرفض كان بيجي من ناحية العريس ...

لكن طبعا مش كلهم ملايكة .. وزي ما فيه رجال كان كل هدفهم انهم يستقروا ويعفوا انفسهم بالحلال .. كان فيه ستات علي العكس .. برده مش عارفة هي عايزة ايه
مانتي مش ممكن تاخدي كل حاجة مع بعض

مستحيـــــــــــــــــل

مكنش يبقي اسمها دنيا

الستات بقي كانت النماذج الغريبة منهم كتير
اشمعني الرجالة تتشرط .. هم يعني مالهمش نفس

واتشرطوا .............!!!!!!!!!!


· لازم يكون مؤهل عالي طبعا .. حتي لو كانت هي بالاعدادية
· والاكيد انه لازم يكون غني ومعاه فلوس
· وياريت يكون دكتور او مهندس او رجل اعمال
· واكيد وسيم وطويل

بس الحقيقة محدش اشترط الحالة الاجتماعية بس لو كان مطلق او ارمل ياريت يكون بدون اولاد

ودي الحالات العامة
غير الحالات الغريبة والشاذة اللي مش مجال الحديث عنها دلوقتي

وطبعا بعد الفشل سببت احباطات كتير وشكلي الاجتماعي بقي بايخ اوي


بس اللي انا متاكدة منه بعد محاولات كتير
ان فعلا فيه رجال كتير كويسين وفيه بنات اكتر كويسين


بس المشكلة المجتمع والتباعد اللي حصل فيه
وطغيان المادة علي التفكير

بس بفكر احاول تاني ..
مش قادرة اشيل من راسي فكرة اني ممكن اوفق راسين في الحلال

ملحوظة :: لو حد عنده اي تجربة مشابهة ياريت يحكيهالي ويبعتهالي علي الايميل .. مع الحفاظ علي السرية المطلقة .. لاني بعمل دراسة عن الموضوع ده .. وهنشر نتيجتها قريبا ان شاء الله

هناك 5 تعليقات:

Ahmed Kamal يقول...

إنتي عارفة ، أنا كنت منتظر العنوان الجديد يكون "وسيم ، ملتزم ، دخل مادي جيد ، قمحي اللون" :)

kochia يقول...

احمد كمال:
هو فعلا المفروض العنوان يبقي كدة .. بس لو كانت قاعدة عامة
لكن هي مش قاعدة خالص بل بالعكس .. الحالات دي نااادرة
والحالات العامة ناس متواضعة جدا عاوزة تعيش وهتقبل العيوب وتحاول تحب المميزات
وانا كتبت الموضوع ده عشان لا اكون متحيزة ضد الرجل لان فيه فعلا رجال فاضلين جدا وفعلا عاوزين يعيشوا ويحبوا حياتهم
بس
تحياتي

KHALED يقول...

موضوع شائك أنصحك بالابتعاد عنة
تمشيا مع المثل القائل .. أمشى فى جنازة ولا تمشى فى جوازة .

طبعا الكلام دة مع الكم الهائل من الطالبين للارتباط . لكن لو كانت مرة أو مرتين يبقى ماشى

.. عموما ..
أتمنالك التوفيق

Ahmed Sanad يقول...

أولا الموضوع بتاعك متكامل جدا جدا جدا
وانا طبعا متابع لمواضيعك من زمان خالص وفعلا معجب بجهدك الكبير لمساعدة أصدقائك بس لما هيتحقق حلمك هتكون ليها فرحه كبيره أكبر من كل جهد اتبذل ويارب الناس كلها تكون صادقة فى نواياها لأن موضوع الارتباط ده من أسمى وانبل المواضيع اللى الانسان بيمر عليها فحياته.
ربنــــــــــــا يـــــــــوفقـــــك

kochia يقول...

Khaled Farag
اشكر مرورك .. لكن اما ضد المثل القائل امشي في جنازة ولا تمشي في جوازة .. لان دي حاجة مش طبيعية لكن الواحد يتقي الله ويتجنب المشاكل .. واشكر نصيحتك

===============================
Ahmed Sanad
احمد .. كلامك مشجع جدا .. وطبعا متشكرة جدا علي مرورك وتعليقك ويارب زيارتك متتقطعش
وفعلا كان نفسي انجح في الموضوع ده بس اكيد الفشل مش في الهدف .. لكن الفشل في الطريقة
التكتيك يعني
انا هغير التكتيتك واتكل علي الله

تحياتي